1 "ଯାକୁବ୍‌ ଆବୁଆଃ ଆପୁଆଃ ସବେନ୍‌ ସାମ୍ପାତ୍ତି କୁମ୍ବୁଡ଼ୁକେଦ୍‌ତେ ଇଦିକେଦା ଓଡ଼ୋଃ କିସାଁଣ୍‌ୟାନ୍‌ଲଃ ମାଇନ୍‌ ନାମେତାନାଏ।" ନେ କାଜି ଲାବନ୍‌ଆଃ ହନ୍‌କ ଜାଗାର୍‌ତେୟାଃ, ଯାକୁବ୍‌ ଆୟୁମ୍‌କେଦାଏ। 2 ଏନ୍ତେ ଯାକୁବ୍‌ ଲାବନ୍‌ଆଃ ମେଦ୍‌ମୁହାଁଡ଼୍‌ ନେଲ୍‌କେଦ୍‌ତେ ଆଟ୍‌କାର୍‌ ଉରୁମ୍‌କେଦାଏ ଯେ, ସିଦା ଲେକାତେ ଲାବନ୍‌ଆଃ ମନ୍‌ରେ ସୁକୁ ବାନଆଃ। 3 ଏନ୍ତେ ପ୍ରାଭୁ ଯାକୁବ୍‌କେ କାଜିକିୟା, "ଆମ୍‌ ଆମାଃ ପୁର୍‌ଖା ଆପୁକଆଃ ଦିଶୁମ୍‌ତେ ଓଡ଼ୋଃ ଆମାଃ କୁଟୁମ୍‌କତାଃତେ ସେନଃ ରୁହାଡ଼୍‌ମେଁ, ଓଡ଼ୋଃ ଆଇଙ୍ଗ୍‌ ଆମାଃଲଃ ତାଇନାଇଙ୍ଗ୍‌।"

4 ଏନ୍ତେ ଯାକୁବ୍‌ ପିଡ଼ିରେ ମିଣ୍ଡି ଗୋଟ୍‌ ଗୁପିତାନ୍‌ ଇମ୍‌ତା ରାହେଲ୍‌ ଓଡ଼ୋଃ ଲେୟାକେ କେଡ଼ା ନାଙ୍ଗ୍‌ କାଜି କୁଲ୍‌କେଦ୍‌ତେ, 5 ଇନ୍‌କିନ୍‌କେ କାଜିକେଦ୍‌କିନା, "ଆଇଙ୍ଗ୍‌ ଆଟ୍‌କାରେ ତାନାଇଙ୍ଗ୍‌, ଆବେନାଃ ଆପୁଆଃ ମନ୍‌କ ଆଇଁୟାଃ ନାଙ୍ଗ୍‌ ସିଦା ଲେକା ବାନଆଃ, ମେନ୍‌ଦ ଆଇଁୟାଃ ଆପୁଆଃ ପାର୍‌ମେଶ୍ୱାର୍‌ ଆଇଁୟାଃଲଃ ମେନାଇୟା। 6 ଆଇଙ୍ଗ୍‌ ଆଇଁୟାଃ ପୁରା ପେଡ଼େଃତେ ଆବେନାଃ ଆପୁଆଃ ସୁନୁସାର୍‌ କାମି ରିକାକେଦାଇଙ୍ଗ୍, ଏନାବେନ୍‌ ସାରିତାନା। 7 ଏନ୍‌ରେହ, ଆବେନାଃ ଆପୁ ଆଇଙ୍ଗ୍‌କେ ବେଦାକେଦିୟାଁ ଓଡ଼ୋଃ ଗେଲ୍‌ସାଃ ଆଇଁୟାଃ ଗନଙ୍ଗ୍‌ ଏମ୍‌ରେ ବାଦ୍‌ଲାଅକେଦା। ମେନ୍‌ଦ ପାର୍‌ମେଶ୍ୱାର୍‌ ଇନିଃକେ ଆଇଁୟାଃ ଜେତ୍‌ନାଃ ନକ୍‌ସାନ୍‌ ରିକା ନାଙ୍ଗ୍‌ କାଏ ଏମ୍‌କିୟା। 8 ଚିମ୍‌ତାଙ୍ଗ୍‌ ଲାବନ୍‌ କାଜିକେଦାଏ, ‘ରାକାମ୍‌ ରାକାମ୍‌ କାବ୍‌ରାଚିତ୍‌ରା ଜାଁତୁକ ଆମାଃ ଗନଙ୍ଗ୍‌ ଲେକାକ ହବାଅଃଆ, ଇମ୍‌ତା ଗୋଟ୍‌ରେନ୍‌ ସବେନ୍‌ ଜାଁତୁକ ଏନ୍‌ଲେକାଗି କାବ୍‌ରାଚିତ୍‌ରା ହନ୍‌କ ଆୟାର୍‌କେଦ୍‌କଆ, ଓଡ଼ୋଃ ଇନିଃ ଗାର୍‌କାନ୍‌ ସବେନ୍‌ ଜାଁତୁକ ଆମାଃ ଗନଙ୍ଗ୍‌ ଲେକାକ ହବାଅଃଆ,’ ମେନ୍ତେ କାଜିକେଦ୍‌ ଇମ୍‌ତା ଗୋଟ୍‌ରେନ୍‌ ସବେନ୍‌ ଜାଁତୁକ ଗାର୍‌ଗାରିୟା ହନ୍‌ ଆୟାର୍‌କେଦ୍‌କଆକ। 