1 ଏନ୍ତେ ଆବ୍ରାହାମ୍‌ ପୁରାଃଗି ହାଡ଼ାମ୍‌ୟାନା। ଓଡ଼ୋଃ ପ୍ରାଭୁ ପାର୍‌ମେଶ୍ୱାର୍‌ ଆବ୍ରାହାମ୍‌କେ ସବେନ୍‌ ବିଷାଏରେ ପୁରାଃଗି ଆଶିଷ୍‌କିୟା। 2 ଏନାମେନ୍ତେ ଆବ୍ରାହାମ୍‌ ଆୟାଃ ଅଡ଼ାଃରାଃ ସବେନାଃ କାମିତାନ୍ ମାରି ଦାସିକେ କାଜିକିୟା, "ଆଇଙ୍ଗ୍‌ ବିନ୍ତିମେ ତାନାଇଙ୍ଗ୍‌, ଆମ୍‌ ଆଇଁୟାଃ ବୁଲୁରେ ତିଃଇ ଦହେମେ। 3 ଅତେ ଓଡ଼ୋଃ ସିର୍ମାରେନ୍ ପ୍ରାଭୁ ପାର୍‌ମେଶ୍ୱାର୍‌ଆଃ ନୁତୁମ୍‌ତେ କିରିୟାତାନ୍‌ଲଃ କାଜିୟାମେ ତାନାଇଙ୍ଗ୍‌, ଆଇଁୟାଃ ହନ୍‌ ଇସାକ୍‌ ନାଗେନ୍ତେ କିନାନ୍‌ରେନ୍‌ କୁଡ଼ି ଆଣ୍‌ଦି ନାଗେନ୍ତେ ଆଲମ୍‌ ସାଲାକଆ। 4 ମେନ୍‌ଦ, ଆମ୍‌ ଆବୁଆଃ କିଲିରେନ୍‌ କୁଟୁମ୍‌ ହଡ଼କତାଃତେ ସେନ୍‌କେଦ୍‌ତେ ହନିଙ୍ଗ୍‌କଡ଼ା ଇସାକ୍‌ ନାଗେନ୍ତେ କୁଡ଼ି ସାଲା ଆଉକମେ।"

5 ଇମ୍‌ତା ଏନ୍‌ ଦାସି ଆବ୍ରାହାମ୍‌କେ କୁଲିକିୟା, "ଜେତାନ୍‌ କୁଡ଼ିହନ୍‌ ଆଇଁୟାଃଲଃ ହିଜୁଃ ନାଙ୍ଗ୍‌ କାଏ ସାନାଙ୍ଗ୍‌ରେଦ, ଆମ୍‌ ଅକ ଦିଶୁମ୍‌ଏତେ ହିଜାକାନାମ୍‌ ଏନ୍‌ ଦିଶୁମ୍‌ତେ ଚିନାଃ ଆମାଃ ହନ୍‌କଡ଼ାକେ ଇଦିୟାଇଙ୍ଗ୍‌ ?"

6 ଆବ୍ରାହାମ୍‌ ଆୟାଃ ଦାସିକେ କାଜିକିୟା, "ଚିର୍ଗାଲ୍‌କାନ୍‌ମେ, ଆଇଁୟାଃ ହନ୍‌କଡ଼ାକେ ଏନ୍ତାଃତେ ଚିଉଲାହଗି ଆଲମ୍‌ ଇଦିୟା। 7 ଚିୟାଃଚି ସିର୍ମାରେନ୍‌ ପ୍ରାଭୁ ପାର୍‌ମେଶ୍ୱାର୍‌ ଆଇଙ୍ଗ୍‌କେ ଆଇଁୟାଃ ଆପୁଆଃ ଅଡ଼ାଃଏତେ ଓଡ଼ୋଃ ଆଇଁୟାଃ ପାରିବାର୍‌ଏତେ ଆଉକାଦିୟାଁ ଓଡ଼ୋଃ ଆଇଁୟାଃଲଃ ଜାଗାର୍‌କାଦା ଓଡ଼ୋଃ ଆଇଁୟାଃ କିଲିକକେ ନେ ଦିଶୁମ୍‌ ଏମାକ ନାଙ୍ଗ୍‌ ବାନାର୍‌ସା ଏମାକାଦିୟାଁଏ। ଇନିଃ ଆମ୍‌କେ ଆୟାର୍‌ତେ ସୁତୁଃ ଇଦିନାଙ୍ଗ୍‌ ଆୟାଃ ଦୁଁତ୍‌କେ କୁଲିୟା। ତାବ୍‌ଦ ଆମ୍‌ ଆଇଁୟାଃ ହନ୍‌କଡ଼ା ନାଙ୍ଗ୍‌ କୁଡ଼ି ଆଉ ଦାଡ଼ିୟାମ୍‌। 8 ଏନ୍‌ ଦିଶୁମ୍‌ଏତେ ଜେତାନ୍‌ କୁଡ଼ିହନ୍‌ ହିଜୁଃ ନାଙ୍ଗ୍‌ କା ସାନାଙ୍ଗ୍‌ ରେଦ, ଆମ୍‌ ଆଇଁୟାଃ ନେ କିରିୟାଏତେ ରାଡ଼ାଅଃଆମେ। ମେନ୍‌ଦ ଆମ୍ ଆଇଁୟାଃ ହନିଙ୍ଗ୍‌କଡ଼ାକେ ଏନ୍‌ ଦିଶୁମ୍‌ତେ ଆଲମ୍‌ ଇଦିୟା।" 9 ଏନ୍ତେ ଏନ୍‌ ଦାସି ଆୟାଃ ଗମ୍‌କେ ଆବ୍ରାହାମ୍‌ରାଃ ବୁଲୁରେ ତିଃଇ ଦହକେଦ୍‌ତେ ଏନ୍‌ ବିଷାଏରେ କିରିୟାକେଦା।

