ଆବ୍ରାହାମ୍ ଓଡ଼ୋଃ ଅବିମେଲେକ୍
1 ଆବ୍ରାହାମ୍ ମମ୍ରି ନୁତୁମ୍ ଠାୟାଦ୍ଏତେ ଦାକ୍ଷିଣ୍ସାଃତେ ସେନଃୟାନ୍ଲଃ କାଦେଶ୍ ଓଡ଼ୋଃ ସୋର୍ ଦିଶୁମ୍ରାଃ ଥାଲା ଠାୟାଦ୍ରେ ତାଇନ୍ୟାନା। ତାୟମ୍ତେ ଗେରାର୍ ନୁତୁମ୍ ଠାୟାଦ୍ରେ ତାଇନ୍ୟାନା। 2 ଏନ୍ତାଃରେ ତାଇକେନା ଇମ୍ତା, ଆବ୍ରାହାମ୍ ଆୟାଃ କୁଡ଼ି ସାରାରାଃ ବିଷାଏରେ କାଜିକାଦ୍ ତାଇକେନାଏ, "ଇନିଃ ଆଇଁୟାଃ ମିଶିଙ୍ଗ୍ ତାନିଃ।" ଏନାମେନ୍ତେ ଗେରାର୍ରେନ୍ ରାଜା ଅବିମେଲେକ୍, ହଡ଼କକେ କୁଲ୍କେଦ୍ତେ ସାରାକେ ଆୟାଃ ଅଡ଼ାଃତେ ଆଉକିୟାକ। 3 ମେନ୍ଦ ନୁବାଃ ଇମ୍ତା ପାର୍ମେଶ୍ୱାର୍ ଅବିମେଲେକ୍କେ କୁମୁରେ ଦାର୍ଶାନ୍ ଏମ୍କେଦ୍ତେ କାଜିକିୟା, "ଆମ୍ ସାର୍ତିଗି ଗଜଃଆମ୍, ଚିୟାଃଚି ଅକ କୁଡ଼ିକେ ଆମ୍ ଆଉୱାକାଇଜାମ୍, ଇନିଃ ଆଣ୍ଦିକାନାଏ, ଇନିୟାଃ କଡ଼ା ମେନାଇୟା।"
4 ମେନ୍ଦ ଅବିମେଲେକ୍ ସାରାଲଃ ହଡ଼୍ମରାଃ ଏତ୍କାନ୍ କାମି କା ରିକାକାଦ୍ ହରାତେ କାଜିକେଦା, "ହେ ପ୍ରାଭୁ, ଆମ୍ ଚିନାଃ ଧାର୍ମାନ୍ ହଡ଼କେ ଗନଏଃ ସାଜାଇ ଏମାଇୟାମ୍ ? 5 ଆବ୍ରାହାମ୍ ଆଇଙ୍ଗ୍କେ ଇନିଃ ଆଇଁୟାଃ ମିଶିଙ୍ଗ୍ ତାନିଃ ମେନ୍ତେ ଚିନାଃ କାଏ କାଜିକାଦ୍ ତାଇକେନା ? ଓଡ଼ୋଃ ଏନ୍ କୁଡ଼ି ହଁଗି, ଇନିଃ ଆଇଁୟାଃ ହାଗାଇଙ୍ଗ୍ ତାନିଃ ମେନ୍ତେ କାଏ ଚି କାଜିକାଦ୍ ତାଇକେନା ? ଏନାମେନ୍ତେ ଆଇଙ୍ଗ୍ ଅକ କାମି ରିକାକେଦାଇଙ୍ଗ୍, ଏନ୍ ବିଷାଏରେ ଆଇଁୟାଃ ଜେତାନ୍ ଗୁହ୍ନାଁ ବାନଃଆ।"
