1 କିନାନ୍‌ ଦିଶୁମ୍‌ରେ ପୁରାଃଗି ରିଙ୍ଗା ହବାଅଃ ତାଇକେନା। 2 ମିସାର୍‌ ଦିଶୁମ୍‌ଏତେ ଆଉକାଦ୍‌ ହିତା ଚାବାୟାନ୍‌ ତାୟମ୍‌ତେ ଇନ୍‌କୁଆଃ ଆପୁ ଇନ୍‌କୁକେ କାଜିକେଦ୍‌କଆ, "ଜୁ, ଆପେ ଆଡଃମିସା ସେନ୍‌କେଦ୍‌ତେ ଆବୁ ସବେନ୍‌କଆଃ ନାଙ୍ଗ୍‌ ଜମେୟାଃ କିରିଙ୍ଗ୍‌କେଦ୍‌ତେ ଆଉୱେପେ।"

3 ଯିହୁଦା ଆପୁତେକେ କାଜିକିୟା, "ଏନ୍‌ ହଡ଼ ଆଲେକେ କେଟେୟାନ୍‌ଗି କିରିୟାକେଦ୍‌ତେ କାଜିକାଦା, ଆପେଲଃ ଆପେୟାଃ ହୁଡିଙ୍ଗ୍‌ ହାଗାକେ କାପେ ଆଉଇ ରେଦ, ଆପେ ଆଇଁୟାଃ ମେଦ୍‌ମୁହାଁଡ଼୍‌ କାପେ ନେଲ୍‌ ଦାଡ଼ିୟା। 4 ଏନାତେ ଆମ୍ ଆଲେୟାଃ ହୁଡିଙ୍ଗ୍‌ ହାଗାକେ ଆଲେଲଃ କୁଲି ରେଦମ୍‌, ଆଲେ ଆମାଃ ନାଗେନ୍ତେ ଜଜମାଃ କିରିଙ୍ଗ୍‌ ନାଙ୍ଗ୍‌ ସେନାଃଲେ।" 5 ଆମ୍‌ ଇନିଃକେ ଆଲେଲଃ କାମ୍‌ କୁଲି ରେଦ କାଲେ ସେନାଃ, ଚିୟାଃଚି ଏନ୍‌ ହଡ଼ କାଜିକାଦାଏ, "ଆପେଲଃ ଆପେୟାଃ ହୁଡିଙ୍ଗ୍‌ ହାଗା କାଏ ତାଇନ୍‌ ରେଦ, ଆପେ ଆଇଁୟାଃ ମେଦ୍‌ମୁହାଁଡ଼୍‌ କାପେ ନେଲ୍‌ ଦାଡ଼ିୟା।"

6 ଯାକୁବ୍‌ କାଜିକେଦାଏ, "ଆପେୟାଃ ଆଡଃମିଆଦ୍‌ ହାଗା ମେନାଇୟା ମେନ୍ତେ ଏନ୍‌ ହଡ଼କେ କାଜିକେଦ୍‌ତେ ଆଇଁୟାଃ ଚେତାନ୍‌ରେ ଚିନାଃ ନାଙ୍ଗ୍‌ ଦୁକୁପେ ଆଉକେଦା ?"

7 ଇନ୍‌କୁ କାଜିରୁହାଡ଼୍‌କିୟାକ, "ଏନ୍‌ ହଡ଼ ଆଲେୟାଃ ବିଷାଏରେ ଓଡ଼ୋଃ ଆଲେୟାଃ ପାରିବାର୍‌ରେନ୍‌କଆଃ ବିଷାଏରେ କୁଲିକେନା, ଆପେୟାଃ ଆପୁ ଚିନାଃ ତିସିଙ୍ଗ୍‌ ଜାକେଦ୍‌ ଜୀନିଦ୍‌ ମେନାଇୟା ? ଚିୟାଃ ଆପେୟାଃ ହାଗାକ ଓଡ଼ୋଃ ମେନାକଆ ? ଆଲେ ଆୟାଃ କୁନୁଲି ଲେକାତେ କାଜିରୁହାଡ଼୍‌କିୟାଲେ। ଆପେୟାଃ ହାଗାକେ ନେତାଃ ଆଉଇପେ ମେନ୍ତେ ଇନିଃ ଆଲେକେ କାଜିଲେୟା ମେନ୍ତେ ଆଲେ ଚିନାଃ ସାରିକାଦ୍‌ ତାଇନାଲେ ?"

