1 ଆବ୍ରାହାମ୍‌ ମମ୍ରିତାଃରେୟାଃ ପୁରାଃ ମାରାଙ୍ଗ୍‌ ଦାରୁ ବୁଟାରେ କୁମ୍ବା ବାଇୟାକାଦ୍‌ ତାଇକେନା। ଆବ୍ରାହାମ୍‌ ଆୟାଃ କୁମ୍ବା ଦୁହାର୍‌ତାଃରେ ଦୁବାକାନ୍‌ ତାଇକେନାଏ ଇମ୍‌ତା ଜେଟ୍‌ ସିଙ୍ଗିରାଃ ତିକିନ୍‌ସିଙ୍ଗି ତାଇକେନା ଓଡ଼ୋଃ ମୁସିଙ୍ଗ୍‌ ହୁଲାଙ୍ଗ୍‌ ପ୍ରାଭୁ ଇନିଃକେ ଦାର୍ଶାନ୍‌ ଏମ୍‌କିୟାଏ। 2 ଇନିଃ ଆପିୟା ହଡ଼କକେ ଆୟାଃ ଆୟାର୍‌ରେ ତିଙ୍ଗୁକାନ୍‌ ନେଲ୍‌କେଦ୍‌କଆଏ ଓଡ଼ୋଃ ନେଲ୍‌ ତର୍‌ସାଗି ଇନିଃ କୁମ୍ବାରାଃ ଦୁହାର୍‌ତାଃଏତେ ନିର୍‌ ବିରିଦ୍‌ୟାନ୍‌ଲଃ ଇନ୍‌କୁଲଃ ନେପେଲ୍‌ ନାଙ୍ଗ୍‌ ସେନଃୟାନାଏ ଓଡ଼ୋଃ ଅତେରେ ଅମ୍ବାୟାନ୍‌ଲଃ ଜହାର୍‌ କେଦ୍‌କଆଏ। 3 ଇନିଃ ଇନ୍‌କୁକେ କାଜିକେଦ୍‌କଆ, "ହେ ପ୍ରାଭୁ, ଆପେୟାଃ ଆଇଁୟାଃ ଚେତାନ୍‌ରେ ଲିନିବୁଇ ମେନାଃ ରେଦ, ଦାୟାକେଦ୍‌ତେ ନେ ଦାସିରାଃ ଠାୟାଦ୍‌ରେ କାଟିଃ ଘାଡ଼ିକାଦ୍‌ ନାଙ୍ଗ୍‌ ତାଇନ୍‌ପେ। 4 ବିନ୍ତିପେ ତାନାଇଙ୍ଗ୍‌, ଆଇଙ୍ଗ୍‌କେ ଆପେୟାଃ କାଟା ଆବୁଙ୍ଗ୍‌ ନାଙ୍ଗ୍‌ କାଟିଃଲେକା ଦାଆଃ ଆଉ ଇଚିଙ୍ଗ୍‌ପେ, ଏନ୍ତେ ଆପେ ସବେନ୍‌କ କାଟା ଆବୁଙ୍ଗ୍‌କେଦ୍‌ତେ ନେ ଦାରୁ ଉମ୍ବୁଲ୍‌ରେ ରୁଡ଼ୁନ୍‌ପେ। 5 ଓଡ଼ୋଃ ଆପେ ଆପେୟାଃ ଦାସିତାଃ ହିଜୁଃକାନାପେ, ଏନାମେନ୍ତେ ଆଇଙ୍ଗ୍‌କେ ଆପେନାଙ୍ଗ୍‌ କାଟିଃଲେକା ଜମେୟାଃ ଆଉ ଇଚିଙ୍ଗ୍‌ପେ, ଏନ୍ତେ ଜମ୍‌ ଚାବାକେଦ୍‌ତେ ପେଡ଼େଃ ନାମ୍‌କେଦ୍‌ଲଃ ଆପେ ସେନ୍‌ହରାଏପେ।"