9 ନେ'ଲେକାତେ ପାର୍‌ମେଶ୍ୱାର୍‌ ଆବେନାଃ ଆପୁଆଃ ଆସୁଲ୍‌ ଜାଁତୁକ ଇଦିକେଦ୍‌ତେ ଆଇଙ୍ଗ୍‌କେ ଏମ୍‌କେଦିୟାଁ।

10 "ଗୋଟ୍‌ରେନ୍‌ ଜାଁତୁକ ଧାମେର୍‌ ତାଇକେନାକ ଇମ୍‌ତା ଆଇଙ୍ଗ୍‌ ମିଆଦ୍‌ କୁମୁ ନେଲ୍‌କେଦାଇଙ୍ଗ୍‌, ଧାମେର୍‌ତାନ୍‌ ସବେନ୍‌ ପେଠା ଜାଁତୁକ ଗାର୍‌କାନ୍‌, କାବ୍‌ରାଚିତ୍‌ରା ଓଡ଼ୋଃ ଦାଗିକାନ୍‌ ତାଇକେନାକ। 11 ପାର୍‌ମେଶ୍ୱାର୍‌ଆଃ ଦୁଁତ୍‌ ଆଇଙ୍ଗ୍‌କେ କୁମୁରେ ଯାକୁବ୍‌ ମେନ୍ତେ ହାକାଅକେଦିୟାଁ, ଇମ୍‌ତା ଆଇଙ୍ଗ୍‌ କାଜିକେଦାଇଙ୍ଗ୍‌, ‘ଆଇଙ୍ଗ୍‌ଦ ନେତାଃରେ ମେନାଇୟାଁ।’ 12 ଏନ୍ତେ ଇନିଃ କାଜିକିୟାଁଏ, ‘ନାହାଁଃ ନେଲ୍‌କମେ, ଗୋଟ୍‌ରେନ୍‌ ଧାମେର୍‌ତାନ୍‌ ସବେନ୍‌ ପେଠା ଜାଁତୁକ ଗାର୍‌କାନ୍‌, କାବ୍‌ରାଚିତ୍‌ରା ଓଡ଼ୋଃ ଦାଗିକାନ୍‌ ମେନାକଆ। ଆଇଙ୍ଗ୍‌ ନିକୁକେ ନେ'ଲେକା ହବା ଇଚିକାଦ୍‌କଆଇଙ୍ଗ୍‌, ଚିଆଃଚି ଲାବନ୍‌ ଆମାଃଲଃ ରିକାକେଦ୍‌ତେୟାଃ ସବେନାଃ ନେଲାକାଦାଇଙ୍ଗ୍‌। 13 ଅକ୍‌ତାଃରେ ଆମ୍‌ ମିଆଦ୍‌ ଦିରି ବିଦ୍‌କେଦ୍‌ତେ ଏନାକେ ସୁନୁମ୍‌ଲଃ ଆଭିଷେକ୍‌କାଦାମ୍‌ ଓଡ଼ୋଃ ଆଇଁୟାଃତାଃରେ କିରିୟାକାଦାମ୍‌, ଏନ୍‌ ବେଥେଲ୍‌ରେନ୍‌ ପାର୍‌ମେଶ୍ୱାର୍‌ ତାନିଙ୍ଗ୍‌। ନାହାଃଁ ବିରିଦ୍‌ମେ ଓଡ଼ୋଃ ନେ ଦିଶୁମ୍‌ ବାଗିକେଦ୍‌ତେ ଆମାଃ ଆପୁଆଃ କୁଟୁମ୍‌କଆଃ ଦିଶୁମ୍‌ତେ ରୁହାଡ଼୍‌ମେଁ !’ "

