ଏନେଟେଦ୍‌ 32

ଯାକୁବ୍‌ ଏଷୌଲଃ ନେପେଲ୍‌ ନାଗେନ୍ତେ ସେକାଡ଼େନ୍‌

1 ଏନ୍ତେ ଯାକୁବ୍‌ ହରା ସେନ୍‌ ଏଟେଦ୍‌କେଦାଏ ଇମ୍‌ତା ପାର୍‌ମେଶ୍ୱାର୍‌ଆଃ ଦୁଁତ୍‌କ ଇନିଃଲଃ ନାପାମ୍‌ୟାନାକ। 2 ଯାକୁବ୍‌ ଇନ୍‌କୁକେ ନେଲ୍‌କେଦ୍‌ତେ କାଜିକେଦ୍‌କଆ, "ନିକୁଦ ପାର୍‌ମେଶ୍ୱାର୍‌ଆଃ ଝୁଣ୍ଡ୍‌ ତାନ୍‌କୁ।" ଏନାମେନ୍ତେ ଏନ୍‌ ଠାୟାଦ୍‌ରାଃ ନୁତୁମ୍‌ ମହନୟିମ୍‌ ଦହକେଦାଏ।

3 ଏନ୍ ତାୟମ୍‌ତେ ଯାକୁବ୍‌ ଆଇଃକ୍‌ ସେନ୍‌ ସିଦାରେ ଆୟାଃ ହାଗା ଏଷୌତାଃ ଆୟାଃ କାଜିକୁଲ୍‌କକେ କୁଲ୍‌କେଦ୍‌କଆ। ଇନିଃ ସେୟିର୍‌ ପାର୍‌ଗାନ୍‌ରେୟାଃ ଇଦୋମ୍‌ ନୁତୁମ୍‌ ଦିଶୁମ୍‌ରେ ତାଇନଃ ତାଇକେନା। 4 ଇନିଃ ଇନ୍‌କୁକେ ନେ’ଲେକା କାଜିପେ ମେନ୍ତେ କାଜିକେଦ୍‌କଆ, "ହେ ଆଲେୟାଃ ଗମ୍‌କେ ଏଷୌ, ଆମାଃ ଦାସି ଯାକୁବ୍‌ଆଃ ଜହାର୍‌ ଲେବେଃ ମନ୍‌ତେ ତେଲାଏମେ। ଆଇଙ୍ଗ୍‌ ଲାବନ୍‌ଆଃ ଅଡ଼ାଃରେ ତିସିଙ୍ଗ୍‌ ଜାକେଦ୍‌ ତାଇକେନ୍‌ ହରାତେ ଆମାଃଲଃ ନେପେଲ୍‌ ନାଗେନ୍ତେ ବିଲାମ୍‌ୟାନା। 5 ଆଇଁୟାଃ ଗୋଟ୍‌ରେ ଉରିକ୍‌, ଗାଧା, ମିଣ୍ଡି ଓଡ଼ୋଃ ଦାସିକ ମେନାକଆ। ଆଇଙ୍ଗ୍‌ ଆଇଁୟାଃ ଗମ୍‌କେୟାଃ ଆୟାର୍‌ରେ ସାୟାଦ୍‌ ନାମେ ନାଗେନ୍ତେ ନେ କାନାଜି ଆମାଃତାଃ କାଜି କୁଲ୍‌କେଦାଇଙ୍ଗ୍‌।"

6 ଏନ୍‌ ତାୟମ୍‌ତେ, କାଜିକୁଲ୍‌କ ଯାକୁବ୍‌ତାଃ ରୁହାଡ଼୍‌କେଦ୍‌ତେ କାଜିକିୟାକ, "ଆଲେ ଆମାଃ ହାଗାମ୍ ଏଷୌତାଃ ସେନ୍‌କାନ୍‌ ତାଇକେନାଲେ, ଇନିଃ ୪୦୦ ହଡ଼କକେ ଗାତିରେ ସାବ୍‌କେଦ୍‌ତେ ଆମାଃଲଃ ନେପେଲ୍‌ ନାଗେନ୍ତେ ହିଜୁଃତାନା।" 7 ନେ କାଜି ଆୟୁମ୍‌କେଦ୍‌ତେ ଯାକୁବ୍‌ ପୁରାଃଗି ବରକେଦା ଓଡ଼ୋଃ ଆଡ଼ାଃଉଡ଼ୁଃୟାନା। ଇନିଃ ଆୟାଃଲଃ ତାଇନ୍‌ ହଡ଼କକେ, ଆୟାଃ ଗୋଟ୍‌ରେନ୍‌ ମିଣ୍ଡି, ମେରମ୍‌, ଉରିଃକ୍‌ ଓଡ଼ୋଃ ଉଁଟ୍‌କକେ ବାର୍‌ ଝୁଣ୍ଡ୍‌ରେ ହାଟିଙ୍ଗ୍‌ କେଦ୍‌କଆ। 8 ଏନ୍ତେ ଇନିଃ ଉଡ଼ୁଃକେଦାଏ, "ଏଷୌ ହିଜୁଃକେଦ୍‌ତେ ମିଆଦ୍‌ ଝୁଣ୍ଡ୍‌କେ ଆକ୍‌ତେୟାର୍‌ ରିକାଏ ରେୟ, ଏଟାଃ ଝୁଣ୍ଡ୍‌ ବାଞ୍ଚାଅକେଦ୍‌ତେ ନିର୍‌ ଦାଡ଼ିୟାକ।"

