1 Umudendeezo dufite ni uko Kristo yatubohooye. Nuuko reero nimuhagarare mushikamye, mwirinda gusubira mu bubaata.

2 Nimwumve! Njeewe Pawulo ndababwira yuuko nimwemera gukebwa, Kristo ntaaco yaaba akibamarira. 3 Kandi ndongera kwihanangiriza umugabo weese wemera gukebwa yuuko akwiriye gukurikiza amategeko yoose. 4 Mwebwe abashaaka gutsindishirizwa n'amategeko mwitandukanyije na Kristo, kuko mwaguuye mukava mu buntu bw'Imaana. 5 Ariko twebwe ku bw'imbaraga z'Umwuka w'Imaana no kwizeera, dufite ubwuzu bwo kwakira ibyiringiro byo gukiraanuka Imaana yaduseezeranyije. 6 Iyo turi muri Kristo, gukebwa cangwa kudakebwa ntaaco bimaze, ahuubwo igikuru ni ukwizeera kugaragarira mu rukundo.

7 Mbese ko mwakoraga neeza, ni nde wababujije gukurikiza ukuri? 8 Beene uko kooshwa ntikwaturuka kuwabahamagaye. 9 ✝Nk'uko bivugwa ngo, "Igituubuura gike gituma ifu y'ingano ituubuuka." Ni na ko ijambo rito rishobora kubahindura mwese. 10 Niizeye ntashidiikanya yuuko ku bwa Nyagasani mutazaateekereza ukundi, kandi ubayobya, akabaazanira guhagarika imitima weese, Imaana izaamuhana.

11 Mbese Bavandimwe, niiba nkibwiriza ko gukebwa ari ngombwa, ni iki gituma ngitootezwa? Iyo mba nigiisha ibyo, ubutumwa bw'umusaraba mbwiriza buba ari ntaawe buteeye ikibazo. 12 Icampa abo bababuza amahoro bashaaka ko mukebwa baakwikona.

13 Naho mwebwe bavandimwe, mwahamagariwe kuba ab'umudendeezo. Ariko umudendeezo mwahaawe mureke kuwuhindura urwitwazo rwo gukora ibyo kamere y'imibiri yaanyu irarikira, ahuubwo buri weese akorere mugenzi we abiteewe n'urukundo. 14 Kuko amategeko yoose abumbiye muri rimwe ngo, "Ukunde mugenzi waawe nk'uko wiikunda." 15 Ariko reero, niiba mwifata nk'inyamaaswa, mugashikagurana, mugaconcomerana, muramenye ntimuzaamarane.

16 Ndababwira nti; nimuyoborwe n'Umwuka, ni bwo mutazaakora ibyo kamere irarikira. 17 ✝Kuko kamere irarikira ibyo Umwuka yanga, kandi ibyo Umwuka ushaaka bitandukanye n'ibyo kamere ishaaka. Ni co gituma ibyo mushaaka gukora atari byo mukora. 18 Ariko niiba muyoborwa n'Umwuka, ntimuba mugihatwa gukurikiza amategeko.

19 Dore ibikorwa bya kamere biriigaragaza, ni ubusambanyi, gukora ibiteeye isoni, ubwomanzi, 20 gusenga ibishushaanyo, kuroga, kwangana, amakimbirane, ishari, uburaakari, intonganya, ubutumviikana, amacaakubiri, 21 umujinya, ubusinzi, kwiyandarika mu byo kunywa n'ubuheeheesi, n'ibindi bisa bityo. Ndabiihanangiriza nk'uko nabibabwiye kare, yuuko abakora ibisa bityo, ntaamurage bazaahaabwa mu Bwami bw'Imaana.

22 Ariko reero, imbuto z'Umwuka ni urukundo, umuneezeero, amahoro, kwihangaana, ubugwaneeza, ubupfura, kwiringirwa, 23 kwiciisha bugufi no kwirinda. Ibimeze bityo ntaamategeko abihana. 24 Aba Kristo Yesu baabambye kamere yaabo y'umubiri, n'ingeso mbi ndetse n'irari ku musaraba. 25 Niiba tubeeshwaho n'Umwuka, tuje tuyoborwa n'Umwuka. 26 Twekwishira heejuru cangwa ngo twenderanye, cangwa ngo tugirirane ishari.