लुका 8

ईसु आयर नी सोरी ने जीवतो करे अने पोगराळी मांदली बयर ने वारु करे

40 जत्‌यार ईसु पासो गलील जीला मे आयो, ता माणहु खुस हय्‌न तीनो आव-भाव कर्‌या, काहाके आखान-आखा तीनी वाट जोय र्‌या हता। 41 तीहयी वखत आयर नाम नो एक माणेह जे भगवान ना भक्‌ती ना घोर नो मुखी हतो, तीहयो ईसुन्‌तां आवीन तीना पोगुन्‌तां पड़्‌यो, अने रावण्‌या करीन वीन्‌ती कर्‌यो के मारा घोर चाल। 42 काहाके तीनी बारे साल नी एकीत सोरी हती अने तीहयी मरवात वाळी हती। अने ईसु तीनी ह़ाते चाल पड़्‌यो अने जत्‌यार ईसु जवा बाज रेलो हतो, तत्‌यार माणहु धकलाय्‌न तीनी पोर पड़े ईसम हय जता हता। 43 अने तीहयी टेमे एक बयर बारे साल नो पोगराळो दुख हतो। अने तीहयी वारु हयवा करीन आखु कमायलु दाक्‌तर्‌या ने आपीन खरचो कर देदली हती, पण ते बी काना बी दाक्‌तर्‌या सी वारु नी हयी। 44 एतरे तीहयी ईसु पसळ आवीन ईसु ना लुगड़ा ना छेड़ा ने सीम लेदी, अने तत्‌यारुत पोगराळान बीमारी वारु हय ज्‌यी अने तीहयी वारु हय जी। 45 अने तत्‌यार ईसु केदो, "मने कोय छीम्‌यो?" जत्‌यार आखा मे नी छीम्‌यो, कीन नीकारो करवा बाज ज्‌या, ता पतरस केदो; "ए मालीक तने मालम नी हय ह़ु? के च्‌यारो-मेर गेथा माणहु तने घेरवी र्‌या अने तारी पोर धेकलाय्‌न पड़ेन पड़े हय र्‌या।"

46 पण ईसु केदो, "कोयने कोय मने छीमलु से, काहाके मने मालम पड़ जेलु के मारी मे गेथी सक्‌ती नीकळी से।" 47 जत्‌यार बयर ने मालम पड़ ज्‌यु, के मने ह़तायवा नी बणे, ता तीहयी कापती जीन ईसुन्‌तां आवीन तीना पोगु मे पड़ी अने आखा माणहु अगळ आखी वात की देदी के, मे ईसु ने ह़ु करवा छीमली, अने हाव मे छीमीन हमणेत वारु बी हय जी। 48 ईसु तीने केदो, "बेटी, तु भरहो करी, एतरे तु वारु हय जेली से, अने हाव सांतीन जीवे जत रे।"

49 ईसु ईसम केवात बाज रेलो तत्‌यारुत कानो भगवान नी भक्‌ती करन्‌या घोर ना मुखीन्‌तां आवीन ईसम केदो, "तारी बेटी ते मर जेली से। हाव तु मास्‌तर ने वेला ना पाड़े।"

50 बाखीन ईसु ईसम ह़मळीन आयर ने केदो, "बीहे ना, नीस्‌तो भरहो कर, अने तारी बेटी आरगी हय जहे।"

51 तीहयो घोर पुगीन पतरस, युहन्‌ना अने याकुब अने तीहयी मरली सोरी ना आय्‌ह-बाहा ने सोड़ीन बीजा कोयने बी आह़फा ह़ाते घोर मे नी आव्‌वा देदो। 52 अने तीहयी मरली सोरीन्‌तां आखा रड़वा बाज रेला हता, ईसु तीमने केदो, "रड़ो ना! हीय्‌यी नी मरी, पण ह़ुव्‌वा बाज री।"

53 तीहया माणहु आहयी वात ह़मळीन ईसु ने हाह़वा बाज ज्‌या, काहाके तीहया आहयु जाणता हता के तीहयी सोरी मर जेली से। 54 पण ईसु सोरी नो हात धरीन केदो, "ए सोरी उठ! 55 अने तेतरी घड़ी तीनो जीव वळी आयो, अने तीहयी जीवती हय जी अने तेतरी घड़ी उठीन तीहयी उबी हय जी। अने ईसु तीहयी सोरी ना आय्‌ह-बाहा ने केदो, हीने जरीक खाणु खवाड़ो।" 56 तीना आय्‌ह-बाहा वहराय ज्‌या, बाखीन ईसु तीमने केदो, "आञे ह़ारीक जे हयु तीहयु कोयने नी केजो।"