9 ଇମ୍‌ତା ଯାକୁବ୍‌ ବିନ୍ତିକେଦ୍‌ତେ କାଜିକେଦା, "ହେ ପ୍ରାଭୁ ଆଇଁୟାଃ ପୁର୍‌ଖା ଆପୁ ଆବ୍ରାହାମ୍‌ଆଃ ପାର୍‌ମେଶ୍ୱାର୍‌, ଆଇଁୟାଃ ଆପୁ ଇସାକ୍‌ଆଃ ପାର୍‌ମେଶ୍ୱାର୍‌, ଆମ୍‌ ଆଇଙ୍ଗ୍‌କେ କାଜିକାଇଙ୍ଗ୍‌ ତାଇକେନାମ୍‌, ଆମ୍‌ ଆମାଃ ଦିଶୁମ୍‌ ଓଡ଼ୋଃ ଆମାଃ କୁଟୁମ୍‌କତାଃତେ ସେନଃମେ, ଇମ୍‌ତା ଆଇଙ୍ଗ୍‌ ଆମାଃ ବୁଗିନାଃ ରିକାୟାଇଙ୍ଗ୍‌। 10 ଆମାଃ ନେ ଦାସି ନାଗେନ୍ତେ ଅକ ସବେନ୍‌ ଦାୟା ଓଡ଼ୋଃ ପାତିୟାର୍‌ରଃ ବିଷାଏ ରିକାକାଦାମ୍‌, ଏନାରାଃ କାଟିକାନ୍‌ ହଁଗି ଆଇଙ୍ଗ୍‌ ନାମେ ଲେକାନିଃ ନାହାଁଲିଙ୍ଗ୍‌। ଚିୟାଃଚି ଆଇଙ୍ଗ୍‌ ନେ ଯାର୍ଦାନ୍‌ ଗାଡ଼ା ପାରମ୍‌କେଦ୍‌ ଇମ୍‌ତା ନେ ମିଆଦ୍‌ ସଟା ବାଗିକେଦ୍‌ତେ ଜେତ୍‌ନାଃ ହଁଗି କା ତାଇକେନା। ମେନ୍‌ଦ ନାହାଁଃ ଆଇଁୟାଃ ବାର୍‌ ଝୁଣ୍ଡ୍‌ ମେନାକଆ। 11 ବିନ୍ତିମେ ତାନାଇଙ୍ଗ୍‌, ଆଇଁୟାଃ ହାଗା ଏଷୌରାଃ ତିଃଇଏତେ ଆଇଙ୍ଗ୍‌କେ ବାଞ୍ଚାଇଙ୍ଗ୍‌ମେଁ, ଚିୟାଃଚି ଆଇଙ୍ଗ୍‌ଦ ଇନିଃକେ ବରଆଇ ତାନାଇଙ୍ଗ୍‌, ଅକଏସାରି ଇନିଃ ହିଜୁଃକେଦ୍‌ତେ ଆଇଙ୍ଗ୍‌କେ ଓଡ଼ୋଃ ହନ୍‌କଲଃ ଆକଆଃ ଏଙ୍ଗାକକେ ହଗି ଜିଅନ୍‌କଆଏ। 12 ମେନ୍‌ଦ ଆମ୍ କାଜିକାଦାମ୍‌, ଆଇଙ୍ଗ୍‌ ସାର୍‌ତିଗି ଆମାଃ ବୁଗିନାଃ ରିକାୟାଇଙ୍ଗ୍‌ ଓଡ଼ୋଃ ଦରେୟା ଗେନାରେୟାଃ ଗିତିଲ୍‌ ଲେକା ଆମାଃ କିଲିକକେ ପୁରାଃଗିଇଙ୍ଗ୍‌ ପସାକଆ।"

