Hebreus 8

यीसु आमरो मोठो याजक

1 यो गोस्टी को सार यो सेत का, आमरो एक असो महायाजक सेत। जोन सरग मा मोठो गौरव को काबिल परमेस्वर को सिघासन को उजो कन बिराजमान भई गयो। 2 वोना सही अना पवीतर जघा अना तम्बु को सेवक सेत। जोन मानूसगिन को लक नही, पर परमेस्वर लक स्थापित कियो गयो सेत।

3 हरेक महायाजक बली चघाव, अना भेट चघान को लाय ठहरायो सेत। एकोलाय यो जरुरी सेत का वोको जवर चघान काजी काही ना काही हो। 4 अदी यीसु धरती मा रव्हतो तो उ याजक भी नही होतो। काहेका मोसे को नियम लक भेट चघान को लाय याजक सेत। 5 पवितर आरधना को जघा, उनको सेवा सरग को सही गोस्टी को सावली सेत। एकोलाय जबा मोसे पवितर तम्बू ला बनावन वालो होतो। तबा च वोला चितायो गयो होतो। "धियान रव्हे का तू हरेक चीज ठीक वोको च नकल करजोस जोन तोला पहाड़ी मा दिसायो होतो।" 6 अबा जोन सेवा मसिहा ला भेटयो से, वा कहीं जादा वरता सेत। काहेका उ एक असो करार को बिचवई सेत। जोन जादा लक जादा से, अना वा साजरा वायदा पर अधारित सेत।

7 अदी पहेलो करार साजरो होतो। तो वोको जघा मा दुसरो को का जरुरत सेत? 8 परमेस्वर उन लोकगीन को निंदा करतो हुया कव्हसेत

"पिरभू यो कव्हसेत, वा दिवस आवासेत जबा मी इसरायल को घराना

अना यहूदा को घराना काजी एक नवा करार स्थापित करुहू।

9 यो वोना विधान को जसो नाहती,

जोनला मी उनको आजा बाबा को लाय वोना बेरा दियो होतो।

जबा मीना उनला मिसर देस लक हेडन काजी उनको हात धरयो होतो।" पिरभू असो कव्हसेत "उनना मोरो करार लक हट गईन। वोको पालन नही करीन,

यो काजी मीना भी उनला तज दियो।

10 पिरभू असो कव्हसेत, वा बेरा बितन को मघा मी इसरायल को लाय यो करार करहू।

मी आपरो नवा करार,

उनको मन मा ठेव देहू,

अना उनको दिलमा लिख देहू।

मी उनको परमेस्वर होहुँ,

अना वय मोरी परजा होहेत।"

11 यो जरुरी नाहती का एक मानूस दुसरो ला सिक्सा देवे।

मजे भाऊ एक दुजो ला सागेत

"पिरभू को गियान ले लेव।

काहेका लहान अना मोठो सबको सब ला

मोरो बारे मा पता चल जाहेति।"

12 काहेका मी उनको बदी को बारे मा दयावन्त रहू

अना उनको पाप ला कदी हेत नही करू।

13 नवा करार आन के पहेलो करार ला जूनो ठहरा दियो सेव। अना जोन चीज जुनो अना जर-जर हो जासे वोको मिट जानो जरुरि सेत।