दगड़ा ना नवला पट्या
(वेवस्थावीवरन 10:1-5)
1 अळतेण यहोवा मुसा ने केदो, "पेल्ना पट्यान तेम अळी बे दगड़ा ना पट्या घड़ ले; ता जे बोल पेल्ना पट्या पोर लीखला हता, जीने तु तोड़ नाखलो, तीहयात बोल मे आहया पट्या पोर बी लीखही। 2 ह़वारे तीयार रेजे, अने ह़वारे सीने बड़ा पोर चड़ीन तीनी चोट्ली पोर मारी अगळ उबो हयजे। 3 तारी ह़ाते कोय बी नी चड़वा जोवे, अने पुरा बड़ा पोर कोय बी माणेह कंखर बी देखाव नी पड़े; अने नी गाडरा-बोकड़ा अने गाय-बोळद्या बड़ा अगळ चरवा जोवे।" 4 ता मुसो पेल्ना पट्यान तेवा बे अळी पट्या घड़्यो; अने ह़वारे उठीन आह़फा ना हात मे दगड़ा ना तीहया बेम पट्या लीन यहोवा ना हुकम नी अनसारे सीने बड़ा पोर चड़ ज्यो। 5 ता यहोवा वादळा मे उतरीन तीनी ह़ाते तां उबो हय्न यहोवा नाम नु परच्यार कर्यो। 6 यहोवा तीनी अगळ माय्न आहयु परच्यार करतो ज्यो, "यहोवा, यहोवा, भगवान दयाळ्ळो अने गीण करवा वाळो, रीह करवा मे धीरपाय राखवा वाळो, दया करवा वाळो अने खरलो,34:6 नीरगमन 20:5,6; गीनती 14:18; वेवस्थावीवरन 5:9-10; 7:9,10 7 हजारु पीड़ी तक लगत दया करवा वाळो, अधरम अने गुनो अने पाप माफ करवा वाळो से, पण गुनाळ्ळा ने तीहयो कानी बी रीते वण-गुनाळ्ळो नी ठेरावे; तीहयो बाहु ना अधरम नो डंड तीमना सोरा मतलब सोरा ना सोरा ने अने तीना सोरा ना सोरा ने बी आपवा वाळो से।" 8 ता मुसो तत्यारुत धरती भणीन ढुंगो वळीन वांद्यो। 9 अने केदो, "ए मालीक, कदीम तारी गीण-दया नी नींगा मारी पोर हय, ता मालीक अमारी वचमे हय्न चाले; आहया माणहु हेटाळ्ळा ते से, ते बी अमारा अधरम अने पाप ने माफ कर अने आमने तारा माणहु ह़मजीन आवरी ले।"
वायदा ने फीर सी देखाड़नु
(नीरगमन 23:14-19; वेवस्थावीवरन 7:1-5; 16:1-17)
10 तीहयो केदो, ह़मळ, मे एक वायदो करु। तारा आखा माणहु अगळ मे एवा घणा जुदा-काम करही जेवा धरती पोर अने आखी जाती मे कदी नी हया, अने तीहया आखा माणहु जीमनी वचमे तु री र्यो यहोवा ना काम ने देखहे; काहाके जे मे तमारी जुगु करवा वाळो से तीहयु घणु-जुदु काम से। 11 जे हुकम मे तमने आज आपु तीने तमु मानजो। देख, मे तमारी अगळ गेथो एमोरी, कनानी, अने हीत्ती, परीज्जी, हीब्बी, अने यबुसी माणहु ने नीकाळ देही। 12 एतरे तु चेतीन रेजे के जे देस मे तु जवा वाळो से तां रेवा वाळा ह़ाते वायदो नी करजे; कंय माय्न आसम नी हय जाय के तीहया तारी जुगु फंदो ठेरे। 13 करीन तीमना वेद्या ने ओदार देजे, अने तीमना खम्बा ने ओदार देजे, अने तीमनी असेरा नाम नी मुर्ती ने बी ओदार देजे;34:13 वेवस्थावीवरन 16:21 14 काहाके तमने बीजा ने भगवान करीन वांदवा नो हुकम नी हय, काहाके यहोवा जीनु नाम खीज राखवा वाळो से, तीहयो रीह कर उठवा वाळो भगवान से, 15 आसम नी हयवा जोवे तु तीहया देस ना माणहु ह़ाते कंय बी वायदो करे, अने तीहया आह़फाम ना देवताम नी पछळ लागला रेय, करीन गलत काम करे, अने तीमनी जुगु गलत बादा बी चड़ावहे, अने कोय तने नेवतु आपे, अने तु तीमनी बादा नी चीज खाय। 16 अने तु तीमना सोर्या ने तारा सोरा करीन लावे जे वेवा करवा करीन लावही, ता तारा सोरा ने धोको देवा वाळा अने तीमने मुर्ती पुजा करवा करीन तीयार करहे। 17 तमु देवताम ना मुरत्या नी बणाय लेजो।34:17 नीरगमन 20:4; लेव्यवेवस्था 19:4; वेवस्थावीवरन 5:8; 27:15 18 खमीर वगर ना रोट्ला नो तीवार वाळजे। जेम मे तने हुकम आपलो से तीनी अनसारे तु अबीब मयना नी संय टेम पोर ह़ात दाड़ा तक खमीर वगर ना रोट्ला खाया करजे; काहाके तु मीस्र देस मे गेथो अबीब ना मयने नीकळीन आवलो।