10 ଏନ୍ତେ ଏନ୍‌ ଦାସି ଆୟାଃ ଗମ୍‌କେୟାଃ ଉଁଟ୍‌କଏତେ ଗେଲେୟା ଉଁଟ୍‌ ଇଦିକେଦ୍‌ତେ ଆୟାଃ ଗମ୍‌କେୟାଃ ସବେନ୍‌ ରାକାମ୍‌ରାଃ ବୁଗିନ୍‌ ଜିନିଷ୍‌କ ସାବ୍‌କେଦ୍‌ତେ ଅରାମ୍‌ନହରୟିମ୍‌ * ଦିଶୁମ୍‌ରାଃ ନାହୁର୍‌ ନାଗାର୍‌ତେ ସେନଃୟାନା। 11 ଏନ୍ତାଃ ସେଟେର୍‌କେଦ୍‌ତେ ନାଗାର୍‌ ବାହାରି ମିଆଁଦ୍‌ କୁଆଁ ହେପାଦ୍‌ତାଃରେ ଉଁଟ୍‌କକେ ଇକ୍‌ଡ଼ୁମ୍‌କେଦ୍‌ତେ ଦୁବ୍‌କେଦ୍‌କଆ। ଇମ୍‌ତା ସିଙ୍ଗିହାସୁରଃ ତାଇକେନ୍‌ ହରାତେ କୁଡ଼ିକ ଦାଆଃ ପେରେଃ ନାଙ୍ଗ୍‌ ହିଜୁଃତାଇକେନାକ। 12 ଏନ୍ତାଃରେ ଇନିଃ ନେ'ଲେକା ବିନ୍ତିକେଦାଏ, "ହେ ପ୍ରାଭୁ ଆଇଁୟାଃ ଗମ୍‌କେ ଆବ୍ରାହାମ୍‌ଆଃ ପାର୍‌ମେଶ୍ୱାର୍‌, ବିନ୍ତିମେ ତାନାଇଙ୍ଗ୍‌ ଆଇଁୟାଃ କାମି ତିସିଙ୍ଗ୍‌ ପୁରାଏମେ ଓଡ଼ୋଃ ଆଇଁୟାଃ ଗମ୍‌କେ ଆବ୍ରାହାମ୍‌ଆଃ ଚେତାନ୍‌ରେ ଆମାଃ ଦାୟା ଉଦୁବେମେ। 13 ଆଇଙ୍ଗ୍‌ ନେ କୁଆଁ ହେପାଦ୍‌ତାଃରେ ତିଙ୍ଗୁକାନାଇଙ୍ଗ୍‌ ଓଡ଼ୋଃ ନେ ନାଗାର୍‌ରେନ୍ ହନ୍‌କୁଡ଼ିକ ଦାଆଃ ଇଦି ନାଗେନ୍ତେ ହିଜୁଃତାନାକ। 14 ଇନ୍‌କୁଏତେ ଜେତା କୁଡ଼ିହନ୍‌କେ, ଆମାଃ ଚାଟୁରାଃ ଦାଆଃ ନୁଁ ନାଗେନ୍ତେ ଦାୟାକେଦ୍‌ତେ ଏମାଇଙ୍ଗ୍‌ମେ ମେନ୍ତେ କାଜିଲିରେ, ଇନିଃ ଆଇଙ୍ଗ୍‌କେ ନୁଁଏମେ ଓଡ଼ୋଃ ଆମାଃ ଉଁଟ୍‌କକେ ହଁଗି ଦାଆଃ ଆନୁକଆଇଙ୍ଗ୍‌ ମେନ୍ତେ କାଜି ରେଦ, ଇନିଃଗି ଆମାଃ ଦାସି ଇସାକ୍‌ ନାଗେନ୍ତେ ସାଲାକାନ୍‌ କୁଡ଼ିହନ୍‌ ହବାଅଃକାଏ, ତାବ୍‌ଦ ଆମ୍‌ ଆଇଁୟାଃ ଗମ୍‌କେଆଃ ଚେତାନ୍‌ରେ ସାୟାଦ୍‌ ଏମ୍‌କେଦାମ୍‌ ମେନ୍ତେ ଆଇଙ୍ଗ୍‌ ସାରି ଦାଡ଼ିୟାଇଙ୍ଗ୍‌।"

15 ଇନିଃ ବିନ୍ତି ଚାବାଲଃଗି, ରିବ୍‌କା ଆୟାଃ ତାରାନ୍‌ରେ ଚାଟୁ ଗଅଃକେଦ୍‌ତେ ହିଜୁଃୟାନା, ଇନିଃ ବଥୁୟେଲ୍‌ରାଃ ହନ୍ତେକୁଡ଼ି, ଏନ୍‌ ବଥୁୟେଲ୍‌ ନାହୋର୍‌ ଓଡ଼ୋଃ ମିଲ୍‌କାରାଃ ହନ୍‌କଡ଼ା ତାଇକେନାଏ। ଓଡ଼ୋଃ ନାହୁର୍‌ ଆବ୍ରାହାମ୍‌ରାଃ ହାଗାତେ ତାଇକେନାଏ। 16 ଇନିଃ ପୁରାଃ ସୁନ୍ଦ୍‌ରି ଓଡ଼ୋଃ କା ଆଣ୍‌ଦିକାନ୍‌ ଡିଣ୍ଡାକୁଡ଼ି ତାଇକେନା। ଇନିୟାଃ ଜେତା କଡ଼ାଲଃ ହଡ଼୍‌ମରାଃ ନାତା କା ତାଇକେନା। ଇନିଃ କୁଆଁ ଲାତାର୍‌ତେ ଆଡ଼୍‌ଗୁୟାନା ଓଡ଼ୋଃ ଚାଟୁରେ ଦାଆଃ ପେରେଃକେଦ୍‌ଲଃ ଚେତାନ୍‌ତେ ଗଅଃ ରାକାବ୍‌କେଦା। 17 ଇମ୍‌ତା ଏନ୍‌ ଦାସି ଏନ୍‌ କୁଡ଼ିତାଃ ନିର୍‌ ହିଜୁଃକେଦ୍‌ତେ କାଜିକିୟା, "ଦାୟାକେଦ୍‌ତେ, ଆମାଃ ଚାଟୁରାଃ ଦାଆଃ ଆଇଙ୍ଗ୍‌କେ ନୁଁ ନାଙ୍ଗ୍‌ କାଟିଃଲେକା ଏମାଇଙ୍ଗ୍‌ମେ।"

