1 ଆବ୍ରାହାମ୍‌ କଟୁରା ନୁତୁମ୍‌ ଆଡଃମିଆଦ୍‌ କୁଡ଼ିକେ ଆଣ୍‌ଦିୟାନା। 2 କଟୁରା ଆବ୍ରାହାମ୍‌ ନାଗେନ୍ତେ ସିମ୍ରାନ୍‌, ଯକ୍‌ଷାନ୍‌, ମେଦାନ୍‍, ମିଦିୟନ୍‌, ଯିଶ୍‍ବକ୍‌ ଓଡ଼ୋଃ ଶୁହ, ନେ ସବେନ୍‌କକେ ଜାନାମ୍‌କେଦ୍‌କଆ। 3 ସେବା ଓଡ଼ୋଃ ଦାଦାନ୍‌, ଯକ୍‌ଷାନ୍‌ରାଃ ହନ୍‌କିନ୍‌ ତାଇକେନା। ଦଦାନ୍ ହବାଅଃତାନାଏ, ଅଶୁରୀୟ, ଲଟୁଶୀୟ ଓଡ଼ୋଃ ଲେଉମିୟ କିଲିକଆଃ ପୁର୍‌ଖାଆପୁ। 4 ମିଦିୟନ୍‌ରାଃ ହନ୍‌କ ହବାଅଃତାନା, ଏଫା, ଏଫାର୍‌, ହନୋକ୍‌, ଅବିଦ୍‌ ଓଡ଼ୋଃ ଇଲ୍‌ଦିୟା, ନେ ସବେନ୍‌କ କଟୁରାରାଃ କିଲିକ।

5 ଆବ୍ରାହାମ୍‌ ଆୟାଃ ସବେନାଃ ଇସାକ୍‌କେ ଏମ୍‌କିୟା; 6 ମେନ୍‌ଦ ଆବ୍ରାହାମ୍‌ ଜୀନିଦ୍‌ ତାଇକେନ୍‌ ଇମ୍‌ତା ଆୟାଃ ହିରୁମ୍‌*କଆଃ ହନ୍‌କକେ କାଟି କାଟି ଖୁର୍ଜି ଏମ୍‌କେଦ୍‌କଆଏ ଓଡ଼ୋଃ ଇସାକ୍‌ତାଃଏତେ ସାଙ୍ଗିନ୍‌ରେ ତାଇନଃ ନାଙ୍ଗ୍‌ ସିଙ୍ଗିତୁରଃସାଃରେୟାଃ ଦିଶୁମ୍‌କରେ ତାଇନଃ ନାଗେନ୍ତେ କୁଲ୍‌କେଦ୍‌କଆ।

7 ଆବ୍ରାହାମ୍‌ ୧୭୫ ବାରାଷ୍ ଜାକେଦ୍‌ ଜୀନିଦ୍‌ ତାଇକେନାଏ। 8 ଏନ୍ତେ ଆବ୍ରାହାମ୍‌ ପୁରାଃ ହାଡ଼ାମ୍‌ ଦିପିଲିରେ ଗଏଃୟାନା ଓଡ଼ୋଃ ସିଦାରେ ଗୟାକାନ୍‌ ଆୟାଃ ଆପ୍‌ନାଃ ପୁର୍‌ଖା ହାଡ଼ାମ୍‌କଲଃ ମେସାୟାନାଏ। 9 ଆୟାଃ ହନ୍ତେକଡ଼ା ଇସାକ୍‌ ଓଡ଼ୋଃ ଇଶ୍ମାଏଲ୍‌, ନେ ବାରାନ୍‌କିନ୍‌ ମମ୍ରିରାଃ ହେପାଦ୍‌ରେ ମକ୍‌ପେଲା ନୁତୁମ୍‌ ଲାପାଙ୍ଗାରେ ଇନିଃକେ ତପାକିୟାକିନ୍‌। ନେ ଲାପାଙ୍ଗା ହିତ୍ତିୟରେନ୍‌ ସୋହର୍‌ଆଃ ହନ୍‌କଡ଼ା ଇଫ୍ରୋଣ୍‌ଆଃ ପିଡ଼ିରେ ତାଇକେନା। 10 ଏନ୍‌ ପିଡ଼ିକେ ଆବ୍ରାହାମ୍‌ ହିତ୍ତିୟ ହଡ଼କତାଃଏତେ କିରିଙ୍ଗ୍‌କାଦ୍‌ ତାଇକେନା। ଏନ୍‌ ଠାୟାଦ୍‍ରେଗି ବାରାନ୍‌କିନ୍‌ ଆବ୍ରାହାମ୍‌ ଓଡ଼ୋଃ ଆୟାଃ କୁଡ଼ି ସାରାକେ ତପାକେଦ୍‌କିନାକ। 11 ଆବ୍ରାହାମ୍‌ଆଃ ଗନଏଃ ତାୟମ୍‌ତେ ପାର୍‌ମେଶ୍ୱାର୍‌ ଆବ୍ରାହାମ୍‌ରାଃ ହନ୍ତେକଡ଼ା ଇସାକ୍‌କେ ଆଶିଷ୍‌କିୟା, ଏନ୍ତେ ଇସାକ୍‌ ବେର୍‌ଲାହାୟିରୋୟି ନୁତୁମ୍‌ ଠାୟାଦ୍‌ରେ ତାଇନ୍‌ୟାନା।

