ନିହିମିୟା 2

ନିହିମିୟାରାଃ ଯୀରୁଶାଲେମ୍‌ତେ ସେନଃ

1 ରାଜା ଅର୍ତ୍ତକ୍ଷସ୍ତରାଃ ଆକ୍‌ତେୟାର୍‌ ଦିପିଲିରେୟାଃ ହିସି ବାରାଷ୍‌ରେ ନିସନ୍‌*2:1 ଏପ୍ରିଲ୍‌ ମାହିଁନା ହବାଅଃ ତାଇକେନ୍‌ ଇମ୍‌ତା, ମୁସିଙ୍ଗ୍‌ ରାଜା ନାଗେନ୍ତେ ଇଲିଆର୍‌ଖି ବାଇୟାନ୍‌ ତାୟମ୍‌ତେ, ଆଇଙ୍ଗ୍‌ ଏନା ଇଦିକେଦ୍‌ତେ ରାଜାକେ ଏମ୍‌କିୟାଇଙ୍ଗ୍‌। ନେଆଁରାଃ ସିଦାରେ ଆଇଙ୍ଗ୍‌ ରାଜାରାଃ ସାମ୍‌ନାଙ୍ଗ୍‌ରେ ଚିଉଲାଅ ଦୁକୁକେଦ୍‌ତେ କାଇଙ୍ଗ୍‌ ନେଲଃ ତାଇକେନା।

2 ଏନାତେ ରାଜା କୁଲିକେଦିୟାଁ, "ଆମ୍‌ଦ କାମ୍‌ ହାସୁତାନା, ଚିନାଃମେନ୍ତେ ଆମାଃ ମେଦ୍‌ମୁହାଁଡ଼୍‌ ଦୁକୁଆନ୍‌ଗି ନେଲଃତାନା ? ନେଆଁ ଆମାଃ ମନ୍‌ସୁରୁଦ୍‌ରାଃ ଦୁକୁ ବାଗିକେଦ୍‌ତେ ଏଟାଃ ନାହାଁଲା।" ଆଇଙ୍ଗ୍‌ ପୁରାଃଗି ବରକେଦାଇଙ୍ଗ୍‌।

3 ଆଇଙ୍ଗ୍‌ ରାଜାକେ କାଜିକିୟାଇଙ୍ଗ୍‌, "ହେ ମାଇନାନ୍‌ ରାଜା, ଆମ୍‌ ଜାନାଅ ଜାନାଅ ଜାକେଦ୍‌ ତାଇନ୍‌ମେ, ଅକ ନାଗାର୍‌ ଆଇଁୟାଃ ପୁର୍‌ଖାହାଡ଼ାମ୍‌କଆଃ ତପାଗାଡ଼ା ତାନାଃ, ଏନା ହାଦୁଡ଼୍‌କେଦ୍‌ତେ, ଏନାରାଃ ଦୁହାର୍‌କ ସେଙ୍ଗେଲ୍‌ତେ ଜିୟନ୍‌କାନା, ତାବ୍‌ଦ ଆଇଁୟାଃ ମେଦ୍‌ମୁହାଁଡ଼୍‌ ଚିଲ୍‌କାତେ କା ଦୁକୁଃଆ ?"

4 ରାଜା ଆଇଙ୍ଗ୍‌କେ କୁଲିକେଦିୟାଁ, "ତାବ୍‌ଦ ଆମ୍‌ ଚିନାଃମ୍‌ ସାନାଙ୍ଗ୍‌ତାନା ?" ଏନ୍ତେ ଆଇଙ୍ଗ୍‌ ସିର୍ମାରେନ୍‌ ପାର୍‌ମେଶ୍ୱାର୍‌ତାଃରେ ବିନ୍ତିକେଦାଇଙ୍ଗ୍‌।