14 ଏନ୍ତେ ରାହେଲ୍‌ ଓଡ଼ୋଃ ଲେୟା କାଜି ରୁହାଡ଼୍‌କିୟା, "ଆପୁଆଃ ଅଡ଼ାଃରେ ଚିନାଃ ଓଡ଼ୋଃ ଆକ୍‌ତେୟାର୍‌ ଚାଏ ହାନାଟିଙ୍ଗ୍‌ ଆଲିୟାଁଃ ମେନାଃ ? 15 ଆଲିଙ୍ଗ୍‌ ନାହାଃଁଦ ଏଟାଃ ଦିଶୁମ୍‌ରେନ୍‌ ତାନ୍‌ଲିଙ୍ଗ୍‌, ଚିୟାଃଚି ଇନିଃ ଆଲିଙ୍ଗ୍‌କେ ଆଖ୍‌ରିଙ୍ଗ୍‌କେଦ୍‌ତେ ଏନାରାଃ ଗନଙ୍ଗ୍‌ ପାଏସା ନାମ୍‌କେଦାଏ। 16 ଏନା ନାଗେନ୍ତେ ପାର୍‌ମେଶ୍ୱାର୍‌ ଆଲିୟାଁଃ ଆପୁତାଃଏତେ ଅକ ନାଲା ଇଦିକେଦାଏ, ଏନ୍‌ ସବେନାଃ ଆଲିୟାଁଃ ଓଡ଼ୋଃ ଆଲିୟାଁଃ ହନ୍‌କଆଃ ତାନାଃ। ଏନାମେନ୍ତେ ପାର୍‌ମେଶ୍ୱାର୍‌ ଆମ୍‌କେ ଅକ ସବେନାଃ କାଜିକାଦ୍‌ମାଏ, ଆମ୍‌ ଏନ୍‌ଲେକାଗି ରିକାଏମେ।"

17 ଏନ୍ତେ ଯାକୁବ୍‌ ବିରିଦ୍‌ୟାନାଏ ଓଡ଼ୋଃ ଆୟାଃ ହନ୍‌କକେ, କୁଡ଼ିକକେ ଉଁଟ୍‌ ଚେତାନ୍‌ରେ ଦୁବ୍‌ କେଦ୍‌କଆଏ। 18 ଓଡ଼ୋଃ ଆୟାଃ କାମିକାଦ୍‌ ନାଲା, ପଦାନ୍‌ ଅରାମ୍‌ରେ ଅକ ଆସୁଲ୍‌ ଜାଁତୁ କତାଃଏତେ ନାଲା ନାମାକାଦ୍‌ ତାଇକେନାଏ, ଏନାକେ ସାବ୍‌କେଦ୍‌ତେ କିନାନ୍‌ ଦିଶୁମ୍‌ ଆୟାଃ ଆପୁତେ ଇସାକ୍‌ତାଃ ସେନଃୟାନାଏ। 19 ଇମ୍‌ତା ଲାବନ୍‌ ଗୋଟ୍‌ରେନ୍‌ ମିଣ୍ଡିକଆଃ ଉବ୍‌ ହାଦ୍‌ ନାଗେନ୍ତେ ସେନାକାନ୍‌ ତାଇକେନା, ଓଡ଼ୋଃ ରାହେଲ୍‌ ଆପୁତେୟାଃ ମାହାପୁରୁକକେ କୁମ୍ବୁଡ଼ୁ ଆଉ କେଦ୍‌କଆଏ। 20 ଏନ୍ତେ ଯାକୁବ୍‌ ଏନ୍ତାଃଏତେ ସେନଃରାଃ ଜେତାନ୍ ଖାବେର୍‌ କା ଏମ୍‌କେଦ୍‌ତେ ଅରାମ୍‌ରେନ୍‌ ଲାବନ୍‌କେ ବେଦାକିୟା। 21 ନେ'ଲେକାତେ ଇନିଃ ଆୟାଃ ସବେନାଃ ଇଦିକେଦ୍‌ତେ ନିର୍‌ୟାନା, ଓଡ଼ୋଃ ବିରିଦ୍‌କେଦ୍‌ତେ ଫରାତ୍‌ ନୁତୁମ୍‌ ଗାଡ଼ାକେ ପାରମ୍‌କେଦ୍‌ଲଃ ଗିଲିୟଦ୍‌ ନୁତୁମ୍‌ ବୁରୁସାଃ ସାଙ୍ଗିଲ୍‌କେଦ୍‌ତେ ସେନଃୟାନା।

22 ଏନ୍ତେ ଆପି ମାହା ହୁଲାଙ୍ଗ୍‌ରେ ଲାବନ୍‌ ଯାକୁବ୍‌ଆଃ ନିର୍‌ ଖାବେର୍‌ ଏମ୍‌ୟାନା। 23 ଏନ୍ତେ ଲାବନ୍‌ ଆୟାଃ କୁଟୁମ୍‌କକେ ସାବ୍‌କେଦ୍‌ତେ ଯାକୁବ୍‌ଆଃ ଦୟା ଦୟାତେ ଅତଙ୍ଗ୍‌କିୟା ଓଡ଼ୋଃ ଗିଲିୟଦ୍‌ ବୁରୁ ହେପାଦ୍‌ତାଃରେ ଇନିଃକେ ସେଟେର୍‌କିୟା। 