ଦାନ୍ ରାକାବ୍ ବେଦି ଆଡଃମିସା ବାଇରୁହାଡ଼ଃ
1 ଏୟା ମାହିନା ହବାୟାନ୍ଲଃ ଇସ୍ରାଏଲ୍ରେନ୍ ହଡ଼କ ଆପ୍ନାଃ ଆପ୍ନାଃ ନାଗାର୍ରେ ତାଇକେନାକ। ଏନ୍ତେ ଇନ୍କୁ ସବେନ୍କ ମିଦ୍ ମନ୍କେଦ୍ତେ ଯୀରୁଶାଲେମ୍ରେ ହୁଣ୍ଡିୟାନାକ। 2 ପାର୍ମେଶ୍ୱାର୍ଆଃ ହଡ଼ ମୁଶାରାଃ ଆନ୍ଚୁରାଃ ଅନଲ୍ ଲେକାତେ ଉରୁବ୍ଦାଣେଁ ରାକାବ୍ ନାଙ୍ଗ୍ ଯୋଷାଦକରାଃ ହନ୍ ଯେଶୁୟ ଓଡ଼ୋଃ ଆୟାଃଲଃ ମିସାତେ କାମିତାନ୍ ଯାଜାକ୍କ, ଶଲ୍ଟୀୟେଲରାଃ ହନ୍ ଯେରୁବାବେଲ୍ ଓଡ଼ୋଃ ଆୟାଃ ହାଗାକ ଇସ୍ରାଏଲ୍ରେନ୍ ପାର୍ମେଶ୍ୱାର୍ଆଃ ବେଦି ବାଇକେଦାକ। 3 ଇନ୍କୁ ଦାନ୍ ରାକାବ୍ ବେଦିକେ ସିଦା ବାଇକାନ୍ ନିହିଁଗାଡ଼ା ଚେତାନ୍ରେଗି ବାଇକେଦାକ ଓଡ଼ୋଃ ଚାରିଓସାଃରେ ତାଇନ୍ତାନ୍ ଏଟାଃ କିଲିରେନ୍ ହଡ଼କ ନାଗେନ୍ତେ ଇନ୍କୁଆଃ ମନ୍ରେ ବର ତାଇକେନ୍ରେୟଗି ପ୍ରାଭୁଆଃ ନୁତୁମ୍ତେ ସେତାଃ ଓଡ଼ୋଃ ସିଙ୍ଗିହାସୁର୍ ଇମ୍ତା ଉରୁବ୍ଦାଣେଁ ରାକାବ୍କେଦାକ। 4 ଏନ୍ତେ ଇନ୍କୁ ଅନଲ୍ରାଃ ରିତିନିତି ଲେକାତେ ଝାମ୍ଡା ପାରାବ୍ ମାନାତିଙ୍ଗ୍କେଦାକ ଓଡ଼ୋଃ ସବେନ୍ ହୁଲାଙ୍ଗ୍ରାଃ ଲାଗାତିଙ୍ଗ୍ ଲେକା ଉରୁବ୍ଦାଣେଁ ରାକାବ୍କେଦାକ। 5 ଓଡ଼ୋଃ ଇନ୍କୁ ସବେନ୍ ହୁଲାଙ୍ଗ୍ ଉରୁବ୍ଦାଣେଁ, ଆମାସ୍ ଓଡ଼ୋଃ ପ୍ରାଭୁଆଃ ହରାତେ ପାବିତାର୍ ଠାହାରାଅକାନ୍ ପାରାବ୍କରେ ଦାଣେଁ ରାକାବ୍କେଦାକ, ଏନାକେ ବାଗିକେଦ୍ତେ ଆପ୍ନାଃ ଇଛାସାନାଙ୍ଗ୍ତେ ଏମ୍ତାନ୍ ଦାନ୍ ଆଉକେଦାକ ଓଡ଼ୋଃ ପ୍ରାଭୁଆଃ ନୁତୁମ୍ତେ ଦାନ୍ ରାକାବ୍କେଦାକ। 6 ପ୍ରାଭୁଆଃ ବିନ୍ତିଅଡ଼ାଃରାଃ ନିହିଁଗାଡ଼ା କା ବାଇକାନ୍ ରେୟ ଇନ୍କୁ ଏୟା ମାହିଁନାରାଃ ପାହିଲା ହୁଲାଙ୍ଗ୍ଏତେ ପ୍ରାଭୁଆଃ ଉଦ୍ଦେଶ୍ରେ ଉରୁବ୍ଦାଣେଁ ରାକାବ୍ ନାଙ୍ଗ୍ ଏଟେଦ୍କେଦାକ।