8 ଯିହୁଦା ଆୟାଃ ଆପୁ ଯାକୁବ୍‌କେ ଆଡଃଗି କାଜିକିୟା, "ନେ ସିଟିୟାକେ ଆଇଁୟାଃଲଃ କୁଲିମେ, ତାବ୍‌ଦ ଆଲେ ସବେନ୍‌କ ସେନ୍‌ ଦାଡ଼ିୟାଲେ। ଆଲେ, ଆମ୍‌ ଓଡ଼ୋଃ ହନ୍‌ଗାଁଣାକ ଜେତାଏ ହଁ କା ଗଏଃକେଦ୍‌ତେ ବାଞ୍ଚାଅଃଆବୁ।" 9 ଆଇଙ୍ଗ୍‌ ଇନିୟାଃ ଜିମା ଇଦିୟାଇଙ୍ଗ୍‌, ଆଇଙ୍ଗ୍‌ ଇନିଃକେ ଜୀଉସୁକୁତେ ରୁହାଡ଼୍‌ ଆଉରାଃ ବାହାରମ୍‌ ଇଦିତାନାଇଙ୍ଗ୍‌। ଆଇଙ୍ଗ୍‌ ଇନିଃକେ ଆମାଃ ସାମ୍‌ନାଙ୍ଗ୍‌ତେ କାଇଙ୍ଗ୍‌ ଆଉ ଦାଡ଼ି ରେଦ, ଆଇଙ୍ଗ୍‌ ସବେନ୍‌ ହୁଲାଙ୍ଗ୍‌ ନାଙ୍ଗ୍‌ ଆମାଃ ନେପେଲ୍‌ରେ ଗୁହ୍ନାଁ ହବାଅଃଆଇଙ୍ଗ୍‌। 10 ଆଲେୟାଃ ନିମିନାଙ୍ଗ୍‌ ବିଲାମ୍‌ କା ହବାକାନ୍‌ ରେଦ, ଆଲେ ବାର୍‌ସାତେ ସେନ୍‌ୟାନ୍‌ଲଃ ହିଜୁଃରୁହାଡ଼୍‌ କାନ୍‌ତେୟାଃଲେ।

11 ଏନ୍ତେ ଇନ୍‌କୁଆଃ ଆପୁ ଯାକୁବ୍‌ ଇନ୍‌କୁକେ କାଜିକେଦ୍‌କଆ, "ଆପେ କାଜିତାନ୍‌ ଲେକାଗି ତାନାଃ ରେଦ, ମିଆଁଦ୍‌ କାମି ରିକାଏପେ। ଆପେ ଆପେୟାଃ ଆପ୍‌ନାଃ ବସ୍ତାରେ ନେ ଦିଶୁମ୍‌ରାଃ ବୁଗିନ୍‌ ଜିନିଷ୍‌କ ଅର୍ଥାତ୍‌ ଜାୟାର୍‌, ହୁରୁମ୍‌ସୁକୁ, ବୁଗିନ୍‌ ସହାନ୍‌ ଧୁଆନ୍‌, ସହାନ୍‌ସୁନୁମ୍‌, ପେସ୍ତା ଓଡ଼ୋଃ ମୁମ୍‌ଫାଲି, ନେ ସବେନାଃକ ଏନ୍‌ ଦିଶୁମ୍‌ରେନ୍‌ ଲାଟ୍‌ସାହେବ୍‌କେ ଦାନ୍‌ ଏମ୍‌ ନାଗେନ୍ତେ ଇଦିପେ। 12 ଆପେୟାଃ ତିଃଇରେ ବାର୍‌ଗୁନା ଟାକା ପାଏସା ଇଦିକେଦ୍‌ତେ ସେନଃପେ, ଚିୟାଃଚି ଆପେୟାଃ ଥାଇଲାରେ ଅକ ଟାକା ପାଏସା ରୁହାଡ଼୍‌ ଆଉକାନା, ଏନା ରୁହାଡ଼୍‌ତାପେ, ହବାସାକାଅଃଆ ଏନା ବେଗାର୍‌ ସାରିତେ ଆଉରୁହାଡ଼୍‌କାନା। 13 ଆପେୟାଃ ହାଗା ବେଞ୍ଜାମିନ୍‌କେ ହଗି ଆପେଲଃ ମିସାତେ ଇଦିକେଦ୍‌ତେ ଏନ୍‌ ହଡ଼ତାଃ ସେନଃପେ। 14 ପୁରାଃ ପେଡ଼େୟାନ୍‌ ପାର୍‌ମେଶ୍ୱାର୍‌ ଆପେକେ ଏନ୍‌ ହଡ଼ରାଃ ନାଜେର୍‌ରେ ସାୟାଦ୍‌ ଏମାପେକାଏ, ଅକ ହରାତେଚି ଇନିଃ ଆପେୟାଃ ଏଟାଃ ହାଗାକେ ଓଡ଼ୋଃ ବେଞ୍ଜାମିନ୍‌କେ ବାଗିତାଇୟା। ଓଡ଼ୋଃ ଆଇଙ୍ଗ୍‌ ବେଗାର୍‌ ହନ୍‌ରେନ୍‌ ହବାଅଃ ରେୟଗି ବାୟୁଗାଃ।"