18 ଇନିଃ କାଜିକିୟାଏ, "ହେ ମାଇନାନ୍‌, ନେ ନୁଁଏମେ," ନେ'କାଜି କାଜିତାନ୍‌ଲଃ ଇନିଃ ଆୟାଃ ଚାଟୁରେୟାଃ ଦାଆଃକେ ଏମ୍‌କିୟା। 19 ଇନିଃକେ ଦାଆଃ ନୁଁ ନାଙ୍ଗ୍‌ ଏମ୍‌କିଃ ତାୟମ୍‌ତେ କାଜିକିୟା, "ଆମାଃ ସବେନ୍‌ ଉଁଟ୍‌କ ଦାଆଃ ନୁଁକେଦ୍‌ତେ ବିୟଃ ଜାକେଦ୍‌ ଆଇଙ୍ଗ୍‌ ଇନ୍‌କୁ ନାଗେନ୍ତେ ଦାଆଃ ଆଉୟାଇଙ୍ଗ୍‌।" 20 ଏନ୍ତେ ଇନିଃ ଇମ୍‌ତାଗି ଚାଟୁରାଃ ଦାଆଃକେ ଡାଡାକାରେ ଦୁଲ୍‌କେଦ୍‌ତେ ଆଡଃଗି ଦାଆଃ ଆଉ ନାଙ୍ଗ୍‌ କୁଆଁ ହେପାଦ୍‌ତେ ନିର୍‌ ଇଦିକେଦା ଓଡ଼ୋଃ ଉଁଟ୍‌କ ନାଙ୍ଗ୍‌ ଦାଆଃ ଆଉକେଦାଏ। 21 ଆବ୍ରାହାମ୍‌ଆଃ ଦାସି ଏନ୍‌ କୁଡ଼ିକେ ନେଲ୍‌କେଦ୍‌ତେ ଇନିଃଲଃ ବେଗାର୍‌ ଜାଗାର୍‌ଗି ତାଇନ୍‌ୟାନା ଓଡ଼ୋଃ ଆୟାଃ ହରାସେନ୍‌କେ ପ୍ରାଭୁ ପୁରାଏୟା ଚି କାହା ଏନା ସାରି ନାଙ୍ଗ୍‌ ଉଡ଼ୁଃ ତାଇକେନାଏ।

22 ଇନିୟାଃ ଉଁଟ୍‌କ ଦାଆଃ ନୁଁ ଚାବାକେଦ୍‌ଚି, ଆବ୍ରାହାମ୍‌ଆଃ ଦାସି ଏନ୍‌ କୁଡ଼ିକେ ମଣେୟାଁ ଗ୍ରାମ୍‌ ସୋନାରେୟାଃ ମୁହୁଁରେ ତୁସିଙ୍ଗ୍‌ୟଃତେୟାଃ ଓଡ଼ୋଃ ୧୧୦ ଗ୍ରାମ୍‌ ସୋନାରାଃ ବାରିୟା ଚୁଡ଼ି ଏମ୍‌କିୟା। 23 ଏନ୍ତେ ଇନିଃ କୁଲିକିୟାଏ, "ଦାୟାକେଦ୍‌ତେ ଆଇଙ୍ଗ୍‌କେ କାଜିଇଙ୍ଗ୍‌ମେ, ଆମ୍‌ ଅକଏୟାଃ ହନ୍‌କୁଡ଼ି ତାନ୍‌ମେ ? ଆମାଃ ଆପୁଆଃ ଅଡ଼ାଃରେ ମିଦ୍‌ ନୁବାଃ ନାଙ୍ଗ୍‌ ଠାୟାଦ୍‌ ମେନାଃ ଚି ?"

24 ଏନ୍‌ କୁଡ଼ି କାଜିରୁହାଡ଼୍‌କିୟାଏ, "ଆଇଙ୍ଗ୍‌ ବଥୁୟେଲ୍‌ରାଃ ହନ୍‌କୁଡ଼ି ତାନିଙ୍ଗ୍‌ ଓଡ଼ୋଃ ଆଇଁୟାଃ ଏଙ୍ଗା ଆପୁରାଃ ନୁତୁମ୍‌ ମିଲ୍‌କା ଓଡ଼ୋଃ ନାହୁର୍‌ ତାନାଃ।" 25 ଇନିଃ ଆଡଃଗି କାଜିକେଦା, "ଆଲେୟାଃ ଅଡ଼ାଃରେ ପୁରାଃଗି କୁଟିବୁସୁଃ ଓଡ଼ୋଃ ଦାନା ମେନାଃ। ଓଡ଼ୋଃ ମିଦ୍‌ନୁବାଃ ତାଇନ୍‌ ନାଗେନ୍ତେ ଠାୟାଦ୍‌ ହଗି ମେନାଃ।"