ଏନ୍ତେ ଇନ୍‌କୁ କାଜିରୁହାଡ଼୍‌କିୟାକ, "ବୁଗିନ୍‌ କାଜିତାନାଃ, ଜୁ ଆମ୍‌ କାଜିତାନ୍‌ ଲେକାଗି ରିକାଏମେ।"

6 ଏନ୍ତେ ଆବ୍ରାହାମ୍‌ ଜାଲ୍‌ଦିଗି କୁମ୍ବା ଭିତାର୍‌ତେ ବଲୟାନା ଓଡ଼ୋଃ ସାରାକେ କାଜିକିୟା, "ହିସି କେ.ଜି ବୁଗିନ୍‌ ମାଏଦା ସିପୁଦ୍‌କେଦ୍‌ତେ ଜାଲ୍‌ଦିଗି ହଲଙ୍ଗ୍‌ ବାଇୟେମେ।"

7 ଏନ୍ତେ ଆବ୍ରାହାମ୍‌ ଗୋଟ୍‌ ସେନ୍‌କେଦ୍‌ତେ ମିଆଁଦ୍‌ ବୁଗିନ୍‌ ବାଛାହନ୍‌ ଆଉକେଦ୍‌ତେ ଆୟାଃ ଦାସିକେ ଏମ୍‌କିୟା, ଏନ୍ତେ ଇନିଃ ଏନାକେ ଜାଲ୍‌ଦିଗି ବାଇକେଦ୍‌ତେ ଆନ୍ଦାଃକେଦା। 8 ଇନିଃ ଦହି, ତଆ ଓଡ଼ୋଃ ଗୋଟ୍‌ରେନ୍‌ ଜାଁତୁରାଃ ଆନ୍ଦାଃମାସ୍‌ ଆଉକେଦ୍‌ତେ ଇନ୍‌କୁଆଃ ଆୟାର୍‌ରେ ଦହକେଦା ଓଡ଼ୋଃ ଇନ୍‌କୁ ଜମ୍‌ତାଇକେନ୍‌ ଇମ୍‌ତା ଇନିଃ ଦାରୁ ଉମ୍ବୁଲ୍‌ରେ ତିଙ୍ଗୁକାନ୍‌ ତାଇକେନା।

9 ଏନ୍ତେ ଇନ୍‌କୁ ଇନିଃକେ କୁଲିକିୟାକ, "ଆମାଃ କୁଡ଼ି ସାରା କତାଃରେ ମେନାଇୟା ?"

ଇନିଃ କାଜିକେଦ୍‌କଆଏ, "ଇନିଃ କୁମ୍ବାରେ ମେନାଇୟା।"

10 ଇନ୍‌କୁଏତେ ମିହୁଡ଼୍‌ କାଜିକିୟାଏ, "ହିଜୁଃ ବାରାଷ୍‌ ନେ ଦିପିଲିରେ ଆଡଃମିସାଇଙ୍ଗ୍‌ ହିଜୁଃରୁହାଡ଼ା, ଇମ୍‌ତା ସାରାରାଃ କୟଙ୍ଗ୍‌ରେ ମିଆଁଦ୍‌ କଡ଼ାହନ୍‌ ତାଇନାଃଏ।"

ନେ କାଜି, ସାରା କୁମ୍ବାରେୟାଃ ଦୁଆର୍‌ ହେପାଦ୍‌ତାଃରେ ତିଙ୍ଗୁକେଦ୍‌ତେ ଆୟୁମ୍‌ ତାଇକେନା। 11 ଏନ୍‌ ଦିପିଲିରେ ଆବ୍ରାହାମ୍‌ ଓଡ଼ୋଃ ସାରା ପୁରାଃଗି ହାଡ଼ାମ୍ ବୁଡିକାନ୍‌ ତାଇକେନାକିନ୍‌ ଓଡ଼ୋଃ ସାରାରାଃ ହନ୍‌ଜାନାମ୍‌ ନେଣ୍ଡା ଚାବାକାନ୍‌ ତାଇକେନା। 12 ଏନାମେନ୍ତେ ସାରା ଲାନ୍ଦାତାନ୍‌ଲଃ ମନ୍‌ରେ ଉଡ଼ୁଃକେଦାଏ, "ନେ ବୁଡିତାନ୍‌ ଦିପିଲିରେ ସାର୍‌ତିଗି ଚିନାଃ ଆଇଙ୍ଗ୍‌ ହନ୍‌ ଜାନାମ୍‌ରାଃ ରାସ୍‌କା ନାମ୍‌ ଦାଡ଼ିୟାଇଙ୍ଗ୍‌ ? ଚିୟାଃଚି ଆଇଁୟାଃ ଗମ୍‌କେହଁଗିଦ ହାଡ଼ାମ୍‌କାନାଏ।"