6 ପାର୍ମେଶ୍ୱାର୍ ଦାର୍ଶାନ୍ରେ ଇନିଃକେ କାଜିକିୟା, "ହେଗି, ଆଇଙ୍ଗ୍ ସାରିତାନାଇଙ୍ଗ୍ ଯେ, ଆମ୍ ଫାର୍ଚି ମନ୍ତେ ନେ କାମି ରିକା କାଦାମ୍, ଏନାମେନ୍ତେ ଆଇଁୟାଃ ବିରୁଧ୍ରେ ପାପ୍ କାମି ରିକା ନାଙ୍ଗ୍ ଆଇଙ୍ଗ୍ ଆମ୍କେ ହକାକେଦ୍ମାଇଙ୍ଗ୍ ଓଡ଼ୋଃ ଏନ୍ କୁଡ଼ିକେ କାଇଙ୍ଗ୍ ଜୁଟିଦ୍ ଇଚିକେଦ୍ମା। 7 ମେନ୍ଦ ନାହାଁଃ, ଏନ୍ ହଡ଼ରାଃ କୁଡ଼ିକେ କୁଲ୍ ରୁହାଡ଼୍ତାଇମେ। ଚିଆଃଚି ଇନିଃ ମିହୁଡ଼୍ ନାବୀ ତାନିଃ, ଇନିଃ ଆମାଃ ନାଗେନ୍ତେ ବିନ୍ତି ରିକାଲେରେ ଆମ୍ ବାଞ୍ଚାଅଃଆମ୍। ମେନ୍ଦ ଆମ୍ କାମ୍ କୁଲ୍ ରୁହାଡ଼ିରେଦ, ଆମାଃ ଓଡ଼ୋଃ ଆମାଃ ହଡ଼କଆଃ ଗନଏଃ ସାର୍ତିଗି ହବାଅଃଆ, ଏନା ସାରିକାମେ।"
8 ଅବିମେଲେକ୍ ଏଟାଃ ହୁଲାଙ୍ଗ୍ ସେତାଃ ଇଦାନ୍ରେ ବିରିଦ୍କେଦ୍ତେ ଆୟାଃ ସବେନ୍ ମାପ୍ରାଙ୍ଗ୍ ହଡ଼କକେ କେଡ଼ାକେଦ୍କଆ ଓଡ଼ୋଃ ଇନିଃ ଉଦୁବ୍କେଦ୍ କାଜି ଆୟୁମ୍କେଦ୍ତେ ସବେନ୍କ ପୁରାଃଗି ବରକେଦାକ। 9 ଏନ୍ତେ ଅବିମେଲେକ୍ ଆବ୍ରାହାମ୍କେ କେଡ଼ାକେଦ୍ତେ କାଜିକିୟା, "ଆମ୍ ଆଲେଲଃ ଚିନାଃ ରିକାକେଦାମ୍ ? ଆଇଙ୍ଗ୍ ଆମାଃ ବିରୁଧ୍ରେ ଚିକାନ୍ ଗୁହ୍ନାଁ ରିକାକାଦ୍ ତାଇକେନାଇଙ୍ଗ୍ ଯେ, ଆମ୍ ଆଇଙ୍ଗ୍କେ ଓଡ଼ୋଃ ଆଇଁୟାଃ ରାଇଜ୍କେ ନିମିନ୍ ମାରାଙ୍ଗ୍ ଗୁହ୍ନାଁରେମ୍ ଚିଟାକେଦା ? ଆମ୍ ଆଇଁୟାଃଲଃ ମିସାତେ କା ଲାଗାତିଙ୍ଗ୍ କାମିମ୍ ରିକାକେଦା।" 10 ଅବିମେଲେକ୍ ଆବ୍ରାହାମ୍କେ ଆଡଃଗି କାଜିକିୟା, "ଆମ୍ ଚିନାଃମେନ୍ତେ ନେ ଲେକାନ୍ କାମିମ୍ ରିକାକେଦା ?"