13 ଏନ୍ତେ ଯାକୁବ୍‌ ଏନ୍‌ ଠାୟାଦ୍‌ରେ ମିଦ୍‌ନୁବାଃ ତାଇନ୍‌ୟାନାଏ। ଓଡ଼ୋଃ ଆୟାଃତାଃରେ ଅକ୍‌ନାଃ ତାଇକେନା, ଏନାଏତେ ଆୟାଃ ହାଗା ଏଷୌକେ ଦାନ୍‌ ଏମ୍‌ ନାଗେନ୍ତେ ସାଲାକେଦା; 14 ୨୦୦ ପେଠି ମେରମ୍‌ ଓଡ଼ୋଃ ମିଦ୍‌ହିସି ବାକ୍‌ରା ମେରମ୍‌ ଓଡ଼ୋଃ ୨୦୦ ପେଠି ମିଣ୍ଡି ଓଡ଼ୋଃ ମିଦ୍‌ହିସି ପେଠା ମିଣ୍ଡି, 15 ତଆ ଏମ୍‌ତାନ୍‌ ହିସି ଗେଲେୟା ଉଁଟ୍‌, ବାର୍‌ହିସି ଗାଈ, ଗେଲେୟା ବାଛା, ତଆ ଏମ୍‌ତାନ୍‌ ବାର୍‌ହିସି ଗାଧା ଓଡ଼ୋଃ ଗେଲେୟା ଗାଧା ଦହକେଦ୍‌କଆଏ। 16 ଏନ୍ତେ ଇନିଃ ଏନ୍‌ ସବେନ୍‌ ଗୋଟ୍‌କକେ ଆପାନ୍‌ ଆପାନ୍‌ ଦହକେଦ୍‌ତେ ମିମିଆଦ୍‌ ଗୋଟ୍‌ ଆୟାଃ ଦାସିକଆଃ ତିଃଇରେ ଜିମାକେଦ୍‌ତେ ଇନ୍‌କୁକେ କାଜିକେଦ୍‌କଆ, "ଆପେ ମିପିଆଦ୍‌ ଗୋଟ୍‌କଆଃ ଥାଲାରେ ସାପାଙ୍ଗିନ୍‌ ଦହକେଦ୍‌ତେ ଆଇଁୟାଃ ଆୟାର୍‌ ଆୟାର୍‌ ସେନ୍‌ପେ।" 17 ଓଡ଼ୋଃ ଇନିଃ ସବେନ୍‌କଆଃଏତେ ଆୟାର୍‌ରେ ତାଇକାନ୍‌ ଦାସିକେ ହୁକୁମ୍‌କିୟା, "ଆଇଁୟାଃ ହାଗା ଏଷୌଲଃ ଆମାଃ ନାପାମ୍‌ ହବାଅଃଆ ଇମ୍‌ତା ଇନିଃ ଆମ୍‌କେ ‘ଆମ୍‌ ଅକଏୟାଃ ଦାସି ? କତାଃ ସେନଃ ତାନାମ୍‌ ? ଓଡ଼ୋଃ ଆମାଃ ଆୟାର୍‌ରେନ୍‌ ଜାଁତୁକ ଅକେୟାଃ ତାନ୍‌କ ?’ ମେନ୍ତେ କୁଲିମେୟାଁ, 18 ଇମ୍‌ତା ଆମ୍‌ ଇନିଃକେ କାଜିରୁହାଡ଼ିମେ, ‘ନେ ସବେନ୍‌କ ଆମାଃ ଦାସି ଯାକୁବ୍‌ଆଃ ତାନ୍‌କ, ଇନିଃ ଆୟାଃ ଗମ୍‌କେ ଏଷୌ ନାଗେନ୍ତେ ଦାନ୍‌ ଏମ୍‌ ଲେକା ସିଦାରେ କୁଲାକାଦ୍‌କଆ, ଓଡ଼ୋଃ ଯାକୁବ୍‌ ହଁଗି ଆଲେୟାଃ ଦୟା ଦୟା ହିଜୁଃତାନାଏ।’ " 19 ଇନିଃ ନେ’ଲେକାଗି ଗୋଟ୍‌ ନେଲ୍‌ତାନ୍‌ ସବେନ୍‌ ଆୟୁର୍‌ ତାୟମ୍‌ ଦାସିକକେ ହୁକୁମ୍‌ ଏମ୍‌ତାନ୍‌ଲଃ କାଜିକେଦ୍‌କଆ, "ଆପେ ଏଷୌଲଃ ନାପାମ୍‌ରେ, ଆପେ ସବେନ୍‌କ ଏନ୍‌ ଲେକାଗି କାଜି ରୁହାଡ଼ାଇପେ।" 20 ଆଡଃଗି କାଜିୟାଇପେ, "ଆମାଃ ଦାସି ଯାକୁବ୍‌ ଆଲେୟାଃ ଦୟା ଦୟା ହିଜୁଃତାନାଏ। ଚିୟାଃଚି ଯାକୁବ୍‌ ଆୟାଃ ମନ୍‌ରେ ଉଡ଼ୁଃକେଦା, ସିଦାତେ ଇନିଃତାଃ ଦାନ୍‌ ଏମ୍‌ କୁଲ୍‌କେଦ୍‌ତେଇଙ୍ଗ୍‌ ସୁକୁଇଚିୟା ଏନ୍ତେ ଆଇଙ୍ଗ୍‌ ଇନିଃଲଃ ନେପେଲ୍‌ ନାଙ୍ଗ୍‌ ସେନାଇଙ୍ଗ୍‌, ହବାସାକାଅଃଆ ଇନିଃ ଆଇଙ୍ଗ୍‌କେ ଛାମା ଏମାଇୟାଁଏ।" 21 ନେ’ଲେକାତେ ଯାକୁବ୍‌ ଆୟାଃ ଦାନ୍‌କେ ସିଦାତେ ଏମ୍‌ କୁଲ୍‌କେଦା ଓଡ଼ୋଃ ଆଇଃକ୍‌ ଏନ୍‌ ନୁବାଃ ଆୟାଃ ଝୁଣ୍ଡ୍‌ଲଃ କୁମ୍ବାରେ ତାଇନ୍‌ୟାନା।