24 ଏନ୍ତେ ପାର୍‌ମେଶ୍ୱାର୍‌ ଅରାମ୍‌ରେନ୍‌ ଲାବନ୍‌କେ ଏନ୍‌ ନୁବାଃ କୁମୁରେ କାଜିକିୟା, "ଚିର୍ଗାଲ୍‌କେଦ୍‌ତେ ତାଇନ୍‌ମେ, ଯାକୁବ୍‌କେ ବୁଗିନ୍‌ ଚାଏ ଏତ୍‌କାନାଃ ଜେତାନ୍‌ କାଜି ଆଲମ୍‌ କାଜିୟା।" 25 ଏନ୍ତେ ଯାକୁବ୍‌ ଆୟାଃ କୁମ୍ବାକେ ବୁରୁ ଚେତାନ୍‌ରେ ବାଇକାଦ୍‌ ତାଇକେନା ଓଡ଼ୋଃ ଲାବନ୍‌ ହଗି ଆୟାଃ କୁଟୁମ୍‌କଲଃ ଗିଲିୟଦ୍‌ ନୁତୁମ୍‌ ବୁରୁ ଦିଶୁମ୍‌ରେ କୁମ୍ବା ବାଇକେଦାଏ।

26 ଏନ୍ତେ ଲାବନ୍‌ ଯାକୁବ୍‌କେ କାଜିକିୟା, "ଆମ୍‌ ଚିନାଃ ମେନ୍ତେ ନେ'ଲେକା ରିକାକେଦାମ୍‌ ? ଓଡ଼ୋଃ ଆଇଙ୍ଗ୍‌କେ ବେଦାକେଦିୟାଁମ୍‌। ଆଇଁୟାଃ ହନ୍‌କୁଡ଼ିକକେ ଲାଡ଼ାଇଏତେ ଆକ୍‌ତେୟାର୍‌ ଆଉକାଦ୍‌କ ଲେକାମ୍‌ ଇଦିକେଦ୍‌କଆ। 27 ଆମ୍‌ ଚିନାଃ ମେନ୍ତେ ବେଦାକିଦିଙ୍ଗ୍‌ଲଃ ଉକୁ ଉକୁ ନିର୍‌ୟାନାମ୍‌ ? ଚିନାଃମେନ୍ତେ ଜେତ୍‌ନାଃ କାମ୍‌ କାଜିକେଦିୟାଁ ? ଆମ୍‌ କାଜିକେଦିଙ୍ଗ୍‌ରେ, ଆଇଙ୍ଗ୍‌ ଆମ୍‌କେ ପୁରାଃ ରାସ୍‌କାତେ, ଦୁରାଙ୍ଗ୍‌ତାନ୍‌ଲଃ ସବେନ୍‌ ଲେକାନ୍‌ ବାଜା ସାଡ଼ିକେଦ୍‌ତେ ବିଦାକାମ୍‌ତେୟାଃଇଙ୍ଗ୍‌। 28 ଆମ୍‌ ଆଇଁୟାଃ ଜାଇହନ୍‌କକେ ଓଡ଼ୋଃ ହନ୍‌କୁଡ଼ିକକେ ହଁଗି ଚଅଃ ନାଗେନ୍ତେ ନେଣ୍ଡା କାମ୍ ଏମାଦିୟାଁ। ନେଆଁଦ ପୁରାଃଗି କା ସେଣାଁନ୍‌ କାମିମ୍‌ ରିକାକେଦା। 29 ଆଇଙ୍ଗ୍‌ ଆମାଃ ହାନି ରିକା ନାଗେନ୍ତେ ଦାଡ଼ିକାତେତେୟାଃଇଙ୍ଗ୍‌, ମେନ୍‌ଦ ଆମାଃ ଆପୁ ପାର୍‌ମେଶ୍ୱାର୍‌ ସେନଃ ନିଦାରେ ଆଇଙ୍ଗ୍‌କେ ଚେତାଅକେଦ୍‌ତେ କାଜିକେଦିୟାଁ, ଆମ୍‌ ଜେତା ଲେକାତେ ଯାକୁବ୍‌ଆଃ ଚେତାନ୍‌ରେ ହାନି ଆଲମ୍‌ ରିକାୟା। 30 ଆଇଙ୍ଗ୍‌ ସାରିତାନାଇଙ୍ଗ୍‌, ଆମ୍‌ ଆମାଃ ଆପୁଆଃ ଅଡ଼ାଃତେ ସେନଃ ନାଙ୍ଗ୍‌ ସାନାଙ୍ଗ୍‌କେଦାମ୍‌, ମେନ୍‌ଦ ଆମ୍‌ ଚିନାଃ ମେନ୍ତେ ଆଇଁୟାଃ ମାହାପୁରୁକକେ କୁମ୍ବୁଡ଼ୁ ଇଦିକେଦ୍‌କଆମ୍‌ ?"