13 ଇମ୍‌ତା ପ୍ରାଭୁ ଆବ୍ରାହାମ୍‌କେ କାଜିକିୟା, "ସାରା ଚିନାଃମେନ୍ତେ ଲାନ୍ଦାକେଦା ? ଇନିଃ ଚିନାଃମେନ୍ତେ କାଜିକେଦା, ବୁଡିୟଃତାନ୍‌ ଦିପିଲିରେ ସାର୍‌ତିଗି ଚିନାଃ ଆଇଁୟାଃ ହନ୍‌ ଜାନାମଃଆଏ ? 14 ପ୍ରାଭୁଆଃ ଆୟାର୍‌ରେ ଅକ କାମି କା ହବାସାକାଅଃଆ ? ହିଜୁଃ ବାରାଷ୍‌ ନେ ଦିପିଲିରେ ଆଡଃମିସାଇଙ୍ଗ୍‌ ହିଜୁଃରୁହାଡ଼ା, ଇମ୍‌ତା ସାରାରାଃ କୟଙ୍ଗ୍‌ରେ କଡ଼ାହନ୍‌ ମିଆଁଦ୍‌ ତାଇନାଏ।"

15 ଏନ୍ତେ ସାରା ବରତାନ୍‌ଲଃ କାଜିକେଦାଏ, "ଆଇଙ୍ଗ୍‌ କାଇଙ୍ଗ୍‌ ଲାନ୍ଦା।"

ମେନ୍‌ଦ ଇନିଃ କାଜିକିୟାଏ, "ଆମ୍‌ ସାର୍‌ତିଗି ଲାନ୍ଦା'କାଦାମ୍‌।"

16 ଏନ୍ତେ ଏନ୍‌ ହଡ଼କ ଏନ୍‌ ଠାୟାଦ୍‌କେ ବାଗିକେଦ୍‌ତେ ସଦୋମ୍‌ ନାଗାର୍‌ତେ ସେନଃ ନାଗେନ୍ତେ ଅଡଙ୍ଗ୍‌ୟାନାକ। ଆବ୍ରାହାମ୍‌ ଇନ୍‌କୁଲଃ ସାଙ୍ଗାତିରେ ହରା ଉଦୁବ୍‌ ନାଗେନ୍ତେ ଅଡଙ୍ଗ୍‌ୟାନା। 17 ପ୍ରାଭୁ କାଜିକେଦାଏ, "ଆଇଙ୍ଗ୍‌ ଅକ କାମି ରିକା ନାଗେନ୍ତେଇଙ୍ଗ୍‌ ସାନାଙ୍ଗ୍‌, ଏନାଚି ଆବ୍ରାହାମ୍‌ତାଃଏତେ ଉକୁଇୟାଇଙ୍ଗ୍‌ ? 18 ଆବ୍ରାହାମ୍‌ତାଃଏତେ ମିଆଁଦ୍‌ ମାରାଙ୍ଗ୍‌ ଓଡ଼ୋଃ ପୁରାଃ ପେଡ଼େୟାନ୍‌ କିଲିକ ହବାଅଃଆ, ଏନ୍ତେ ଅତେରେନ୍‌ ସବେନ୍‌ କିଲିକ ଆୟାଃତାଃଏତେ ଆଶିଷ୍‌କ ନାମେୟା। 19 ଜେ'ଲେକାଚି ହିଜୁଃତାନ୍‌ ପିଢ଼ିରେନ୍‌ ଆୟାଃ ହନ୍‌ଗାଁଣା ଓଡ଼ୋଃ ଅଡ଼ାଃରେନ୍‌ ହଡ଼କ ଧାର୍‌ମାନ୍‌ ଓଡ଼ୋଃ ନ୍ୟାୟ ରିକାକେଦ୍‌ତେ ପ୍ରାଭୁଆଃ ହରାରେକ ସେସେନ୍‌କା ମେନ୍ତେ ଇନିଃ ଇନ୍‌କୁକେ ଇତୁକଆ, ଏନାମେନ୍ତେ ଆଇଙ୍ଗ୍‌ ଇନିଃକେଇଙ୍ଗ୍‌ ସାଲାକିୟା, ଏନାରେ ପ୍ରାଭୁ ଆବ୍ରାହାମ୍‌ଆଃ ବିଷାଏରେ କାଜିକାଦ୍‌ତେୟାଃ ପୁରାଏୟାଏ।"