ପାର୍‌ମେଶ୍ୱାର୍‌ଲଃ ଯାକୁବ୍‌ଆଃ ଲାଡ଼ାଇ

22 ଏନ୍ତେ ଯାକୁବ୍‌ ଏନ୍‌ ନିଦାରେ ବିରିଦ୍‌କେଦ୍‌ତେ ଆୟାଃ ବାରାନ୍‌ କୁଡ଼ି, ବାରାନ୍‌ ଦାସି ଓଡ଼ୋଃ ଗେଲ୍‌ମିଆଦ୍‌ ହନ୍‌କକେ ଯାବୋକ୍‌ ଗାଡ଼ାରାଃ ହାନ୍‌ପାରମ୍‌ତେ ଇଦି ସେଟେର୍‌କ ନାଙ୍ଗ୍‌ ମିସାତେ ଇଦିକେଦ୍‌କଆ। 23 ଓଡ଼ୋଃ ଇନିଃ ଇନ୍‌କୁକେ ଏନ୍‌ ଗାଡ଼ା ପାରମ୍‌ କେଦ୍‌କଆଏ ଓଡ଼ୋଃ ଆୟାଃ ସବେନ୍‌ ଜିନିଷ୍‌କକେ ହାନ୍‌ ପାରମ୍‌ତେ କୁଲ୍‌କେଦା। 24 ମେନ୍‌ଦ ଯାକୁବ୍‌ ଏସ୍‌କାର୍‌ଗି ଏନ୍ତାଃରେ ତାଇନ୍‌ୟାନା।

ଇମ୍‌ତା ମିଆଦ୍‌ ହଡ଼ ହିଜୁଃକେଦ୍‌ତେ ସିଙ୍ଗିତୁରଃ ଜାକେଦ୍‌ ଆୟାଃଲଃ ଥାପାଃୟାନାଏ। 25 ଇନିଃ ଯାକୁବ୍‌ଲଃ ଥାପାଃରେ କାଏ ହାରାଅ ଦାଡ଼ିତାନ୍‌ ଲେକା ଆଟ୍‌କାର୍‌କେଦାଏ ଇମ୍‌ତା, ଇନିଃ ଯାକୁବ୍‌ଆଃ ବୁଲୁରାଃ ଜଡ଼େନ୍‌ଜାଙ୍ଗ୍‌ରେ ହୁମାଃକିୟା, ଏନ୍ତେ ଯାକୁବ୍‌ଆଃ ଜଡ଼େନ୍‌ଜାଙ୍ଗ୍‌ ଖସ୍‌ରାଅୟାନା। 26 ଏନ୍ତେ ଏନ୍‌ ହଡ଼ କାଜିକିୟାଏ, "ସିଙ୍ଗି ତୁର୍‌ୟାନ୍‌ଗିୟା, ଆଇଙ୍ଗ୍‌କେ ବାଗିତାଇଙ୍ଗ୍‌ମେ।"

ମେନ୍‌ଦ ଯାକୁବ୍‌ କାଜିରୁହାଡ଼୍‌କିୟାଏ, "ଆମ୍‌ ଆଇଙ୍ଗ୍‌କେ ଆଶିଷ୍‌ କାମ୍‌ ଏମାଇଙ୍ଗ୍‌ରେ, କାଇଙ୍ଗ୍‌ ବାଗିମେୟାଁ।"

27 ଏନ୍‌ ହଡ଼ ଯାକୁବ୍‌କେ କୁଲିକିୟା, "ଆମାଃ ନୁତୁମ୍‌ ଚିନାଃ ତାନାଃ ?"