26 ଏନ୍ତେ ଏନ୍‌ ଦାସି ଇକ୍‌ଡ଼ୁମ୍‌ୟାନ୍‌ଲଃ ପ୍ରାଭୁକେ ଜହାର୍‌କେଦ୍‌ତେ କାଜିକିୟା, 27 "ଆଇଁୟାଃ ଗମ୍‌କେ ଆବ୍ରାହାମ୍‌ଆଃ ପ୍ରାଭୁ ପାର୍‌ମେଶ୍ୱାର୍‌ ଧାଇନ୍‌ ହବାଅଃକାଏ, ଚିୟାଃଚି ପ୍ରାଭୁ ଆଇଁୟାଃ ଗମ୍‌କେ ଚେତାନ୍‌ରେ ଦାୟା ଓଡ଼ୋଃ ଆୟାଃ ପାତିୟାର୍‌ରଃ କାଜି କାଏ ରକାଅକାଦା। ଓଡ଼ୋଃ ପ୍ରାଭୁ ଆଇଁୟାଃ ଗମ୍‌କେୟାଃ କିଲିକଆଃ ଅଡ଼ାଃତେ ଇଦିସେଟେର୍‌ କେଦିୟାଁ।"

28 ଏନ୍ କୁଡ଼ିହନ୍ ନିର୍‌ ଇଦିକେଦ୍‌ତେ ଆୟାଃ ଏଙ୍ଗା ଅଡ଼ାଃରେନ୍‌ ସବେନ୍‌କକେ ନେ କାଜି ଉଦୁବାକଆ। 29 ରିବ୍‌କାରାଃ ଲାବନ୍‌ ନୁତୁମ୍‌ ମିହୁଡ଼୍‌ ହାଗା ତାଇକେନାଏ। ଲାବାନ୍‌ ଏନ୍‌ ହଡ଼ଲଃ ନେପେଲ୍‌ ନାଗେନ୍ତେ ଏନ୍‌ କୁଆଁ ହେପାଦ୍‌ ସେନ୍‌ ନାଙ୍ଗ୍‌ ଜାଲ୍‌ଦିଗି ନିର୍‌ ଅଡଙ୍ଗ୍‌ୟାନା। 30 ଇନିଃ ମିଶିତେତାଃରେ, ମୁହୁଁରେ ତୁସିଙ୍ଗ୍‌ତେୟାଃ ଓଡ଼ୋଃ ତିଃଇରେ ତୁସିଙ୍ଗ୍‌ତେୟାଃ ନେଲ୍‌କାଦାଏ, ଓଡ଼ୋଃ ଏନ୍‌ ଦାସି ରିବ୍‌କାକେ ଅକ କାଜିକଏ କାଜିକାଇ ତାଇକେନା, ଏନ୍‌ ସବେନାଃ ଆୟୁମ୍‌କେଦାଏ ଇମ୍‌ତା, ଲାବାନ୍‌ ଏନ୍‌ ଦାସିତାଃତେ ଜାଲ୍‌ଦିଗି ସେନଃୟାନା ଓଡ଼ୋଃ କୁଆଁ ହେପାଦ୍‌ରେ ଇନିଃକେ ଉଁଟ୍‌କଲଃ ତିଙ୍ଗୁଆକାନ୍‌ ନେଲ୍‌କିୟାଏ। 31 ଲାବାନ୍‌ ଇନିଃକେ କାଜିକିୟା, "ହେ ପ୍ରାଭୁଆଃ ଆଶିଷ୍‌ ନାମାକାଦ୍‌ନିଃ, ଭିତାର୍‌ତେ ଏଲା ହିଜୁଃମେ, ଆମ୍‌ ଚିନାଃମେନ୍ତେ ବାହାରିରେମ୍‌ ତିଙ୍ଗୁଆକାନା ? ଆଇଙ୍ଗ୍‌ ଆମାଃ ନାଗେନ୍ତେ ଓଡ଼ୋଃ ଉଁଟ୍‌କ ତାଇନଃ ନାଗେନ୍ତେ ଠାୟାଦ୍‌ ବାଇ ସେକାଡ଼ାକାଦାଇଙ୍ଗ୍‌।"

32 ଏନ୍ତେ ଏନ୍‌ ହଡ଼ ଅଡ଼ାଃ ଭିତାର୍‌ତେ ବଲୟାନା। ଲାବାନ୍‌ ଉଁଟ୍‌କଆଃ ଚେତାନ୍‌ରେ ଲାଦିୟାକାନ୍‌ ଜିନିଷ୍‌କ ଆଡ଼୍‌ଗୁକେଦ୍‌ତେ ଇନ୍‌କୁକେ କୁଟିବୁସୁ ଓଡ଼ୋଃ ଦାନା ଏମାଦ୍‌କଆଏ। ଏନ୍ତେ ଇନିଃ ଆବ୍ରାହାମ୍‌ରାଃ ଦାସି ଓଡ଼ୋଃ ଆୟାଃଲଃ ହିଜୁଃକାନ୍‌ ହଡ଼କଆଃ କାଟା ଆବୁଙ୍ଗ୍‌ ନାଙ୍ଗ୍‌ ଦାଆଃ ଏମାଦ୍‌କଆ। 33 ଏନ୍‌ ଦାସିରାଃ ଆୟାର୍‌ରେ ଜଜମାଃ ଦହୟାନା ଇମ୍‌ତା, ଇନିଃ କାଜିକେଦ୍‌କଆଏ, "ଆଇଁୟାଃ ଜାଗାର୍‌କାଜି ଆଉରି ଜାଗାର୍‌ରେ ଜାକେଦ୍‌ ଆଇଙ୍ଗ୍‌ କାଇଙ୍ଗ୍‌ ଜଜମାଃ।"

ଏନାତେ ଲାବନ୍‌ କାଜିକିୟାଏ, "ତାବ୍‌ଦ ଲାଗେ ଜାଗାର୍‌ରେମେଁ।"

