1 Ábati lariñagun Agürípa lun Pábulu:

—Gayaraati badimurehan buéigiñegua.

Aba liñuruni Pábulu lúhabu lun haganbuni, aba lagumeserun adimureha, lariñaga:

2 «Óunwenbu nugundan gayara lan nadimurehan nuéigiñegua bigibugiñe, urúei Agürípa, luagu sun katei le ariñaga hamaalibei huríu nuagu; 3 gúndaatimatina ladüga subudi bani hagaburi huríu luma katei le burí uágubei hasigeneha. Ligía namuriahanbei buma lun gaguraasun ban lun baganbunina.

4 «Subudi hamuti sun huríu ligaburi meha nabagaridun hadan, nageira luma uburugu Herusalén, lúmagiñe irahügídina. 5 Lüha hasubudirunina, ani gayaraati hamuga hariñaguni ánhaña hamuga busén luagu fariséu nan lúmagiñe niñüraü, adamurini létima deregüdabei lidan luwuyeri wafiñen, wagía huríu. 6 Guentoti, haguseragüdüñadina luagu emenigini le nuágubei, luagu lásaaragüdübaña lan Bungiu hilaaña lídangiñe óunweni lunya habagaridun, kei meha lariñaguni houn wagüchagu. 7 Dúusugubei iduheñu le hadügawagunbei lirahüñü Ísüraeli agurabatiña harihini lagunfulirun dimurei le, ligía háhuduragunbei lun Bungiu, seriwi haméi wéyuagu, áriebu. Luéigiñememe emenigini le, hadarira huríu nidurun, urúei Agürípa. 8 Ka san uagu mafiñen habéi luagu gayara lan lásaaragüdüniña Bungiu hilaaña?

9 «Au guánarügü, haritaguatina meha luagu lunti lan néibaahaniña ha afalarubalin Hesusu Nasarétüna, 10 ani ítara liña nadügüni uburugu Herusalén. Dátina saragu hádangiñe lánigu Bungiu furisunrugun, lau ubafu le híchugubei hábutigu fádirigu nun, ani dan le burí hasiadirúniwa lun hounwen, au aban hádangiñe ha abuduhabaña lun ítara luba lan. 11 Aniheinha dan, súfurigüda numutiña lun yebe heyeedagun luagu hafiñen luagu Hesukrístu. Adaagua numuti meha katei le tidan sun haligilisin afiñetiña, ani wéiriti meha nigañi houn darí lun néibaahaniña chülǘ lidoun burí uburugu le díseti.

12 «Ligía yebe katei le gabügürübalina uburugun Damasüku aban dan, hóunahan hábutigu fádirigu. 13 Luagu üma, nurúeite, amidirugu, aba narihin aban larugounga siélugiñeti; héreti sügǘ lau larugounga weyu, aba ladurangun geyegua nau hau sun ha úarabaña numa. 14 Danti wábürühan múarugun sun wagía, aba naganbun aban umalali ariñaguti nun lidan ebüréu, le hererun huríu: "Saulu, Saulu, ka uagu béibaahana? Badügüñatia wuribani bungua lau bamaharun nun kei ladüga bágasu dan le líchaagun kiki luagun katei gágiriti". 15 Ábati nariñagun: "Kátabu san, Nabureme?" Aba lariñagun nun: "Hesusu au, lememe béibaahabei. 16 Saraba, ráramaba, ladüga narufudagunbei nungua bun lun beseriwidun nun, lun gefén ban luagu le ariha báalibei guentó luma le lunbei narufuduni bun. 17 Nesefurubadibu hawéi huríu luma hawéi ha mámabaña huríu, ha únbaña nóunahabu guentó. 18 Nóunahañadibu hamoun lun béfegechagüdüni hagu, lun hebé lan héibugun lidan luburiga, lun héibugun lidan larugounga; lun giñe meredememe hamá lábugiñe lubafu Mafia, lun lábugiñe hamá lubafu Bungiu. Nóunahañadibu houn, afiñe hamaamuga nuagu, ferudunawa láamuga hafigoun, ibiha hamaamuga alagan hadan lánigu Bungiu ha sándubaña".

19 «Ítara liña lubeiti, urúei Agürípa, aba nadügüni le lariñagunbei Hesusu nun lidan le lasaliragunbei nun. 20 Furumiñe, aba napurichihan houn ha Damasükubaña, ariñagatina houn lun hasakürihan lídangiñe hafigoun, lun hagiribudun lun Bungiu, lun hadügün katei buiti, arihúa láamuga luagu asakürihaadün lan. Lárigiñe, aba napurichihani káteimeme le houn ha Herusalénbaña, ha mámabaña huríu. 21 Ligía lébubei hárügüdünina huríu ténpulurugu, aba hálugun háfarunina hilagubei. 22 Aba líderagunina Bungiu, ítara liña gayara lan nasigirun íchiga fe luagu Hesusu lan Krístubei houn sun gürigia, dandu ha wéirigubaña keisi ha ǘnabugubaña, chülǘ lumoun oura le. Mariñaguntina ni kata houn gürigia bóugudin luéi le uágubei lariñaga Moisesi hama profetagu luagu lasusereduba lan, 23 luagu lunti lan meha lasufuriruba lan Kristu, luagu lárigiñe lanme lounwen, ligíaba lan furumiñeti ásaaruti hádangiñe hilaaña lau ibagari magumuchaditi, luagu giñe líchugubei lan larugounga luáguti asalbaruni dandu houn huríu kei houn ha mámabaña huríu».

24 Lidan le lariñagunbalin Pábulu katei le burí lidan ladimurehan luéigiñegua, aba lagúaragun Fésütu:

—Lǘlühali bau, Pábulu! Lǘlügüda saragu aturiahani bau.

25 Aba lóunabun Pábulu, aba lariñagun:

—Málülünti nau, gumadimati; inarüni le nariñagunbei. 26 Anihán urúei Agürípa le subudihabúbei lun burí katei le buidu, ligía gayara lubéi nadimurehan ligibugiñe, furangu; ladüga chouru nani luagu subudi lani giñe sun katei le asuseredubei lun Hesusu, ladüga mama katei le adügǘti aramudaguarügü. 27 Afiñetibu san luagu le hariñagubei profetagu, urúei Agürípa? Subudi numuti luagu afiñe ban.

28 Aba lariñagun Agürípa lun:

—Saminatibu san bafiñeragüdübadina lan luagu Hesukrístu ítara ufuresen?

29 —Furese yebe, o darasa yebe, amuriahatina luma Bungiu, mámarügü buagu, hawagu giñe sun ha añahabaña aganbana uguñe, lun hayabin lun hafiñerun kei au, gama lumoun úouga güringüri hawagu.

30 Lárigiñe lariñaguni Pábulu katei le, aba lásaarun urúei, sará giñe gumadimati úara tuma Bereníse hama sun ha ñúnbaña ñein; 31 aba hadiñurun ñéingiñe lun hadimurehan luagu katei le. Hariñagati hámagua:

—Wügüri le, madügünti ni kata le lunti lafarún hilagubei luéigiñe; moun lumuti ni íbini lerederun furisunrugu.

32 Aba lariñagun Agürípa lun Fésütu:

—Lun hamuga mamuriahan lan wügüri le lun laguseragüdüni Augustu Sésarü, gayaraati hamuga lígirawagüdün.