1 ଦାଣେଁ ରାକାବ୍‌କାନ୍ ଜଜମାଃତେ ପେରେୟାକାନ୍‌ ଏପେରାଙ୍ଗ୍‌ରେୟାଃ ଅଡ଼ାଃ ଏତେ ସୁକୁତେ ମିଦ୍‌ ଟୁକ୍‌ଡ଼ା ହଲଙ୍ଗ୍‌ ଜମ୍‌ତେୟାଃ ବୁଗିନ୍‌ ତାନାଃ।

2 ଅକନ୍‌ ଦାସି ସେଣାଁନ୍‌ତେ ଚାଲାଅନା ଓଡ଼ୋଃ ଇନିଃ ଆୟାଃ ଗମ୍‌କେଆଃ ଗିହୁଃକାନ୍‌ ହନ୍‌ରାଃ ଚେତାନ୍‌ରେ ଆକ୍‌ତେୟାର୍‌ ରିକାୟାଏ। ଓଡ଼ୋଃ ଇନିଃ ଇନିୟାଃ ହାଗାକଲଃ ଖୁର୍ଜିରେୟାଃ ଆକ୍‌ତେୟାର୍‌ ନାମାଃଏ।

3 ରୁପା ଓଡ଼ୋଃ ସୋନାକେ ସେଙ୍ଗେଲ୍‌ତେ ଫାର୍‌ଚି ରିକାନାଃ, ମେନ୍‌ଦ ହଡ଼ରାଃ ମନ୍‌କେ ପ୍ରାଭୁ ବିନିଡ଼ାଅ ରିକାଏ।

4 ଏତ୍‌କାନ୍‌କାମି ରିକାତାନ୍‌ ହଡ଼ ଏତ୍‌କାନ୍‌ କାଜିତାନ୍‌ ନିୟାଃ କାଜିକ ଆୟୁମାଃଏ। ଓଡ଼ୋଃ ହସଡ଼ ହଡ଼ ହିସିଙ୍ଗା କାଜିତାନ୍‌ ନିୟାଃ କାଜିକେ ଲୁତୁର୍‌ତେ ଆୟୁମାଃ।

5 ଅକଏ ଗାରିବ୍‌କେ ଲାନ୍ଦାଇୟା, ଇନିଃ ଆୟାଃ ବାବାଇନିଃକେ ଲାନ୍ଦାଇୟା ଓଡ଼ୋଃ ଅକଏ ସାଙ୍କାଟ୍‌ରେ ତାଇନ୍‌ ହଡ଼କେ ଲାନ୍ଦାଇୟା, ଇନିଃ ସାଜାଇ କା ନାମ୍‌କେଦ୍‌ତେ କାଏ ତାଇନାଃ।

6 ହନ୍‌କ ପୁର୍‌ଖା ହାଡ଼ାମ୍‌କଆଃ ମୁକୁଟ୍‌ ଓଡ଼ୋଃ ହନ୍‌କଆଃ ମାନାରାଙ୍ଗ୍‌ ଆକଆଃ ଆପୁକ ତାନ୍‌କ।

7 ଡଣ୍ଡ ହଡ଼ରାଃ ମଚାଏତେ ବୁଗିନ୍‌ କାଜି ବେଶ୍‌ କା ଆଟ୍‌କାରାଃ, ନେଆଁଏତେ ଆଦ୍‌କା ବୁଗିନ୍‌ କା ଆଟ୍‌କାରାଃ ମିଆଦ୍‌ ମାଇନାନ୍‌ ହଡ଼ ବେଦା କାଜିକ କାଜିତେୟାଃ।

8 କିରିଙ୍ଗ୍‌ ହଡ଼ରାଃ ନେପେଲ୍‌ରେ ଦାନ୍‌ ଏମ୍‌ତେୟାଃ ଗନଙ୍ଗ୍‌ଆଁନ୍‌ ଦିରି ଲେକାନାଃ ତାନାଃ, ଏନା ଅକସାଃତେ ସେନା, ଏନ୍‌ସାଃତେ ହାରା ଇଦିୟଃଆ।

9 ଅକଏ ଏଟାଃନିୟାଃ ଗୁହ୍ନାଁ ଛାମା ରିକାଃଏ, ଇନିଃ ଦୁଲାଡ଼୍‌ ଦାଣାଁଃଏ। ମେନ୍‌ଦ ଅକଏ ମିଆଦ୍‌ କାଜିକେ ଘାଡ଼ି ଘାଡ଼ି କାଜିୟା, ଇନିଃ ବୁଗିନ୍‌ ଗାତିକକେ ବିନ୍‌ଗାଅକଆ।

