1 ଯାକୁବ୍‌ ଆୟାଃ ହନ୍‌କକେ ହାକାଅକେଦ୍‌ତେ କାଜିକେଦ୍‌କଆ, "ଆପେ ମିଦ୍‌ତାଃରେ ହୁଣ୍ଡିୟଃପେ, ଓଡ଼ୋଃ ଆଇଙ୍ଗ୍‌ ହିଜୁଃ ଦିପିଲିରେ ଆପେଲଃ ଚିନାଃ ହବାଅଃଆ, ଏନାଇଙ୍ଗ୍‌ କାଜିୟାପେୟା।

2 "ହେ ଯାକୁବ୍‌ଆଃ ହନ୍‌କ, ମିଦ୍‌ତାଃରେ ହୁଣ୍ଡିକେଦ୍‌ତେ ଆୟୁମେପେ,

ଓଡ଼ୋଃ ଆପେୟାଃ ଆପୁ ଇସ୍ରାଏଲ୍‌ଆଃ କାଜିକେ ଆୟୁମେପେ।

3 "ହେ ରୁବେନ୍‌, ଆମ୍‌ ଆଇଁୟାଃ ମୁତ୍‌କୁଲ୍‌ ହନ୍‌, ଆଇଁୟାଃ ପେଡ଼େଃ

ଓଡ଼ୋଃ ପେଡ଼େୟାନ୍‌ରାଃ ସିଦା ଜଅ ତାନ୍‌ମେ, ମାଇନ୍‌ ନାମେରେ ସିଦାନିଃ

ଓଡ଼ୋଃ ପେଡ଼େୟାନ୍‌ରେ ହଗି ସିଦାନିଃ ତାନ୍‌ମେ।

4 ଆମ୍‌ ଟୁଡା ଦାଆଃ ବିୟୁରଃତାନ୍‌ ଲେକାନିଃ ତାନ୍‌ମେ,

ମେନ୍‌ଦ ଆମ୍‌ ଏଟାଃନିୟାଃଏତେ ମାରାଙ୍ଗ୍‌ କାମ୍‌ ତାଇନା।

ଚିଆଃଚି ଆମ୍‌ ଆମାଃ ଆପୁଆଃ ହିରୁମ୍‌କଲଃ ମିଆଁଦ୍‌ ପାର୍‌କମ୍‌ରେ ଗିତିଜ୍‌ୟାନାମ୍‌,

ଓଡ଼ୋଃ ଆମାଃ ଆପୁରାଃ ଡିସ୍‌ନାକେ ସତ୍‌ରାକେଦାମ୍‌।

5 "ଶିମିୟୋନ୍‌ ଓଡ଼ୋଃ ଲେବୀ,

ଏନ୍‌ ବାରାନ୍‌ ହାଗାୟାକିନାଃ ତାରାଉଡ଼ି ବରୱାନ୍‌ଗିୟା।

6 ହେ ଆଇଁୟାଃ ଜୀଉ, ଇନ୍‌କିନାଃ ଉକୁଆକାନ୍‌ ରଜୋଟରେ ଆଲକା ବଲକା,

ଆଇଁୟାଃ ମନ୍‌ସୁରୁଦ୍‌ ଇନ୍‌କିନାଃ ପାଞ୍ଚେଟ୍‌ରେ ଆଲକା ମେସାଅଃକା,

ଚିଆଃଚି ଇନ୍‌କିନ୍‌ ଖିସ୍‌ତେ ହଡ଼ ଗଏଃକେଦ୍‌କଆକିନ୍‌

ଓଡ଼ୋଃ ରାସ୍‌କାନ୍‌ ନାଙ୍ଗ୍‌ ଆପ୍‌ନାଃ ଇଛାତେ ଉରିକ୍‌କଆଃ ଚାଆଃଲମ୍‌ ଖାଣ୍ଡାଅକେଦାକିନ୍‌।

7 ଇନ୍‌କିନାଃ ଖିସ୍‌ ସାର୍‌ପାଅଃକା, ଚିୟାଃଚି ଏନା ପୁରାଃ ବରୱାନ୍‌ଗି

ଓଡ଼ୋଃ ଦାୟା ବାନଃ ଲେକା ତାଇକେନା।

ଆଇଙ୍ଗ୍‌ ଯାକୁବ୍‌ଆଃ କିଲିରେ ଇନ୍‌କିନ୍‌କେ ବିନ୍‌ଗାଅକିନାଇଙ୍ଗ୍‌

ଓଡ଼ୋଃ ଗଟା ଇସ୍ରାଏଲ୍‌ ଦିଶୁମ୍‌ରେ ଛିତିବିତିକିନାଇଙ୍ଗ୍‌।

8 "ହେ ଯିହୁଦା, ଆମାଃ ହାଗାକ ଆମାଃ ସାହାରାଅ ରିକାଏୟାକ,

ଆମାଃ ତିଃଇ ବାଇରିକଆଃ ହଟଃରେ ତାଇନାଃ,

ଆମାଃ ଆପୁରାଃ ହନ୍‌କ ଆମ୍‌କେ ଜହାର୍‌ମେୟାଁକ।

9 ଯିହୁଦା ଟେଡ଼ଃ ହନ୍‌ ତାନିଃ,

ହେ ଆଇଁୟାଃ ହନ୍‌ ଯିହୁଦା,

ଆମ୍‌ ଜାଁତୁ ସାଙ୍ଗାର୍‌ଏତେ ରୁହାଡ଼୍‌କାନ୍‌ ଟେଡ଼ଃ ଲେକାନ୍‌ନିଃ ତାନ୍‌ମେ। ଲାପାଙ୍ଗାରେ ଅବର୍‌କେଦ୍‌ତେ ବାଟିୟାକାନ୍‌ ଟେଡ଼ଃ ଓଡ଼ୋଃ ଏଙ୍ଗା ଟେଡ଼ଃ ଲେକାନ୍‌ନିଃ ତାନ୍‌ମେ,

ଅକଏ ଆମ୍‌କେ ଆମାଃ ଦୁଡ଼ୁମ୍‌ଏତେ ବିରିଦ୍‌ ଦାଡ଼ିମାଏଁ ?

