1 Gúndaatiti Saulu lau lafarún Esütéban.

Weyuméme ligía, aba lagumeserun aban óunwenbu éibaahouni hárigi ha afiñebaña luagu Hesukrístu, Herusalén. Aba hanurahan lidoun burí lirahüñü fulasu Hudéa luma Samaria; apostolugurügüñanu manurahan. 2 Aba hayabin wügüriña ha deregeguatiña houngua lun Bungiu, aba hábununi Esütéban lau saragu íruni luagu lounwen. 3 Ábati lasigirun Saulu éibaahaña afiñetiña, ábaha lebelurun tidoun sun muna lun lasagaruniña wügüriña hama würiña aduruuheina, aba lóunahaniña furisunrugun.

4 Hati anurahabaña, aba hapurichihani uganu buiti le ñein lumuti houdin. 5 Aba lidin aban hádangiñe, gíriti Felipe, uburugun Samaria; aba lagumeserun adimureha houn ha ñéinbaña luagu Kristu. 6 Danha le haganbuni Felipe ariha haméi burí milaguru le ladaagubei, ábaha hóundaragun saragu gürigia aganbei le lariñagubei. 7 Ladüga areidaguátiña saragu gürigia gawagutiña sífirigu wuribatiña, aba burí háfuridun sífirigu wuribatiña agúaraheina hádangiñe ha gawagubaliña; areidagua hagía saragu fadaguaaña, hama méibuguntiña. 8 Sunti gürigia lidan fulasu ligía, gúndaatiña luagu katei le.

9 Ñeinñein aban wügüri lidan fulasu ligía, gíriti Simón, gabiñarahati meha, lǘñahali eyeehaña gürigia Samariana lau lariñagun houn luagu mama lan furumiñeguarügü gürigia ligía. 10 Aganbaha hamutiti sun gürigia buidu, hámagiñe ha gudemegutiña dagá hamoun wéirigutiña; aba hariñagun:

—Ibiha lumuti gürigia le óunwenbu lubafu Bungiu.

11 Ábatiha hadügün gasu lau, ladüga lǘñahali eyeehaña lau labiñarahan. 12 Dan le hafiñerunbei luagu uganu le líchugubei Felipe houn luagu larúeihan Bungiu luma luagu Hesukrístu, dandu wügüriña kei würiña, aba habadiseirún. 13 Simonmeme ligía aba giñe lafiñerun, aba giñe labadiseirún, aba lagumeserun afalarei Felipe, le tueirin lanigi lau óunwenbu burí milaguru luma seini le ladaagubei Felipe.

14 Dan le haganbunbalin apostolugu ha Herusalénbaña luagu resibi hamaali lan Samariana lererun Bungiu, aba hóunahani Féduru luma Huan ñein. 15 Dan le hachülürünbei, aba hafurieidun hawagu afiñetiña ha Samariana lun liábinba lan Sífiri Sandu hadoun; 16 ladüga miábingili lan Sífiri Sandu lidoun ni aban hádangiñe, badiseirügügiña lidan liri Wabureme Hesusu. 17 Ábati híchuguni Féduru luma Huan háhabu hawagu, aba liabin Sífiri Sandu hadoun.

18 Dan le larihinbei Simón luagu ñübuin lan Sífiri Sandu hadoun gürigia dan le híchuguni apostolugu háhabu hawagu, aba lálugun lagañeihani ubafu ligía hámagiñe lau seinsu. 19 Aba lariñagun houn:

—Ru huméi giñe ubafu le nun, lun danme lan níchuguni núhabu luagu furumiñeguarügü, lun giñe leresibiruni Sífiri Sandu.

20 Ábati lariñagun Féduru lun:

—Beiba máfiougatin lau sun biseinsun; ladüga haritaguatibu luagu gayara lan lagañeihóun katei le ledewehan Bungiu. 21 Marichatibu, mafanran buguya lidan weseriwidun lun Bungiu, ladüga múarantu banigi ligibugiñe Bungiu. 22 Asakürihabá, ayumuragua buguyame lun Bungiu, lun feruduna lánibu luagu luriban baritagun. 23 Ladüga ariha numuti luagu buin tiña lan banigi lau wuribani, ani ragüñu liñalibu wuribani.

