1 अळतेण भगवान मुसा ने केदो, "तु हारुन, नादाब, अबीहु, अने ईस्‌रायल ना सत्‌तर डायला माणहु भेळ यहोवान्‌तां उपर आवीन सेटो रीन वांदजे। 2 मुसो एतरोत यहोवा नी ह़ाते आवे; पण तीहया बीजा ह़ाते नी आवे। अने बीजा माणहु तीनी ह़ाते उपर नी आव्‌वा जोवे।"

3 मुसो माणहुन्‌तां जाय्‌न यहोवा नी आखी वात अने आखा नेम ह़मळाय देदो। ता आखा माणहु एक रंगा आड़ीन केवा बाज ज्‌या, "जेतरी वात यहोवा केदलो से तीहयी आखी वात ने आमु मानहु।" 4 ता मुसो यहोवा ना आखा बोलु लीख देदो; अने ह़वारे वेगोत उठीन बड़ान हेटो एक वेदी अने ईस्‌रायली माणहु ना बारे घोराणा नी अनसारे बारे खम्‌बा बी बणायो।✝ 5 ता मुसो ईस्‌रायली जुवान माणहु ने मोकल्‌यो, जे यहोवा जुगु होम बादा अने जानवरु नी मेल-मीलाप नी बादा चड़ाया। 6 अने मुसो आदु लोय लीन कटवरा मे राख लेदो, अने आदु वेदी पोर छाट देदो। 7 ता वायदा नी कीताप लीन माणहु ने भणीन ह़मळायो; तीने ह़मळीन माणहु केदा, "जे कंय यहोवा केदलो से तीहयु आखु आमु करहु, अने तीना हुकम मानहु।" 8 ता मुसो लोय लीन माणहु पोर छाट देदो, अने तीमने केदो, "देखो, आहयु तीहया वायदा नु लोय से, जीने यहोवा आहया आखा वायदा तमारी ह़ाते करलो से।"✝

9 ता मुसो, हारुन, नादाब, अबीहु अने ईस्‌रायल ना सत्‌तर डायला माणहु बड़ा पोर ज्‌या, 10 अने ईस्‌रायल ना भगवान नो दरसन कर्‌या; अने तीना पोगु तळे नीलमणी नाम ना लील्‌ला दगड़ा ना पाट्‌लान तेवु कंय हतु, जे वादळान तेवु उजळु हतु। 11 अने तीहयो ईस्‌रायल ना डाहला पोर हात नी अगो कर्‌यो; ता तीहया भगवान नो दरसन कर्‌या, अने खादा-पीदा।

12 ता यहोवा मुसा ने केदो, "बड़ा पोर मारीन्‌तां चड़ आव, अने तां मारी वाट जोव; अने मे तने दगड़ा ना पट्‌या, अने मारा लीखला नेम अने हुकम आपही के तु तीमने ह़ीकाड़े।" 13 ता मुसो यहोसु नाम ना आह़फा ना चाकर्‌या भेळ भगवान ना बड़ा पोर चड़ ज्‌यो। 14 अने डायला ने आहयु की ज्‌या, "जत्‌यार तक आमु तमारीन्‌तां पासा नी आवती रीया तांह तक तमु आञेत अमारी वाट जोवता रेवो; अने ह़मळो, हारुन अने हुर तमारी ह़ाते से; कदीम कोयनो मुकदमो हय ता तीमनीन्‌तांत जजो।"

15 ता मुसो बड़ा पोर चड़ ज्‌यो, अने वादळु बड़ा ने ढाक लेदु। 16 अने यहोवा नु वीजाळु सीने बड़ा पोर आयु, अने तीहयु वादळु ते बड़ा पोर छो दाड़ा तक छवायलु र्‌यु; अने ह़ातवा दाड़े भगवान मुसा ने वादळा नी वचमे गेथो आड़्‌यो। 17 ईस्‌रायली माणहु नी नींगा मे यहोवा नु वीजाळु बड़ा नी चोट्‌ली पोर घण-जबर आक्‌ठुन तेम देखाव पड़तु हतु। 18 ता मुसो वादळा नी वचमे भराय्‌न बड़ा पोर चड़ ज्‌यो। अने तीहयो बड़ा पोर चाळीह दाड़ा अने चाळीह रात र्‌यो।✝