12 ସାରାରାଃ କାମ୍‌ଡ଼ି କୁଡ଼ି ହାଗାର୍‌, ଇନିଃ ମିସାର୍‌ରେନ୍‌ ତାଇକେନାଏ, ଇନିଃ ଆବ୍ରାହାମ୍‌ ନାଗେନ୍ତେ ମିଆଁଦ୍‌ କଡ଼ାହନ୍‌ ଜାନାମ୍‌କିୟାଏ। ଇନିୟାଃ ନୁତୁମ୍‌ ଇଶ୍ମାଏଲ୍‌। 13 ଏନ୍‌ ଇଶ୍ମାଏଲ୍‌ରାଃ ହନ୍‌କଆଃ ନୁତୁମ୍‌ ଓଡ଼ୋଃ କିଲିକ ହବାଅଃତାନା; ମୁତ୍‌କୁଲ୍‌ ହନ୍‌କଡ଼ାରାଃ ନୁତୁମ୍‌ ହବାଅଃତାନା ନବାୟୋତ୍‌, ଏନ୍ତେ କେଦାର୍‌, ଅଦ୍‌ବେଲ୍‌ ଓଡ଼ୋଃ ମିବ୍‌ସମ୍‌, 14 ମିସ୍‌ମା, ଦୁମା, ମାସା, 15 ଓଡ଼ୋଃ ହଦାଦ୍‌, ଟେମା, ଯିଟୁର୍‌, ନାଫିଶ୍‍ ଓଡ଼ୋଃ କେଦ୍‌ମା। 16 ନେ ସବେନ୍‌କ ଇଶ୍ମାଏଲ୍‌ରାଃ ହନ୍‌କ ଓଡ଼ୋଃ ଗେଲ୍‌ବାର୍‌ କିଲିରେନ୍‌ ଆଗୁଆଇକ ତାନ୍‌କ। ଇନ୍‌କୁଆଃ ନୁତୁମ୍‌ ଲେକାଗି ଆକଆଃ ହାତୁ ଓଡ଼ୋଃ ତାଇନଃ ଠାୟାଦ୍‌ ନୁତୁମାକାନା। 17 ଇଶ୍ମାଏଲ୍‌ରାଃ ୧୩୭ ବାରାଷ୍‌ ହବାଅଃତାଇକେନ୍‌ ଇମ୍‌ତା ଜୀଉ ଟୁଣ୍ଡୁକେଦାଏ ଓଡ଼ୋଃ ଇନିଃ ଆୟାଃ ପୁର୍‌ଖାହାଡ଼ାମ୍‌କଆଃ ତପାଠାୟାଦ୍‌ରେ ତପାୟାନା। 18 ଇଶ୍ମାଏଲ୍‌ରାଃ କିଲିକ ହବିଲା ଦିଶୁମ୍‌ଏତେ ମିସାର୍‌ରେୟାଃ ସିଙ୍ଗିତୁରଃସାଃରେ ତାଇକାନ୍‌ ସୋର୍‌ ଦିଶୁମ୍‌ ଓଡ଼ୋଃ ଆସେରିୟା ଦିଶୁମ୍‌ ଜାକେଦ୍ ପାସ୍‌ରାଅୟାନାକ। ନେ'ଲେକାତେ ଇନ୍‌କୁ ଆକଆଃ ସବେନ୍‌ ହାଗାକଲଃ ବାଇରି ଲେକା ତାଇୟାନାକା।