ବିନ୍ତିଅଡ଼ାଃ ଆଡଃମିସା ବାଇରୁହାଡ଼୍
7 ପାରସ୍ୟରେନ୍ ରାଜା କୋରସ୍ଆଃ ଆନାଚୁ ହରାତେ ଇନ୍କୁ ଅଡାଃଜୋଡ଼ାଇ ଓଡ଼ୋଃ ବାଢ଼ାଇକକେ ନାଲା ଏମ୍କେଦ୍ତେ କାମି ଇଚିକେଦ୍କଆକ ଓଡ଼ୋଃ ଲିବାନୋନ୍ଏତେ ଯାଫରେୟାଃ ଦୋରେୟା ଗେନା ଜାକେଦ୍ ଏରସ୍ ଦାରୁ ଆଉ ନାଙ୍ଗ୍ ସିଦୋନ୍ ଓଡ଼ୋଃ ସୋର୍ ନାଗାର୍ରେନ୍ ହଡ଼କକେ ଜମ୍, ନୁଁ ଓଡ଼ୋଃ ସୁନୁମ୍ ଏମାଦ୍କଆକ। 8 ଯୀରୁଶାଲେମ୍ରେ ପାର୍ମେଶ୍ୱାର୍ଆଃ ଅକ ବିନ୍ତିଅଡ଼ାଃ ତାଇକେନା, ଏନ୍ତାଃତେ ଇନ୍କୁଆଃ ହିଜୁଃରାଃ ବାର୍ ବାରାଷ୍ରାଃ ବାର୍ ମାହିଁନାରେ କାମି ଏଟେଦ୍ୟାନା। ଶଲ୍ଟୀୟେଲରାଃ ହନ୍ ଯେରୁବାବେଲ୍, ଯୋଷାଦକରାଃ ହନ୍ ଯେଶୁୟ ଓଡ଼ୋଃ ଇନ୍କୁଆଃ ହାଗାକ, ଅକନ୍କଚି ଯାଜାକ୍, ଲେବୀ ହଡ଼କ ଓଡ଼ୋଃ ତନଲ୍ହେତେ ରାଡ଼ାକାନ୍ ହଡ଼କ ଯୀରୁଶାଲେମ୍ତେ ହିଜୁଃୟାନ୍ଲଃ ସବେନ୍କ କାମି ଏଟେଦ୍କେଦାକ। ମିଦ୍ହିସି ଚାଏ ଏନାଏତେ ଆଦ୍କା ବାରାଷ୍ରେନ୍ ଲେବୀକ ପ୍ରାଭୁଆଃ ବିନ୍ତିଅଡ଼ାଃରାଃ କାମିକ ନେଲ୍ ନାଙ୍ଗ୍ ସାଲାୟାନାକ। 9 ଯେଶୁୟ, ଆୟାଃ ହନ୍ ଓଡ଼ୋଃ ହାଗାକ, କଦ୍ମିୟେଲ୍ ଓଡ଼ୋଃ ଆୟାଃ ହନ୍କ, ଯିହୁଦାରାଃ ହନ୍କ, ହେନାଦାଦ୍ରାଃ ହନ୍କ ଓଡ଼ୋଃ ଇନ୍କୁଆଃ ହନ୍କ ଓଡ଼ୋଃ ହାଗାକ, ନେ ଲେବୀକ ପାର୍ମେଶ୍ୱାର୍ଆଃ ବିନ୍ତିଅଡ଼ାଃ ବାବାଇ ହଡ଼କଆଃ କାମି ନେଲ୍ ନାଙ୍ଗ୍ ସାଲାୟାନାକ। 