1 Lidan dan ligía, aba lagumeserun urúei Erodesi éibaahaña hádangiñe afiñetiña. 2 Aba láfaragüdüni Santiagu le lamulen Huan tau eféin; 3 keiti larihin luagu gunda hamá huríu lau katei le, aba giñe lanügüni Féduru adaüra. Lidan burí weyu le fedu le ídanbei teigua fein maganatu lébini lasusereda katei le. 4 Lárigiñe lanügüni Erodesi Féduru adaüra, aba ládaruni furisunrugun hau disisi súdaragu lun hóunigiruni, aban ladügün gádürü sétanu hau; gádürü lidan kada sétanu; laritagun yebe lun lasagaruni hagibugiñe lílana fulasu lárigiñe fedu lun laguserun. 5 Ñeinñein lubeiti Féduru furisunrugu góunigiwañu buidu, gama lumoun meredeti hafurieidun tílana ligilisi lun Bungiu luagu.

6 Áriebu lubaragiñe weyu le yebe lunbei lasagaruni Erodesi Féduru hagibugiñoun gürigia, larumuguña Féduru hamidangua bián súdara, güragu ligía lau bián güringüri, hámaya bián súdara luagu bena óunigira. 7 Sódini, ligía lasaliragun aban lani Wabureme ánheli, aba larugoungadún furisunrugu. Aba laguuruni ánheli ligía lóubawagu, aba lagagudahani, aba lariñagun lun:

—Saraba furese.

Ábati lábürühan güringüri luéigiñe lúhabu Féduru; 8 aba lariñagun ánheli ligía lun:

—Murubei bubelitin, daübounme bigeidin.

Lárigiñe ladügüni Féduru sun lira, aba lariñagun ánheli ligía lun:

—Daüboun bidáü, falabana.

9 Aba láfuridun Féduru lárigi ánheli ligía, ibidiñoun lun anhein inarüni lubéi lumoun mama lan inarüni katei le ladügübei ánheli ligía. Genegetimati lun kamá gewenedüñein. 10 Aba hásügürün hau furumiñetiña óunigirutiña, sügǘ hamaña habiaman; danti le hachülürünbei luagun bena le gürabu le ǘmadarugunbei, aba ladaarun lungua. Aba háfuridun; lárigiñe hánhiñuragun aban üma, aba lígiruni ánheli ligía Féduru lábugua. 11 Ligíaali lárügüdagun Féduru lungua, aba lariñagun:

—Aná guentó, subudi naali luagu óunaha laali lan Bungiu lani ánheli lun lesefurunina luéi Erodesi luma luéi sun le yebe habusenrubei huríu hadügün nau.

12 Asaminaréina ligía Féduru luagu katei le, aba lidin túbiñoun María to lúguchu Huan le giñe unbei hariñaga Márükosu, le ñein habéi saragu gürigia damurigu afurieida lun Bungiu luagu. 13 Dan ladaünhan luagu lubenari bürürü, aba táfuridun aban nibureintu, gíritu Rode, ariha ka lan agúahabei. 14 Dan tasubudiruni luagu Féduru lan luagu lumalali, bulíei tumuti tadaaruni bena, le lueirin tugundan; ábarüga téibaagun múnadoun awisaha luagu anihán lan Féduru bénabu. 15 Ábati hariñagun tun:

—Lǘlühali bau!

Aba tariñagun houn luagu chouru tani luagu ligía lan. Aba hariñagun:

—Mama ligia; háfuga láfurugu.

16 Anihánmemeti Féduru adaünha luagu bena. Dan hadaarunbalin, aba taweiridun hanigi dan le harihini. 17 Aba líchugun seini houn lau lúhabu lun hámanichun, aba labahüdaguni houn ida liña lan lasagaruni Bungiu furisunrugúgiñe; lárigiñe, aba lariñagun houn:

—Abahüdagua huméi katei le lun Santiagu luma houn híbiri afiñetiña.

Ábati láfuridun, aba lidin lidoun amu fulasu.

18 Dan larugadunbei, aniha sun luwuyeri saminaü hadan súdara, ladüga ibidiñeti houn ka lan suserebei lun Féduru. 19 Aba lóunahan Erodesi áluahei; kei madari hamani, aba lálügüdaguniña súdara ha buga óunigirubalin; lárigiñe, aba láfaraguagüdüniña hilagubei. Lárigiñe, aba láfuridun Erodesi Hudeagiñe, aba lidin aganawa Sesaréa.

20 Wéiriti ligañi Erodesi hama gürigia ha aganóubaña Tiru luma Sidón; ha ebelurubaña lidoun aban aritaguni lun hóunahan wügüriña lun hadimurehan luma luagu hafulesein. Dan le hachülürünbei, aba hagañeiruni lubuidun ligaburi Bülasutu, aban wügüri íñuguti lidan lagumadihan Erodesi, ábati líderaguniña adilihei sun katei; ladüga lageiragiñe lan Erodesi habiha éigini. 21 Aba lagúaragüdün Erodesi hawagu luagu aban weyu; weyu ligía, aba ladaürünu daüguaü to lánina larúeihan, aba lañuurun luagu lala le ñéingiñe lubéi lagumadiha, aba ladimurehan houn. 22 Ábati hagumeserun gürigia agúaraha:

—Mama wügüri adimurehabei, aban bungiu adimurehabei!

23 Lidan oura ligía, aba lasandiragüdüni lani Bungiu ánheli Erodesi, ladüga lanaagun lungua luagu hererun gürigia, michu lumuti linebese Bungiu lun; aba héigini héweraü, aba lounwen.

24 Aganbahoueina ligíati luagu Lererun Bungiu, ani apurichihóua ligía lidan sun fulasu.

25 Dan hagumuchuni Berünawé luma Saulu hawadigimari Herusalén, aba hagiribudun barüina haméi Huan le giñe unbei hariñaga Márükosu hámagua.