1 ଆବ୍ରାହାମ୍‌ଆଃ ଦିପିଲିରେ ସିଦା ଚିଲ୍‌କା ରିଙ୍ଗା ହବାକାନ୍‌ ତାଇକେନା, ଏନ୍‌ଲେକାଗି ଇସାକ୍‌ଆଃ ଦିପିଲିରେହ ରିଙ୍ଗା ହବାୟାନା। ଏନାମେନ୍ତେ ଇସାକ୍‌ ଗେରାର୍‌ ଦିଶୁମ୍‌ରେନ୍‌ ପାଲେଷ୍ଟାଇନ୍‌ ହଡ଼କଆଃ ରାଜା ଅବିମେଲେକ୍‌ତାଃତେ ସେନଃୟାନା। 2 ପ୍ରାଭୁ ଇସାକ୍‌କେ ଦାର୍ଶାନ୍‌ ଏମ୍‌କେଦ୍‌ତେ କାଜିକାଇ ତାଇକେନା, "ଆମ୍‌ ମିସାର୍‌ ଦିଶୁମ୍‌ତେ ଆଲମ୍‌ ସେନାଃ, ଆଇଙ୍ଗ୍‌ ଅକ ଦିଶୁମ୍‌ରେ ତାଇନଃ ନାଙ୍ଗ୍‌ କାଜିମାଇଙ୍ଗ୍‌, ଏନ୍‌ ଦିଶୁମ୍‌ତେ ସେନଃମେ ଓଡ଼ୋଃ ଏନ୍ତାଃରେ ତାଇନ୍‌ମେ। 3 ଆମ୍‌ ହୁଡିଙ୍ଗ୍‌ ଦିପିଲି ନାଙ୍ଗ୍‌ ନେ ଦିଶୁମ୍‌ରେଗି ତାଇନ୍‌ମେ, ଆଇଙ୍ଗ୍‌ ଆମାଃଲଃ ତାଇକେଦ୍‌ତେ ଆମ୍‌କେ ଆଶିଷ୍‌ମେୟାଁଇଙ୍ଗ୍‌। ଚିଆଃଚି ଆଇଙ୍ଗ୍‌ ଆମ୍‌କେ ଓଡ଼ୋଃ ଆମାଃ କିଲିକକେ ନେ ସବେନ୍‌ ଦିଶୁମ୍‌ ଏମାକଆଇଙ୍ଗ୍‌ ଓଡ଼ୋଃ ଆମାଃ ଆପୁ ଆବ୍ରାହାମ୍‌ତାଃରେ କିରିୟାକାଦ୍‌ତେୟାଃ ପୁରାଏୟାଇଙ୍ଗ୍‌। 4 ଆଇଙ୍ଗ୍‌ ସିର୍ମାରେନ୍‌ ଇପିଲ୍‌କ ଲେକା ଆମାଃ କିଲିକଇଙ୍ଗ୍‌ ପସାକଆ ଓଡ଼ୋଃ ଇନ୍‌କୁକେ ନେ ସବେନ୍‌ ଦିଶୁମ୍‌ ଏମାକଆଇଙ୍ଗ୍‌। ଆମାଃ କିଲିକଆଃ ହରାତେ ଅତେରେନ୍‌ ସବେନ୍‌ ହଡ଼କ ଆଶିଷ୍‌କ ନାମେୟା। 5 ଆଇଙ୍ଗ୍‌ ଆମ୍‌କେ ଆଶିଷ୍‌ମେୟାଁଇଙ୍ଗ୍‌, ଚିଆଃଚି ଆବ୍ରାହାମ୍‌ ଆଇଁୟାଃ କାଜି ଆୟୁମ୍‌କେଦ୍‌ତେ ଆଇଁୟାଃ ଆନ୍‌ଚୁ ଓଡ଼ୋଃ ନିୟାମ୍‌ ମାନାତିଙ୍ଗ୍‌କାଦାଏ।"

