1 Ñeinñein giñe aban wügüri gíriti Ananíasi, tuma Safira, to lúmari; aba halugurun aban fulasu. 2 Wügüri ligía, aba lanügün lídangiñe seinsu, aba lidin lau líbiri houn apostolugu, lafamura kamá hamuga ligíarügüñein libihin luagu fulasu. Ani subusetiti sun katei tun lúmari. 3 Ábati lariñagun Féduru lun:

—Ananíasi, ka uagu bígira lun lagañeirunu Mafia banigi lun ladügün lun beyeeduni Sífiri Sandu, lau berederun lau líbiri seinsu le afayeirúbei bun luagu fulasu? 4 Ma funagia bufulasun meha fulasu? Lárigiñe baluguruni, ma biseinsun seinsu lun badügüni le babusenrubei lau? Ka uagu basaminara badügüni katei le? Bungiu bálugubei bayeeragun, mama wügüriña.

5 Dan laganbuni Ananíasi katei le, aba lábürühan hilagubei. Sunti ha asubudirubalin katei le, aba hanufudedagun. 6 Ábati hayabin nibureingiña, aba hóuburaguni Ananíasi, aba hanügüni ábuna.

7 Kei burí ǘrüwa oura lárigiñe, aba tebelurun lúmari Ananíasi, ibidiñoun ni kata tun luagu le asuseredubei. 8 Aba lariñagun Féduru tun:

—Ariñagabéi nun, anhein luagu lubéi ebegi le hariñagubei halugurei fulasu?

Aba tariñagun:

—Anha, luagu ebegi ligía.

9 Ábati lariñagun Féduru:

—Ka san uagu hebelura lidoun úarani lun hóuchaguni lani Bungiu Sífiri ítara? Añatén ha anügübalin búmari ábuna, hanügaadibu giñe.

10 Lídanmeme oura ligía, aba tábürühan hilagubei lubadu lugudi Féduru. Dan hebelurunbei nibureingiña hagía, hadariroun hilaaru; aba hasagarunu, aba hábununu lóubagiñe túmari. 11 Sunti gürigia ha afiñebaña luagu Kristu hama sun ha asubudirubalin katei le, aba hanufudedagun saragu.

12 Adaaguatiña burí apostolugu saragu seini luma milaguru hadan gürigia; ábati burí hóundaragun sun afiñetiña lidan fulasu le gíribei «Lubarandan Salomón» ténpulurugu. 13 Úati meha ni aban hádangiñe ha mámabaña afiñetiña óundaragutiña hama afiñetiña ladüga hanufude, lau sun hínsiñe hamá sun afiñetiña houn gürigia, saragu. 14 Eibu weyu, eibu hayabin gürigia lun hafiñerun luagu Hesukrístu, dandu wügüriña keisi würiña. 15 Ábaha hasagaraguniña gürigia sánditiña ǘmadarugun tidan habarari lubá lásügürün Féduru, gayara láamuga hareidagun láurügü tadagarun liyawadi hawagu. 16 Ñǘbuintiña giñe saragu gürigia lídangiñe burí fulasu yarafati lun Herusaléun hau sánditiña hama ha gawagutiña sífirigu wuribatiña; sun hagía areidaguátiña.

17 Ábati labuinchun fádiri le íñutimabei, hama hánigu saduséugu ha lúmabaña lau gimugaü; 18 aba hárügüdüniña apostolugu lun hadaürüniña. 19 Gama lumoun aba ladaaruni aban lani Wabureme ánheli tubenari furisun áriebu ligía, aba láfuridagüdüniña, aba lariñagun houn:

20 —Heiba, hararamame ténpulurugu, ábame habahüdagun houn gürigia luagu ñunsu lánina ibagari le líchugubei Hesukrístu.

21 Dan haganbunbalin katei le, aba houdin ténpulurugu larugan binaafingiua, aba hagumeserun arufudaha.

Ábati lóundaruniña fádiri le íñutimabei hama ha lúmabaña, sun liñun-agei lúrudu, hama ábutigu Ísüraelina, aba hóunahan anügaña apostolugu furisunrugúgiñe. 22 Dan hachülürünbei súdaragu furisunrugu, madari hamutiña ñein. Aba hagiribudun, 23 aba hariñagun:

—Daruñu liña wadarirunu furisun, ñéinñanu súdara bénabu óunigira; gama lumoun dan le webelurunbei, madaritiwa ni aban hádangiñe apostolugu ñein múnada.