34 ଏନ୍ତେ ଇନିଃ ଜାଗାର୍‌ ଏଟେଦ୍‌ତାନ୍‌ଲଃ କାଜିକେଦାଏ, "ଆଇଙ୍ଗ୍‌ ଆବ୍ରାହାମ୍‌ଆଃ ଦାସି ତାନିଙ୍ଗ୍‌।" 35 ପ୍ରାଭୁ ଆଇଁୟାଃ ଗମ୍‌କେକେ ପୁରାଃଗି ଆଶିଷ୍‌କାଇଜା, ଏନାମେନ୍ତେ ଇନିଃ ପୁରାଃଗି କିସାଁଣ୍‌ ହବାକାନାଏ। ଇନିଃତାଃରେ ପୁରାଃଗି ମିଣ୍ଡି ଗୋଟ୍‌, ମେରମ୍‌ ଗୋଟ୍‌, ଉରିଃକ୍‌ ଗୋଟ୍‌, ସୋନା, ରୁପା, ଦାସି, କାମ୍‌ଡ଼ି, ଗାଧା ଓଡ଼ୋଃ ଉଁଟ୍‌, ନେ ସବେନ୍‌କ ମେନାକଆ। 36 ଆଇଁୟାଃ ଗମ୍‌କେକେ ଓଡ଼ୋଃ ଆୟାଃ କୁଡ଼ି ସାରାକେ ହାଡ଼ାମ୍‌ ଦିପିଲିରେ ପ୍ରାଭୁ ମିଆଁଦ୍‌ କଡ଼ାହନ୍‌ ଏମାଦ୍‌କିନାଏ ଓଡ଼ୋଃ ଆଇଁୟାଃ ଗମ୍‌କେ ଆୟାଃ ହନ୍‌କେ ସବେନାଃ ଏମାକାଇଜାଏ। 37 ଆଇଁୟାଃ ଗମ୍‌କେ ଆଇଙ୍ଗ୍‌କେ କିରିୟା ଇଚିକେଦ୍‌ତେ କାଜିକେଦିୟାଁ, "ଆଇଙ୍ଗ୍‌ ଅକ କିନାନ୍‌ରେନ୍‌ ହଡ଼କଆଃ ଦିଶୁମ୍‌ରେ ତାଇନଃ ତାନାଇଙ୍ଗ୍‌, ଆମ୍‌ ଏନ୍‌ ଦିଶୁମ୍‌ରେନ୍‌ ଜେତା କୁଡ଼ିହନ୍‌କେ ଆଇଁୟାଃ ହନିଙ୍ଗ୍‌କଡ଼ା ନାଗେନ୍ତେ ଆଲମ୍‌ ଆଉକଆ। 38 ମେନ୍‌ଦ ଆମ୍‌ ଆଇଁୟାଃ ଆପୁକଆଃ କିଲିରେନ୍‌ ହଡ଼କତାଃ ସେନ୍‌କେଦ୍‌ତେ ହନିଙ୍ଗ୍‌କଡ଼ା ନାଙ୍ଗ୍‌ କୁଡ଼ି ଆଉଇମେ।" 39 ଇମ୍‌ତା ଆଇଙ୍ଗ୍‌ ଗମ୍‌କେ ତାଇୟାଁଃକେ କାଜିକିୟାଇଙ୍ଗ୍‌, "ଆଇଁୟାଃଲଃ ଜେତା କୁଡ଼ି କାଏ ହିଜୁଃ ରେଦ, ଆଇଙ୍ଗ୍‌ ଚିନାଃଇଙ୍ଗ୍‌ ଚିକାୟା ?" 40 ଇନିଃ କାଜିରୁହାଡ଼୍‌କିୟାଁଏ, "ଆଇଙ୍ଗ୍‌ ଅକ ପ୍ରାଭୁଆଃ କାଜି ମାନାତିଙ୍ଗ୍‌ ତାନାଇଙ୍ଗ୍‌, ଇନିଃ ଆୟାଃ ଦୁଁତ୍‌କକେ ଆମାଃଲଃ କୁଲ୍‌କେଦ୍‌ତେ ଆମାଃ ହିଜୁଃସେନଃ କାମିକେ ପୁରାଏୟା। ଏନ୍ତେ ଆମ୍‌ ଆଇଁୟାଃ ହଡ଼କତାଃଏତେ ଓଡ଼ୋଃ ଆଇଁୟାଃ ଆପୁକଆଃ କିଲିଏତେ ହନିଙ୍ଗ୍‌କଡ଼ା ନାଙ୍ଗ୍‌ କୁଡ଼ି ଆଉ ଦାଡ଼ିୟାମ୍‌। 41 ଆମ୍‌ ଆଇଁୟାଃ କିଲିରେନ୍‌ ହଡ଼କତାଃ ସେନ୍‌ରେଦମ୍‌, ନେ କିରିୟାଏତେ ରାଡ଼ାଅଃଆମ୍‌। ଇନ୍‌କୁ କୁଡ଼ିହନ୍‌ ଏମାମ୍‌ ଚାଏ କାକ ଏମାମ୍‌, ଆମ୍‌ ଆମାଃ କିରିୟାଏତେ ରାଡ଼ାଅଃଆମ୍‌।"