10 ଅଡ଼ାଃ ବାବାଇକ ପ୍ରାଭୁଆଃ ବିନ୍ତିଅଡ଼ାଃରାଃ ନିହିଁଗାଡ଼ା ବାଇକେଦାକ ଇମ୍ତା ପ୍ରାଭୁଆଃ ମାନାରାଙ୍ଗ୍ ରିକାନାଙ୍ଗ୍ ଯାଜାକ୍କ ଆକଆଃ ଯାଜାକ୍ଲିଜାଃ ତୁସିଙ୍ଗ୍କେଦ୍ତେ ବିଙ୍ଗୁଲ୍ବାଜାଲଃ ଓଡ଼ୋଃ ଆସଫ୍ରାଃ ହନ୍ ଲେବୀକ ତିଃଇ ଥାପ୍ଡ଼ିତାନ୍ଲଃ ଆକଆଃ ଆପ୍ନାଃ ଠାୟାଦ୍ରେ ତିଙ୍ଗୁୟାନାକ। ଇନ୍କୁ ଇସ୍ରାଏଲ୍ରେନ୍ ରାଜା ଦାଉଦ୍ ଠାହାରାଅକାଦ୍ ନିୟାମ୍ ଲେକା ନେଆଁ ରିକାକେଦାକ। 11 ଇନ୍କୁ ପ୍ରାଭୁଆଃ ମାନାରାଙ୍ଗ୍ ଓଡ଼ୋଃ ଧାନ୍ୟାବାଦ୍ ରିକାତାନ୍ଲଃ ନେ ଦୁରାଙ୍ଗ୍ ଦୁରାଙ୍ଗ୍କେଦାକ, "ପ୍ରାଭୁ ପୁରାଃ ବୁଗିନ୍ନିଃ ତାନିଃ ଇସ୍ରାଏଲ୍ ହଡ଼କଆଃ ନାଙ୍ଗ୍ ଇନିୟାଃ ଲିନିବୁଇ ଜାନାଅ ଜାନାଅ ମେନାଃ।" ପ୍ରାଭୁଆଃ ବିନ୍ତିଅଡ଼ାଃରାଃ ନିହିଁଗାଡ଼ା ବାଇୟାନ୍ ହରାତେ ହଡ଼କ କାଉରିକେଦ୍ତେ ପ୍ରାଭୁଆଃ ମାନାରାଙ୍ଗ୍ ଦୁରାଙ୍ଗ୍କେଦାକ। 12 ନେ ବିନ୍ତିଅଡ଼ାଃରାଃ ନିହିଁଗାଡ଼ା ବାଇୟାନ୍ତେୟାଃ ନେଲ୍କେଦ୍ତେ ପୁରାଃ ହଡ଼କ ରାସ୍କାତେ ଦୁରାଙ୍ଗ୍ତାନ୍ ଇମ୍ତା ପୁରାଃ ହାଡ଼ାମ୍କାନ୍ ଯାଜାକ୍କ, ଲେବୀକ ଓଡ଼ୋଃ କିଲିରେନ୍ ମାପ୍ରାଙ୍ଗ୍କ, ଅର୍ଥାତ୍ ଅକନ୍କଚି ସୁଲିମାନ୍ନାଃ ହରାତେ ପାହିଲା ବାଇୟାକାନ୍ ବିନ୍ତିଅଡ଼ାଃ ନେଲାକାଦ୍ ତାଇକେନାକ, ଇନ୍କୁ କାଉରିକେଦ୍ତେ ରାଆଃ କେଦାକ। 13 ନେ’ଲେକା କାଉରି ଆୟୁମ୍ୟାନା ଯେ, ହଡ଼କ ରାସ୍କାତେ କାଉରିତାନାକ ଚି ଏୟମ୍ତାନ୍ଲଃ ରାଆଃ ତାନାକ ଏନା ସାରି କା ଦାଡ଼ିୟାନା, ନେଆଁ ପୁରାଃ ସାଙ୍ଗିନ୍ ଜାକେଦ୍ ଆୟୁମ୍ୟାନା।
/images/a/a0208299-6f37-40a0-66e1-2576b9435f00)
/images/a/Tcg2NiV7ce24OT6kCIQGR)