24 Dan le haganbunbalin hábutigu fádirigu luma hábuti súdara ha óunigirubarun ténpulu katei le, aba hálügüdagun houngua kaba lan funa idan lébeda katei le. 25 Lidan oura ligía, ligía liabin aban wügüri, aba lariñagun houn:

—Añahein wügüriña ha hádarubaña furisunrugun, arufudaha houn gürigia ténpulurugu.

26 Ábati lidin hábuti óunigirutiña hau súdara, aba hanügüniña lau buidu, ladüga hanufude luéi hachamuragun gürigia dübü hawagu. 27 Dan hachülürünbei hau, aba híchuguniña ligibugiñe liñun-agei lúrudu, aba lariñagun fádiri le íñutimabei houn:

28 —Wéridi wamaadün lun marufudahandügüya humá lidan liri Hesusu, ani ka hadüga? Buíngüda humá sun Herusalén lau le harufudahabei, ani busentün híchuguni duru wawagun luagu lounwen wügüri ligía.

29 Ábati lóunabun Féduru hama ha híbiri apostolugu:

—Lunti waganbuni Bungiu lun wadügüni le lariñagubei lubaragiñe le hariñagubei wügüriña. 30 Le Habungiute wagüchagu, ligía ásaaragüdübalin Hesusu, lememe háfarubei lau hádaraguni luagu aban gurúa. 31 Ru laali Bungiu uéiriguni lun, ñurugüdaléi luéigiñe lóunwenren, adüga laali Ábutime luma Asalbaragüleime, gayara láamuga hasakürihan Ísüraelina, lun giñe ferudunawa lan hafigoun. 32 Gefentiwa luagu lira, gefenti giñe Sífiri Sandu le líchugubei Bungiu houn ha ñǘdünbaña lau le lariñagubei.

33 Dan haganbunbalin liñun-agei lúrudu katei le, aba hagañidun, aba yebe habusenrun háfaraguniña hilagubei. 34 Ñeinñein aban fariséu hadan lúrudugu, gíriti Gamalieli, máisturu lidan lilurudun Moisesi, inebeti houn gürigia saragu. Aba lararamun, aba lariñagun lun hanügǘniwa apostolugu lídangiñe adamurini luagu murusun oura, gayara láamuga ladimurehan hámarügü lúrudugu. 35 Aba lariñagun houn gumadimatiña:

—Wügüriña Ísüraelina, góunigi humatia lau le lunbei hadügüni hau wügüriña ha. 36 Haritagua humatia luagu iñuragua lan meha Teudasi lungua ariñaga luagu aban lan wügüri wéiriguti ligía, aba hafalaruni gádürü-san wügüriña; ani afarúati hilagubei, sunti ha afalarubalin, aba hawaraüdagun, aba lagumuchun sun katei. 37 Lárigiñe, lidan lidaani habahüdǘniwa gürigia, ligía liñuragun Húdasi le Galiléana lungua, saragu haña afalaruti lidan labusenrun yebe lagarabaagun luagun gumadi. Afarúati giñe, aba giñe hawaraüdagun sun ha afalarubalin. 38 Ígira humaña lubeiti wügüriña ha; mádaragua humá hungua hamoun. Ladüga anhein hani lubéi wügüriña katei le harufudahabei luma le hadügübei, lagumuchaguba; 39 Gama lumoun anhein lani lubéi Bungiu, hásiñarubei agünrinchagua. Góunigi humá, luéi hageindaguña lan luma Bungiu.

40 Aba hánharun súngubei lau le lariñagubei. Ábati hebelaagüdüniña apostolugu, aba habeichuniña, aba hariñagun houn lun hebé lan hadimurehan lidan liri Hesusu. Lárigiñe, aba hígiragüdüniña; 41 Aba háfuridun apostolugu hámagiñe lúrudugu, gúndaañu lau larihiniña Bungiu keisi gürigia gadünamatiña lun hasufurirun busiganu luagu liri Hesusu. 42 Meredetiti harufudahan ténpulurugu luma tidan burí muna sagü weyu, ariñaga hagía luagu Hesusu lan Krístubei le agurabahóubei.