31 ଏନ୍ତେ ଯାକୁବ୍‌ ଲାବନ୍‌କେ କାଜିରୁହାଡ଼୍‌କିୟା, "ଆଇଙ୍ଗ୍‌ ଉଡ଼ୁଃକେଦାଇଙ୍ଗ୍‌, ଆମ୍ ଆମାଃ ହନ୍‌କୁଡ଼ିକକେ ପୁରାଃ ପେଡ଼େଃଲଃ ଆଇଙ୍ଗ୍‌ତାଃଏତେ ଇଦିକଆମ୍‌ ମେନ୍ତେଇଙ୍ଗ୍‌ ବରକେଦା। 32 ମେନ୍‌ଦ ନାହାଁଃ ଆମ୍‌ ଅକଏତାଃରେ ଆମାଃ ମାହାପୁରୁକକେ ନାମ୍‌କଆମ୍‌ ଇନିଃ କାଏ ବାଞ୍ଚାଅଃଆ। ଆଇଁୟାଃତାଃରେ ଅକ୍‌ନାଃ ମେନାଃ ଏନାରେ ଆମାଃ ଜେତ୍‌ନାଃ ତାଇନଃ ରେଦ ଆଇଁୟାଃ କୁଟୁକଆଃ ସାମ୍‌ନାଙ୍ଗ୍‌ରେ ନେଲଃ ଲେକା ଇଦିକେମେ।" ରାହେଲ୍‌ ଆପୁତେୟାଃ ମୁରୁତ୍‌କକେ କୁମ୍ବୁଡ଼ୁକେଦ୍‌ତେ ଆଉକାଦ୍‌କଆ, ଏନା ଯାକୁବ୍‌ କାଏ ସାରିକାଦ୍‌ ତାଇକେନା।

33 ଏନ୍ତେ ଲାବନ୍‌ ଯାକୁବ୍‌ଆଃ କୁମ୍ବାତେ ସେନଃୟାନା ଓଡ଼ୋଃ ଦାଣାଁକେଦାଏ, ଏନ୍ତେ ଇନିଃ ଲେୟାରାଃ ଓଡ଼ୋଃ ଇନିୟାଃ ବାରିୟା କାମ୍‌ଡ଼ିକୁଡ଼ିକିନାଃ କୁମ୍ବାତେ ହଁଗି ସେନଃୟାନା ମେନ୍‌ଦ ଇନିଃ ଆୟାଃ ମୁରୁତ୍‌କକେ କାଏ ନାମ୍‌କେଦ୍‌କଆ। ଏନ୍ତେ ଇନିଃ ରାହେଲ୍‌ଆଃ କୁମ୍ବାତେ ସେନଃୟାନା। 34 ମେନ୍‌ଦ ରାହେଲ୍‌ ଏନ୍‌ ମୁରୁତ୍‌କକେ ଉଁଟ୍‌ରାଃ ହଡ଼୍‌ମରେ ଆଟେଦାକାନ୍‌ ଲିଜାଃ ଭିତାର୍‌ରେ ଦହକେଦ୍‌ତେ ଏନାରାଃ ଚେତାନ୍‌ରେ ଦୁବାକାନ୍‌ ତାଇକେନା। ଏନାତେ ଲାବନ୍‌ କୁମ୍ବାରେୟାଃ ସବେନ୍‌ସାଃରେ ଦାଣାଁକେଦ୍‌କଆ ମେନ୍‌ଦ କାଏ ନାମ୍‌କେଦ୍‌କଆ। 35 ଇମ୍‌ତାଙ୍ଗ୍‌ ରାହେଲ୍‌ ଆପୁତେକେ କାଜିକିୟା, "ହେ ଆବା, ଆଇଙ୍ଗ୍‌ ଆମାଃ ଆୟାର୍‌ରେ କାଇଙ୍ଗ୍‌ ତିଙ୍ଗୁ ଦାଡ଼ିୟାନା ମେନ୍ତେ ଆଲମ୍‌ ଖିସ୍‌ଅଃଆ, ଚିୟାଃଚି ଆଇଙ୍ଗ୍‌ କୁଡ଼ିକ ଦୁକୁତାନ୍‌ ଲେକାନ୍‌ ମାସିକ୍‌ ଦୁକୁରେଇଙ୍ଗ୍‌ ଦୁକୁଃ ତାଇକେନା।" ଲାବନ୍‌ ଦାଣାଁକେଦ୍‌କଆଏ ମେନ୍‌ଦ ଆୟାଃ ଅଡ଼ାଃରେନ୍‌ ମୁରୁତ୍‌କକେ କାଏ ନାମ୍‌କେଦ୍‌କଆ।