5 ଆଇଙ୍ଗ୍‌ ରାଜାକେ କାଜିରୁହାଡ଼୍‌କିୟାଇଙ୍ଗ୍‌, "ରାଜା ଆଇଙ୍ଗ୍‌କେ ସୁକୁଆଇଙ୍ଗ୍‌ ତାନ୍‌ରେଦ ଓଡ଼ୋଃ ଆୟାଃ ନାଜେର୍‌ରେ ସାୟାଦ୍‌ ନାମାକାଦାଇଙ୍ଗ୍‌ ରେଦ, ବିନ୍ତିତାନାଇଙ୍ଗ୍‌, ଆଇଙ୍ଗ୍‌କେ ଯିହୁଦା ପାର୍‌ଗାନ୍‌କେ ଓଡ଼ୋଃ ଆଇଁୟାଃ ପୁର୍‌ଖାହାଡ଼ାମ୍‌କଆଃ ତପାଗାଡ଼ାରାଃ ନାଗାର୍‌ତେ ସେନ୍‌ ନାଙ୍ଗ୍‌ ଆଚୁଇଙ୍ଗ୍‌ମେ। ଆଇଙ୍ଗ୍‌ ଏନାକେ ଆଡଃମିସା ବାଇରୁହାଡ଼୍‌ ଦାଡ଼ିୟାଇଙ୍ଗ୍‌।"

6 ରାଜାରାଃ ସାମ୍‌ନାଙ୍ଗ୍‌ରେ ରାନି ଦୁବାକାନ୍‌ ତାଇକେନାଏ, ଇମ୍‌ତା ରାଜା କୁଲିକେଦିୟାଁଏ, "ଆମ୍‌କେ ସେନ୍‌ ନାଙ୍ଗ୍‌ ଚିମିନ୍‌ଦିନ୍‌ ହବାଅଃଆ ଓଡ଼ୋଃ ଆମ୍‌ ଚିଉଲା ହିଜୁଃରୁହାଡ଼ାମ୍‌ ?" ରାଜା ଆଇଁୟାଃ ବିନ୍ତି ଆୟୁମ୍‌କେଦ୍‌ତେ ଆଇଙ୍ଗ୍‌କେ ସେନ୍‌ ଇଚିକିଦିଙ୍ଗ୍‌ ହରାତେ ଆଇଙ୍ଗ୍‌ ଆଇଁୟାଃ ରୁହାଡ଼୍‌ ନେଣ୍ଡା ଉଦୁବ୍‌କିୟାଇଙ୍ଗ୍‌। 7 ଆଡଃଗି, ଆଇଙ୍ଗ୍‌ ରାଜାକେ କାଜିକିୟାଇଙ୍ଗ୍‌, "ରାଜାକେ ସୁକୁ ଆଟ୍‌କାରି ରେଦ, ଫରାତ୍ ଗାଡା ହାନ୍‌ ପାରମ୍‌ରେନ୍‌ ଲାଟ୍‌ସାହେବ୍‌କ ଯିହୁଦା ଦିଶୁମ୍‌ତେ ବଲ ଇଚିଙ୍ଗ୍‌ ଜାକେଦ୍‌ ଆକଆଃ ପାର୍‌ଗାନ୍‌ ହରାତେ ଆଇଙ୍ଗ୍‌କେ ସେନ୍‌ ଇଚିଙ୍ଗ୍‌କାକ ମେନ୍ତେ ଆଇଁୟାଃ ତିଃଇରେ ଅନଲ୍‌ ଚିଠା ମିଆଁଦ୍‌ ଏମାଇଙ୍ଗ୍‌କାଏ।

8 "ନେଆଁ ବାଗିକେଦ୍‌ତେ, ମାନ୍ଦିର୍‌ରାଃ ଦୁହାର୍‌, ଗାଡ଼୍‌ରାଃ ଦୁହାର୍‌, ନାଗାର୍‌ ପାଚ୍‌ରିରାଃ ଦୁହାର୍‌ ଓଡ଼ୋଃ ଆଇଁୟାଃ ତାଇନଃ ନାଙ୍ଗ୍‌ ଅକ ଦାରୁ ଲାଗାତିଙ୍ଗ୍‌ ହବାଅଃଆ, ଏନା ଜଗାଡ଼୍‌ ରିକା ନାଙ୍ଗ୍‌ ଆଚୁକେଦ୍‌ତେ ଆମାଃ ବୁରୁ ହରନିଃ ଆସଫ୍‌ତାଃ ମିଆଁଦ୍‌ ଅନଲ୍‌ ଚିଠା ଏମାଇଙ୍ଗ୍‌ମେ।" ଆଇଁୟାଃ ବୁଗିନାଃ ରିକାତାନ୍‌ ପାର୍‌ମେଶ୍ୱାର୍‌ଆଃ ତିଃଇ ଆଇଁୟାଃ ଚେତାନ୍‌ରେ ତାଇକେନ୍‌ ହରାତେ ରାଜା ଆଇଁୟାଃ ସବେନ୍‌ ବିନ୍ତି ଆୟୁମ୍‌କେଦାଏ।