15 ଏନାତେ ଇନ୍‌କୁ ଦାନ୍‌ ଏମ୍‌ ନାଙ୍ଗ୍‌ ବାର୍‌ଗୁନା ଟାକା ପାଏସା ଓଡ଼ୋଃ ବେଞ୍ଜାମିନ୍‌କେ ମିସାତେ ଇଦିକେଦ୍‌ଲଃ ମିସାର୍‌ ଦିଶୁମ୍‌ତେ ସେଟେର୍‌କେଦ୍‌ତେ ଯୋଷେଫ୍‌ଆଃ ଆୟାର୍‌ରେ ତିଙ୍ଗୁୟାନାକ। 16 ଯୋଷେଫ୍‌ ଇନ୍‌କୁଲଃ ବେଞ୍ଜାମିନ୍‌କେ ନେଲ୍‌କେଦ୍‌ତେ ଅଡ଼ାଃ ଗୁସିୟାଁରାଃ ଦାସିକେ କାଜିକିୟା, "ନେ ହଡ଼କକେ ଆଇଁୟାଃ ଅଡ଼ାଃତେ ଇଦିକୁମେ ଓଡ଼ୋଃ ମିଆଁଦ୍‌ ଜାଁତୁ ଗଏଃକେଦ୍‌ତେ ଜଜମାଃ ବାଇୟେମେ, ନେ ସବେନ୍‌କ ତିକିନ୍‌ସିଙ୍ଗିରେ ଆଇଁୟାଃଲଃ ଜମେୟାଁକ।" 17 ଏନ୍ତେ ଏନ୍ ହଡ଼ ଯୋଷେଫ୍‌ଆଃ କାଜି ଲେକାତେ କାମିକେଦା ଓଡ଼ୋଃ ଇନ୍‌କୁକେ ଯୋଷେଫ୍‌ଆଃ ଅଡ଼ାଃତେ ଇଦିକେଦ୍‌କଆ।