36 ଏନ୍ତେ ଯାକୁବ୍‌ ଲାବନ୍‌କେ ଖିସ୍‌ୟାନ୍‌ଲଃ ଏପ୍‌ରାଙ୍ଗ୍‌ୟାନାଏ ଓଡ଼ୋଃ କାଜିକିୟାଏ, "ଆଇଙ୍ଗ୍‌ ଚିକାନ୍‌ ଗୁହ୍ନାଁ ଚାଏ ପାପ୍‌ ରିକାକେଦାଇଙ୍ଗ୍‌ ଯେ, ଆମ୍‌ ଖିସ୍‌କେଦ୍‌ତେ ଆଇଁୟାଃ ଦୟା ଦୟା ଅତଙ୍ଗ୍‌କେଦିୟାଁମ୍‌ ? 37 ଆମ୍‌ ଆଇଁୟାଃ ସବେନ୍‌ ଜିନିଷ୍‌ରେ ଆମାଃ ମୁରୁତ୍‌କକେ ଦାଣାଁକେଦ୍‌କଆମ୍‌, ଆମାଃ ଅଡ଼ାଃରାଃ ଜେତାନ୍‌ ଜିନିଷ୍‌ ନାମ୍‌କେଦାମ୍‌ ଚି ? ନାମାକାଦ୍‌ରେଦମ୍‌ ଆମାଃ ଓଡ଼ୋଃ ଆଇଁୟାଃ ହଡ଼କଆଃ ଥାଲାରେ ଦହେମେ, ଇନ୍‌କୁ ଆଲାଙ୍ଗ୍‌ ବାରାନ୍‌କିନାଃ ବିଚାର୍‌ ରିକାଏୟାକ। 38 ଆଇଙ୍ଗ୍‌ ମିଦ୍‌ହିସି ବାରାଷ୍‌ ହବାୟାନା ଆମାଃଲଃ ତାଇକେନାଇଙ୍ଗ୍‌। ଆମାଃ ଗୋଟ୍‌ରେନ୍‌ ମିଣ୍ଡି ଚାଏ ମେରମ୍‌ ପସାଇଦିୟଃରେ ଜେତାନ୍ ହାନି କା ହବାକାନା, ଓଡ଼ୋଃ ଆଇଙ୍ଗ୍‌ ଆମାଃ ଗୋଟ୍‌ରେନ୍‌ ମିଆଦ୍‌ ମିଣ୍ଡି ହଁ କାଇଙ୍ଗ୍‌ ଜମ୍‌। 39 ଅକନ୍‌ ମିଣ୍ଡିକକେ ବିର୍‌ରେନ୍‌ ଜାଁତୁକ ନକ୍‌ସାନ୍‌କେଦ୍‌କଆକ, ଏନ୍‌ ମିଣ୍ଡିକଆଃ ହିସାବ୍‌ ଆମାଃତାଃରେ କା ଉଦୁବ୍‌କେଦ୍‌ତେ ଆଇଙ୍ଗ୍‌ଗି ଏନ୍‌ ନକ୍‌ସାନ୍‌ରାଃ ଗନଙ୍ଗ୍‌ ଏମ୍‌କେଦାଇଙ୍ଗ୍‌। ମେନ୍‌ଦ ଆଇଙ୍ଗ୍‌କେ ଦୋଷ୍‌ କେଦିୟାଁମ୍‌ ଓଡ଼ୋଃ ନୁବାଃରେ ଚାଏ ସିଙ୍ଗିରେ ଅକନ୍‌ ମିଣ୍ଡିକ କୁମ୍ବୁଡ଼ୁୟାନା, ଇନ୍‌କୁଆଃ ହିସାବ୍‌ ଆସିକେଦିୟାଁମ୍‌ ଓଡ଼ୋଃ ଆଇଁୟାଃ ତିଃଇଏତେଗି ଇଦିକେଦାମ୍‌। 40 ଆଇଙ୍ଗ୍‌ ସିଙ୍ଗି ଇମ୍‌ତା ସିତୁଙ୍ଗ୍‌ରେ, ନୁବାଃ ଇମ୍‌ତା ରାବାଙ୍ଗ୍‌ ସାହାତିଙ୍ଗ୍‌ କେଦାଇଙ୍ଗ୍‌, ଆଇଙ୍ଗ୍‌ କାଇଙ୍ଗ୍‌ ଦୁଡ଼ୁମ୍‌ ଦାଡ଼ିତାଇକେନା। 41 ଆଇଙ୍ଗ୍‌ ମିଦ୍‌ହିସି ବାରାଷ୍‌ ଜାକେଦ୍‌ ଆମାଃ ଅଡ଼ାଃରେଇଙ୍ଗ୍‌ ତାଇନ୍‌ୟାନା, ଆମାଃ ବାରାନ୍‌ କୁଡ଼ିହନ୍‌ ନାଗେନ୍ତେ ଗେଲ୍‌ ଉପୁନିୟା ବାରାଷ୍‌ ଓଡ଼ୋଃ ଗୋଟ୍‌ରେନ୍‌ ମିଣ୍ଡି ମେରମ୍‌ ନାଗେନ୍ତେ ତୁରିୟା ବାରାଷ୍‌ ଦାସି ଲେକା ସୁନୁସାର୍‌ କାମି ରିକାକେଦାଇଙ୍ଗ୍‌। ଏନ୍ତେ ଆମ୍ ଆଇଁୟାଃ ନାଲା ଗେଲେୟାସାଃ ବାଦ୍‌ଲାଅକେଦାମ୍‌। 42 ଆଇଁୟାଃ ଆପୁରାଃ ପାର୍‌ମେଶ୍ୱାର୍‌, ଆବ୍ରାହାମ୍‌ଆଃ ପାର୍‌ମେଶ୍ୱାର୍‌ ଓଡ଼ୋଃ ଆଇଁୟାଃ ଆପୁ ଇସାକ୍‌ ବରଭାକ୍ତିତାନ୍‌ ପାର୍‌ମେଶ୍ୱାର୍‌ ଆଇଁୟାଃଲଃ କାଏ ତାଇନ୍‌କାନ୍‌ ରେଦ, ଆମ୍‌ ଆଇଙ୍ଗ୍‌କେ ସାମା ତିଃଇଗି ବିଦାକାଇଙ୍ଗ୍‌ତେୟାଃମେ। ମେନ୍‌ଦ ପାର୍‌ମେଶ୍ୱାର୍‌ ଆଇଁୟାଃ ଦୁକୁହାସୁ ଓଡ଼ୋଃ ତିଃଇରେୟାଃ ପୁରାଃ କାମିକ ନେଲ୍‌କେଦାଏ, ଏନାତେ ସେନଃୟାନ୍‌ ନିଦାରେ ଆମ୍‌କେ ଏଗେର୍‌କେଦ୍‌ମା।"

