Gênesis 39

7 आहयी वात नी अळतेण आसम हयु, के तीना मालीक नी लाडी युसुफ भणी भाळी अने केदी, "मार ह़ाते ह़ुव।" 8 पण तीहयो नीकारो करतो जाय्‌न आह़फा ना मालीक नी लाडी ने केदो, "ह़मळ, जे कंय आहया घोर मे मारा हात मे से; तीने मारो मालीक कंय नी जाणतो, अने तीहयो आह़फा नु आखु कंय मारा हात मे ह़ोप देदलो से। 9 आहया घोर मे मार गेथो मोटो कोय बी नी हय; अने तीहयो तने छोड़ीन, जे तीनी लाडी से; मार सी कंय नी ह़ताड़ीन मेक्‌यो; एतरे भलो, मे आसवो मोटो गुनो करीन भगवान नो गुनाळ्‌ळो ह़ुका बणु?" 10 अने आसम हयु के तीहयी दाड़ीक युसुफ सी वात करती री, पण तीहयो तीनी नी मान्‌यो के तीनी ह़ाते ह़ुवे नीता तीनी ह़ाते रेय।

11 एक दाड़े ह़ु हयु के युसुफ आह़फा नु काम-काज करवा करीन घोर मे ज्‌यो, अने घोर ना पावर्‌या मे सी कोय बी घोर ना मोय नी हतो। 12 तत्‌यार तीहयी बयर तीनु लुगड़ु धरीन केदी, "मार ह़ाते ह़ुव," पण तीहयो आह़फा नु लुगड़ु तीना हात मे रेवा दीन नाह्‌यो, अने बारो नीकळी ज्‌यो।