1 ଆମ୍‌ ଜେତା ହାକିମ୍‌ଲଃ ଜଜମ୍‌ ନାଙ୍ଗ୍‌ ଦୁବ୍‌ ତାନାମ୍‌ ରେଦ ଆମାଃ ଆୟାର୍‌ରେ ଅକଏ ମେନାଇୟା ଏନା ଜାତାନ୍‌ତେ ସାରିଉରୁମ୍‌କେଦ୍‌ଲଃ ବିଚାର୍‌ ରିକାଏମେ।

2 ଆମ୍‌ ପୁରାଃଗି ପେଟୁ ହବାଅଃରେଦ, ଆମ୍‌ ଆପ୍‌ନାଃ ହଟଃରେ କାତୁକେ ଆମ୍‌ଗିମ୍‌ ଦହତାନା।

3 ଇନିୟାଃ ହେଡ଼େମ୍‌ ଜମେୟାଃରେ ଆଲମ୍‌ ହାୟାଅଃଆ, ଚିଆଃଚି ଏନା ବେଦା ଜମେୟାଃ ତାନାଃ।

4 କିସାଁଣ୍‌ ବାଇୟଃ ନାଙ୍ଗ୍‌ ଆମାଃ ବାଲ୍‌ ବାଲ୍‌ ଦାଃଆ ଆଲମ୍‌ ଲିଙ୍ଗିୟା, ଆମାଃ ଆପ୍‌ନାଃ ନେ ଆଟ୍‌କାର୍‌ଉରୁମ୍‌ ଏତେ ବାଞ୍ଚାଅଏନ୍‌ମେ।

5 ଅକ୍‌ନାଃ ବାନଃଆ, ଏନାକେ ଚିନାଃ ଆମ୍‌ ଆମାଃ ମେଦ୍‌ତେ ନେନେଲ୍‌ ସାନାଙ୍ଗ୍‌ ତାନାମ୍‌ ? ଚିଆଃଚି ସିର୍ମାରେ ଆଫିର୍‌ତାନ୍‌ ବାଜ୍‌ ଅଡ଼େ ଲେକା ସାର୍‌ତିଗି ଖୁର୍‌ଜି ଆପ୍‌ନାଃ ନାଙ୍ଗ୍‌ ଆପାନ୍‌କେ ଏନ୍‌ ବାଜ୍‌ ଲେକା ଆପ୍‌ରବ୍‌ ଅଡଙ୍ଗ୍‌କେଦ୍‌ତେ ଅଟାଙ୍ଗ୍‌କଆଃ।

6 ଅକଏ ଏତ୍‌କାନ୍‌ ମେଦ୍‌ତେ ନେଲେ ତାନାଏ ଇନିୟାଃ ଲାଦ୍‌ ଆଲମ୍‌ ଜମାଃ ଓଡ଼ୋଃ ଇନିୟାଃ ହେଡ଼େମ୍‌ ଜମେୟାଃ ଆଲମ୍‌ ହାୟାଅଃଆ।

7 ଚିଆଃଚି ଜେ'ଲେକା ଇନିଃ ମନ୍‌ସୁରୁଦ୍‌ରେ ଉଡ଼ୁଃୟା, ଏନ୍‌ଲେକା ଇନିଃ ଜମେୟାଃ ଓଡ଼ୋଃ ନୁଇୟାଃ ଆମ୍‌କେ କାଜିମେୟାଁ ମେନ୍‌ଦ ଇନିୟାଃ ମନ୍‌ସୁରୁଦ୍‌ ଆମାଃଲଃ ବାନଃଆ।

8 ଆମ୍‌ କାଟିଃ ଲେକା ଅକ୍‌ନାଃ ଜମା କାଦାମେ ଏନା ଉସାଡ଼୍‌ ରିକାୟା ଓଡ଼ୋଃ ଆମାଃ ହେଡ଼େମାନ୍‌ କାଜି ଆଦେୟା।

9 ଡଣ୍ଡ ହଡ଼ରାଃ ଆୟାର୍‌ରେ ଆଲମ୍‌ କାଜିୟା, ଚିଆଃଚି ଇନିଃ ଆମାଃ ସେଣାଁରେୟାଃ କାଜିକେ ହିଲାଙ୍ଗ୍‌ୟେଁଆ।

10 ମାରି ସିମ୍‌ନାକେ ଆଲମ୍‌ ଗେନାଏୟା ଓଡ଼ୋଃ ଟୁଆର୍‌କଆଃ ଲୟଙ୍ଗ୍‌ରେ ଆଲମ୍‌ ବଲଆ।

11 ଚିଆଃଚି ଇନ୍‌କୁଆଃ ବାଞ୍ଚାଅନିଃ ପେଡ଼େୟାନ୍‌ ତାନିଃ, ଇନ୍‌କୁଆଃ ଏପେରାଙ୍ଗ୍‌ ନାଙ୍ଗ୍‌ ଇନିଃ ଆମାଃଲଃ ବିରୁଧ୍‌ ରିକାୟା।