43 ଏନ୍ତେ ଲାବନ୍‌ ଯାକୁବ୍‌କେ କାଜିରୁହାଡ଼୍‌କିୟା, "ନେ କୁଡ଼ିହନ୍‌କ ଆଇଁୟାଃ ହନ୍‌କୁଡ଼ି ତାନ୍‌କ, ନେ ହନ୍‌କ ଆଇଁୟାଃ ହନ୍‌ ତାନ୍‌କ, ଓଡ଼ୋଃ ଗୋଟ୍‌ରେନ୍‌ ନେ ମିଣ୍ଡି ମେରମ୍‌ ସବେନ୍‌ ଆଇଁୟାଃ ତାନ୍‌କ। ଆମ୍‌ ଅକ୍‌ନାଃ ନେଲ୍‌ତାନାମ୍‌, ଏନ୍‌ ସବେନାଃ ଆଇଁୟାଃ ତାନାଃ। ଏନାତେ ଅକନ୍‌କ ଆଇଁୟାଃ ଆପ୍‌ନାଃ ତାନ୍‌କ, ଇନ୍‌କୁକେ ଆଇଙ୍ଗ୍‌ ଚିଲ୍‌କାକେଦ୍‌ତେ ନକ୍‌ସାନ୍‌ ରିକା ଦାଡ଼ିୟାଇଙ୍ଗ୍‌ ? 44 ଏନାତେ ଏଲା, ଆଲାଙ୍ଗ୍‌ ବାରାନ୍‌କିନ୍‌ ମିଆଁଦ୍‌ ରାଜିନାମା ରିକାଏୟାଲାଙ୍ଗ୍‌, ଏନା ଆଲାଙ୍ଗ୍‌ଆଃ ବାରାନ୍‌କିନାଃ ଗାୱା ହବାଅଃଆ।" 45 ଇମ୍‌ତା ନେଆଁ ପାହାମଃ ନାଙ୍ଗ୍‌ ଯାକୁବ୍‌ ମିଆଦ୍‌ ଦିରି ଇଦିକେଦ୍‌ତେ ଖୁଣ୍ଟୁ ଲେକାଏ ବିଦ୍‌କେଦା। 46 ଓଡ଼ୋଃ ଯାକୁବ୍‌ ଆୟାଃ କୁଟୁମ୍‌କକେ କାଜିକେଦ୍‌କଆ, "ଆପେ ଦିରିକ ଦାଣାଁ ଆଉୱେପେ।" ଏନ୍ତେ ଇନ୍‌କୁ ଦିରି ଆଉକେଦ୍‌ତେ ମିଦ୍‌ତାଃରେ ହୁଣ୍ଡିକେଦାକ ଓଡ଼ୋଃ ଢିପା ଲେକା ବାଇକେଦାକ। ଏନ୍ତେ ସବେନ୍‌କ ଏନ୍‌ ହୁଣ୍ଡିକାନ୍‌ ଦିରି ଢିପାତାଃରେ ଜମ୍‌କେଦାକ। 47 ଲାବନ୍‌ ଏନ୍‌ ହୁଣ୍ଡିକାନ୍‌ ଦିରି ଢିପାରାଃ ନୁତୁମ୍‌ ଜିଗର୍‌ ସାହାଦୁଥା ଦହକେଦାଏ ଓଡ଼ୋଃ ଯାକୁବ୍‌ ଏନାରାଃ ନୁତୁମ୍‌ ଗଲୟଦ୍‌ ଦହକେଦାଏ। 48 ଲାବନ୍‌ ଯାକୁବ୍‌କେ କାଜିକିୟା, "ତିସିଙ୍ଗ୍‌ ନେ ହୁଣ୍ଡିକାନ୍‌ ଦିରିରାଃ ଢିପା ଆମାଃ ଓଡ଼ୋଃ ଆଇଁୟାଃ ଥାଲାରେ ଆଲାଙ୍ଗ୍‌ ବାରାନ୍‌କିନାଃ ଗାୱା ଲେକା ତାଇନାଃ।" ଏନାମେନ୍ତେ ଏନ୍‌ ଠାୟାଦ୍‌ରାଃ ନୁତୁମ୍‌ ଗଲୟଦ୍‌* 49 ଓଡ଼ୋଃ ମିସ୍‌ପା* ହବାୟାନା। ଚିଆଃଚି ଲାବନ୍ କାଜିକେଦାଏ, "ଆଲାଙ୍ଗ୍‌ ବାରାନ୍‌କିନ୍‌ ମିହୁଡ଼୍‌ ଆଡଃମିହୁଡ଼୍‌ତାଃଏତେ ବିନ୍‌ଗାଅକେଦ୍‌ତେ ତାଇନଃ ଇମ୍‌ତା ପ୍ରାଭୁ ଆଲାଙ୍ଗ୍‌ଆଃ ହରନିଃ ହବାଅଃକାଏ। 