10 ଡଣ୍ଡ ହଡ଼କେ ମିଦ୍‌ସାଅ ଧାଅଁ ଜାକେଦ୍‌ ଏଗେର୍‌ ଏତେ, ମିଆଦ୍‌ ସେଣାଁନ୍‌ ହଡ଼କେ ମିସାଗି ଚେତାଅ କାଜି କାଜିତେୟାଃ ଇନିଃକେ ପୁରାଃ ହାସୁଇୟା।

11 ଏତ୍‌କାନ୍‌ ରିକାତାନ୍‌ନିଃ ଏସ୍‌କାର୍‌ ଏପ୍‌ରାଙ୍ଗ୍‌ ରିକା ନାଗେନ୍ତେ ସାନାଙ୍ଗ୍‌ଆଃ, ଏନାମେନ୍ତେ ଇନିୟାଃ ବିରୁଧ୍‌ରେ ମିଆଦ୍‌ ନିଠୁର୍‌ କାଜି ଇଦି ସେଟେର୍‌ନିଃକେ କୁଲଃଆ।

12 ହନ୍‌କକେ ବାଗିକାଦ୍ ଏଙ୍ଗା ଭାଲୁଲଃ ନେପେଲ୍‌ ଏତେ ଡଣ୍ଡ କାମିରେ ତାଇକାନ୍‌ ଡଣ୍ଡ ହଡ଼ଲଃ ନାପାମ୍‌ ବୁଗିନ୍‌ ତାନାଃ।

13 ଅକନ୍‌ ହଡ଼ ବୁଗିନାଃ ବାଦ୍‌ଲାରେ ଏତ୍‌କାନାଃ ରିକାଃଏ, ଇନିୟାଃ ଅଡ଼ାଃଏତେ ଏତ୍‌କାନ୍‌କାଜି ଚିଉଲାଃ ହ କା ସାଙ୍ଗିନଃଆ।

14 ଲାପ୍‌ଡ଼ାଇ ରେୟାଃ ଏନେଟେଦ୍‌, ବାନ୍ଦା ଆଡ଼ିରେ ଭୁଲ୍‌କାନ୍‌ ଲେକାନାଃ ତାନାଃ, ଏନାତେ ଏନା ହାଦୁଡ଼ଃ ସିଦାରେ ଏନ୍ତାଃଏତେ ନିର୍‌ପେ।

15 ଅକଏ ଏତ୍‌କାନ୍‌ନିଃକେ ବେଗାର୍‌ ଗୁହ୍ନାଁ ମେନ୍ତେ ଓଡ଼ୋଃ ଅକଏ ଧାର୍‌ମାନ୍‌କେ ଗୁହ୍ନାଁ ମେନ୍ତେ କାଜିୟା, ଏନ୍‌ ବାରାନ୍‌କିନ୍‌ ପ୍ରାଭୁ ପାର୍‌ମେଶ୍ୱାର୍‌ଆଃ ଆୟାର୍‌ରେ ହିଲାଙ୍ଗ୍‌ ଲେକାନ୍‌କିନ୍‌ ତାନ୍‌କିନ୍‌।

16 ଡଣ୍ଡକେ ସେଣାଁ ନାମ୍‌ ନାଗେନ୍ତେ ଗନଙ୍ଗ୍‌ ଚିକା ନାଙ୍ଗ୍‌ ଏମ୍‌ତାନା ? ନେଲେରେ ଇନିଃତାଃରେ ଏନାକେ ଦହ ନାଙ୍ଗ୍‌ ମନ୍‌ ବାନଆ।

17 ଗାତି ସବେର୍‌ ଇମ୍‌ତା ଦୁଲାଡ଼୍‌ ରିକାଃଏ ଓଡ଼ୋଃ ଇନିଃ ସାଙ୍କାଟ୍‌ ଇମ୍‌ତା ହାଗା ହବାଅଃଆଏ।

18 ଡଣ୍ଡ ହଡ଼ ରାଜିନାମାରେ ତିଃଇ ମିଲାଅ ରିକାଃଏ ଓଡ଼ୋଃ ଆପ୍‌ନା ଗାତି ନାଙ୍ଗ୍‌ ଜାମାନାତ୍‌ ବାଇକଆ।