12 ଆମାଃ ମନ୍‌ସୁରୁଦ୍‌ ଇନିତୁରେ ଓଡ଼ୋଃ ଲୁତୁର୍‌ରେ ସେଣାଁ କାଜି ଆୟୁମେମ୍‌।

13 ସିଟିଆକେ ସାସାତି ଏମ୍‌ ନାଗେନ୍ତେ ଆଲମ୍‌ ବାଗି, ଚିଆଃଚି ଆମ୍‌ ଇନିଃକେ ସଟାରେ ବିଡ଼ାଇରେ କାଏ ଗଜଃଆ। 14 ଆମ୍‌ ଇନିଃକେ ସଟାରେ ବିଡ଼ାଇରେ, ଇନିୟାଃ ଜୀଉକେ ପାତାଲ୍‌ ହେତେ ବାନ୍‌ଚାଅ ରିକାୟାମେ।

15 ହେ ଆଇଁୟାଃ ହନ୍‌ ଆମାଃ ମନ୍‌ସୁରୁଦ୍‌ ସେଣାଁନ୍‌ ହବାଅଃ ରେଦ ଆଇଁୟାଃ ମନ୍‌ସୁରୁଦ୍‌ ରାସ୍‌କା ହବାୱା। 16 ଚିମ୍‌ତାଙ୍ଗ୍‌ ଆମାଃ ମଚା ଠାଉକା କାଜି କାଜିୟା, ଇମ୍‌ତାଙ୍ଗ୍‌ ଆଇଁୟାଃ ମନ୍‌ସୁରୁଦ୍‌ ରାସ୍‌କା ହବାୱା।

17 ଆମାଃ ମନ୍‌ସୁରୁଦ୍‌ରେ ପାପିକ ନାଙ୍ଗ୍‌ ହିସିଙ୍ଗା ଆଲମ୍‌ ଦହେୟା, ମେନ୍‌ଦ ପ୍ରାଭୁକେ ବରତାନ୍‌ଲଃ ତାଇନ୍‌ମେ। 18 ଜାରୁଡ଼୍‌ଗି ହିଜୁଃ ଦିପିଲି ମେନାଃ ଓଡ଼ୋଃ ଆମାଃ ଆସ୍ରା କା ଟଟାଃ ଗଆଃ।

19 ହେ ଆଇଁୟାଃ ହନ୍‌, ଆୟୁମେମ୍‌, ସେଣାଁନ୍‌ ବାଇୟଃମେଁ ଓଡ଼ୋଃ ଆମାଃ ମନ୍‌ସୁରୁଦ୍‌କେ ବୁଗିନ୍‌ ହରାରେ ଆୟାର୍‌ ଇଦିମେ। 20 ଅକନ୍‌ ହଡ଼କ ପୁରାଃ ଇଲିଆର୍‌ଖି ନୁଏଁତାନ୍‌ ଚାଏ ପୁରାଃ ମାସ୍‌ ଜମ୍‌ତାନ୍‌କଲଃ ଆଲମ୍‌ ଗାତିନା। 21 ଚିଆଃଚି ପୁରାଃ ଇଲିଆର୍‌ଖି ନୁଏଁତାନ୍‌ନିଃ ଓଡ଼ୋଃ ପେଟୁ ହଡ଼ ଗାରିବ୍‌କଆଃଏ ଓଡ଼ୋଃ ଦୁଡ଼ୁମ୍‌ ହଡ଼କେ ଚେଚାଃ ଲିଜାଃ ତୁସିଙ୍ଗ୍‌ଇୟା।

22 ଆମାଃ ଆପୁରାଃ କାଜି ଆୟୁମେମ୍‌ ଇନିଃ ଆମ୍‌କେ ଜାନାମା କାଦ୍‌ମେୟାଁ ଓଡ଼ୋଃ ଚିମ୍‌ତାଙ୍ଗ୍‌ ଆମାଃ ଏଙ୍ଗା ବୁଡିକଆଃଏ, ଇମ୍‌ତାଙ୍ଗ୍‌ ଇନିଃକେ ଆଲମ୍‌ ହିଲାଙ୍ଗ୍‌ଇୟା।

23 ସାର୍‌ତିକେ କିରିଙ୍ଗ୍‌ୟେଁମେ ଏନାକେ ଆଲ୍‌ମେ ଆଖ୍‌ରିଙ୍ଗ୍‌ୟେଁଆ ଓଡ଼ୋଃ ସେଣାଁ, ଇନିତୁ ଓଡ଼ୋଃ ଆଟ୍‌କାର୍‌ଉରୁମ୍‌ ତେୟାଃ କିରିଙ୍ଗ୍‌ୟେଁମେ।

24 ଧାର୍‌ମାନ୍‌ ହଡ଼ରାଃ ଆପୁ ପୁରାଃଗି ରାସ୍‌କାନାଃ ଓଡ଼ୋଃ ସେଣାଁନ୍‌ ହନ୍‌କେ ଜାନାମ୍‌କାଇ ଏଙ୍ଗା ରାସ୍‌କାନାଏ।