18 ଇନ୍‌କୁକେ ଯୋଷେଫ୍‌ଆଃ ଅଡ଼ାଃତେ ଇଦିକେଦ୍‌କ ହରାତେ ଇନ୍‌କୁ ବରତାନ୍‌ଲଃ ମିହୁଡ଼୍‌ ଆଡଃମିହୁଡ଼୍‌ଲଃ କୁପ୍‌ଲିୟାନାକ, "ସିଦା ଆବୁଆଃ ବସ୍ତାରେ ଅକ ଟାକା ପାଏସା ରୁହାଡ଼୍‌କାନ୍‌ ତାଇକେନା, ଏନାମେନ୍ତେ ଇନିଃ ଆବୁକେ ନେତାଃତେ ଆଉୱାକାଦ୍‌ବୁଆ। ନାହାଁଃ ଇନିଃ ଆବୁଲଃ ଲାଡ଼ାଇକେଦ୍‌ତେ ଆବୁଆଃ ଗାଧାକକେ ଇଦିକଆ ଓଡ଼ୋଃ ଆବୁକେ ଆୟାଃ ଦାସି ବାଇବୁଆ।" 19 ଏନାତେ ଇନ୍‌କୁ ଯୋଷେଫ୍‌ଆଃ ଅଡ଼ାଃ ଗୁସିୟାଁତାଃ ସେନ୍‌କେଦ୍‌ତେ ଅଡ଼ାଃ ଦୁଆର୍‌ତାଃରେ ସେଟେର୍‌ୟାନ୍‌ଚି ଇନିଃଲଃ ଜାଗାର୍‌କେଦାକ, 20 ଓଡ଼ୋଃ କାଜିକିୟାକ, "ହେ ଗମ୍‌କେ, ଦାୟାକେଦ୍‌ତେ ଆୟୁମେମେ, ସିଦା ଆଲେ ଜମେୟାଃଁ କିରିଙ୍ଗ୍‌ ନାଗେନ୍ତେ ହିଜୁଃକାନ୍‌ ତାଇକେନାଲେ। 21 ଆଲେ ସବେନ୍‌କ ଅଡ଼ାଃ ରୁହାଡ଼୍‌ ଇମ୍‌ତା ହରାରେ ରୁଡ଼ୁନ୍‌ ଠାୟାଦ୍‌ତାଃ ସେଟେର୍‌କେଦ୍‌ତେ ଆପ୍‌ନାଃ ଆପ୍‌ନାଃ ବସ୍ତା ରାଡ଼ାକେଦାଲେ ଇମ୍‌ତା ନେଲ୍‌କେଦାଲେ ଯେ, ସବେନ୍‌କଆଃ ବସ୍ତାରେ ପୁରା ଟାକା ପାଏସା ରୁହାଡ଼୍‌ ହିଜାକାନା। ଏନାକେ ଆଲେ ଆଡଃମିସା ଆଉ ରୁହାଡ଼୍‌କାଦାଲେ। 22 ଓଡ଼ୋଃ ଜଜମାଃ କିରିଙ୍ଗ୍‌ ନାଗେନ୍ତେ ପୁରାଃଗି ଆଦ୍‌କା ଟାକା ପାଏସା ଆଉୱାକାଦାଲେ। ମେନ୍‌ଦ ଏନ୍‌ ଟାକା ପାଏସା ଆଲେୟାଃ ବସ୍ତାରେ ଅକଏ ଦହାକାଦ୍‌ ତାଇକେନାଏ, ଏନା କାଲେ ସାରିୟାଃ।"

23 ଅଡାଃ ଗୁସିୟାଁ କାଜିକେଦାଏ, "ଆପେୟାଃ ବୁଗିନ୍‌ ହବାଅଃକା, ଆଲପେ ବରୟା। ଆପେୟାଃ ପାର୍‌ମେଶ୍ୱାର୍‌ ଓଡ଼ୋଃ ଆପେୟାଃ ଆପୁଆଃ ପାର୍‌ମେଶ୍ୱାର୍‌ ଆପେୟାଃ ବସ୍ତାରେ ଏନ୍‌ ଟାକା ପାଏସା ଏମାକାଦାଏ। ଆପେ ଜମେୟାଁଃ କିରିଙ୍ଗ୍‌କେଦ୍‌ ଗନଙ୍ଗ୍‌ରାଃ ଟାକା ଆଇଙ୍ଗ୍‌ ନାମ୍‌କେଦାଇଙ୍ଗ୍‌।" ଏନ୍ତେ ଇନିଃ ଶିମିୟୋନ୍‌କେ ଇନ୍‌କୁତାଃ ଆଉକିୟା।