6 ଏନାତେ ଇସାକ୍‌ ଗେରାର୍‌ରେ ତାଇନ୍‌ୟାନା। 7 ଏନ୍‌ ଠାୟାଦ୍‌ରେନ୍‌ ହଡ଼କ ଇସାକ୍‌ରାଃ କୁଡ଼ି ରିବ୍‌କା ବିଷାଏରେ କୁଲି ତାଇକେନାକ ଇମ୍‌ତା ଇସାକ୍‌ କାଜିକ ତାଇକେନାଏ, "ଇନିଃ ଆଇଁୟାଃ ମିଶି ତାନିଃ।" ଇସାକ୍‌ ରିବ୍‌କାକେ ଆଇଁୟାଃ କୁଡ଼ି ତାନିଃ ମେନ୍ତେ କାଜି ନାଙ୍ଗ୍‌ ବର ତାଇକେନାଏ। ଚିୟାଃଚି ରିବ୍‌କା ପୁରାଃ ସୁନ୍ଦ୍‌ରୀ ତାଇକେନ୍‌ ହରାତେ, ହବାସାକାଅଃଆ ଇନିୟାଃ ଖାତିର୍‌ ଏନ୍‌ ଠାୟାଦ୍‌ରେନ୍‌ ହଡ଼କ ଆଇଁୟାଃ ଜୀଉ ଇଦିୟାକ ମେନ୍ତେ ଇସାକ୍‌ ବର ତାଇକେନାଏ। 8 ଏନ୍‌ ଠାୟାଦ୍‌ରେ ପୁରାଃ ଦିପିଲି ଜାକେଦ୍‌ ତାଇନ୍‌ୟାନ୍‌ ତାୟମ୍‌ତେ, ମୁସିଙ୍ଗ୍‌ ହୁଲାଙ୍ଗ୍‌ ପାଲେଷ୍ଟାଇନ୍‌ ହଡ଼କଆଃ ରାଜା ଅବିମେଲେକ୍‌ ଖିଡ଼୍‌କିଏତେ ଇସାକ୍‌ ଓଡ଼ୋଃ ରିବ୍‌କାକେ ଦୁଲାଡ଼ଃତାନ୍‌ ନେଲ୍‌କେଦ୍‌କିନାଏ। 9 ଅବିମେଲେକ୍‌ ଇସାକ୍‌କେ କେଡ଼ାକେଦ୍‌ତେ କାଜିକିୟା, "ଇନିଃ ସାର୍‌ତିଗି ଆମାଃ କୁଡ଼ି ତାନିଃ ! ତାବ୍‌ଦ ଆମ୍‌ ଚିନାଃମେନ୍ତେ ଇନିଃ ଆଇଁୟାଃ ମିଶି ତାନିଃ ମେନ୍ତେମ୍‌ କାଜିକେଦା ?"

ଇମ୍‌ତା ଇସାକ୍‌ କାଜିରୁହାଡ଼୍‌କିୟାଏ, "ହବାସାକାଅଃଆ, ଇନିୟାଃ ଖାତିର୍‌ ଆଇଁୟାଃ ଜୀଉ ସେନାଃ ମେନ୍ତେ ଉଡ଼ୁଃକେଦ୍‌ଲଃ ବର ତାଇକେନାଇଙ୍ଗ୍‌।"

10 ଅବିମେଲେକ୍‌ କାଜିକିୟାଏ, "ଆମ୍‌ ଆଲେଲଃ ନେ'ଲେକା ଚିନାଃମେନ୍ତେମ୍‌ ରିକାକେଦା ? ଜେତାଏ ଆମାଃ କୁଡ଼ିଲଃ ହଡ଼୍‌ମରାଃ ଏତ୍‌କାନ୍‌ କାମି ରିକାକେଦ୍‌ ରେଦ, ଆଲେ ସବେନ୍‌କ ଚିଟାକାନ୍‌ତେୟାଃଲେ।" 11 ଏନ୍ତେ ଅବିମେଲେକ୍‌ ହଡ଼କକେ ହୁକୁମ୍‌କେଦ୍‌ତେ କାଜିକେଦ୍‌କଆ, "ଜେତାଏ ନେ ହଡ଼କେ ଚାଏ ଆୟାଃ କୁଡ଼ିକେ ଜୁଟିଦି ରେଦ, ଇନିଃ ଗନଏଃ ସାଜାଇ ନାମେୟାଏ।"