50 ଆମ୍‌ ଆଇଁୟାଃ ହନ୍‌କୁଡ଼ିକକେ ଦୁକୁମ୍‌ ଏମାକରେଦ ଚାଏ ଆଇଁୟାଃ ହନ୍‌କୁଡ଼ି ତାଇନ୍‌ ତାଇନ୍‌ ଏଟାଃ କୁଡ଼ିକକେମ୍‌ ଆଣ୍‌ଦିନ୍‌ ରେଦ, ଇମ୍‌ତା ଜେତା ହଡ଼ ଆଲାଙ୍ଗ୍‌ ବାରାନ୍‌କିନାଃ ଥାଲାରେ କାକ ତାଇନ୍‌ରେୟଗି ପାହାମେମେ ଯେ, ପାର୍‌ମେଶ୍ୱାର୍‌ ଆଲାଙ୍ଗ୍‌ଆଃ ଗାୱା ତାନିଃ ଚାଏ ପାର୍‌ମେଶ୍ୱାର୍‌ ଆଲାଙ୍ଗ୍‌କେ ହରତାନା।"

51 ଲାବନ୍‌ ଯାକୁବ୍‌କେ ଆଡଃଗି କାଜିକିୟା, "ଆମାଃ ଓଡ଼ୋଃ ଆଇଁୟାଃ ଥାଲାରେ ବାଇୟାକାନ୍‌ ନେ ଦିରିରାଃ ଢିପା ଓଡ଼ୋଃ ପାହାମେ ନାଙ୍ଗ୍‌ ବିଦାକାନ୍‌ ଦିରିକେ ନେଲେମେ। 52 ଆଇଙ୍ଗ୍‌ ଆମାଃ ଏତ୍‌କାନ୍‌ ରିକାନାଙ୍ଗ୍‌ ନେ ଦିରିରାଃ ଢିପାକେ ପାରମ୍‌କେଦ୍‌ତେ ଆମାଃତାଃ କାଇଙ୍ଗ୍‌ ସେନାଃ ଚାଏ ଆମ୍‌ ଆଇଁୟାଃ ଏତ୍‌କାନାଃ ରିକାନାଙ୍ଗ୍‌ ନେ ଦିରିରାଃ ଢିପାକେ ଓଡ଼ୋଃ ବିଦାକାନ୍‌ ଦିରିକେ ପାରମ୍‌କେଦ୍‌ତେ ଆଇଁୟାଃତାଃ ଆଲମ୍‌ ହିଜୁଃଆ। ନେଆଁରାଃ ଗାୱା ନେ ଦିରିରାଃ ଢିପା ଓଡ଼ୋଃ ବିଦାକାନ୍‌ ଦିରି ତାନାଃ। 53 ଆବ୍ରାହାମ୍‌ଆଃ ପାର୍‌ମେଶ୍ୱାର୍‌, ନାହୁର୍‌ଆଃ ପାର୍‌ମେଶ୍ୱାର୍‌ ଓଡ଼ୋଃ ଇନ୍‌କୁଆଃ ପୁର୍‌ଖା ଆପୁକଆଃ ପାର୍‌ମେଶ୍ୱାର୍‌ ଆଲାଙ୍ଗ୍‌ ବାରାନ୍‌କିନାଃ ଥାଲାରେ ବିଚାର୍‌ ରିକାଏୟାକ।" ଇମ୍‌ତା ଯାକୁବ୍‌ ଆୟାଃ ଆପୁତେ ଇସାକ୍‌, ଅକ ପାର୍‌ମେଶ୍ୱାର୍‌କେ ବରକେଦ୍‌ତେ ସେୱାଇ ତାଇକେନା, ଇନିୟାଃ ନୁତୁମ୍‌ରେ କିରିୟାକେଦା। 54 ଏନ୍ତେ ଯାକୁବ୍‌ ଏନ୍‌ ବୁରୁରେ ଦାଣେଁ ରାକାବ୍‌କେଦ୍‌ତେ ଜଜମ୍‌ ନାଗେନ୍ତେ ଆୟାଃ କୁଟୁମ୍‌କକେ କେଡ଼ାକେଦ୍‌କଆ, ଏନ୍ତେ ଇନ୍‌କୁ ଜମ୍‌କେଦ୍‌ତେ ମିଦ୍‌ନୁବାଃ ବୁରୁରେ ତାଇୟାନାକ। 55 ଏଟାଃ ହୁଲାଙ୍ଗ୍‌ ସେତାଃ ଇଦାନ୍‌ରେ ଲାବନ୍‌ ବିରିଦ୍‌ୟାନାଏ ଓଡ଼ୋଃ ଆୟାଃ ଜାଇହନ୍‌କକେ ଓଡ଼ୋଃ ହନ୍‌କୁଡ଼ିକକେ ଚଅଃକେଦ୍‌ତେ ଆଶିଷ୍‌କେଦ୍‌କଆ ଏନ୍ତେ ଆୟାଃ ଅଡ଼ାଃତେ ସେନଃରୁହାଡ଼୍‌ୟାନା।