20 ପ୍ରାଭୁ ଆଡଃଗି ଆବ୍ରାହାମ୍‌କେ କାଜିକିୟା, "ସଦୋମ୍‌ ଓଡ଼ୋଃ ଗମ୍‌ରା ବିରୁଧ୍‌ରେ ଏତ୍‌କାନ୍‌ କାଜିରାଃ ସାଡ଼ି ପୁରାଃଗି ଆୟୁମଃ ତାନା। ଚିୟାଃଚି ଇନ୍‌କୁଆଃ ପାପ୍‌କ ପୁରାଃଗି ହବାକାନା। 21 ଇନ୍‌କୁଆଃ କାଜିକାମି ବିରୁଧ୍‌ରେ ଆଇଙ୍ଗ୍‌ ଅକ ଏତ୍‌କାନ୍‌ କାଜି ଆୟୁମ୍‌କାଦାଇଙ୍ଗ୍‌, ଏନା ସାର୍‌ତି ତାନାଃଚି ନାହାଁଲାଃ, ଏନା ସାରି ନାଗେନ୍ତେ ଲାତାର୍‌ତେଇଙ୍ଗ୍‌ ସେନା।"

22 ଏନ୍‌ତାୟମ୍‌ତେ ଏନ୍‌ ବାର୍‌ହଡ଼୍‌କିନ୍‌ ଏନ୍ତାଃଏତେ ରୁହାଡ଼୍‌କେଦ୍‌ତେ ସଦୋମ୍‌ ନାଗାର୍‌ତେ ସେନଃୟାନାକିନ୍‌। ମେନ୍‌ଦ ଆବ୍ରାହାମ୍‌ ପ୍ରାଭୁଆଃ ଆୟାର୍‌ରେ ତିଙ୍ଗୁଗି ତାଇନ୍‌ୟାନା। 23 ଆବ୍ରାହାମ୍‌ ପ୍ରାଭୁଆଃ ହେପାଦ୍‌ତେ ସେନ୍‌କେଦ୍‌ତେ କୁଲିକିୟା, "ଆମ୍‌ ଚିନାଃ ଏତ୍‌କାନ୍‌ ହଡ଼କଲଃ ଧାର୍‌ମାନ୍‌ ହଡ଼କକେ ଜିଅନ୍‌କଆମ୍‌ ? 24 ହବାସାକାଅଃଆ, ଏନ୍‌ ନାଗାର୍‌ରେ ପାଚାଶ୍‌ ଝାନ୍‌ ଧାର୍‌ମାନ୍‌ ହଡ଼କ ମେନାକଆ, ଆମ୍‌ ଏନ୍‌ ପାଚାଶ୍‌ ଝାନ୍‌ ଧାର୍‌ମାନ୍‌ ହଡ଼କ ନାଗେନ୍ତେ ଏନ୍‌ ନାଗାର୍‌କେ ଛାମା କା ଏମ୍‌କେଦ୍‌ତେ, ଚିନାଃ ଜିଅନ୍‌ ରିକାଏୟାମ୍‌ ? 25 ଏତ୍‌କାନ୍‌ ହଡ଼କଲଃ ଧାର୍‌ମାନ୍‌ ହଡ଼କକେ ଜିଅନ୍‌ ତେୟାଃ କା ବୁଗିନାଃ। ଚିୟାଃଚି ଧାର୍‌ମାନ୍‌ ହଡ଼କେ ଏତ୍‌କାନ୍‌ ହଡ଼ଲଃ ଜକାତେୟାଃ ଆମାଃତାଃଏତେ ସାଙ୍ଗିନ୍‌ରେ ତାଇନ୍‌କା। ଗଟା ଅତେରେନ୍‌ ବିଚାର୍‌ନିଃ ଚିନାଃ ନ୍ୟାୟ ବିଚାର୍‌ କାଏଚି ରିକାଏୟା ?"