34:18 नीरगमन 12:14-20; लेव्यवेवस्था 23:6-8; गीनती 28:16-25 19 जेतरा बी पेल-खोळ्या से; अने ह़ु वाछड़ा, ह़ु गाडरा, तारा जानवरु मे गेथा जे नर आखा गेथा पेल्ला पयदा हयला से तीहया आखा मारात से।34:19 नीरगमन 13:2 20 गदड़ु नु आखा गेथु पेल्लु बच्चुन बदले गाडरु आपीन तीने छोड़ावजे, कदीम तु तीने छोड़ाव्वा नी हींडे ता तीनु बोचु तोड़ देजे। पण आह़फा ना पेल-खोळ्या सोरा ना बदले आपीन छोड़ावजे। मने कोय बी माणेह ठारला हाते मोडु नी देखाड़े।34:20 नीरगमन 13:13 21 छोव दाड़ा ते मेहनत करजे, पण ह़ातवा दाड़े अराम करजे; तु होळ जोपवा अने वाडणी नी टेमे बी अराम करजे।34:21 नीरगमन 20:9,10; 23:12; 31:15; 35:2; लेव्यवेवस्था 23:3; वेवस्थावीवरन 5:13,14
22 "अने तु हप्ताम नो तीवार वाळजे जे पेले एक्ठा करला गम नो तीवार केवाय, अने साल ना आखरी मे एक्ठु करवा नो बी तीवार वाळजे।34:22 लेव्यवेवस्था 23:15-21; गीनती 28:26-31
23 "साल मे तीन काव तारा आखा अदमी ईस्रायल ना मालीक यहोवा ने आह़फाम नु मोडु देखाड़े। 24 काहाके में आड़जात्या ने तारी अगळ गेथा नीकाळीन तारी काकड़ ने वदाड़ही; अने जत्यार तु तारा भगवान यहोवा ने आह़फा नु मोडु देखाड़वा करीन साल मे तीन काव आया करही, ता कोय बी तारी जागा नी लालच नी करे।
25 "मारी बादा नु लोय ने खमीर भेळ नी चड़ावजे, अने नी फसह ना तीवार नी बादा मे गेथु कंय बी ह़वारे तक मेकजे।34:25 नीरगमन 12:10
26 "आह़फा ना जागा नी पेली मेर नो पेलो वाटो आह़फा ना भगवान यहोवा ना घोर मे ली आवजे। बोकड़ी नु गीदल्यु ने तीनी आय्ह ना दुद मे नी रांदजो।"34:26 वेवस्थावीवरन 26:2; 14:21
27 ता यहोवा मुसा ने केदो, "आहया बोल लीख ले; काहाके आहयात बोल नी अनसारे मे तारी ह़ाते अने ईस्रायल ह़ाते वायदो करलो से।" 28 मुसो तां यहोवा ह़ाते चाळीह दाड़ा अने रात र्यो; अने तांह तक तीहयो नी ते रोट्लो खादो अने नी पाणी पीदो। अने तीहयो तीहया पट्या पोर वायदा ना बोल मतलब दह हुकम लीख देदो।
मुसा नु सीने बड़ा पोर गेथु उतरनु
29 जत्यार मुसो सीने बड़ा पोर गेथो गवा ना बेम पट्या हात मे लीन उतरवा बाज र्यो हतो ता यहोवा ह़ाते वात करवा ना कारण सी तीनु मोडु चमकतु हतु, पण मुसो नी जाणतो हतो के तीनु मोडु नी चमकवा बाज र्यु।34:29 2 कुरन्थी 3:7-16 30 जत्यार हारुन अने आखा ईस्रायली माणहु मुसा ने देख्या के तीनु मोडु चमकवा बाज र्यु, ता तीहया तीनीन्तां जवा सी बीह ज्या। 31 ता मुसो तीमने बोलायो; अने हारुन मंडळी ना आखा मुख्या तीनी ह़ाते आयो, अने मुसो तीमनी ह़ाते वात करवा बाज ज्यो। 32 आनीन अळतेण आखा ईस्रायली ह़ाते आया, अने जेतरा हुकम यहोवा सीने बड़ा पोर मुसा ह़ाते वात करवा नी टेमे आपलो, तीहया आखा तीहयो तीमने देखाड़्यो। 33 जत्यार तक मुसो तीमनी ह़ाते वात नी कर लेदो तांह तक आह़फा ना मोडे फटकु ओडीन र्यो; 34 पण जत्यार-जत्यार मुसो मोय यहोवा ह़ाते वात करवा करीन तीनी अगळ जतो हतो, ता-ता तीहयो तीहयु फटकु ने नीकळवा नी टेमे तक सेटु करीन राखतो हतो; अळतेण बाहर आवीन जे-जे हुकम तीने जड़ता हता तीमने ईस्रायली माणहु ने की देतो हतो। 35 ईस्रायली माणहु मुसा नु मोडु देखता हता के तीना मोडे गेथी चमक नीकळे; अने जत्यार तक मुसो यहोवा ह़ाते वात करवा करीन मोय नी जतो हतो तांह तक तीहयो तीहयु फटकु ने ओडीन रेतो हतो।