19 ଆବ୍ରାହାମ୍‌ଆଃ ହନ୍ତେକଡ଼ା ଇସାକ୍‌ଆଃ କିଲିକ। 20 ଇସାକ୍‌ରାଃ ବାର୍‌ହିସି ବାରାଷ୍‌ ହବାଅଃ ତାଇକେନ୍‌ ଇମ୍‌ତା ରିବ୍‌କାକେ ଆଣ୍‌ଦିୟାନା। ରିବ୍‌କା ପଦାନ୍‌ ଅରାମ୍‌ରେନ୍‌ ବଥୁୟେଲ୍‌ଆଃ ହନ୍ତେକୁଡ଼ି, ଲାବନ୍‌ଆଃ ମିଶି ତାଇକେନା। 21 ଇସାକ୍‌ରାଃ କୁଡ଼ିତେୟାଃ ହନ୍‌ଗାଁଣା କାକ ହବାଅଃତାଇକେନ୍‌ ହରାତେ, ଇସାକ୍‌ ଆୟାଃ କୁଡ଼ି ରିବ୍‌କା ନାଙ୍ଗ୍‌ ପ୍ରାଭୁତାଃରେ ବିନ୍ତିକେଦା, ଏନ୍ତେ ପ୍ରାଭୁ ଇନିୟାଃ ବିନ୍ତି ଆୟୁମ୍‌କେଦାଏ ଓଡ଼ୋଃ ରିବ୍‌କା ହାମ୍ବାଲ୍‌ରୋୱା ହବାୟାନାଏ। 22 ଏନ୍ତେ ଇନିୟାଃ ଲାହିଦ୍‌ ଭିତାର୍‌ରେ ବାରିୟା ହନ୍‌ ଛାନ୍ଦ୍‌ଲାଅୟାନ୍‌ ହରାତେ ରିବ୍‌କା କାଜିକେଦାଏ, "ଆଇଙ୍ଗ୍‌କେ ଚିନାଃମେନ୍ତେ ନେ'ଲେକା ଆଟ୍‌କାରିଙ୍ଗ୍‌ତାନା ?" ଏନାତେ ଇନିଃ ପ୍ରାଭୁତାଃ ସେନ୍‌ୟାନ୍‌ଲଃ ଏନ୍‌ ବିଷାଏରେ କୁଲିକିୟା।

23 ଏନ୍ତେ ପ୍ରାଭୁ ଇନିଃକେ କାଜିକିୟା,

"ଆମାଃ ଲାହିଦ୍‌ରେ ବାରିୟା ଜାତି ମେନାକିନା,

ବାରାନ୍‌କିନ୍‌ ବିନ୍‌ଗାଅଆଃକିନ୍‌,

ମିଆଁଦ୍‌ ଜାତି ଆଡଃମିଆଦ୍‌ ଜାତିତାଃଏତେ ପେଡ଼େୟାନ୍‌ଗି ହବାଅଃଆ

ଓଡ଼ୋଃ ମାରାଙ୍ଗ୍‌ ହନ୍‌ ହୁଡିଙ୍ଗ୍‌ ହନ୍‌ଆଃ ସେୱାନିଃ ହବାଅଃଆଏ।"

24 ହନ୍‌ ଜାନାମ୍‌ରେୟାଃ ନେଣ୍ଡା ସେଟେର୍‌ୟାନ୍‌ ଇମ୍‌ତା, ଇନିୟାଃ ଲାହିଦ୍‌ଏତେ ଜାଅଆ ହନ୍‌ ଜାନାମ୍‌ୟାନାକିନ୍‌। 25 ଇନିୟାଃ ମାରାଙ୍ଗ୍‌ ହନ୍ତେକଡ଼ା ମାୟୋମ୍‌ ଲେକାଏ ନେଲଃ ତାଇକେନା ଓଡ଼ୋଃ ହଡ଼୍‌ମ ତାୟାଃ ଉବ୍‌ରାଃ ଲିଜାଃ ଲେକା ଉବ୍‌ତେ ପେରେୟାକାନ୍‌ ତାଇକେନା, ଏନାମେନ୍ତେ ଇନିୟାଃ ନୁତୁମ୍‌ ଏଷୌ* ଏମ୍‌ୟାନା। 26 ଏନ୍ତେ ଏଷୌରାଃ ହାଗାତେ ଏଷୌରାଃ କାଟା ଇଡି ସାବ୍‌କେଦ୍‌ତେ ଜାନାମ୍‌ୟାନା, ଏନାମେନ୍ତେ ଇନିୟାଃ ନୁତୁମ୍‌ ଯାକୁବ୍‌* ଏମ୍‌ୟାନା। ରିବ୍‌କାରାଃ ନେ ବାରାନ୍‌ ହନ୍‌ ଜାନାମ୍‌ୟାନ୍‌ ଇମ୍‌ତା ଇସାକ୍‌କେ ଆପିହିସି ବାରାଷ୍‌ ହବାକାନ୍‌ ତାଇକେନା।

