1 ବୁଗିନ୍‌ ଇତୁ ଏମଃ ନିୟାଃ ସବେନ୍‌ କାଜିକ,ଦାଉଦ୍‌ଆଃ ହନ୍ତେକଡ଼ା, ଯୀରୁଶାଲେମ୍‌ରେନ୍‌ ରାଜା ।

2 ବୁଗିନ୍‌ ଇତୁ ଏମଃନିଃ କାଜିତାନାଏ, "ସାମାଗି, ସାମାଗି, ପୁରାଃ ସାମାଗି, ସବେନାଃ ସାମାଗି ।" 3 ହଡ଼ ଆୟାଃ କାମିତାନ୍‌ତେୟାଃ ଏତେ ଅକ ସବେନାଃ ନାଲାକ ନାମାଃ, ସିଙ୍ଗି ଲାତାର୍‌ରେ ଏନ୍‌ ସବେନାଃ ଜେତ୍‌ନାଃ ଲାଭ୍‌ କା ହୁଇନାଃ ? 4 ମିଆଦ୍‌ ପିଢ଼ି ସେନଆଃ ଏଟାଃ ମିଆଦ୍‌ ପିଢ଼ି ହିଜୁଃଆ, ମେନ୍‌ଦ ଅତେ ଜାନାଅଗି ତାଇନାଃ । 5 ସିଙ୍ଗି ତୁରଃଆ ଓଡ଼ୋଃ ସିଙ୍ଗି ହାସୁର୍‌ ନାଃ । ଓଡ଼ୋଃ ତୁରଃ ଠାୟାଦ୍‌ତେ ଇମ୍‌ତାଗି ସେନ୍‌ରୁହାଡ଼୍‌ ନାଗେନ୍ତେ ସାନାଙ୍ଗା । 6 ଦାକ୍ଷିଣ୍‌ସାଃ ଏତେ ହୟ ହିଜୁଃଆ ଓଡ଼ୋଃ ଉତ୍ତାର୍‌ ସାଃତେ ହୟ ରୁହାଡ଼୍‌କଆ, ଓଡ଼ୋଃ ନେ’ଲେକାତେ ଏନ୍‌ ହୟ ଆୟାଃତେଗି ଚାରିଓସାଃ ହନର୍‌ ବିୟୁର୍‌ ରିକା ଓଡ଼ୋଃ ଆୟାଃ ହିଜୁଃ ହରାରେଗି ରୁହାଡ଼୍‌କଆ । 7 ଗାଡ଼ା ସବେନ୍‌ ଦରେୟାତେ ଲିଙ୍ଗିୟଃତାନା । ଏନ୍‌ରେହ ଦରେୟା କା ପେରେଜଃ ତାନା । ଅକ ଠାୟାଦ୍‌ ଏତେ ଗାଡ଼ାକ ଉନୁଦୁବ୍‌ କାନା, ଏନ୍‌ ଠାୟାଦ୍‌ତେକ ଆଡଃଗି ଏନ୍‌ ଦାଆଃ ରୁହାଡ଼୍‌କଆ । 8 ସବେନ୍ ବିଷାଏ ଲାଗା ଲେକ୍‌ନାଃ ତାନା, ହଡ଼ ଏନାକେ କାଏ ଉଦୁବ୍‌ ଦାଡ଼ିୟାଃ । ଚିମିନ୍‌ ନେନେଲ୍‌ରେ ହଗି ମେଦ୍‌ ଏନାକେ କା ନେଲ୍‌ ଦାଡ଼ିୟାଃ, ଚିମିନ୍‌ ଆୟୁମେ ରେୟଗି ଲୁତୁର୍‌ କା ଆୟୁମ୍‌ ଦାଡ଼ିୟାଃ । 9 ଅକଆଃ ହବାକାନା, ଏନାଗି ହୁଇନାଃ, ଅକଆଃ ରିକାକାନା ଏନାଗି ରିକାନାଃ । ସିଙ୍ଗି ଲାତାର୍‌ରେ ନାୱା ବିଷାଏ ମେନ୍ତେ ଜେତାନ୍‌ କାଜି ବାନଃଆ । 10 ନେଲେପେ, ଜେତାନ୍‌ ହଡ଼, ନେଆଁ ନାୱା ବିଷାଏ ତାନା ମେନ୍ତେ କାଜି ଦାଡ଼ିୟାଃ, "ନେ’ଲେକାନ୍‌ ଜେତାନ୍‌ ନାୱା ବିଷାଏ ମେନାଃ ଚି ?" ଏନାଦ ସିଦା ଦିପିଲି ରେୟାଃ ପୁରାଃ ସିର୍ମା ସିଦାରେ ତାଇନ୍‌କେନା ।