9 ଆଇଙ୍ଗ୍‌ ନାହିଁ ହାନ୍‌ ପାରମ୍‌ରେ ତାଇନ୍‌ତାନ୍‌ ଲାଟ୍‌ସାହେବ୍‌କଆଃ ହେପାଦ୍‌ ସେନ୍‌କେଦ୍‌ତେ ଇନ୍‌କୁକେ ରାଜାରାଃ ଅନଲ୍‌ ଚିଠା ଏମାଦ୍‌କଆଇଙ୍ଗ୍‌। ରାଜା ଆଇଁୟାଃ ହରାସେନ୍‌ ନାଙ୍ଗ୍‌ ସିପାଇକଆଃ ହାକିମ୍‌ ଓଡ଼ୋଃ ସାଦମ୍‌ରେ ଦୁବ୍‌ ସିପାଇକକେ ଆଇଙ୍ଗ୍‌ଲଃ କୁଲ୍‌କେଦ୍‌କଆଏ। 10 ମେନ୍‌ଦ ହରୋନ୍‌ରେନ୍‌ ସନ୍‌ବଲ୍ଲଟ୍‌ ଓଡ଼ୋଃ ରାଜାରାଃ କାମିତାନ୍‌ ଅମ୍ମୋନିୟ ପାର୍‌ଗାନ୍‌ରେନ୍‌ ଟୋବିୟ, ଇସ୍ରାଏଲ୍‌ ହଡ଼କଆଃ ବୁଗିନାଃ ରିକାନାଙ୍ଗ୍‌ ମିହୁଡ଼୍‌ ହିଜୁଃକାନାଏ ମେନ୍ତେ ଆୟୁମ୍‌କେଦ୍‌ଚି ଇନ୍‌କିନ୍‌ ପୁରାଃଗି ଖିସ୍‌ୟାନାକିନ୍‌।