19 ଅକଏ ଏପେରାଙ୍ଗ୍‌ ସୁକୁଃଆଏ, ଇନିଃ ଗୁହ୍ନାଁକେ ସୁକୁଃଆ ଓଡ଼ୋଃ ଅକଏ ଆୟାଃ ଦୁଆର୍‌କେ ସାଲାଙ୍ଗି ରିକାଃଏ, ଇନିଃ ଜୀଅନ୍‌ ଦାଣାଁଃଏ।

20 ଅକେୟାଃ ଏତ୍‌କାନ୍‌ ଉଡ଼ୁଃ ମନ୍‌ ତାଇନାଃ, ଇନିୟାଃ ଜେତାନ୍‌ ବୁଗିନାଃ କା ହବାୱା ଓଡ଼ୋଃ ଅକେୟାଃ ଆଲାଙ୍ଗ୍‌ ନେତେହାନ୍ତେ ଏତ୍‌କାନ୍‌ କାଜିୟା, ଇନିଃ ସାଙ୍କାଟ୍‌ରେ ଉୟୁଗଃଆ।

21 ଅକଏ ଡଣ୍ଡକେ ଜାନାମିତାନା, ଇନିଃ ଆୟାଃ ଦୁକୁକେ ପସାଏ ତାନା ଓଡ଼ୋଃ ଡଣ୍ଡରାଃ ଆପୁକେ ଜେତାନ୍‌ ସୁକୁ କା ତାଇନାଃ।

22 ରାସିକା ମନ୍‌ ବୁଗିନ୍‌ ରାନୁ ଲେକା ତାନାଃ ଓଡ଼ୋଃ ଦୁକୁ ମନ୍‌ ଜାଙ୍ଗ୍‌କେ ରହଡ଼୍‌ତାଃଏ।

23 ଏତ୍‌କାନ୍‌ ହଡ଼ ବିଚାର୍‌କେ ବାଗ୍‌ଡ଼ାଅଃ ନାଗେନ୍ତେ ଉକୁ କେଦ୍‌ତେ ଘୁସ୍‌ ତେଲାଏ।

24 ଅକଏତାଃରେ ସାରିଉରୁମ୍‌ ମେନାଃ ଇନିୟାଃ ଆୟାର୍‌ରେ ସେଣାଁ ମେନାଃ, ମେନ୍‌ଦ ଡଣ୍ଡରାଃ ମେଦ୍‌ ଦିଶୁମ୍‌ରାଃ ଟୁଣ୍ଡୁ ଜାକେଦ୍‌ ନେଲ୍‌ ରିକା କାତେୟାଃ।

25 ଡଣ୍ଡ ହନ୍‌ ଆୟାଃ ଆପୁ ନାଙ୍ଗ୍‌ ଦୁକୁ ଓଡ଼ୋଃ ଇନିଃକେ ଜାନାମ୍‌ ଏମାକାଇ ନାଙ୍ଗ୍‌ ଦୁକୁ ହୁଇନାଃ।

26 ଧାର୍‌ମାନ୍‌କେ ସାଜାଇ ଏମ୍‌ ଓଡ଼ୋଃ ନ୍ୟାୟ ନାଙ୍ଗ୍‌ ବିଚାର୍‌ନିଃକେ ଗଗଏଃ ବୁଗିନ୍‌ କା ତାନାଃ।

27 ଅକଏତାଃରେ ସେଣାଁ ତାଇନାଃ ଇନିଃ ହୁଡିଙ୍ଗ୍‌ କାଜି କାଜିୟା ଓଡ଼ୋଃ ସାରିଉରୁମ୍‌ ହଡ଼ତାଃରେ ଶାନ୍ତି ଆତ୍ମା ତାଇନାଃ।

28 ଡଣ୍ଡ ଚିମ୍‌ତାଙ୍ଗ୍‌ ହାପାଗି ତାଇନାଃ, ଇମ୍‌ତାଙ୍ଗ୍‌ ଇନିଃକେ ସେଣାଁନ୍‌ ମେନ୍ତେ କାଜିନାଃ ଓଡ଼ୋଃ ଅକଏ ଆୟାଃ ମଚାକେ କାଏ ଅଟାଃ ରିକାୟା, ଇନିଃ ସାରିଉରୁମ୍‌ ହଡ଼ ତାନିଃ ମେନ୍ତେ କାଜିନାଃ।