11 ଆବ୍ରାହାମ୍ କାଜିରୁହାଡ଼୍କିୟାଏ, "ନେ ଠାୟାଦ୍ରେନ୍ ଜେତା ହଡ଼କଆଃ ପାର୍ମେଶ୍ୱାର୍ଆଃ ଚେତାନ୍ରେ ବରଭାକ୍ତି ବାନଃଆ, ହବାସାକାଅଃଆ, ଆଇଁୟାଃ କୁଡ଼ି ଖାତିର୍ ଇନ୍କୁ ଆଇଁୟାଃ ଜୀଉ ଇଦିୟାକ ମେନ୍ତେଇଙ୍ଗ୍ ଉଡ଼ୁଃକେଦା। 12 ଇନିଃ ଆଇଁୟାଃ କୁଡ଼ି ହବାକାନାଏ, ମେନ୍ଦ ଇନିଃ ଆଇଁୟାଃ ମିଶି ତାନିଃ, ନେୟାଁଦ ସାର୍ତି ତାନାଃ, ଚିୟାଃଚି ଆଲିଙ୍ଗ୍ଆଃ ଆପୁ ମିଆଁଦ୍ ତାନିଃ ମେନ୍ଦ ଆଲିଙ୍ଗ୍ଆଃ ଏଙ୍ଗା ଆପାନ୍ ଆପାନ୍ ତାନ୍କିନ୍। 13 ପାର୍ମେଶ୍ୱାର୍ ଆଇଙ୍ଗ୍କେ ଆଇଁୟାଃ ଆପୁଆଃ ଅଡ଼ାଃ ବାଗିକେଦ୍ତେ ଏଟାଃ ଦିଶୁମ୍ତେ କୁଲ୍କେଦିୟାଁ ଇମ୍ତା, ଆଇଙ୍ଗ୍ ଆଇଁୟାଃ କୁଡ଼ିକେ କାଜିକାଇ ତାଇକେନାଇଙ୍ଗ୍, ଆମ୍ ଆଇଙ୍ଗ୍କେ ସାର୍ତିଗି ଦୁଲାଡ଼୍ଇଙ୍ଗ୍ତାନ୍ ରେଦ, ଆଲାଙ୍ଗ୍ ଅକ ଅକ ଠାୟାଦ୍ତେ ସେନାଃଲାଙ୍ଗ୍, ଏନ୍ତାଃରେ ଇନିଃ ଆଇଁୟାଃ ହାଗା ତାନିଃ ମେନ୍ତେ ଦାୟାକେଦ୍ତେ କାଜିମେ।"
14 ଏନ୍ତେ ରାଜା ଅବିମେଲେକ୍ ଆବ୍ରାହାମ୍ରାଃ କୁଡ଼ି ସାରାକେ ଏମ୍ ରୁହାଡ଼୍କିୟା, ଏନ୍ତେ ଗୋଟ୍ରେନ୍ ମିଣ୍ଡି, ଉରିଃକ୍ ଓଡ଼ୋଃ ଦାସିକକେ ଆଉକେଦ୍ତେ ଆବ୍ରାହାମ୍କେ ଏମ୍କିୟା। 15 ଅବିମେଲେକ୍ ଆବ୍ରାହାମ୍କେ କାଜିକିୟାଏ, "ଆଇଁୟାଃ ଦିଶୁମ୍ ଆମାଃ ଆୟାର୍ରେ ମେନାଃ, ଆମାଃ ଅକ୍ତାଃରେ ସାନାଙ୍ଗ୍, ଏନ୍ତାଃରେ ତାଇନ୍ମେଁ।" 16 ଓଡ଼ୋଃ ଇନିଃ ସାରାକେ କାଜିକିୟା, "ନେଲେମେ ଆମାଃ ବିରୁଧ୍ରେ ହବାକାନ୍ ଅନ୍ୟାୟରାଃ ମାନ୍ହାନି ବାଦ୍ଲାରେ, ଆମାଃ ହଡ଼କଆଃ ସାମ୍ନାଙ୍ଗ୍ରେ ହାଗାମ୍ ତାମାଃକେ ମିଦ୍ ହାଜାର୍ ରୁପା ସିକା ଏମ୍ଇତାନାଇଙ୍ଗ୍। ନେଆଁ ହରାତେ ଆମାଃ ପୁରା ନ୍ୟାୟ ବିଚାର୍ ହବାୟାନା।"
17 ଏନ୍ତେ ଆବ୍ରାହାମ୍ ପାର୍ମେଶ୍ୱାର୍ତାଃରେ ବିନ୍ତିକେଦାଏ, ଏନ୍ତେ ପ୍ରାଭୁ ପାର୍ମେଶ୍ୱାର୍ ଅବିମେଲେକ୍କେ, ଆୟାଃ କୁଡ଼ିକେ ଓଡ଼ୋଃ ଆୟାଃ ଦାସିକକେ ବୁଗିକେଦ୍କଆ ଓଡ଼ୋଃ ଇନ୍କୁଆଃ ହନ୍ଗାଁଣାକ ହବାୟାନା। 18 ଚିୟାଃଚି ପ୍ରାଭୁ ପାର୍ମେଶ୍ୱାର୍ ଆବ୍ରାହାମ୍ଆଃ କୁଡ଼ି ସାରାରାଃ ଖାତିର୍ ଅବିମେଲେକ୍ଆଃ କୁଡ଼ି ଓଡ଼ୋଃ ଆୟାଃ ଅଡ଼ାଃରେନ୍ ସବେନ୍ କୁଡ଼ିକଆଃ ହନ୍ଗାଁଣା କାକ ହବାଅଃ ତାଇକେନା।
/images/a/WG5FS9VaSWVnVmV3VI8yP)
/images/a/a0208299-6f37-40a0-66e1-2576b9435f00)