42 "ତିସିଙ୍ଗ୍‌ ଆଇଙ୍ଗ୍‌ ନେ କୁଆଁତାଃ ସେଟେର୍‌ୟାନାଇଙ୍ଗ୍‌ ଇମ୍‌ତା ଆଇଙ୍ଗ୍‌ ବିନ୍ତିକେଦ୍‌ତେ କାଜିକେଦାଇଙ୍ଗ୍‌, ‘ହେ ପ୍ରାଭୁ ଆଇଁୟାଃ ଗମ୍‌କେ ଆବ୍ରାହାମ୍‌ଆଃ ପାର୍‌ମେଶ୍ୱାର୍‌ ଆମ୍‌ ଆଇଁୟାଃ ହିଜୁଃରାଃ ଉଦ୍ଦେଶ୍‌କେ ପୁରାଏମେ। 43 ନେଲେମେ, ଆଇଙ୍ଗ୍‌ ନେ କୁଆଁତାଃରେ ତିଙ୍ଗୁଆକାନାଇଙ୍ଗ୍‌। ଆଇଙ୍ଗ୍‌ ଅକ କୁଡ଼ି ଦାଆଃ ଇଦି ନାଗେନ୍ତେ ହିଜୁଃଆ ଇନିଃକେଇଙ୍ଗ୍‌ କାଜିୟା, ଆମାଃ ଚାଟୁରାଃ ଦାଆଃ ନୁଏଁ ନାଗେନ୍ତେ କାଟିକାନ୍‌ ଏମାଇଙ୍ଗ୍‌ମେ,’ 44 ଓଡ଼ୋଃ ଏନ୍‌ କୁଡ଼ି, ‘ଆମ୍‌ ଦାଆଃ ନୁଁଏମେ ଓଡ଼ୋଃ ଆମାଃ ଉଁଟ୍‌କଆଃ ନାଗେନ୍ତେ ହଗି ଦାଆଃ ଆଉତାଃଇଙ୍ଗ୍‌’ ମେନ୍ତେ କାଜି ରେଦ, ଇନିଃ ଆଇଁୟାଃ ଗମ୍‌କେୟାଃ ହନ୍‌କଡ଼ା ନାଙ୍ଗ୍‌ ପ୍ରାଭୁଆଃ ହରାତେ ସାଲାକାନ୍‌ କୁଡ଼ି ତାନିଃ ମେନ୍ତେଇଙ୍ଗ୍‌ ସାରିୟା। 45 ନେ ବିନ୍ତି ଆଇଙ୍ଗ୍‌ ମନ୍‌ରେ ବିନ୍ତିତାନ୍‌ ଇମ୍‌ତାଗି, ରିବ୍‌କା ଆୟାଃ ତାରାନ୍‌ରେ ଦାଆଃ ଚାଟୁ ତେଙ୍ଗଃକେଦ୍‌ତେ ହିଜୁଃୟାନା। ଇନିଃ କୁଆଁ ହେପାଦ୍‌ତେ ସେନଃୟାନ୍‌ଲଃ ଦାଆଃ ଆଉକେଦାଏ ଇମ୍‌ତା, ଆଇଙ୍ଗ୍‌ କାଜିକିୟାଇଙ୍ଗ୍‌, ‘ଦାୟାକେଦ୍‌ତେ ଆଇଙ୍ଗ୍‌କେ କାଟିଃଲେକା ଦାଆଃ ନୁଏଁ ନାଗେନ୍ତେ ଏମାଇଙ୍ଗ୍‌ମେ।’ 46 ଇନିଃ ଜାଲ୍‌ଦିଗି ଆୟାଃ ତାରାନ୍‌ଏତେ ଦାଆଃ ଚାଟୁ ଆଡ଼୍‌ଗୁକେଦାଏ ଓଡ଼ୋଃ କାଜିକେଦିୟାଁଏ, ‘ନେ ନୁଁଏମେ। ଆଇଙ୍ଗ୍‌ ଆମାଃ ଉଁଟ୍‌କଆଃ ନାଗେନ୍ତେ ହଁଗି ଦାଆଃ ଆଉତାଃଇଙ୍ଗ୍‌।’ ଏନ୍ତେ ଆଇଙ୍ଗ୍‌ ଦାଆଃ ନୁଁ'କେଦାଇଙ୍ଗ୍‌ ଓଡ଼ୋଃ ଇନିଃ ଆଇଁୟାଃ ଉଁଟ୍‌କକେ ହଁଗି ଦାଆଃ ଆନୁଁକେଦ୍‌କଆଏ। 47 ଏନ୍ତେ ଆଇଙ୍ଗ୍‌ ଇନିଃକେ କୁଲିକିୟାଇଙ୍ଗ୍‌, ‘ଆମ୍‌ ଅକଏୟାଃ ହନ୍‌କୁଡ଼ି ତାନ୍‌ମେ ?’ ଇନିଃ କାଜିରୁହାଡ଼୍‌କେଦିୟାଁଏ, ‘ଆଇଁୟାଃ ଆପୁଆଃ ନୁତୁମ୍‌ ବଥୁୟେଲ୍‌ ଓଡ଼ୋଃ ଆଇଁୟାଃ ଆପୁଆଃ ଏଙ୍ଗା ଆପୁକିନାଃ ନୁତୁମ୍‌ ନାହୁର୍‌ ଓଡ଼ୋଃ ମିଲ୍‌କା।’ ଏନ୍ତେ ଆଇଙ୍ଗ୍‌ ଆୟାଃ ମୁହୁଁରେ ତୁସିଙ୍ଗ୍‌ତେୟାଃ ଓଡ଼ୋଃ ତିଃଇରେ ତୁସିଙ୍ଗ୍‌ତେୟାଃ ତୁସିଙ୍ଗ୍‌କିୟାଇଙ୍ଗ୍‌। 48 ଏନ୍ତେ ଆଇଙ୍ଗ୍‌ ଇକ୍‌ଡ଼ୁମ୍‌କେଦ୍‌ତେ ପାର୍‌ମେଶ୍ୱାର୍‌କେଇଙ୍ଗ୍‌ ଜହାର୍‌କିୟା। ଆଇଙ୍ଗ୍‌ ଆଇଁୟାଃ ଗମ୍‌କେଆଃ ହନ୍‌କଡ଼ା ନାଙ୍ଗ୍‌ ଆୟାଃ ହାଗାତେୟାଃ ଅଡ଼ାଃଏତେ ହନ୍‌କୁଡ଼ି ସାଲାଅଡଙ୍ଗ୍‌ ନାଙ୍ଗ୍‌ ପ୍ରାଭୁ ଆଇଙ୍ଗ୍‌କେ ସାର୍‌ତି ହରାରେ ସୁତୁଃ ଆଉକିଦିୟାଁ, ଏନାମେନ୍ତେ ଆଇଁୟାଃ ଗମ୍‌କେ ଆବ୍ରାହାମ୍‌ଆଃ ପ୍ରାଭୁ ପାର୍‌ମେଶ୍ୱାର୍‌କେ ଧାନ୍ୟାବାଦ୍‌ ଏମ୍‌କିୟାଇଙ୍ଗ୍‌। 49 ଏନାତେ ଆପେ ଆଇଁୟାଃ ଗମ୍‌କେଲଃ ପାତିୟାର୍‌ଲଃ ଲେକାନ୍‌ ନାତା ବାଇ ସାନାଙ୍ଗ୍‌ତାନ୍‌ ରେଦ ଫାର୍‌ଚି ମନ୍‌ତେ ହେଗି ଚାଏ କାହାଗି ମେନ୍ତେ ଦାୟାକେଦ୍‌ତେ କାଜିପେ। ଏନାରେ ଆଇଙ୍ଗ୍‌ ଜମ୍‌ସାଃତେ ଚାଏ ଲେଙ୍ଗାସାଃତେ ସେନାଇଙ୍ଗ୍‌, ଏନା ଉହାଟେୟାଇଙ୍ଗ୍‌।"