10 କିଲିକ ଅକଏୟାଃ ଆକ୍‌ତେୟାର୍‌ରେ ହବାଅଃଆକ,

ଏନ୍‌ ଶିଲୋ*ରାଃ ହିନିଜୁଃ ଆଉରି ହବାଅଃ ଜାକେଦ୍‌

ଯିହୁଦାତାଃଏତେ ଚାଏ ଆୟାଃ କାଟାତାଲ୍‌କାଏତେ

ରାଇଜ୍‌ ରିକାରାଃ ସଟା କା ଆତମଃଆ।

11 ଇନିଃ ଦାଖ୍‌ନାଡ଼ିରେ ଆୟାଃ ଗାଧାକେ,

ଓଡ଼ୋଃ ଗାଧା ହନ୍‌କେ ବୁଗିନ୍‌ ଦାଖ୍‌ନାଡ଼ିରେ ତଲିୟା।

ଇନିଃ ଦାଖ୍‌ଜ ଚିପୁଦ୍‌କେଦ୍‌ତେ ଏନ୍‌ ରାସିରେ ଆୟାଃ ଲିଜାଃକେ ଆବୁଙ୍ଗ୍‌ୟେଁଆ,

ଓଡ଼ୋଃ ଆୟାଃ ତୁସିଙ୍ଗ୍‌ ଲିଜାଃକେ ଆରାଃ ଦାଖ୍‌ରାସିରେ ଆବୁଙ୍ଗ୍‌ୟେଁଆ।

12 ଇନିୟାଃ ବାରାନ୍‌ ମେଦ୍‌ ଆରାଃ ଦାଖ୍‌ରାସିଏତେ ଆଦ୍‌କା ମାୟୋମ୍‌ ରାଙ୍ଗ୍‌ ଲେକା,

ଓଡ଼ୋଃ ଆୟାଃ ଡାଟା, ତଆଏତେ ଆଦ୍‌କା ପୁଣ୍ଡି ନେଲଃଆ।

13 "ସବ୍‌ଲୁନ୍‌ ଦରେୟା ଗେନାରେ ତାଇନାଃ

ଓଡ଼ୋଃ ଦାଆଃ ଜାହାଜ୍‌ରାଃ ଘାଟ୍‌ତାଃରେ କାମିୟା।

ଇନିଃ ସିଦୋନ୍‌ ଜାକେଦ୍‌ ଆକ୍‌ତେୟାର୍‌ ରିକାଏୟାଏ।

14 "ଇଷାଖର୍‌ ମିଆଁଦ୍‌ ପେଡ଼େୟାନ୍‌ ଗାଧା ଲେକାନିଃ ତାନିଃ,

ଇନିଃ ମିଣ୍ଡିଗଁଣାରାଃ ଥାଲାରେ ରୁଡ଼ୁନାଃଏ।

15 ଇନିଃ ରୁଡ଼ୁନ୍ ଠାୟାଦ୍‌କେ ବୁଗିନ୍‌

ଓଡ଼ୋଃ ଏନ୍‌ ଦିଶୁମ୍‌କେ ସୁଗାଡ଼ାନ୍‌ଗି ନେଲ୍‌କେଦ୍‌ତେ

ଗଅଃ ନାଙ୍ଗ୍‌ ଆୟାଃ ତାରାନ୍‌ ଲାତାରେୟାଏ

ଓଡ଼ୋଃ ଦାସି ଲେକା ସୁନୁସାର୍‌ କାମି ରିକା ନାଙ୍ଗ୍‌ ଜିମାନାଏ।

16 "ଇସ୍ରାଏଲ୍‌ରାଃ ଏଟାଃ କିଲିକ ଲେକାଗି