11 ସିଦା ଦିପିଲିରେନ୍‌ ପୁର୍‌ଖା ହଡ଼କଆଃ ବିଷାଏରେ ଜେତାନ୍‌ ଉଡ଼ୁଃ ପାହାମ୍‌ କା ତାଇନାଃ । ଚାଏ ହିଜୁଃ ଦିପିଲିରେ ଅକନ୍‌କ ଜାନାମଃଆ, ଇନ୍‌କୁଆଃ ହିଜୁଃ ଦିପିଲିରେନ୍‌ ହଡ଼କଆଃ ଥାଲାରେ ଜେତାନ୍‌ ପାହାମ୍‌ କାଜି କା ତାଇନାଃ ।

12 ଆଇଙ୍ଗ୍‌ ଇତୁନିଃ, ଗଟା ଯୀରୁଶାଲେମ୍‌ ଇସ୍ରାଏଲ୍‌ରେନ୍‌ ରାଜା ତାଇନ୍‌କେନା । 13 ରିମିଲ୍‌ ଲାତାର୍‌ରେ ଅକ ସବେନାଃ ରିକାନାଃ, ଏନ୍‌ ସବେନାଃକେ ସେଣାଁ ହରାତେ ସାରି ନାଗେନ୍ତେ ଓଡ଼ୋଃ ଦାଣାଁନାମ୍‌ ନାଗେନ୍ତେ ଆଇଙ୍ଗ୍‌ ମନ୍‌ ଏମ୍‌କେଦା । ଏନାତେ ପାର୍‌ମେଶ୍ୱାର୍‌ ଯେ ମାନୱାକକେ ବାହାରମ୍‌ ଏମା କାଦ୍‌କଆଏ, ଏନା ପୁରାଃଗି ଦୁକୁ ଲେକାନ୍ କାଜି ତାନାଃ । 14 ସିଙ୍ଗି ଲାତାର୍‌ରେ ହବାକାନ୍‌ ସବେନ୍‌ କାଜିକାମିକେ ଆଇଙ୍ଗ୍‌ ନେଲ୍‌କେଦା । ଓଡ଼ୋଃ ନେଲେପେ, ସବେନାଃ ସାମା ତାନାଃ, ଓଡ଼ୋଃ ଏନା ହୟକେ ସାବ୍‌ ଲେକାନ୍‌ ବିଷାଏ ତାନାଃ । 15 ଅକଆଃ ବେଙ୍କଆକାନ୍ ମେନାଃ ଏନା କା ସିଧାଅଃଆ । ଓଡ଼ୋଃ ଅକଆଃ କାଟିକାନ୍‌ ମେନା, ଏନା ଲେକା କା ଦାଡ଼ିୟଃଆ ।

16 ଆଇଙ୍ଗ୍‌ ଆଇଁୟାଃ ମନ୍‌ସୁରୁଦ୍‌ରେ ଉଡ଼ୁଃ ପାହାମ୍‌ କେଦ୍‌ତେ କାଜିକେଦା ଯେ, "ନେଲେପେ, ଯୀରୁଶାଲେମ୍‌ରେ ତାଇନ୍‌ତାନ୍‌ ସିଦାରେନ୍‌ ହଡ଼କତାଃଏତେ ଆଇଙ୍ଗ୍‌ ପୁରାଃ ସେଣାଁ ନାମାକାଦା । ଆଇଁୟାଃ ମନ୍‌ସୁରୁଦ୍‌ ସେଣାଁତେ ଓଡ଼ୋଃ ବୁଦ୍ଧିତେ ପୁରାଃଗି ଆଟ୍‌କାର୍‌ ଉରୁମ୍‌ ଲେକାନିଃ ହବାକାନା ।" 17 ଏନ୍ତେ ଆଇଙ୍ଗ୍‌ ସେଣାଁ ରେୟାଃ ମୁଣ୍ଡି, ବାଲୁଅଃ ଓଡ଼ୋଃ ଡଣ୍ଡ ରେୟାଃ ମୁଣ୍ଡି କେ ସାରିନାଗେନ୍ତେ ସାନାଙ୍ଗ୍‌କେଦା । ନେଆଁଗି ହୟକେ ସାବ୍‌ ଲେକାନ୍‌ ବିଷାଏ ମେନ୍ତେ ସାରିକେଦା । 18 ଚିୟାଃଚି ପୁରାଃ ସେଣାଁରେ ପୁରାଃଗି ଦୁକୁ ତାଇନାଃ । ଓଡ଼ୋଃ ଅକଏ ସେଣାଁ ହାରା ଇଦିୟା, ଇନିଃ ଆୟାଃ ଦୁକୁକେ ହାରା ଇଦିୟା ।