ଇନିଃ କାଜିରୁହାଡ଼୍‌କିୟା, "ଆଇଁୟାଃ ନୁତୁମ୍‌ ଯାକୁବ୍‌ ତାନାଃ।"

28 ଏନ୍‌ ହଡ଼ କାଜିକିୟାଏ, "ଆମାଃ ନୁତୁମ୍‌ ଓଡ଼ୋଃ ଯାକୁବ୍‌ କା ହବାଅଃଆ, ମେନ୍‌ଦ ଇସ୍ରାଏଲ୍‌ ନୁତୁମ୍‌ରେମ୍‌ ସାରିୟଃଆ। ଚିଆଃଚି ଆମ୍‌ ପାର୍‌ମେଶ୍ୱାର୍‌ ଓଡ଼ୋଃ ହଡ଼ଲଃ ଲାଡ଼ାଇକେଦ୍‌ତେ ଜିତାଅକାନାମ୍‌।"

29 ଇମ୍‌ତା ଯାକୁବ୍‌ କାଜିକିୟାଏ, "ଦାୟାକେଦ୍‌ତେ ଆମାଃ ନୁତୁମ୍‌ ଉଦୁବାଇଙ୍ଗ୍‌ମେ।"

ମେନ୍‌ଦ ଇନିଃ କାଜିରୁହାଡ଼୍‌କିୟାଏ, "ଚିନାଃ ମେନ୍ତେ ଆଇଁୟାଃ ନୁତୁମ୍‌ କୁଲିତାନାମ୍‌ ?" ଏନ୍ତେ ଇନିଃ ଯାକୁବ୍‌କେ ଆଶିଷ୍‌କିୟା।

30 ଏନାମେନ୍ତେ ଯାକୁବ୍‌ ଏନ୍‌ ଠାୟାଦ୍‌ରାଃ ନୁତୁମ୍‌ ପନୁୟେଲ୍‌*32:30 ପାର୍‌ମେଶ୍ୱାର୍‌ଆଃ ମେଦ୍‌ମୁହାଡ଼୍‌ ଦହକେଦାଏ। ଚିଆଃଚି ଇନିଃ କାଜିକେଦାଏ, "ଆଇଙ୍ଗ୍‌ ପାର୍‌ମେଶ୍ୱାର୍‌ଆଃ ମେଦ୍‌ମୁହାଁଡ଼୍‌ ନେଲ୍‌କେଦାଇଙ୍ଗ୍‌, ଏନ୍‌ରେୟ ବାଞ୍ଚାଅକାନାଇଙ୍ଗ୍‌।" 31 ଯାକୁବ୍‌ ଏନ୍‌ ପନୁୟେଲ୍‌ ଠାୟାଦ୍‌ ବାଗିକେଦ୍‌ତେ ସେନଃଲଃ ସିଙ୍ଗିତୁର୍‌ୟାନା। ଚିଆଃଚି ଯାକୁବ୍‌ଆଃ ବୁଲୁତାଃରାଃ ଜଡ଼େନ୍‌ଜାଙ୍ଗ୍‌ ଖସ୍‌ରାଅକାନ୍‌ ହରାତେ କାଟା ଲିକୁଇଃ ଲିକୁଇଃ ସେସେନ୍‌ୟାନାଏ। 32 ଏନାମେନ୍ତେ ଇସ୍ରାଏଲ୍‌ରେନ୍‌ ହଡ଼କ ତିସିଙ୍ଗ୍‌ ଜାକେଦ୍‌ ବୁଲୁରାଃ ଜଡ଼େନ୍‌ ଜାଙ୍ଗ୍‌ରେୟାଃ ମାସ୍‌ କାକ ଜଜମାଃ। ଚିୟାଃଚି ଇନିଃ ଯାକୁବ୍‌ଆଃ ବୁଲୁରାଃ ଜଡ଼େନ୍‌ ଜାଙ୍ଗ୍‌ରେ ଜୁଟିଦାକାଦ୍‌ ତାଇକେନା।