1 ନେଆଁ ସୁଲିମାନ୍‌ରାଃ କାଜିକ ତାନାଃ, ଯିହୁଦାରେନ୍‌ ରାଜା ହିଜକିୟରାଃ ହଡ଼କ ନେଆଁକେ ନାକାଲ୍‌କେଦ୍‌ତେ ଅଲାକାଦାକ।

2 କାଜିକେ ଉକୁ ପାର୍‌ମେଶ୍ୱାର୍‌ଆଃ ମାନାରାଙ୍ଗ୍‌ ତାନାଃ, ମେନ୍‌ଦ କାଜିକେ ଦାଣାଁ ଅଡଙ୍ଗ୍‌ ରାଜାରାଃ ମାନାରାଙ୍ଗ୍‌ ତାନାଃ। 3 ସିର୍ମାରେୟାଃ ସାଲାଙ୍ଗି, ଅତେରେୟାଃ ଇକିର୍‌ ଓଡ଼ୋଃ ରାଜାକଆଃ ମନ୍‌ସୁରୁଦ୍‌, ନେଆଁ କା ସାରିଉରୁମ୍‌ ଦାଡ଼ିଅଃଆ।

4 ରୁପା ହେତେ ମାଇଲା ଆତମ୍‌ତାରେ, ସୋନାରି ନାଗେନ୍ତେ ମିଆଦ୍‌ ବେଭାର୍‌ ଜିନିଷ୍‌ ଅଡଙ୍ଗ୍‌ଅଃଆ। 5 ଏତ୍‌କାନ୍‌ ହଡ଼କକେ ରାଜାରାଃ ଆୟାର୍‌ ହେତେ ସାଙ୍ଗିନ୍‌ତେ ଅଡଙ୍ଗ୍‌ତାକପେ ଓଡ଼ୋଃ ରାଜାରାଃ ରାଜ୍‌ଗାଦି ଧାର୍‌ମାନ୍‌ତେ ତିଙ୍ଗୁ କେଟେଜଃଆ।

6 ରାଜାରାଃ ଆୟାର୍‌ରେ ଆପ୍‌ନାଃ ମାନାରାଙ୍ଗ୍‌ ଆଲମ୍‌ ରିକାଏ ଓଡ଼ୋଃ ମାପ୍‌ରାଙ୍ଗ୍‌କଆଃ ଆୟାର୍‌ରେ ଆଲମ୍‌ ତିଙ୍ଗୁନା। 7 ଚିଆଃଚି ନେଆଁ ବୁଗିନ୍‌ ତାନାଃ, ଚି ଇନିଃ ଆମ୍‌କେ କାଜିଲେରେ, ନେତାଃ ଚେତାନ୍‌ ହିଜୁଃମେ, ଆମ୍‌କେ ରାଜ୍‌କୁମାର୍‌ରାଃ ଆୟାର୍‌ରେ ଲାତାର୍‌ରେ ଦହମାଃ ଅକଏକେ ଆମ୍‌ ମେଦ୍‌ତେ ନେଲା କାଇୟାଃମେ।

8 ଜେତାନ୍‌ ଏପେରାଙ୍ଗ୍‌ ବିଷାଏକେ ଜାଲ୍‌ଦି କେଦ୍‌ତେ କାଚାଇରିତେ ଆଲମ୍‌ ଇଦିୟା। ତାୟମ୍‌ତେ କା'ରେଦ ଆମାଃ ହୋପର୍‌ଜାପାଃନିଃ ଆମ୍‌କେ ଗିହୁଃ ରିକା ତାୟମ୍‌ତେ, ଆମ୍‌ ଚିନାଃ ଚିକାୟାମ୍‌ ?

9 ଆମାଃ ହୋପର୍‌ଜାପାଃନିଃଲଃ ଆମାଃ ଏପେରାଙ୍ଗ୍‌ ବିଷାଏରେ କାଜିମେ ଓଡ଼ୋଃ ମିହୁଡ଼୍‌ ଏଟାଃ ନିୟାଃ ଉକୁ କାଜି ଆଲମ୍‌ ଉଦୁବ୍‌ ରିକାଏ। 10 ନେ'ଲେକା ଆଲକା ହବାଅକା ଯେ ଆୟୁମ୍‌ ତାନ୍‌ନିଃ ଆମ୍‌କେ ଗିହୁଃ ରିକାମେୟାଁ ଓଡ଼ୋଃ ଆମାଃ ନୁତୁମ୍‌ ବାଦ୍‌ନାମ୍‌ତେୟାଃ କା ନିରାଃ।