24 ଅଡାଃ ଗୁସିୟାଁରାଃ ଦାସି ଇନ୍‌କୁକେ ଯୋଷେଫ୍‌ଆଃ ଅଡ଼ାଃ ଭିତାର୍‌ତେ ଇଦିକେଦ୍‌କଆ। କାଟା ଆବୁଙ୍ଗ୍‌ ନାଙ୍ଗ୍‌ ଲଟାରେ ଦାଆଃ ଏମାଦ୍‌କଆଏ ଓଡ଼ୋଃ ଗାଧାକକେ ଜଜମାଃ ଏମାଦ୍‌କଆଏ। 25 ଇନ୍‌କୁ ତିକିନ୍‌ସିଙ୍ଗି ଇମ୍‌ତା ଯୋଷେଫ୍‌କେ ଦାନ୍‌ ଏମ୍‌ ନାଙ୍ଗ୍‌ ଆଉକାଦ୍‌ତେୟାଃକେ ସେକାଡ଼୍‌କେଦାକ ଓଡ଼ୋଃ ଯୋଷେଫ୍‌ ହିଜୁଃ ଜାକେଦ୍‌ ତାଙ୍ଗିକେଦାକ, ଚିୟାଃଚି ଏନ୍ତାଃରେ ଇନ୍‌କୁ ଯୋଷେଫ୍‌ଲଃ ଜଜମ୍‌ ଦୁବାଃକ ମେନ୍ତେ ଆୟୁମ୍‌କାଦ୍‌ ତାଇକେନାକ। 26 ଯୋଷେଫ୍‌ ଅଡ଼ାଃତେ ହିଜୁଃୟାନା ଇମ୍‌ତା ଇନ୍‌କୁ ଦାନ୍‌ ଏମ୍‌ ନାଙ୍ଗ୍‌ ଜିନିଷ୍‌କକେ ଅଡ଼ାଃ ଭିତାର୍‌ତେ ଆଉକେଦାକ ଓଡ଼ୋଃ ଇନିଃକେ ଏମ୍‌କେଦ୍‌ତେ ଅତେରେ ଇକ୍‌ଡ଼ୁମ୍‌ୟାନ୍‌ଲଃ ଜହାର୍‌କିୟାକ। 27 ଯୋଷେଫ୍‌ ଇନ୍‌କୁଆଃ ସୁକୁ ଜୀଦାନ୍‌ କୁଲିକେଦ୍‌ତେ କାଜିକେଦ୍‌କଆ, "ଆପେୟାଃ ଆପୁଆଃ କାଜି ଆଇଙ୍ଗ୍‌କେ କାଜିକାଇଙ୍ଗ୍‌ ତାଇକେନାପେ, ଇନିଃ ଚିନାଃ ଜୀଉସୁକୁରେ ମେନାଇୟା ? ଚିନାଃ ତିସିଙ୍ଗ୍‌ ଜାକେଦ୍‌ ଜୀନିଦ୍‌ ମେନାଇୟା ?"

28 ଇନ୍‌କୁ କାଜିରୁହାଡ଼୍‌କିୟାକ, "ଆମାଃ ଦାସି ଆଲେୟାଃ ଆପୁ ତିସିଙ୍ଗ୍‌ ଜାକେଦ୍‌ ଜୀନିଦ୍‌ ତାଇକେଦ୍‌ତେ ଜୀଉସୁକୁରେ ମେନାଇୟା। ଏନ୍ତେ ଇନ୍‌କୁ ବହଃ ତିରୁବ୍‌କେଦ୍‌ତେ ଇକ୍‌ଡ଼ୁମ୍‌ୟାନ୍‌ଲଃ ଜହାର୍‌କିୟାକ।"