12 ଇସାକ୍‌ ଏନ୍‌ ଦିଶୁମ୍‌ରେ ଲୟଙ୍ଗ୍‌ କାମି ରିକାକେଦାଏ ଓଡ଼ୋଃ ଏନ୍‌ ବାରାଷ୍‌ରେ ଶାଅଗୁନା ଆଦାୟ ନାମ୍‌କେଦାଏ, ଚିଆଃଚି ପ୍ରାଭୁ ଇନିଃକେ ଆଶିଷ୍‌କିୟା। 13 ଏନାମେନ୍ତେ ଇନିୟାଃ ସାମ୍ପାତି ପସାଇଦିୟାନା ଓଡ଼ୋଃ ଇନିଃ ପୁରାଃଗି କିସାଁଣ୍‌ୟାନା। 14 ଇନିୟାଃ ଗୋଟ୍‌ରେ ପୁରାଃଗି ଆସୁଲ୍‌ ଜାଁତୁକ ହବାୟାନା ଓଡ଼ୋଃ ଦାସିକ ପୁରାଃଗି ତାଇକେନାକ, ଏନାମେନ୍ତେ ପାଲେଷ୍ଟାଇନ୍‌ ହଡ଼କ ଇନିଃକେ ହିସିଙ୍ଗାକିୟାକ। 15 ଓଡ଼ୋଃ ଆୟାଃ ଆପୁ ଆବ୍ରାହାମ୍‌ଆଃ ଦିପିଲିରେ ଆପୁତେୟାଃ ଦାସିକ ଅକ କୁଆଁ ଉରାକାଦ୍‌ ତାଇକେନାକ, ଏନ୍‌ କୁଆଁକକେ ପାଲେଷ୍ଟାଇନ୍‌ ହଡ଼କ ତପା ପାଟାଅକେଦାକ।

16 ଏନ୍ତେ ଅବିମେଲେକ୍‌ ଇସାକ୍‌କେ କାଜିକିୟା, "ଆମ୍‌ ଆଲେୟାଃ ଦିଶୁମ୍‌ଏତେ ସେନଃମେ। ଚିୟାଃଚି ଆମ୍‌ ଆଲେତାଃଏତେ ପୁରାଃଗି ପେଡ଼େୟାନ୍‌ ହବାୟାନ୍‌ଗିୟାମ୍‌।" 17 ଏନ୍ତେ ଇସାକ୍‌ ଏନ୍‌ ଠାୟାଦ୍‌ଏତେ ସେନଃୟାନାଏ ଓଡ଼ୋଃ ଗେରାର୍‌ ନୁତୁମ୍‌ ଠାୟାଦ୍‌ରେ କୁମ୍ବା ବାଇକେଦ୍‌ତେ ତାଇନ୍‌ୟାନା। 18 ଆୟାଃ ଆପୁ ଆବ୍ରାହାମ୍‌ଆଃ ଦିପିଲିରେ ଉରାକାନ୍‌ କୁଆଁକକେ ପାଲେଷ୍ଟାଇନ୍‌ ହଡ଼କ ଆବ୍ରାହାମ୍‌ଆଃ ଗନଏଃ ତାୟମ୍‌ତେ ତପା ପାଟାଅକାଦ୍‌ ତାଇକେନାକ, ଏନ୍‌ କୁଆଁକକେ ଇସାକ୍‌ ଆଡଃମିସା ଉର୍‌କେଦାଏ ଓଡ଼ୋଃ ଆପୁତେ ନୁତୁମାକାଦ୍‌ ତାଇକେନ୍‌ ଲେକାଗି ଏନ୍‌ କୁଆଁକକେ ନୁତୁମ୍‌କେଦା।

19 ଇସାକ୍‌ଆଃ ଦାସିକ ଏନ୍‌ ଗେରାର୍‌ ପାର୍‌ଗାନ୍‌ରାଃ ସାମାନ୍‌ ଠାୟାଦ୍‍ରେଗି ମିଆଁଦ୍‌ ନାୱା କୁଆଁ ଉର୍‌କେଦ୍‌ତେ ସେତେଙ୍ଗ୍‌ ଲିଙ୍ଗିୟଃତାନ୍‌ ଦାଆଃ ନାମ୍‌କେଦାକ। 20 ମେନ୍‌ଦ ଗେରାର୍‌ରେନ୍‌ ମିଣ୍ଡିଗୁପିକ ହିଜୁଃକେଦ୍‌ତେ ଇସାକ୍‌ଆଃ ମିଣ୍ଡିଗୁପି ହଡ଼କଲଃ ଏପ୍‌ରାଙ୍ଗ୍‌କେଦ୍‌ତେ କାଜିକେଦାକ, "ନେ ଦାଆଃ ଆଲେୟାଃ ତାନାଃ।" ଏନାମେନ୍ତେ ଇସାକ୍‌ ଏନ୍‌ କୁଆଁରାଃ ନୁତୁମ୍‌ ଏସେକ୍‌* ଦହକେଦାଏ। ଚିୟାଃଚି ଇନ୍‌କୁ ଇନିଃଲଃ ଏପ୍‌ରାଙ୍ଗ୍‌କେନାକ।