26 ପ୍ରାଭୁ କାଜିରୁହାଡ଼୍‌କିୟା, "ଆଇଙ୍ଗ୍‌ ସଦୋମ୍‌ ନାଗାର୍‌ରେ ପାଚାଶ୍‌ ଝାନ୍‌ ଧାର୍‌ମାନ୍‌ ହଡ଼ ନାମ୍‌କରେଦ, ଇନ୍‌କୁ ନାଗେନ୍ତେ ଏନ୍‌ ଗଟା ନାଗାର୍‌କେ ଛାମାକେଦ୍‌ତେ ଜିଅନ୍‌ କାଇଙ୍ଗ୍‌ ରିକାଏୟା।"

27 ଆବ୍ରାହାମ୍‌ ଆଡଃମିସା କାଜିରୁହାଡ଼୍‌କିୟାଏ, "ଆଇଙ୍ଗ୍‌ ଧୁଡ଼ି ଓଡ଼ୋଃ ତରେକ୍‌ ଲେକାନ୍‌ ହଡ଼ ତାନିଙ୍ଗ୍‌ରେହଗି, ହେ ପ୍ରାଭୁ, ଆଇଙ୍ଗ୍‌ ଆମାଃଲଃ ଏନ୍‌ କାଜିକେଗି ଜାଗାର୍‌ତାନ୍‌ ହରାତେ ଛାମା ଏମାଇଙ୍ଗ୍‌ମେ। 28 ହବାସାକାଅଃଆ, ଏନ୍‌ ନାଗାର୍‌ରେ ପାଚାଶ୍‌ ଝାନ୍‌ଏତେ ମଣେୟାଁ ଧାର୍‌ମାନ୍‌ ହଡ଼ କାକ ତାଇନ୍‌ରେଦ, ଏନ୍‌ ମଣେୟାଁ ହଡ଼କ କାମ୍‌ତିୟଃ ହରାତେ ଚିଆଃ ଏନ୍‌ ନାଗାର୍‌କେ ଜିଅନ୍‌ ରିକାୟାମ୍‌ ?"

ପ୍ରାଭୁ କାଜିକିୟାଏ, "ଆଇଙ୍ଗ୍‌ ବାର୍‌ହିସି ମଣେୟାଁ ହଡ଼ ଧାର୍‌ମାନ୍‌ ନାମ୍‌କରେହଗି, ଏନ୍‌ ନାଗାର୍‌କେ କାଇଙ୍ଗ୍‌ ଜିଅନ୍‌ ରିକାଏୟା।"

29 ଆବ୍ରାହାମ୍‌ ଆଡଃଗି ଇନିଃକେ କାଜିକିୟା, "ହେ ପ୍ରାଭୁ ଏନ୍ତାଃରେ ବାର୍‌ହିସି ଧାର୍‌ମାନ୍‌ ହଡ଼କ ନାମଃରେ।" ପ୍ରାଭୁ କାଜିକିୟାଏ, "ଏନ୍‌ ବାର୍‌ହିସି ଧାର୍‌ମାନ୍‌ ହଡ଼ ନାଗେନ୍ତେ ଆଇଙ୍ଗ୍‌ ଏନ୍‌ ନାଗାର୍‌କେ କାଇଙ୍ଗ୍‌ ଜିଅନ୍‌ ରିକାୟା।"