ନିହିମିୟାରାଃ ଯୀରୁଶାଲେମ୍‌ ପାଚ୍‌ରି ଯାଞ୍ଚ୍‌ ରିକା

11 ଆଇଙ୍ଗ୍‌ ଯୀରୁଶାଲେମ୍‌ତେ ସେଟେର୍‌କେଦ୍‌ତେ ଆପି ହୁଲାଙ୍ଗ୍‌ ଏନ୍ତାଃରେ ତାଇକେନାଇଙ୍ଗ୍‌। 12 ତାୟମ୍‌ତେ ଚିମିନ୍‌ ଝାନ୍‌କକେ ମିସାତେ ଇଦିକେଦ୍‌ତେ ନିଦା ଇମ୍‌ତା ଅଡଙ୍ଗ୍‌ୟାନାଇଙ୍ଗ୍‌। ମେନ୍‌ଦ ଆଇଁୟାଃ ପାର୍‌ମେଶ୍ୱାର୍‌ ଯୀରୁଶାଲେମ୍‌ ନାଗେନ୍ତେ ଅକ୍‌ନାଃ ରିକା ନାଙ୍ଗ୍‌ ଆଇଁୟାଃ ମନ୍‌ସୁରୁଦ୍‌ରେ କାଜିକାଦ୍‌ ତାଇକେନା, ଏନା ଆଇଙ୍ଗ୍‌ ଜେତାଏକେ କାଇଙ୍ଗ୍‌ ଉଦୁବ୍‌। ଆଇଙ୍ଗ୍‌ ଅକ ଜାଁତୁ ଚେତାନ୍‌ରେ ଦୁବ୍‌କାନ୍‌ ତାଇକେନାଇଙ୍ଗ୍‌, ଇନିଃକେ ବାଗିକେଦ୍‌ତେ ଜେତାଏ ଆଇଁୟାଃଲଃ କାକ ତାଇକେନା। 13 ଆଇଙ୍ଗ୍‌ ନିଦା ଇମ୍‌ତା ଅଡଙ୍ଗ୍‌କେଦ୍‌ତେ ପିଡ଼ି ହରାରେ ବିଙ୍ଗ୍‌କୁଆଁ ଓଡ଼ୋଃ ଗୁରିଃକ୍‌ ହରା ଜାକେଦ୍‌ ସେନ୍‌କେନାଇଙ୍ଗ୍‌ ଏନ୍ତେ ଯୀରୁଶାଲେମ୍‌ରାଃ ହାଦୁଡ଼ାକାନ୍‌ ପାଚ୍‌ରି ଓଡ଼ୋଃ ସେଙ୍ଗେଲ୍‌ତେ ଜିୟନ୍‌କାନ୍‌ ଦୁହାର୍‌କ ହନର୍‌ ହନର୍‌ ନେଲ୍‌କେଦାଇଙ୍ଗ୍‌। 14 ଏନ୍ତେ ଆଇଙ୍ଗ୍‌ ସେତେଙ୍ଗ୍‌ ଲିଙ୍ଗିୟଃତାନ୍‌ ଦୁହାର୍‌ ଓଡ଼ୋଃ ରାଜାରାଃ ପୋଖେରା ଜାକେଦ୍‌ ସେନ୍‌କେନାଇଙ୍ଗ୍‌, ମେନ୍‌ଦ ଆଇଁୟାଃ ଜାଁତୁକେ ହାଦୁଡ଼ାକାନ୍‌ ହରା ପାରମ୍‌କେଦ୍‌ତେ ସେନ୍‌ ନାଙ୍ଗ୍‌ ହରା କା ତାଇକେନା। 15 ଆଇଙ୍ଗ୍‌ ନୁବାଃରେ ପିଡ଼ିସାଃ ସେନ୍‌କେଦ୍‌ତେ ନାଗାର୍‌ରେୟାଃ ପାଚ୍‌ରି ନେଲ୍‌କେଦାଇଙ୍ଗ୍‌। ଏନ୍ତେ ଆଇଙ୍ଗ୍‌ ଆଡଃମିସା ପିଡ଼ି ହରା ସେନ୍‌କେଦ୍‌ତେ ନାଗାର୍‌ରେ ବଲୟାନ୍‌ଲଃ ରୁହାଡ଼୍‌ୟାନାଇଙ୍ଗ୍‌।

16 ଆଇଙ୍ଗ୍‌ କତେ ସେନ୍‌କେନାଇଙ୍ଗ୍‌ ଓଡ଼ୋଃ ଚିନାଃ ଚିକାକେନାଇଙ୍ଗ୍‌, ଏନା ହେପାଦ୍‌ରେନ୍‌ ହାକିମ୍‌କ କାକ ସାରି ଦାଡ଼ିକେଦା। ଏନ୍‌ ଜାକେଦ୍‌ ଯିହୁଦୀ ହଡ଼କକେ, ଯାଜାକ୍‌କକେ, ଆଗୁଆଇକକେ, ହାକିମ୍‌କକେ ଓଡ଼ୋଃ ଏଟାଃ ଜେତାଏକକେ, ନେ ବିଷାଏରେ ଜେତ୍‌ନାଃ କାଇଙ୍ଗ୍‌ ଉଦୁବ୍‌କାଦ୍‌କ ତାଇକେନା।