21 ଏନ୍ତେ ଇସାକ୍‌ ଆୟାଃ ଦାସିକକେ ଆଡଃମିଆଦ୍‌ କୁଆଁ ଉର୍‌ ଇଚିକେଦ୍‌କଆ, ଓଡ଼ୋଃ ଏନ୍‌ କୁଆଁ ନାଗେନ୍ତେ ହଗି ଏପ୍‌ରାଙ୍ଗ୍‌ ହବାୟାନା। ଏନାମେନ୍ତେ ଇସାକ୍‌ ଏନ୍‌ ଠାୟାଦ୍‌ରାଃ ନୁତୁମ୍‌ ସିଟ୍‌ନା* ଦହକେଦାଏ। 22 ଇନିଃ ଏନ୍ତାଃଏତେ ସେନଃୟାନା ଓଡ଼ୋଃ ଏଟାଃତାଃରେ କୁଆଁ ଉର୍‌କେଦାଏ। ଏନ୍‌ କୁଆଁ ନାଗେନ୍ତେ ଜେତାଏ କାକ ଏପ୍‌ରାଙ୍ଗ୍‌କେନା, ଏନାତେ ଇନିଃ ଏନ୍ତାଃରାଃ ନୁତୁମ୍‌ ରେହୋବତ୍‌* ଦହକେଦାଏ। ଚିୟାଃଚି ଇନିଃ କାଜିକେଦାଏ, "ନାହାଁଃ ପ୍ରାଭୁ ଆଲେକେ ଚାକାର୍‌ ଠାୟାଦ୍‌ ଏମାକାଦ୍‌ଲେୟାଏ, ଆଲେ ନେ ଦିଶୁମ୍‌ରେ ପସାଇଦିଅଃଆଲେ।"

23 ଏନ୍ତାଃଏତେ ଇନିଃ ବେର୍‌ଶେବାତେ ସେନଃୟାନା। 24 ଏନ୍‌ ନିଦାରେଗି ପ୍ରାଭୁ ପାର୍‌ମେଶ୍ୱାର୍‌ ଇସାକ୍‌କେ ଦାର୍ଶାନ୍‌ରେ କାଜିକିୟା, "ଆଇଙ୍ଗ୍‌ ଆମାଃ ଆପୁ ଆବ୍ରାହାମ୍ଆଃ ପାର୍‌ମେଶ୍ୱାର୍‌ ତାନିଙ୍ଗ୍‌। ଆଲମ୍‌ ବରୟା, ଚିୟାଃଚି ଆଇଁୟାଃ ଦାସି ଆବ୍ରାହାମ୍‌ଆଃ ହରାତେ ଆଇଙ୍ଗ୍‌ ଆମ୍‌କେ ଆଶିଷ୍‌ମେୟାଁଇଙ୍ଗ୍‌ ଓଡ଼ୋଃ ଆମାଃ କିଲିକଇଙ୍ଗ୍‌ ପସାକଆ।" 25 ଇସାକ୍‌ ଏନ୍ତାଃରେ ମିଆଁଦ୍‌ ବେଦି ବାଇକେଦ୍‌ତେ ପ୍ରାଭୁଆଃ ନୁତୁମ୍‌ରେ ବିନ୍ତିକେଦା। ଇନିଃ ଏନ୍ତାଃରେ କୁମ୍ବା ବାଇକେଦାଏ ଓଡ଼ୋଃ ଆୟାଃ ଦାସିକ ମିଆଁଦ୍‌ କୁଆଁ ଉର୍‌କେଦାକ।

26 ମୁସିଙ୍ଗ୍‌ ଅବିମେଲେକ୍‌ ଆହୁଷତ୍‌ ନୁତୁମ୍‌ ଆୟାଃ ଗାତିକେ ଓଡ଼ୋଃ ସିପାଇକଆଃ ଆଗୁଆଇ ଫିଖଲ୍‌କେ ମିସାତେ ଇଦିକେଦ୍‌କିନା ଓଡ଼ୋଃ ଗେରାର୍‌ଏତେ ଇସାକ୍‌ତାଃକ ସେନଃୟାନା। 27 ଇସାକ୍‌ ଇନ୍‌କୁକେ କୁଲିକେଦ୍‌କଆ, "ଆପେଦ ଆଇଁୟାଃ ଚେତାନ୍‌ରେ ହିସିଙ୍ଗାୟାନାପେ ଓଡ଼ୋଃ ଆପେତାଃଏତେ ହାର୍‌କେଦିୟାଁପେ, ନାହାଁଃ ଚିନାଃମେନ୍ତେପେ ହିଜାକାନା ?"

