1 अळतेण यहोवा मुसा ने केदो, 2 "पेल्‌ला मयना ना पेल्‌ला दाड़े तु भगवान नी हजुरी नु तम्‌बु ना रेवा ना जागा ने उबो करजे। 3 अने तीनी मे गवा नी चीट्‌ठी नो बाक्‌सो मेकीन वचे वाळा पड़दा नी आडळ कर देजे। 4 अने खाणु खावा नी टेबल ने मोय ली जाय्‌न जे कंय तीनी पोर ह़जाड़वा नु से तीने ह़जाड़ देजे; ता दीवो मेकवा ना खुटा ने मोय ली जाय्‌न तीना दीवाम ने धपाड़ देजे। 5 अने गवा नी चीट्‌ठी ना बाक्‌सान अगळ ह़ोना नी वेदी ने, जे धुप जुगु से तीने मेकजे, अने रेवा ना जागा ना पड़दा ने लगाड़ देजे। 6 अने भगवान नी हजुरी ना रेवा ना तम्‌बु ना झापला अगळ होम बादा नी वेदी ने मेकजे। 7 अने भगवान नी हजुरी ना तम्‌बु अने वेदी नी वचमे मोट्‌ला तपला ने मेकीन तीनी मे पाणी भरजे। 8 अने आंगणु नी च्‌यारो-मेर पड़दा नी वाड़ उबी करजे, अने तीहयु आंगणु ना झापले पड़दा ने टांग देजे। 9 अने अभीसेक नु तेल लीन रेवा ना जागा नो अने जे कंय तीनी मे से आखु नो अभीसेक करजे, अने आखु ह़मान भेळ तीने चोखो करजे; ता तीहयो चोखलो ठेरहे। 10 आखु ह़मान भेळ होम बादा नी वेदी नो अभीसेक करीन तीने ह़ोपजे करजे; ता तीहयी आखा गेथी चोखली ठेरहे। 11 पाया भेळ मोट्‌ला तपला ने बी चोखु करीन तीने ह़ोपजे। 12 ता हारुन अने तीना सोरा ने भगवान नी हजुरी ना तम्‌बु ना झापले ली जाय्‌न पाणी वेर उंगवाळजे, 13 अने हारुन ने चोखला लुगड़ा पेरावजे, अने तीनो अभीसेक करीन तीने ह़ोपजे के तीहयो मारी जुगु पुंजारा नु काम करे। 14 अने तीना सोराम ने ह़ाते लावीन कुड़ता पेरावजे, 15 अने जेम तु तीमना बाह नो अभीसेक करही तेमेत तीमनो बी अभीसेक करजे के तीहया मारी जुगु पुंजारा नु काम करे; अने तीमनो अभीसेक तीमनी पीड़ी सी पीड़ी जुगु तीमना सदा ना पुंजारा ना जागा पोर पुंजारो बणाय्‌न राखहे।"

16 आहयी रीते मुसो, जे-जे हुकम यहोवा तीने आपलो तीनीत अनसारे कर्‌यो। 17 अने बीजा साल ना पेल्‌ला मयना ना पेल्‌ला दाड़े रेवा ना जागा ना तम्‌बु ने उबो कर्‌या। 18 मुसो रेवा ना जागा ना तम्‌बु ने उबो कर्‌यो, अने तीमना पाया मेकीन तीना चोवखट लगाड़ीन तीनी मे डांडा घाल्‌यो, अने तीमना खम्‌बा ने उबा कर्‌यो; 19 अने तीहयो रेवा ना जागा नी उप्‌पर तम्‌बु ने फेलायो, अने तम्‌बु नी उप्‌पर तीहयो ढाकवा नु ने लगाड़्‌यो; जे रीते यहोवा मुसा ने हुकम आपलो हतो। 20 अने तीहयो गवा ना पट्‌या ने लीन बाक्‌सा मे मेक्‌यो, अने बाक्‌सा मे डींगा अटकाड़ीन तीनी उप्‌पर पछतावा नु ढाकणु ने मेक देदो; 21 अने तीहयो बाक्‌सा ने रेवा ना जागा मे पुगाड़्‌यो, अने वचे वाळा पड़दा ने टांगीन गवा ना पट्‌या ने तीहयो आडळ कर देदो; जे रीते यहोवा मुसा ने हुकम आपलो हतो। 