50 ନେଆଁ ଆୟୁମ୍‌କେଦ୍‌ତେ ଲାବନ୍‌ ଓଡ଼ୋଃ ବଥୁୟେଲ୍‌ କାଜିରୁହାଡ଼୍‌କିୟାକିନ୍‌, "ନେଆଁ ପ୍ରାଭୁ ସାଃଏତେ ହବାକାନା, ଏନାତେ ନେ ବିଷାଏରେ ଜେତାନ୍‌ କାଜିରାଃ ବାନଃଆ। 51 ନେଲିମେ, ରିବ୍‌କା ଆମାଃ ଆୟାର୍‌ରେ ମେନାଇୟା, ଇନିଃକେ ମିସାତେ ଇଦିକିମେ ଓଡ଼ୋଃ ପ୍ରାଭୁଆଃ କାଜି ଲେକାତେ ଇନିଃ ଆମାଃ ଗମ୍‌କେଆଃ ହନ୍‌କଡ଼ାରାଃ କୁଡ଼ି ହବାଅଃକାଏ।" 52 ଆବ୍ରାହାମ୍‌ଆଃ ଏନ୍‌ ଦାସି ଇନ୍‌କୁଆଃ କାଜି ଆୟୁମ୍‌କେଦ୍‌ତେ ପ୍ରାଭୁକେ ଇକ୍‌ଡ଼ୁମ୍‌କେଦ୍‌ତେ ଜହାର୍‌କିୟା। 53 ଏନ୍ତେ ଏନ୍‌ ଦାସି ରୁପା ଓଡ଼ୋଃ ସୋନାତେ ବାଇୟାକାନ୍‌ତେୟାଃକ ଓଡ଼ୋଃ ଗନଙ୍ଗ୍‌ଆଁନ୍‌ ଲିଜାଃ ଆଉକେଦ୍‌ତେ ରିବ୍‌କାକେ ଏମ୍‌କିୟା। ଇନିଃ ରିବ୍‌କାରାଃ ହାଗାତେ ଓଡ଼ୋଃ ଏଙ୍ଗାତେକେ ହଁଗି ଗନଙ୍ଗ୍‌ଆଁନ୍‌ ଜିନିଷ୍‌କ ଏମାଦ୍‌କିନାଏ।

54 ଏନ୍ତେ ଇନିଃ ଓଡ଼ୋଃ ଆୟାଃଲଃ ହିଜୁଃକାନ୍‌ ହଡ଼କ ଜମ୍‌ ନୁଁ'କେଦ୍‌ତେ ମିଦ୍‌ନୁବାଃ ଏନ୍ତାଃରେ ତାଇନ୍‌ୟାନାକ। ଏଟାଃ ହୁଲାଙ୍ଗ୍‌ ସେତାଃ ଇଦାନ୍‌ରେ ବିରିଦ୍‌କେଦ୍‌ତେ, ଏନ୍‌ ଦାସି କାଜିକେଦ୍‌କଆ, "ଆଇଁୟାଃ ଗମ୍‌କେତାଃ ସେନଃ ନାଗେନ୍ତେ ଆଇଙ୍ଗ୍‌କେ ବିଦା ଏମାଇଙ୍ଗ୍‌ପେ।"

55 ମେନ୍‌ଦ ରିବ୍‌କାରାଃ ହାଗାତେ ଓଡ଼ୋଃ ଏଙ୍ଗାତେ ଏନ୍‌ ଦାସିକେ କାଜିକିୟାକିନ୍‌, "ହନିଙ୍ଗ୍‌କୁଡ଼ି ଆଲେତାଃ ‌ମିଦ୍‌ ହାପ୍ତା ତାଇନ୍‌କାଏ, ହବାଅଃ ରେଦ ଗେଲେୟା ହୁଲାଙ୍ଗ୍‌ ଜାକେଦ୍‌ ତାଇନ୍‌କାଏ, ଏନ୍ତେ ସେନଃଚାଏ।"

56 ମେନ୍‌ଦ ଏନ୍‌ ଦାସି ଇନ୍‌କୁକେ କାଜିକେଦ୍‌କଆ, "ପ୍ରାଭୁ ଆଇଁୟାଃ ହିଜୁଃସେନଃ ହରାଏ ପୁରାକାଦା, ଏନାତେ ଆପେ ଆଇଙ୍ଗ୍‌କେ ଆଲ୍‌ପେ ଆଟ୍‌କାଅଇୟାଁ। ଆଇଁୟାଃ ଗମ୍‌କେତାଃ ରୁହାଡ଼୍‌ ନାଙ୍ଗ୍‌ ବିଦା ଏମାଇଙ୍ଗ୍‌ପେ।"

57 ଇନ୍‌କୁ ଇନିଃକେ କାଜିକିୟାକ, "ଆବୁ ଏନ୍‌ କୁଡ଼ିକେ ହାକାଅକେଦ୍‌ତେ ଆୟାଃ ଇଛାସାନାଙ୍ଗ୍‌ କୁଲିୟାବୁ।" 58 ଏନ୍ତେ ଇନ୍‌କୁ ରିବ୍‌କାକେ କେଡ଼ାକେଦ୍‌ତେ କୁଲିକିୟାକ, "ଆମ୍‌ ନେ ହଡ଼ଲଃ ସେନାମ୍‌ ଚି ?"