29 ଇମ୍‌ତା ଯୋଷେଫ୍‌ ଆୟାଃ ହାଗା ବେଞ୍ଜାମିନ୍‌କେ ନେଲ୍‌କେଦ୍‌ତେ କାଜିକେଦା, "ଆପେ ଅକ ହୁଡିଙ୍ଗ୍‌ ହାଗା ବିଷାଏରେ କାଜି ତାଇକେନାପେ, ଇନିଃ ଚିନାଃ ନିଃ ତାନିଃ ଚି ?" ଏନ୍ତେ ଯୋଷେଫ୍‌ ଇନିଃକେ କାଜିକିୟା, "ହେ ହନ୍‌, ପାର୍‌ମେଶ୍ୱାର୍‌ ଆମ୍‌କେ ଦାୟାମେକା।" 30 ଏନ୍ତେ ହାଗାତେ ନାଙ୍ଗ୍‌ ଯୋଷେଫ୍‌ଆଃ ମନ୍‌ସୁରୁଦ୍‌ ପୁରାଃଗି ଦୁଲାଡ଼୍‌ତେ ବିଲ୍‌କାଅୟାନ୍‌ ହରାତେ ଇନିଃ ଜାଲ୍‌ଦିଗି ଅଡ଼ାଃ କୁଠାତେ ବଲୟାନା ଓଡ଼ୋଃ ରାଆଃକେଦାଏ। 31 ଏନ୍ତେ ଇନିଃ ଆୟାଃ ମେଦ୍‌ମୁହାଁଡ଼୍‌ ଆବୁଙ୍ଗ୍‌କେଦ୍‌ତେ ବାହାରି ଅଡଙ୍ଗ୍‌ୟାନାଏ, ଓଡ଼ୋଃ ଆପାନ୍‌କେ କେଟେଦ୍‌କେଦ୍‌ତେ ଜଜମାଃ ହାଟିଙ୍ଗ୍‌ ନାଙ୍ଗ୍‌ ହୁକୁମ୍‌କେଦ୍‌କଆଏ। 32 ଏନ୍ତେ ଦାସିକ ଯୋଷେଫ୍‌ ନାଙ୍ଗ୍‌, ଆୟାଃ ହାଗାକ ନାଙ୍ଗ୍‌ ଓଡ଼ୋଃ ଆୟାଃଲଃ ଜଜମ୍‌ ଦୁବ୍‌ତାନ୍‌ ମିସାର୍‌ରେନ୍‌ ହଡ଼କ ନାଙ୍ଗ୍‌ ଆପାନ୍‌ ଆପାନ୍‌ଗି ହାଟିଙ୍ଗ୍‌କେଦାକ। ଚିୟାଃଚି ଏବ୍ରୀ ହଡ଼କଲଃ ମିସାର୍‌ରେନ୍‌ ହଡ଼କ ମିଦ୍‌ ଠାୟାଦ୍‌ରେ ଜଜମ୍‌ ଦୁବ୍‌ରାଃ ରିତି କା ତାଇକେନା, ଏନା ମିସାର୍‌ରେନ୍‌ ହଡ଼କଆଃ ନେପେଲ୍‌ରେ ହିଁଣିଅଃ କାଜି ତାଇକେନା। 33 ଯୋଷେଫ୍‌ଆଃ ଆୟାର୍‌ରେ ଇନ୍‌କୁକେ ଆକଆଃ ବାୟାସ୍‌ ଲେକାଗି ମାରାଙ୍ଗ୍‌ଏତେ ହୁଡିଙ୍ଗ୍‌ ଜାକେଦ୍‌ ପାନ୍ତିରେ ଦୁବ୍‌ ନାଙ୍ଗ୍‌ ଏମାଦ୍‌କଆକ, ଏନା ନେଲ୍‌କେଦ୍‌ତେ ଇନ୍‌କୁ ହାଏକାଟ୍‌ୟାନାକ। 34 ଯୋଷେଫ୍‌ ଆୟାଃ ମେଜ୍‌ଏତେ ଜଜମାଃ ଇନ୍‌କୁକେ ହାଟିଙ୍ଗ୍‌ ନାଙ୍ଗ୍‌ ଏମାଦ୍‌କଆଏ, ମେନ୍‌ଦ ବେଞ୍ଜାମିନ୍‌ରାଃ ହିସା ଏଟାଃକଆଃ ହିସାଏତେ ମଣେଁୟା ଗୁନା ଆଦ୍‌କା ତାଇକେନା। ନେ'ଲେକାତେ ଇନ୍‌କୁ ଯୋଷେଫ୍‌ଲଃ ଲାନ୍ଦା ରାସ୍‌କାତେ ଜମ୍‌ ନୁଁ'କେଦାକ।