27 ଏନ୍‌ ବାରାନ୍‌ ହନ୍‌କିନ୍‌ ହାରାୟାନାକିନ୍‌, ଏଷୌ ମିହୁଡ଼୍‌ ପାର୍‌ଧିଆ ଓଡ଼ୋଃ ବୁରୁସାଙ୍ଗାର୍‌ନିଃ ହବାୟାନାଏ। ମେନ୍‌ଦ ଯାକୁବ୍‌ ଲେବେଃ ମନ୍‌ରେନ୍‌ ହଡ଼ ହବାୟାନାଏ ଓଡ଼ୋଃ କୁମ୍ବାରେଗି ତାଇନ୍‌ୟାନା।

28 ଇସାକ୍‌ ମିରିକ୍‌ ମାସ୍‌ ଜଜମ୍‌ନିଃ ତାଇକେନ୍‌ ହରାତେ ଏଷୌକେ ଦୁଲାଡ଼ି ତାଇକେନା, ମେନ୍‌ଦ ରିବ୍‌କା ଯାକୁବ୍‌କେ ଦୁଲାଡ଼ି ତାଇକେନା।

29 ମୁସିଙ୍ଗ୍‌ ହୁଲାଙ୍ଗ୍‌ ଯାକୁବ୍‌ ଦାଇଲ୍‌, ଉତୁ ତାଇକେନ୍‌ ଇମ୍‌ତା ଏଷୌ ଲାଗାୟାନ୍‌ଲଃ ବିର୍‌ଏତେ ଆୟାଃତାଃ ହିଜୁଃୟାନା, 30 ଓଡ଼ୋଃ ଏଷୌ ଯାକୁବ୍‌କେ କାଜିକିୟା, "ଆଇଙ୍ଗ୍‌ ପୁରାଃଗି ଲାଗାଉତାର୍‌ କାନାଇଙ୍ଗ୍‌ ଓଡ଼ୋଃ ରେଙ୍ଗେଜିଙ୍ଗ୍‌ତାନା, ଦାୟାକେଦ୍‌ତେ, ଜାଲ୍‌ଦି ଆଇଙ୍ଗ୍‌କେ ଏନ୍‌ ଆରାଃ ଦାଇଲ୍‌ ଉତୁ ଜଜମ୍‌ ନାଗେନ୍ତେ କାଟିଃଲେକା ଏମାଇଙ୍ଗ୍‌ମେ।" ଏନା ମେନ୍ତେ ଇନିୟାଃ ନୁତୁମ୍‌ ଇଦୋମ୍‌ ମେନ୍ତେ ହଗି ସାରିୟାନା।

31 ଯାକୁବ୍‌ କାଜିକିୟାଏ, "ସିଦାତେ ଆମ୍‌ ଆମାଃ ମୁତ୍‌କୁଲ୍‌ ହିସାରାଃ ଆକ୍‌ତେୟାର୍‌ ଆଇଙ୍ଗ୍‌କେ ଏମାଇଙ୍ଗ୍‌ରେଦ, ଆଇଙ୍ଗ୍‌ ଆମ୍‌କେ ଦାଇଲ୍‌ ଉତୁ ଏମାମେୟାଇଙ୍ଗ୍‌।"

32 ଏଷୌ କାଜିକିୟାଏ, "ନେଲେମେ, ଆଇଙ୍ଗ୍‌ଦ ଗଜାକାନ୍‌ ଲେକା ହବାକାନାଇଙ୍ଗ୍‌, ଆଇଁୟାଃ ମୁତ୍‌କୁଲ୍‌ ହିସାରାଃ ଆକ୍‌ତେୟାର୍‌ ଚିକାନ୍‌ କାମିରେ ହିଜୁଃଆ ?"

33 ଯାକୁବ୍‌ କାଜିକିୟାଏ, "ଆମ୍ ସିଦାତେ ଆଇଙ୍ଗ୍‌ତାଃରେ କିରିୟାଏମେ।"

ଏନ୍ତେ ଇନିଃ ଯାକୁବ୍‌କେ ମୁତ୍‌କୁଲ୍‌ରାଃ ହିସା ଆଖ୍‌ରିଙ୍ଗ୍‌କେଦ୍‌ତେ କିରିୟାକେଦା। 34 ଏନ୍ତେ ଯାକୁବ୍‌ ଏଷୌକେ ହଲଙ୍ଗ୍‌ ଓଡ଼ୋଃ ଦାଇଲ୍‌ ଉତୁ ଏମ୍‌କିୟାଏ। ଏଷୌ ଜମ୍‌କେଦ୍‌ତେ ସେନଃୟାନା। ନେ'ଲେକାତେ ଏଷୌ ଆୟାଃ ମୁତ୍‌କୁଲ୍‌ ହିସାରାଃ ଆକ୍‌ତେୟାର୍‌କେ ସାମାତାନାଃ ମେନ୍ତେ ଉଡ଼ୁଃକେଦା।