22 अने तीहयो भगवान नी हजुरी ना तम्‌बु मे रेवा ना जागा नी धुराव भणी वचे ना पड़दा गेथी बाहर खाणु खावा नी टेबल मेक्‌यो, 23 अने तीनी पोर तीहयो यहोवा अगळ रोट्‌ला ह़जाड़ीन मेक्‌यो; जे रीते यहोवा मुसा ने हुकम आपलो हतो।✝ 24 अने तीहयो मळवा ना तम्‌बु मे टेबल अगळ रेवा ना जागा नी दखणाव नी ह़ोड़ दीवो मेकवा ना खुटा ने मेक्‌यो, 25 अने तीहयो दीवा ने यहोवा अगळ धपाड़ देदो; जे रीते यहोवा मुसा ने हुकम आपलो हतो। 26 अने तीहयो भगवान नी हजुरी ना तम्‌बु मे वचे वाळा पड़दा नी अगळ ह़ोना नी वेदी ने मेक्‌यो, 27 अने तीहयो तीनी पोर वारु गंदायण्‌यान धुप धपाड़्‌यो: जे रीते यहोवा मुसा ने हुकम आपलो हतो। 28 तीहयो रेवा ना जागा ना झापले पड़दो लगाड़्‌यो। 29 अने मळवा वाळा तम्‌बु ना रेवा ना जागा ना झापले होम बादा नी वेदी ने मेकीन तीनी पोर होम नी बादा अने अनबादा चड़ायो; जे रीते यहोवा मुसा ने हुकम आपलो हतो। 30 अने तीहयो मळवा ना तम्‌बु अने वेदी नी वचे मोट्‌ला तपला ने मेकीन तीनी मे हातु-पोगु धोव्‌वा करीन पाणी भर्‌यो, 31 अने मुसो अने हारुन अने तीना सोरा तीनी मे आह़फा-आह़फाम हातु-पोगु धोया; 32 अने जत्‌यार-जत्‌यार तीहया मळवा वाळा तम्‌बु मे नीता वेदीन्‌तां जता हता ता-ता तीहया हातु-पोगु धोवता हता; जे रीते यहोवा मुसा ने हुकम आपलो हतो।✝ 33 अने तीहयो रेवा ना जागा नी च्‌यारो-मेर अने वेदी नी आड़े-धेड़े आंगणु नी पड़दा नी वाड़ ने उबी कर्‌यो, अने आंगणु नु झापलु नो पड़दो टांग देदो। आहयी रीते मुसो आखु काम पुरु कर्‌यो।

34 ता भगवान नी हजुरी ना तम्‌बु पोर वादळु छवाय ज्‌यु, अने यहोवा नु वीजाळु रेवा ना जागा मे भराय ज्‌यु।✝ 35 अने भगवान नी हजुरी ना तम्‌बु पोर ठेर ज्‌यु, अने यहोवा नु वीजाळु रेवा ना जागा मे भराय ज्‌यु, आहया कारण सी मुसो तीनी मे भराय नी सक्‌यो। 36 ईस्‌रायली माणहु नी आखी यात्‌रा मे आसम हयतु हतु, के जत्‌यार-जत्‌यार तीहयु वादळु रेवा ना जागान उप्‌पर गेथु सेटु हय जतु हतु ता-ता तीहया अगा बड़ता हता; 37 अने कदीम तीहयु नी सेटु हयतु हतु, ता जे दाड़े तक तीहयु सेटु नी हयतु हतु तीहया दाड़े तक तीहया अगा नी बड़ता हता। 38 ईस्‌रायल ना माणहु नी आखी यात्‌रा मे दीहु ते यहोवा नु वादळु रेवा ना जागा पोर, अने राते तीहयुत वादळु मे आक्‌ठु तीहया आखा ने देखाव पड़तु हतु।