25 ଆମାଃ ଆପୁ ଓଡ଼ୋଃ ଏଙ୍ଗା ରାସ୍‌କାନ୍‌କାକିନ୍‌ ଓଡ଼ୋଃ ଅକଏ ଆମ୍‌କେ ଜାନାମ୍‌କାଦ୍‌ମା ଇନିଃହଗି ରାସ୍‌କାନ୍‌କା।

26 ହେ ଆଇଁୟାଃ ହନ୍‌, ଆମାଃ ମନ୍‌ସୁରୁଦ୍‌ ଆଇଙ୍ଗ୍‌କେ ଏମାଇଙ୍ଗ୍‌ମେ ଓଡ଼ୋଃ ଆମାଃ ମେଦ୍‌ ଆଇଁୟାଃ ଚାଇଲ୍‌ ଚାଲାନ୍‌ରେ ରାସ୍‌କାନ୍‌କା। 27 ମିଆଦ୍‌ ବେଶ୍ୟା ନାଙ୍ଗ୍‌ ଇକିର୍‌ ଗାଡା ତାନାଃ ଓଡ଼ୋଃ ମିଆଦ୍‌ ଆପାଙ୍ଗିର୍ କୁଡ଼ି ନାଙ୍ଗ୍‌ ମିଆଦ୍‌ ରେସେଦ୍‌ କୁଆଁ ତାନାଃ। 28 ଇନିଃ ଡାକୁ ଲେକା ହରା ନେଲ୍‌କାତେୟାଃଏ ଓଡ଼ୋଃ ହଡ଼କଆଃ ଥାଲାରେ କା ପାତିୟାର୍‌କକେ ପସାକଆ।

29 ଅକଏ ଦୁକୁ ମେନାଃ ? ଦୁକୁ ଅକଏକେ ହବାକାନା ? ଅକଏତାଃରେ ଏପେରାଙ୍ଗ୍‌ ମେନାଃ ? ଅକଏ ବାକ୍‌ବାକାଅ ତାନିଃ ? ଅକଏକେ କା ସାରିତେ ଘାଅ ହୁଇନାଃ ? ଅକେୟାଃ ମେଦ୍‌ ଆରାଃ କଆଃ ? 30 ଅକନ୍‌କ ଦାଖ୍‌ରାସି ନୁଏଁ ନାଙ୍ଗ୍‌ ଥିମ୍ବା ସାମାଏ ତାଇନାଃକ, ଇନ୍‌କୁ ସବେନାଃ ମେସାକାନ୍‌ ଦାଖ୍‌ରାସି ଦାଣାଁ କାତେୟାଃକ। 31 ଦାଖ୍‌ରାସି ଆଲମ୍‌ ନେଲେଆ ଚିଆଃଚି ଏନା ଆରାଃ ନେଲଆଃ, ଚିମ୍‌ତାଙ୍ଗ୍‌ ଏନା ଗିଲାସ୍‌ରେ ବୁଗିନ୍‌ ରାଙ୍ଗ୍‌ ନେଲଆଃ ଇମ୍‌ତାଙ୍ଗ୍‌ ବୁଗିଲେକା ଏନା ଲାତାର୍‌ତେ ଆଡ଼୍‌ଗୁକଆଃ। 32 ଟୁଣ୍ଡୁରେ ନେଆଁ ମିଆଦ୍‌ ବିଙ୍ଗ୍‌ ଲେକା ହାବାଃଏ ଓଡ଼ୋଃ ମିଆଦ୍‌ ପାଣ୍ଡୁ ବିଙ୍ଗ୍‌ ଲେକା ଜିଅନ୍‌ ରିକାଃଏ। 33 ଆମାଃ ମେଦ୍‌ କା ହବାଅଃତେୟାଃ ନେଲେଆ ଓଡ଼ୋଃ ମନ୍‌ ନେତେହାନ୍ତେ କାଜିକ କାଜିୟା। 34 ଓଡ଼ୋଃ ଆମ୍‌ ଦରେୟା ଥାଲାରେ ବାଟିୟାକାନ୍‌ ହଡ଼ ଲେକା ହବାଅଃଆମ୍‌ ଓଡ଼ୋଃ ଜାହାଜ୍‌ରାଃ ମୁଚ୍‌ଲା ପାଟା ଚେତାନ୍‌ରେ ବାଟିୟାକାନ୍‌ ହଡ଼ ଲେକା ହବାଅଃଆମ୍‌। 35 ଆମ୍‌ କାଜିୟା, ଇନ୍‌କୁ ଆଇଙ୍ଗ୍‌କେ ଥାପ୍‌ଡ଼ିକିୟାଁକ ମେନ୍‌ଦ କା ହାସୁକିୟାଁ ଓଡ଼ୋଃ ଦାଲ୍‌କିୟାଁକ ମେନ୍‌ଦ ଆଇଙ୍ଗ୍‌ କାଇଙ୍ଗ୍‌ ଆଟ୍‌କାର୍‌କେଦା, ଓଡ଼ୋଃ ଚିମ୍‌ତା ସୁତିନାଇଙ୍ଗ୍‌ ? ଆଇଙ୍ଗ୍‌ ଆଡଃଗି ଏନା ଦାଣାଁଏୟାଇଙ୍ଗ୍‌।