24 Ábati lariñagun Simón:

—Afurieida humá lun Bungiu nuagu lun masuseredun lan ni kata nun lídangiñe le hariñagubei.

25 Lárigiñe híchugun fe luagu Hesukrístu luma hadimurehani lererun Bungiu lidan fulasu ligía, aba hapurichihani apostolugu uganu buiti lidan saragu lirahüñü fulasu Samaria, luagu haweiyasun hárigoun Herusaléun.

26 Lárigiñe katei le, aba lariñagun lani Wabureme Bungiu ánheli lun Felipe:

—Aransebá, beiba luagun suru lídangiñe üma le ararirubei Herusaléngiñe lun uburugun Gasa.

Ligía üma le ásügürübei lídangiñe fulasu mageirawati. 27 Aba laranserun Felipe, aba lidin. Ǘmadarugu, aba larihin aban wügüri Etiopíana lubá lubá. Wügüri ligía siñati garáü lan, aban wügüri wéiriguti; ligía giñe gamaniharibei lau sun tiseinsun Kandase to lurúeite Etiopía. Liábiñati wügüri ligía Herusaléngiñe lárigi lidin áhuduragua lun Bungiu. 28 Lagiribuduñati lageiroun, ñun tidan aban karü, aliiheinalóun liliburun profeta Isaíasi. 29 Ábati lariñagun Sífiri Sandu lun Felipe:

—Yarafabá tuagun karü tura.

30 Aba layarafadun tuagun karü, aba laganbuni laliihaña lan wügüri ligía tidan liliburun Isaíasi; aba lariñagun lun:

—Gunfuranda bumuti san le baliihabei?

31 Aba lariñagun wügüri ligía lun:

—Ida lubagia gunfuranda nani, úaga kaba lan afuranguágüdei nun?

Aba lariñagun lun Felipe lun ládinun lumoun lun lañuurun lóubagiñe.

32 Anihán burí dimurei le laliihabei:

Barüwati kei mudún lun lafarún hilagubei;

ítara kei lerederun mudún maniñu hagibugiñe ha ásarubalin,

ítara liña giñe mariñagun lan ni kata.

33 Ǘnabuguti lanügǘn, ani michugúnwati liricha lun;

siñabei ladimurehóun hawagu ladügawagun,

ladüga gumuha lan labagaridun ubouagu.

34 Aba lariñagun wügüri ligía lun Felipe:

—Adügabéi fulesei nun; ariñagabéi nun, ka san uagu lariñagei wügüri le abürühabei dimurei le, luougua, odi luagu amu?

35 Ábati lagumeserun Felipe arufudahei Lererun Bungiu lun, lúmagiñe le ñéingiñe lubéi lagumesera aliiha, aba líchuguni uganu luáguti Hesusu lun. 36 Danti le hásügürünbei lídangiñe aban fulasu le ñein lubéi duna, aba lariñagun wügüri ligía:

—Anihántia duna, siñati san nabadiseirun?

37 Lariñaga Felipe lun:

—Anhein afiñe bubéi luagu Hesukrístu tau sun banigi, gayaraati babadiseirún.

Lariñaga wügüri ligía lun:

—Afiñetina luagu Hesukrístu lan Liraübei Bungiu.

38 Ábati lararamagüdünu karü, aba hararirun biángubei hagía dúnarugun, aba labadiseiruni Felipe. 39 Dan hamudeirun dúnarugugiñe, aba lanügüni lani Bungiu Sífiri Felipe ñéingiñe, aba marihin laali lan wügüri ligía. Aba lasigiruni léibugun, gúndaañu. 40 Aba ladariragun Felipe lungua Asotu, aba lásügürün lídangiñeina burí fulasu apurichiheinaléi uganu luáguti Kristu darí lachülürün Sesaréa.