30 ଆଡଃଗି ଆବ୍ରାହାମ୍‌ କାଜିକିୟାଏ, "ହେ ପ୍ରାଭୁ, କାମ୍‌ ଖିସ୍‌ଅଃ ରେଦ ଆଡଃଗି କୁଲି ସାନାଙ୍ଗ୍‌ତାନିଙ୍ଗ୍‌, ଏନ୍ତାଃରେ ତିରିଶ୍‌ ଝାନ୍‌ ଏସ୍‌କାର୍‌ ତାଇନଃରେ ?"

ପ୍ରାଭୁ କାଜିରୁହାଡ଼୍‌କିୟାଏ, "ଆଇଙ୍ଗ୍‌ ତିରିଶ୍‌ ଝାନ୍‌ ଧାର୍‌ମାନ୍‌ ହଡ଼ ନାମ୍‌କ ରେଦ, ଏନ୍‌ ନାଗାର୍‌କେ କାଇଙ୍ଗ୍‌ ଜିଅନ୍‌ ରିକାୟା।"

31 ଆବ୍ରାହାମ୍‌ ଆଡଃଗି କାଜିକିୟା, "ହେ ପ୍ରାଭୁ ଆମାଃଲଃ ଏନ୍‌ କାଜିକେଗି ଦହରାଅତାନ୍‌ ହରାତେ ଛାମା ଏମାଇଙ୍ଗ୍‌ମେ, ହବାସାକାଅଃଆ ଏନ୍ତାଃରେ ମିଦ୍‌ହିସି ଧାର୍‌ମାନ୍‌ ହଡ଼ ନାମଃରେ।"

ପ୍ରାଭୁ କାଜିକିୟାଏ, "ଏନ୍‌ ମିଦ୍‌ହିସି ଧାର୍‌ମାନ୍‌ ହଡ଼ ନାଗେନ୍ତେ ଆଇଙ୍ଗ୍‌ ଏନ୍‌ ନାଗାର୍‌କେ ଜିଅନ୍‌ କାଇଙ୍ଗ୍‌ ରିକାୟା।"

32 ଟୁଣ୍ଡୁରେ ଆବ୍ରାହାମ୍‌ ଆଡଃଗି କାଜିକିୟା, "ହେ ପ୍ରାଭୁ, କାମ୍‌ ଖିସ୍‌ଅଃ ରେଦ, ଆଇଙ୍ଗ୍‌ ଆଡଃମିସାଗି କୁଲି ସାନାଙ୍ଗ୍‌ତାନିଙ୍ଗ୍‌, ଏନ୍‌ ନାଗାର୍‌ରେ ଗେଲେୟା ଧାର୍‌ମାନ୍‌ ହଡ଼କ ନାମଃରେ।"

ପ୍ରାଭୁ କାଜିକିୟାଏ, "ଏନ୍‌ ଗେଲେୟା ଧାର୍‌ମାନ୍‌ ହଡ଼କ ନାଗେନ୍ତେ ଆଇଙ୍ଗ୍‌ ଏନ୍ ନାଗାର୍‌କେ କାଇଙ୍ଗ୍‌ ଜିଅନେୟା ?" 33 ପ୍ରାଭୁ ଆବ୍ରାହାମ୍‌ଲଃ ନେ'ଲେକା ଜାଗାର୍‌ ଚାବାକେଦ୍‌ଚି ଏନ୍ତାଃଏତେ ସେନଃୟାନା। ଏନ୍ତେ ଆବ୍ରାହାମ୍ ଆୟାଃ ଠାୟାଦ୍‌ତେ ରୁହାଡ଼୍‌ୟାନା।