28 ଇନ୍‌କୁ କାଜିରୁହାଡ଼୍‌କିୟାକ, "ପ୍ରାଭୁ ଆମାଃଲଃ ମେନାଇୟା, ନେଆଁ ଆଲେ ସାର୍‌ତିଗିଲେ ସାରିକେଦା। ଏନାମେନ୍ତେ ଆବୁଆଃ ଥାଲାରେ କିରିୟାକେଦ୍‌ତେ ମିଆଁଦ୍‌ ରାଜିନାମା ବାଇ ନାଗେନ୍ତେଲେ ସାନାଙ୍ଗ୍‌କେଦା। 29 ଆଲେ ଆମାଃ ବୁଗିନାଃ ବାଗିକେଦ୍‌ତେ ଏତ୍‌କାନାଃ କାଲେ ରିକା, ମେନ୍‌ଦ ଆମ୍‌କେ ଜୀଉସୁକୁତେ ବିଦା କେଦ୍‌ମେୟାଁଲେ। ଆମ୍‌ ଏନ୍‌ଲେକାଗି ଆଲେୟାଃ ଏତ୍‌କାନାଃ କାମ୍‌ ରିକାଏୟା ମେନ୍ତେ କିରିୟାକେଦ୍‌ତେ ଆଲେଲଃ ମିଆଁଦ୍‌ ରାଜିନାମା ରିକାଏମେ। ଆମ୍‌ଦ ମିହୁଁଡ଼୍‌ ପ୍ରାଭୁଆଃ ଆଶିଷ୍‌ ନାମେ ଲେକାନ୍‌ନିଃ ତାନ୍‌ମେ।" 30 ଇସାକ୍‌ ଇନ୍‌କୁ ନାଗେନ୍ତେ ଜଜମାଃ ବାଇକେଦାଏ ଓଡ଼ୋଃ ଇନ୍‌କୁ ଜମ୍‌କେଦାକ। 31 ଏଟାଃ ହୁଲାଙ୍ଗ୍‌ ସେତାଃ ଇଦାନ୍‌ରେ ଇନ୍‌କୁ ମିହୁଁଡ଼୍‌ ଆଡଃମିହୁଡ଼୍‌ଲଃ କିରିୟାକେଦ୍‌ତେ ରାଜିନାମା ବାଇକେଦାକ। ଏନ୍ତେ ଇସାକ୍‌ ଇନ୍‌କୁକେ ବିଦାକେଦ୍‌କଆ ଓଡ଼ୋଃ ଇନ୍‌କୁ ଜୀଉସୁକୁତେ ସେନଃୟାନାକ।

32 ଏନ୍‌ ହୁଲାଙ୍ଗ୍‌ଗି ଇସାକ୍‌ଆଃ ଦାସିକ ହିଜୁଃକେଦ୍‌ତେ ଆକ ଉର୍‌ତାଇକେନ୍‌ କୁଆଁ ବିଷାଏରେ କାଜିକିୟାକ, "ଆଲେ ଦାଆଃ ନାମ୍‌କାଦାଲେ।" 33 ଏନାମେନ୍ତେ ଇନିଃ ଏନ୍‌ କୁଆଁରାଃ ନୁତୁମ୍‌ ଶେବା ଦହକେଦାଏ ଓଡ଼ୋଃ ତିସିଙ୍ଗ୍‌ ଜାକେଦ୍‌ ଏନ୍‌ ନାଗାର୍‌, ବେର୍‌ଶେବା ନୁତୁମ୍‌ତେ ସାରିୟଃତାନା।

34 ଏଷୌରାଃ ବାର୍‌ହିସି ବାରାଷ୍ ହବାୟାନ୍‌ ଇମ୍‌ତା ଇନିଃ ବାରିୟା ହିତ୍ତିୟ କୁଡ଼ିକିନ୍‌କେ ଆଣ୍‌ଦିୟାନା। ମିଆଁଦ୍‌ନିଃ ବେରିରେନ୍‌ ଯିହୁଦୀତ୍‌ ନୁତୁମ୍‌ କୁଡ଼ି ତାଇକେନା ଆଡଃମିଆଦ୍‌ନିଃ ଏଲୋନ୍‌ରେନ୍‌ ବାସ୍‌ମତ୍‌ ନୁତୁମ୍‌ କୁଡ଼ି ତାଇକେନା। 35 ମେନ୍‌ଦ ଇନ୍‌କିନ୍‌ ଇସାକ୍‌ ଓଡ଼ୋଃ ରିବ୍‌କାରାଃ ମନ୍‌ରେ ଦୁକୁ ଏମଃରାଃ କାଜିକିନ୍‌ ହବାୟାନା।