11 ଠାଉକା ସାମାଏରେ କାଜିଆକାନ୍‌ କାଜି ରୁପା ଥାଡ଼ିରେ ସୋନାରାଃ ସେଓ ଜ' ଲେକା ତାନାଃ।

12 ସୋନାରାଃ ମିଆଦ୍‌ ଲୁତୁର୍‌ରାଃ ତୁସିଙ୍ଗ୍‌ ତେୟାଃ ଓଡ଼ୋଃ ସୋନାରାଃ ବୁଗିନ୍‌ ସିଙ୍ଗାର୍‌ ଜେ'ଲେକା ବୁଗିଲେକା ଆୟୁମ୍‌ ନାଙ୍ଗ୍‌ ସେଣାଁନ୍‌ ଏଗେର୍‌ ଏନ୍‌ଲେକା ତାନାଃ।

13 ଇରଃ ସାମାଏରେ ଆରିଲ୍‌ରେୟାଃ ରେହାଡ଼୍‌ ଜେ'ଲେକା, କାଜି କୁଲ୍‌ତାନ୍‌କ ନାଙ୍ଗ୍‌ ପାତିୟାର୍‌ରଃ କାଜି ଇଦିସେଟେର୍‌ନିଃ ଏନ୍‌ଲେକା ତାନିଃ, ଚିଆଃଚି ଇନିଃ ଆୟାଃ ଗମ୍‌କେକଆଃ ଆତ୍ମାକେ ଜୀଉରାଡ଼େଃ ଏମାଃଏ।

14 ବେଗାର୍‌ ଦାଆଃ ଗାମା ତାନ୍‌ ରିମିଲ୍‌ ଓଡ଼ୋଃ ହୟ ଜେ'ଲେକା, ଆପ୍‌ନାଃ ଦାନ୍‌ ଏମଃ ବିଷାଏରେ ବେଦାତାନ୍‌ଲଃ ଆପାନ୍‌କେ ମାରାଙ୍ଗ୍‌ କାଜିନ୍‌ନିଃ ଏନ୍‌ଲେକା ତାନିଃ।

15 ଧିରାଜ୍‌ ହରାତେ ମିଆଦ୍‌ ରାଜାକେ ମାନାଅ ଦାଡ଼ିଅଃଆ ଓଡ଼ୋଃ ମିଆଦ୍‌ ଲେବେଃ ଆଲାଙ୍ଗ୍‌ ଜାଙ୍ଗ୍‌କେହଗି ଟହେଜ୍‌ ଦାଡ଼ିୟା।

16 ଚିଆଃ ଆମ୍‌ ହୁରୁମ୍‌ସୁକୁ ନାମାକାଦାମ୍‌ ? ଆମାଃ ନାଗେନ୍ତେ ଚିମିନ୍‌ ଲାଗାତିଙ୍ଗ୍‌ ତାନାଃ ଇମିନ୍‌ଗି ଜମେମେ, ଆମ୍‌ ପୁରାଃଗିମ୍‌ ଜମେ ରେଦ ଆମ୍‌ ଏନାକେ ଉଲାୟାମ୍‌। 17 ଆମ୍‌ ଆମାଃ ହୋପର୍‌ଜାପାଃନିଆଃ ଅଡ଼ାଃତେ ସବେର୍‌ ଇମ୍‌ତା ଆଲମ୍‌ ସେନାଃ, କା'ରେଦ ଇନିଃ ଆମ୍‌କେ ନେଲ୍‌ କେଦ୍‌ତେ ହିଲାଙ୍ଗ୍‌ମେୟାଁ।

18 ଅକଏ ହୋପର୍‌ଜାପାଃନିଆଃ ବିରୁଧ୍‌ରେ ବେଦା ଗାୱା ଏମାଃଏ, ଇନିଃ ମିଆଦ୍‌ ଲାଡ଼ାଇ ଖୁଟ୍‌ଲି, ତାରାଉଡ଼ି, ଓଡ଼ୋଃ ଲେସେର୍‌ ଚିଆରି ଲେକା ତାନିଃ।