ଆଡଃମିସା ବାଇରୁହାଡ଼୍‌ କାମିରାଃ ଏନେଟେଦ୍‌ ରିକାନାଙ୍ଗ୍‌ ଜାଗାର୍‌

17 ଏନ୍ତେ ଆଇଙ୍ଗ୍‌ ଇନ୍‌କୁକେ କାଜିକେଦ୍‌କଆଇଙ୍ଗ୍‌, "ଆଲେୟାଃ ଚିଲ୍‌କା ନାରାଦୁରା ମେନାଲେୟା, ଯୀରୁଶାଲେମ୍‌ ଚିଲ୍‌କା ହାଦୁଡ଼୍‌କାନା ଓଡ଼ୋଃ ନାଗାର୍‌କ ସେଙ୍ଗେଲ୍‌ତେ ଜିୟନ୍‌କାନା, ଏନା ଆପେ ନେଲେତାନାପେ। ଦେଲା, ଆବୁ ଜେ’ଲେକା ହିଁଣିୟାନ୍‌ଗି କାବୁ ନେଲଃଆ, ଏନାମେନ୍ତେ ଯୀରୁଶାଲେମ୍‌ ପାଚ୍‌ରି ଆଡଃମିସାବୁ ବାଇ ରୁହାଡ଼େୟା।"

18 ଏନ୍ତେ ଆଇଁୟାଃ ପାର୍‌ମେଶ୍ୱାର୍‌ଆଃ ସାୟାଦ୍‌ରାଃ ତିଃଇ ଚିଲ୍‌କା ଆଇଙ୍ଗ୍‌ସାଃରେ ତାଇକେନା ଓଡ଼ୋଃ ରାଜା ଆଇଙ୍ଗ୍‌କେ ଅକ୍‌ନାଃ କାଜିକାଇଙ୍ଗ୍‌ ତାଇକେନାଏ, ଏନ୍‌ ସବେନ୍‌ କାଜି ଆଇଙ୍ଗ୍‌ ଇନ୍‌କୁକେ କାଜିକେଦ୍‌କଆଇଙ୍ଗ୍‌।

ଇନ୍‌କୁ କାଜିରୁହାଡ଼୍‌କିଦିୟାଁକ, "ଦଲା, ଆବୁ ଆଡଃମିସା ବାଇ ରୁହାଡ଼୍‌ରେୟାଃ କାମି ଏଟେଜେୟାବୁ।" ନେ’ଲେକାତେ ଇନ୍‌କୁ ରାସ୍‌କାତେ ଏନ୍‌ ବୁଗିନ୍‌ କାମି ଏଟେଦ୍‌କେଦାକ।

19 ମେନ୍‌ଦ ଚିମ୍‌ତା ହରୋନ୍‌ରେନ୍‌ ସନ୍‌ବଲ୍ଲଟ୍‌, ରାଜାରାଃ କାମିତାନ୍‌ ଅମ୍ମୋନିୟରେନ୍‌ ଟୋବିୟ ଓଡ଼ୋଃ ଆରବ୍‌ରେନ୍‌ ଗେଶମ୍‌, ନେଆଁ ଆୟୁମ୍‌କେଦ୍‌ତେ ଆଲେକେ ଲାନ୍ଦାତାନ୍‌ଲଃ ହିଁଣିକେଦ୍‌ତେ କାଜିକେଦ୍‌ଲେୟାକ, "ଆପେ ନେଆଁ ଚିନାଃ ଚିକା ତାନାପେ ? ଆପେ ଚିନାଃ ରାଜାରାଃ ବିରୁଧ୍‌ରେ ଲାଡ଼ାଇୟାପେ ?" 20 ଆଇଙ୍ଗ୍‌ ଇନ୍‌କୁକେ କାଜିକେଦ୍‌କଆଇଙ୍ଗ୍‌, "ସିର୍ମାରେନ୍‌ ପାର୍‌ମେଶ୍ୱାର୍‌ ଆଲେୟାଃ କାମି ପୁରାଏୟାଏ। ଆଲେ ଇନିୟାଃ ଦାସି ତାନ୍‌ଲେ, ଆଲେ ଆଡଃମିସା ବାଇରୁହାଡ଼୍‌ରାଃ କାମି ଏନେଟେଦ୍‌ ରିକାଏୟାଲେ। ମେନ୍‌ଦ ଯୀରୁଶାଲେମ୍‌ରେ ଆପେୟାଃ ଜେତାନ୍‌ ହିସା ବାନଃଆ ଚାଏ ଏନ୍‌ ଚେତାନ୍‌ରେ ଆମାଃ ଜେତାନ୍‌ ଆକ୍‌ତେୟାର୍‌ ଚାଏ ପାହାମଃରାଃ ବୁଗିନ୍‌ ହାଟି ବାନଃଆ।"