1 मारा भाय अने बेन्‌या, मे पुरा मन सी चाहु, अने भगवान सी वीन्‌ती करु के आखा माणहु बच जाय। 2 तीमना बारा मे, मे आहयी गवाय देम के तीमनी मे भगवान लेदे होह ते से पण तीमनो आहयो होह खरला ग्‌यान ना अनसारे नी हय। 3 भगवान नी धरमीपण ना बारा मे अंजाणला अने आपणीत धरमीपण बणाव्‌वा करीन तीहया होह मे खुद ने भगवान ना हक मे नी कर्‌या। 4 तीहया आखा जणा वाटु, जे मसी पोर भरहो करे, मसीत धरमीपण ना कायदा नो खत्‌तम से।

5 मुसो कायदा सी जड़ली धरमीपण ना बारा मे आहयु लीखे, "जे माणेह कायदा नो पाळण करहे तीहयो तीनी सी जीवत्‌लो रेहे।" 6 पण भरहा सी जड़वा वाळी धारमीक्‌ता ना बारा मे सास्‌तर आहयु केय, "तु आह़फा ना मन मे आहयु ना पुछे, ह़रग मे उप्‌पर कोय जहे?" मसी ने हेटो धरती पोर लाव्‌वा। 7 नीता मसी ने मरला मे गेथो जीवतो करवा करीन "पताळ मे कोय उतरहे?" 8 ह़ु से आनो मतलब भगवान नो बोल तमारी पांह से तमारा मोडा मे के मन मे भरहा तीहयी खबर, जे अमारा परच्‌यार ना बारा मे से। 9 आनीन करते कदी तमु आपणा मोडा सी ईसु ने मालीक करीन मान्‌ता हय अने मन मे आहयो भरहो करता हय के भगवान तीने मरला मे गेथो जीवतो करलो से ता तमने छुटकारो जड़हे। 10 काहाके भरहो मन सी कराय, जीनु फोळ से धारमीक्‌ता अने मानवा मोडा सी हये जीनु फोळ से छुटकारो। 11 चोखली सास्‌तर मे लीखलु से, आखा जणा जे तीनी मे भरहो करहे, तीहयो कदी लाजे नी पड़े। 12 युहदी अने आड़जात्‌या मे कंय भेद-भाव नी र्‌यो काहाके एकीत मालीक आखा नो मालीक से, जे तीहया आखा ना लेदे, जे तीनी गवाय देता हय, 13 काहाके सास्‌तर केय के, जे कोय मालीक नाम सी वीन्‌ती करहे, तीहयो छुटकारो हात करहे।

14 अने माणहु ईसु ना बारा मे ह़मळ्‌यात नी ता तीहया तीनी पोर कीसम भरहो करहे, अने तीहया ईसु पोर भरहो नी करे, ता तीहया तीना नाम सी काहा वीन्‌ती करहे, पण परच्‌यार करन्‌या वगर माणहु ईसु ना बारा कीसम ह़मळे? 15 कदी परच्‌यार करन्‌या ने मोकल्‌लो नी हय ता कीसम परच्‌यार कर सकहे? चोखली सास्‌तर मे लीखलु से केवा वारु से तीहया पोगु जीनी लारे वारली वातु नी खुस-खबर लावे!✝10:15 यसाया 52:7; नहुम 1:15 16 ते बी आखा भगवान नी खुस-खबर पोर ध्‌यान नी देदा, भगवान वगे गेथा बोलन्‌या यसाया नु लीखलु से: मालीक! कोय भरहो करलु से अमारी खबर पोर? ✝10:16 यसाया 53:1 17 आनीन करते खुल्‌लु से के भरहा उबजवु ह़मळवा सी अने ह़मळवा मसी ना बोलु सी।

18 पण सवाल आहयो से; तीहया ह़मळ्‌या नी ह़ु? तीहया ह़मळ्‌ळा से:

तीनो बोल आखी धरती पोर अने,

तीनी खबर धरती ना आखरी लग पुग जेली से।

19 पण मे पुछु, ईस्‌रायली माणहु आने ह़मज सकहे ह़ु? पेले मुसो केदलो:

"मे एवा राज ना लारे तमारी मे रीह पयदा करही, एक वण-भरह्‌या जाती ना लारे तमारा

मन मे रीह पयदा करही।"✝10:19 वेवस्‌थावीवरन 32:21

20 यसायो हीम्‌मत राखीन केय,

"जे मने नी ह़ोदत्‌ला तीमने मे जड़ ज्‌यो,

अने जे मने पुछत्‌ला बी नी तीमनी अगळ मे उजन्‌तो हय ज्‌यो।"✝10:20 यसाया 65:1

21 पण ईस्‌रायली माणहु ना बारा मे तीहयो केय, मे आखो दाड़ो हुकम नी माने तीमनी अगळ अने जखड़ी पड़न्‌या अगळ मारो हात फेंदारलो र्‌यो✝10:21 यसाया 65:1।