ଇନିଃ କାଜିକେଦ୍‌କଆଏ, "ହେଗି, ଆଇଙ୍ଗ୍‌ ସେନାଇଙ୍ଗ୍‌।"

59 ଏନ୍ତେ ଇନ୍‌କୁ ଆକଆଃ ମିଶି ରିବ୍‌କାକେ ଓଡ଼ୋଃ ଇନିୟାଃ କାମ୍‌ଡ଼ି କୁଡ଼ିକେ, ଏନ୍ତେ ଆବ୍ରାହାମ୍‌ଆଃ ଏନ୍‌ ଦାସି ଓଡ଼ୋଃ ଆୟାଃଲଃ ହିଜୁଃକାନ୍‌ ହଡ଼କକେ ବିଦାକେଦ୍‌କଆ। 60 ଓଡ଼ୋଃ ଇନ୍‌କୁ ରିବ୍‌କାକେ ଆଶିଷ୍‌ ଏମ୍‌ତାନ୍‌ଲଃ କାଜିକିୟାକ,

"ଆମ୍ ଆଲେୟାଃ ମିଶି, ଆମାଃ କିଲିକ ପସାକେଦ୍‌ତେ ହାଜାର୍‌ ହାଜାର୍‌ ହଡ଼କ ହବାଅଃକା,

ଆମାଃ କିଲିରେନ୍‌ ହଡ଼କ ବାଇରିକଆଃ ନାଗାର୍‌କ ଆକ୍‌ତେୟାର୍‌ରେକା।"

61 ଏନ୍ତେ ରିବ୍‌କା ଓଡ଼ୋଃ ଆୟାଃ କାମ୍‌ଡ଼ି କୁଡ଼ିକ ସେକାଡ଼୍‌କେଦ୍‌ତେ ଉଁଟ୍‌କଆଃ ଚେତାନ୍‌ରେ ଦୁବ୍‌ୟାନାକ ଓଡ଼ୋଃ ଏନ୍‌ ହଡ଼କଲଃ ସେନଃୟାନା। ନେ'ଲେକାତେ ଏନ୍‌ ଦାସି ରିବ୍‌କାକେ ଇଦିକେଦ୍‌ତେ ସେନଃୟାନା।

62 ଏନ୍‌ ଦିପିଲିରେ ଇସାକ୍‌ ଦାକ୍ଷିଣ୍‌ସାଃରେ ତାଇନଃ ତାଇକେନା ଓଡ଼ୋଃ ଇନିଃ ବେର୍‌ଲାହାୟିରୋୟି ନୁତୁମ୍‌ ଠାୟାଦ୍‌ ସେନ୍‌କେଦ୍‌ତେ ରୁହାଡ଼୍‌କାନ୍‌ ତାଇକେନା। 63 ମୁସିଙ୍ଗ୍‌ ସିଙ୍ଗି ହାସୁରଃତାନ୍‌ ବେଡ଼ାରେ ଇସାକ୍‌ ହନର୍‌ବାଡ଼ା ନାଙ୍ଗ୍‌ ପିଡ଼ିତେ ସେନାକାନ୍‌ ତାଇକେନ୍‌ ଇମ୍‌ତା ସାଙ୍ଗିନ୍‌ଏତେ ଉଁଟ୍‌କକେ ହିଜୁଃତାନ୍‌ ନେଲ୍‌କେଦ୍‌କଆଏ। 64 ରିବ୍‌କା ହଗି ଇସାକ୍‌କେ ନେଲ୍‌କିୟାଏ ଓଡ଼ୋଃ ଉଁଟ୍‌ ଚେତାନ୍‌ଏତେ ଆଡ଼୍‌ଗୁୟାନା। 65 ଏନ୍ତେ ଆବ୍ରାହାମ୍‌ଆଃ ଦାସିକେ କୁଲିକିୟା, "ପିଡ଼ିଏତେ ଆବୁଲଃ ନେପେଲ୍‌ ନାଙ୍ଗ୍‌ ହିଜୁଃତାନ୍‌ ହଡ଼ ଅକଏ ତାନିଃ ?" ଏନ୍ତେ ଏନ୍‌ ଦାସି କାଜିରୁହାଡ଼୍‌କିୟା,

"ଇନିଃ ଆଇଁୟାଃ ଗମ୍‌କେ ତାନିଃ।" ଏନ୍ତେ ରିବ୍‌କା ଆୟାଃ ଆଚ୍‌ରା ଲିଜାଃଲଃ ବହଃ ଗୁଗ୍‌ଲୁୟାନାଏ।

66 ଏନ୍‌ ଦାସି ଇସାକ୍‌କେ ସବେନ୍‌ କାଜି ଉଦୁବ୍‌କିୟା। 67 ଇସାକ୍‌ ରିବ୍‌କାକେ ଇଦିକେଦ୍‌ତେ ଆୟାଃ ଉମା ସାରାରାଃ କୁମ୍ବାରେ ଦହକିୟା ଓଡ଼ୋଃ ରିବ୍‌କାଲଃ ଆଣ୍‌ଦିୟାନାଏ। ରିବ୍‌କା ଇସାକ୍‌ରାଃ କୁଡ଼ି ହବାୟାନାଏ ଓଡ଼ୋଃ ଇସାକ୍‌ ଇନିଃକେ ଦୁଲାଡ଼୍‌କିୟା। ନେ'ଲେକାତେ ଇସାକ୍‌ ଏଙ୍ଗାତେୟାଃ ଗନଏଃରାଃ ଦୁକୁଏତେ ଜୀଉରାଡ଼େଃ ନାମ୍‌କେଦାଏ।