1 Aba lebelurun Pábulu luma Berünawé tidoun haligilisin huríu uburugu Ikoniu, aba hapurichihan; buiti hadimurehan darí lun hafiñerun saragu, dandu huríu kei mama huríu, luagu Hesukrístu. 2 Huríuti ha mafiñenbaña luagu Hesukrístu, aba hínchahaniña ha mámabaña huríu, aminsiñedagüdaña afiñetiña houn. 3 Ligía lerederunbei Pábulu luma Berünawé saragu dan ñein, aba hadimurehan furangu, manufudeuga, hemenigiñu luagu Bungiu; arufuda lumuti Wabureme luagu inarüni lan katei le hapurichihabei luagu línsiñehabu, lau líchugun ubafu houn lun hadaagun seini luma milaguru. 4 Fánreinguañu haña lílana uburugu ligia; híbiri hámagiñeñanu huríu ha mafiñenbaña, híbiri hámagiñe apostolugu. 5 Hati huríu hama ha mámabaña huríu, aba hebelurun lidoun aban aritaguni hama gumadimatiña lun héibaahaniña apostolugu luma lun hachamuragun dübü hawagun. 6 Anhein Pábulu luma Berünawé, dan hasubudiruni, aba houdin lidoun burí fulasu le gíribei Lístüra luma Dérübe, bián fulasu le laniméme Likaónia, luma geyegua lau, 7 apurichiha hamuti giñe uganu luáguti Wasalbaragüle Hesukrístu ñein.

8 Ñeinñein aban wügüri méibugunti, Lístüra; ñun liña ladüga ítaragubeiñein lan lúmagiñe lágurahoun. 9 Laganbahañein wügüri ligía le lariñagubei Pábulu; láurügü larihin Pábulu luagun, aba lasubudiruni luagu afiñe lan wügüri ligía luagu gayara lan lareidagun. 10 Ábati lariñagun Pábulu lun lau umalali héreti:

—Saraba, ráramaba buidu.

Aba lachubarun wügüri ligía ararama, aba lagumeserun éibuga. 11 Dan harihini gürigia katei le ladügübei Pábulu, aba hagumeserun agúaraha lidan hererun Likaóniana, hariñaga:

—Rarihaña búngiugu kei hagaburi wügüriña wamoun!

12 Hariñaga luagu Berünawé bungiu Húpiterü, luagu Pábulu bungiu Merükúriu, ladüga ligía lan adimurehabei. 13 Aba liabin lufadirin Húpiterü ñéingiñe barüina bágasu wügüriña luma burí fuluri luagun lubenari uburugu; busenti yebeti ligía hama burí gürigia lun hadagaragüdün lun Pábulu luma Berünawé. 14 Dan hasubudiruni Pábulu luma Berünawé katei lan habusenrubei gürigia ha hadügün, aba haheiridagunu hadaüragun le lueirin luberesen katei le houn; aba hádaragun houngua hadoun gürigia agúaraheina:

15 —Wügüriña! Kame san habusenra hadügüni katei le? Wügüriña giñe wagía kei huguya; wayabiña ariñaga hun lun hígiruni katei burí le mabuidunbei, lun hafalaruni Bungiu le wínwanbei, le adügübalin sielu luma ubóu, barana luma sun katei le lídanbei. 16 Lidan meha dan le sügühalibei, ígira lumutiña meha Bungiu gürigia lun hadügüni le habusenrubei, 17 súnwandanha larufuduni houn gürigia káteiñein lan lau buiti le ladügübei houn. Ruti huya woun luma alubahani buiti, ru ligía éigini buídurügüti woun, belugüda lumuti ugundani tidoun wanigi.

18 Lau sun ariñaga hamani Pábulu luma Berünawé sun katei le houn, hénrengumemegili herederuniña gürigia luéi hadagaragüdün houn.

19 Ábati hachülürün huríu Antiokíagiñe luma Ikoniugiñe, aba hagañeiruni haritagun gürigia lun hachamuragun dübü luagun Pábulu. Lárigiñe, aba haduruguduni bóugudin luéi fulasu, sun hariñagun luagu hilaali lan. 20 Dan le hóundaragunbei afiñetiña geyegua lau Pábulu, aba lásaarun, ábaya lebelurun fulasurugún. Larugan, ligía lidin luma Berünawé uburugun Dérübe.

21 Lárigiñe lapurichihani uganu luáguti asalbaruni ñein Dérübe, le ñein habéi saragu gürigia afiñerutiña luagu Hesukrístu, aba hagiribudun; aba houdin Lístüra, Ikoniu luma Antiokía. 22 Rútiña gurasu houn afiñetiña ha lídanbaña burí fulasu ligía, ariñaga hagía houn lun hasigirun deregüdagu lidan hafiñen, ariñageina hagía houn luagu lunti lan wasufurirun saragu lun gayara lan webelurun lidoun larúeihan Bungiu. 23 Rútiña giñe ábutigu lidan kada hadamurin afiñetiña. Lásurunti hafurieidun luma hayunarun, aba hederegeruniña labun laríaahan Bungiu le uágubei hafiñera.

24 Lárigiñe, aba hásügürün Pisidiagiñe, aba hachülürün Panfilia. 25 Aba hapurichihani uganu luáguti Hesukrístu uburugu Pérühe, le líbirimeme Panfilia; ábati houdin Atalíoun. 26 Ñéingiñe hádina, aba houdin Antiokíoun, uburugu le ñeinhin lubéi hayumuragua hawagu lun Bungiu, lubá buga háfuridun adügei wadagimanu le hagumuchubei guentó. 27 Dan hachülürün Antiokía, aba hóundaraguniña tánigu haligilisin afiñetiña, aba habahüdaguni sun katei le ladügübei Bungiu hau houn, luma luagu ladaaruni Bungiu bena houn ha mámabaña huríu lun giñe gayaraabei lan hafiñerun luagu Hesukrístu lun hasalbarun. 28 Aba lerederun Pábulu luma Berünawé saragu dan hama afiñetiña ñein.