ଦାନ୍‌ ଆୟାଃ ହଡ଼କ ନାଗେନ୍ତେ ବିଚାର୍‌ନିଃ ହବାଅଃଆଏ।

17 ଦାନ୍‌ ହରା ଗେନାରେନ୍‌ ବିଙ୍ଗ୍‌ ଲେକାନିଃ

ଓଡ଼ୋଃ ସେସେନ୍‌ ହରାରେ ବିଷ୍‌ତେ ପେରେଜାକାନ୍‌ ବିଙ୍ଗ୍‌ ଲେକାନ୍‌ନିଃ ତାନିଃ,

ଅକ୍‌ନିଃଚି ସାଦମ୍‌ରାଃ ମୁକ୍‌ଡ଼ିକେ ସଦାଃଏ

ଓଡ଼ୋଃ ସାଦମ୍‌ରେ ଦୁବାକାନ୍‌ ହଡ଼ ଦୟାକେନଃଆଏ।

18 "ହେ ପ୍ରାଭୁ, ଆଇଙ୍ଗ୍‌ ଆମାଃତାଃଏତେ ଜୀଉବାଞ୍ଚାଅ ନାମେ ନାଙ୍ଗ୍‌ ନେଲ୍‌ହରା ତାନାଇଙ୍ଗ୍‌।

19 "ଗାଦ୍‌କେ ରେରେଃକ୍‌ ହଡ଼କ ହୁମାଗିଆକ,

ମେନ୍‌ଦ ଇନିଃ ଇନ୍‌କୁକେ ହୁମାଃରୁହାଡ଼୍‌କଆ ଓଡ଼ୋଃ ହାର୍‌କଆଏ।

20 "ଆସେର୍‌ତାଃଏତେ ବୁଗିନ୍‌ ଜଜମାଃ ଅମନଆଃ

ଓଡ଼ୋଃ ଇନିଃ ରାଜାକେ ଜଜମାଃ ଏମ୍‌ ପୁରାଇୟାଏ।

21 "ନପ୍ତାଲି ମିରିକ୍‌କ ଲେକା ବେଗାର୍‌ ବରତେ ନିର୍‌ ବାଡ଼ାୟାଏ।

ଇନିଃ ସୁଗାଡ଼ାନ୍‌ କାଜିକ କାଜିୟାଏ।

22 "ଯୋଷେଫ୍‌ ସେତେଙ୍ଗ୍‌ ଦାଆଃ ହେପାଦ୍‌ରେ ଜ'ଅଃତାନ୍‌ ନାଡ଼ିକତ ଲେକାନ୍‌ନିଃ ତାନିଃ,

ଏନାରାଃ ନାଡ଼ିକତ ପାଚ୍‌ରିରେ ରାକାବ୍‌କେଦ୍‌ତେ ଗଟାସାଃରେ ଲାଦିତପାକେନଃଆ।

23 ଧାନୁତେ ଲାଡ଼ାଇ ହଡ଼କ ଇନିଃକେ ପୁରାଃଗି ସିଗିଦ୍‌କିଜାକ,

ଓଡ଼ୋଃ ଇନିଃକେ ଧାନୁ ଚିଆରିଲଃ ତୁଇଙ୍ଗ୍‌କେଦ୍‌ତେ ସାସାତି ଏମାକାଇଜାଃକ।

24 ମେନ୍‌ଦ ଇନିୟାଃ ଧାନୁ କେଟେଦ୍‌ କେଦ୍‌ତେ ତାଇନ୍‌ୟାନା,