19 ସାଙ୍କାଟ୍‌ ସାମାଏରେ କା ବିଶ୍ୱାସିରେ ବିଶ୍ୱାସ୍‌ ଦହ ଟହେଜ୍‌କାନ୍‌ ଡାଟା ଓଡ଼ୋଃ ଦଡ଼ାଙ୍ଗ୍‌କାନ୍‌ କାଟା ଲେକା ତାନାଃ।

20 ଜେ'ଲେକା ରାବାଙ୍ଗ୍‌ସାଃରେ ଲିଜାଃକେ ହଡ଼୍‌ମ ହେତେ ଆଡ଼୍‌ଗୁ ଓଡ଼ୋଃ ଘାଅ ଚେତାନ୍‌ରେ ମେହେର୍‌ ରାସି ଦୁଲ୍‌ ତାନାଏ, ଇନିଃ ଏନ୍‌ ଲେକାଗି ଦୁକୁରେ ତାଇନ୍‌ ମନ୍‌ ହେପାଦ୍‌ରେ ଦୁରାଙ୍ଗ୍‌ ହଡ଼ ଲେକା ତାନିଃ।

21 ଆମାଃ ବାଇରି ରେଙ୍ଗେଃ ତାନାଏ, ତାବ୍‌ଦ ଆମ୍‌ ଇନିଃକେ ଜମେୟାଃ ନାଙ୍ଗ୍‌ ଲାଦ୍‌ ଏମାଇମେ ଓଡ଼ୋଃ ଇନିଃ ତେତାଙ୍ଗ୍‌ ତାନ୍‌ରେଦ ନୁଏଁ ନାଙ୍ଗ୍‌ ଦାଆଃ ଏମାଇମେ। 22 ଆମ୍‌ ଇନିୟାଃ ବହଃରେ ଜୁଲଃତାନ୍ ଆଙ୍ଗରା ଦହେୟାମ୍‌ ଓଡ଼ୋଃ ପ୍ରାଭୁ ଆମ୍‌କେ ନାଲା ଏମାମେୟା।

23 ଉତାର୍‌ ସାଃରେୟାଃ ହୟ ଗାମାଦାଆଃ ଆଉୟା ଓଡ଼ୋଃ ଚୁଗ୍‌ଲି କାଜିତାନ୍‌ ଆଲାଙ୍ଗ୍‌ ରିସ୍‌ମି ଆଉୟା।

24 ଏପେରାଙ୍ଗ୍‌ କୁଡ଼ିଲଃ ମିସାତେ ତାଇନଃ ହେତେ, ଅଡ଼ାଃ ଚେତାନ୍‌ କଚାରେ ତାଇନଃ ବୁଗିନ୍‌ ତାନାଃ।

25 ସାଙ୍ଗିନ୍‌ ଦିଶୁମ୍‌ ହେତେ ହିଜାକାନ୍‌ ବୁଗିନ୍‌ କାଜି ତେତାଙ୍ଗ୍‌ ଆତ୍ମା ନାଙ୍ଗ୍‌ ରେହାଡ଼୍‌ ଦାଆଃ ଲେକା ତାନାଃ।

26 ବଡା ଦାଆଃତେ ପେରେଜାକାନ୍‌ ଗାଡା ଓଡ଼ୋଃ ସତ୍‌ରାକାନ୍‌ ସେତେଙ୍ଗ୍‌ ଜେ'ଲେକା ତାନାଃ, ଏନ୍‌ଲେକା ମିଆଦ୍‌ ଧାର୍‌ମାନ୍‌ ହଡ଼ ଏତ୍‌କାନ୍‌ ହଡ଼କଆଃ ଆୟାର୍‌ରେ ଉୟୁଗଃତେୟାଃ ତାନାଃ।

27 ପୁରାଃ ହୁରୁମ୍‌ସୁକୁ ଜମେୟାଃ ବୁଗିନ୍‌ କା ତାନାଃ ଏନ୍‌ଲେକାଗି ହଡ଼ ଆପ୍‌ନାଃଗି ମାନାରାଙ୍ଗ୍‌ ଦାଣାଁ ବୁଗିନ୍‌ କା ତାନାଃ।

28 ଅକଏ ଆପାନ୍‌କେ ଆକ୍‌ତେୟାର୍‌ରେ କାଏ ଦହ ଦାଡ଼ିୟା, ଇନିଃ ନାଗାର୍‌ରାଃ ହାଦୁଡ଼ାକାନ୍‌ ପାଚ୍‌ରି ଲେକାନ୍‌ନିଃ ତାନିଃ।