ଇନିଃ ଆୟାଃ ସୁପୁକେ ପେଡ଼େଃକେଦାଏ,

ଇନିଃ ଯାକୁବ୍‌ଆଃ ପାର୍‌ମେଶ୍ୱାର୍‌ଆଃ ହରାତେ ପେଡ଼େୟାନ୍‌ନିଃ,

ଏନ୍‌ ହରାତେ ଇନିଃ ଇସ୍ରାଏଲ୍‌କେ ବାଞ୍ଚାଅ ତାନ୍‌ ମିଆଦ୍ ମିଣ୍ଡିଗୁପିନିଃ।

25 ଇନିଃ ଆମାଃ ଆପୁଆଃ ପାର୍‌ମେଶ୍ୱାର୍‌ ଅକଏଚି ଆମାଃ ବୁଗିନାଃ ରିକାୟାଏ,

ପୁରାଃ ପେଡ଼େୟାନ୍‌ ପାର୍‌ମେଶ୍ୱାର୍‌ ଆମ୍‌କେ ଆଶିଷ୍‌ ଏମାମେୟାଁଏ,

ଗାମା ଦାଆଃ ଲେକା ଇନିଃ ଆମାଃ ଚେତାନ୍‌ରେ ଆଶିଷ୍‌ ରିକାୟାଏ,

ଅତେ ଲାତାର୍‌ରେୟାଃ ଦାଆଃ ଲେକା ଆମାଃ ବୁଗିନାଃ ରିକାୟାଏ,

ପୁରାଃ ହନ୍‌କ ଓଡ଼ୋଃ ମିଣ୍ଡି ମେରମ୍‌ ପସା ଇଦିୟଃଆ।

26 ଆଇଁୟାଃ ପୁର୍‌ଖା ଆପୁକଆଃ ଆଶିଷ୍‌ ଏତେ

ଆମାଃ ଆପୁଆଃ ଆଶିଷ୍‌ ପୁରାଃଗିୟାଃ,

ଏନା ମାରାଙ୍ଗ୍‌ ବୁରୁ ଲେକା ଆଶିଷ୍‌ ନାମେୟାଏ,

ଏନା ସବେନ୍‌ ହୁଲାଙ୍ଗ୍‌ ତାଇନଃ ବୁରୁରେୟାଃ ଟୁଣ୍ଡୁ ଜାକେଦ୍ ଆଶିଷ୍‌ ନାମେୟାଏ, ଏନା ଯୋଷେଫ୍‌ଆଃ ବହଃରେ ଏନ୍‌ ଆଶିଷ୍‌ ହବାଅଃଆ,

ଓଡ଼ୋଃ ଆୟାଃ ହାଗା କତାଃଏତେ ବିନ୍‌ଗାଅକାନ୍‌ ହଡ଼ ଲେକା ଇନିୟାଃ ବହଃରେ ଏନ୍‌ ଆଶିଷ୍‌ ହବାଅଃଆ।

27 "ବେଞ୍ଜାମିନ୍‌ ଏଟାଃକକେ ହାନି ରିକାତାନ୍‌ ତୁୟୁ ଲେକାଃଏ।

ସେତାଃ ଇମ୍‌ତା ଇନିଃ ମିରିକ୍‌ ଗଏଃକେଦ୍‌ତେ ଜମାଃଏ ଓଡ଼ୋଃ ସିଙ୍ଗି ହାସୁର୍‌ କେନଃରେ ଗଏଃକାଇ ତେୟାଃକେ ହାଟିଙ୍ଗ୍‌ ରିକାଃଏ।"

28 ନେ ସବେନ୍‌କ ଇସ୍ରାଏଲ୍‌ଆଃ ଗେଲ୍‌ବାର୍‌ କିଲିକ ତାନ୍‌କ, ଓଡ଼ୋଃ ଆପୁତେ ନେ ସବେନ୍‌କକେ ଆଶିଷ୍‌ ଏମାକତାନ୍‌ ଦିପିଲିରେ ମିପିହୁଡ଼୍‌ ସବେନ୍‌କକେ ବିଶେଷ୍‌ ଆଶିଷ୍‌ ଏମାଦ୍‌କଆଏ।

29 ଏନ୍ତେ ଯାକୁବ୍‌ ଆୟାଃ ହନ୍‌କକେ ହୁକୁମ୍‌କେଦ୍‌ତେ କାଜିକେଦ୍‌କଆ, "ନାହାଁଃଦ ଆଇଙ୍ଗ୍‌ ଆଇଁୟାଃ ପୁର୍‌ଖା ଆପୁକତାଃତେ ସେନଃ ନାଙ୍ଗ୍‌ ସେକାଡ଼େନ୍‌ ତାନାଇଙ୍ଗ୍‌, ଆଇଁୟାଃ ଆପୁକ ଅକନ୍‌ ଲାପାଙ୍ଗାରେ ତପାକାନାକ ଏନ୍‌ ଠାୟାଦ୍‌ ଅକଆଃ ଚି ଇଫ୍ରୋଣ୍‌ରାଃ ହିତ୍ତିୟ ପିଡ଼ିରେ ମେନାଃ ଏନ୍ତାଃରେଗି ଆଇଙ୍ଗ୍‌କେ କାବାର୍‌ ଏମାଇଙ୍ଗ୍‌ପେ। 30 ଚିୟାଃଚି ଆବ୍ରାହାମ୍‌ କାବାର୍‌ ନାମ୍‌ ନାଗେନ୍ତେ କିନାନ୍‌ ଦିଶୁମ୍‌ରେୟାଃ ମମ୍ରି ନୁତୁମ୍‌ ଠାୟାଦ୍‌ ଏନ୍‌ ଆୟାର୍‌ରେ ମକ୍‌ପେଲା ନୁତୁମ୍‌ ପିଡ଼ି ହିତ୍ତିୟ ଇଫ୍ରୋଣ୍‌ତାଃଏତେ କିରିଙ୍ଗ୍‌କାଦ୍‌ ତାଇକେନାଏ। 31 ଏନ୍‌ ଠାୟାଦ୍‌ରେ ଆବ୍ରାହାମ୍‌ ଓଡ଼ୋଃ ଆୟାଃ କୁଡ଼ି ସାରାକେ, ଇସାକ୍‌ ଓଡ଼ୋଃ ଆୟାଃ କୁଡ଼ି ରିବ୍‌କାକେ ହାସାଗାଡା ଏମାକାନା। ଆଇଙ୍ଗ୍‌ ହଗି ଏନ୍‌ ଠାୟାଦ୍‌ରେ ଲେୟାକେହଁ ହାସାଗାଡା ଏମାକାଇଜାଇଙ୍ଗ୍‌। 32 ଏନ୍ ଲୟଙ୍ଗ୍ ଓଡ଼ୋଃ ଏନ୍‌ ଭିତାର୍‌ରେ ତାଇକେନ୍‌ ଲାପାଙ୍ଗା ହିତ୍ତିୟ ଆଉକାଦାଇଙ୍ଗ୍‌, ଏନ୍ତାଃରେ ଆଇଙ୍ଗ୍‌କେ ତପାଇଙ୍ଗ୍‌ପେ।" 33 ନେ ଲେକାତେ ଯାକୁବ୍‌ ଆୟାଃ ହନ୍‌କକେ କାଜିକ କାଜି ଚାବା କେଦ୍‌ଚି, ଡିସ୍‌ନାଃରେ ଆୟାଃ କାଟାକେ ମିଦ୍‌ତାଃରେ ଦହଃକେଦ୍‌ତେ ଇନିଃ ଗଏଃୟାନା। ଓଡ଼ୋଃ ଆୟାଃ ହଡ଼କଲଃ ମେସାୟାନାଏ।