1 Aba laríagun Pábulu hawagun lúrudugu hagía, aba lariñagun houn:

—Niduheñu, harumati nasandiragun nungua ligibugiñe Bungiu chülǘ lumoun weyu le.

2 Ábati lóunahan Ananíasi, fádiri le íñutimabei, lun hagayuahan ha yarafabaña ñein luagun liyuma Pábulu. 3 Aba lariñagun Pábulu lun:

—Lagayuahaba Bungiu buagu, biangua tigibu buguya le! Ñun biña ñein lun baguseragüdünina kei lariñaguni lúrudu, kati uagu bagayuagüda nuagu, adüraaguei lúrudu?

4 Aba hariñagun ha ñéinbaña lun:

—Ítara liña san banabuni fádiri le íñutimabei le lufadirin Bungiu?

5 Aba lariñagun Pábulu:

—Niduheñu, ibidiñeti yebe nun luagu fádiri lan le íñutimabei; ladüga tariñahare Lererun Bungiu: "Míñaraguabei le agumadihabei bageira".

6 Kei lasubudirúni Pábulu luagu hánigu lan saduséugu híbiri ha ñéinbaña, híbiri, hánigu fariséugu, aba lariñagun lau umalali héreti:

—Niduheñu, fariséu au, hádangiñetiña fariséugu nagübürigu; ani haguseragüdüñadina ladüga afiñe nan luagu hásaaruba lan hilaaña lídangiñe óunweni.

7 Dan le lariñagunbalin katei le, aba hagumeserun fariséugu hama saduséugu asigeneha hámagua, aba lafanreinragun adamurini. 8 Ladüga hariñahare saduséugu luagu másaarunbaña lan hilaaña lídangiñe óunweni; úatiña nege giñe ánheligu, ni sífirigu; ánhañati fariséugu, afiñetiña luagu sun katei le. 9 Hareinchati súngubei; aba hásaarun hádangiñe arufudahatiña lilurudun Moisesi ha ñéinbaña, ani fariséugu giñe hagía, aba hariñagun:

—Wügüri le, úati ni kata wuribati ladüga; ladüga gayaraati aban lan sífiri o aban lan ánheli adimurehabei lun.

10 Wéirihali sigenei darí lun lanufudedun gumadan luéi háfaruni Pábulu hilagubei. Ábati lóunahaniña lisudaranigu lun hasagaruni Pábulu lídangiñe adamurini lunya hanügüni hábiñoun súdara.

11 Le aban áriebu, aba lasaliragun Wabureme Hesusu lun Pábulu, aba lariñagun lun:

—Manufudedabá, Pábulu, ladüga ítara kei rúhadibu lan fe nuagu ya Herusalén, bíchuguba giñe fe nuagu, Roma.

12 Larugan, aba hebelurun huríu lidoun úarani lun háfaruni Pábulu hilagubei; aba háfiñurun lau íñaraguni luagu méiginbaña lan, matun hagíame ni kata darí háfaruni. 13 Hóugiñeñanu bián-wein wügüriña ariñaguti katei le. 14 Ábati houdin hamoun hábutigu fádirigu luma hamoun wügüriña wéirigutiña hadan huríu, aba hariñagun:

—Fiñuhadiwa lau íñaraguni luagu méiginbadiwa lan ni kata darí wáfaruni Pábulu hilagubei. 15 Guentoti, huguya hama ha híbiri lúrudugu íñutimatiña amuriaha humá luma gumadan lun lanügüni hun haruga, hariñagame lun luagu lúntima lan hálügüdüni luagu duru le ichugúbei luagu habusenra harihini. Wagía, aranseñu waba lun wáfaruni lubaragiñe lachülürün.

16 Aba lachülürün katei le labun laganbun libase Pábulu, aba lidin hábiñoun súdara asubudiragüdei lun Pábulu. 17 Ábati lagúarun Pábulu lun aban hádangiñe hábutigu súdara, aba lariñagun lun:

—Barübei irahü le lumoun gumadan; anihein katei lunti lariñaguni lun.

18 Aba lanügüni hábuti súdara lumoun gumadan, aba lariñagun lun:

—Wati adaürǘti Pábulu nun, aba lamuriahan numa lun nanügüni irahü le bun ñahoun; anihein nege katei lun lariñaguni bun.

19 Aba lárügüdüni gumadan lúhabu irahü ligía, aba lanügüni lun hábugua hamá, aba lariñagun lun:

—Ka babusenrubei bariñagun nun?

20 Ábati lariñagun irahü ligía lun:

—Beluhaña huríu lidoun úarani lun hamuriahan buma lun banügüni Pábulu hagibugiñoun lúrudugu íñutimatiña lun nege hálügüdünitima luagu lidurun. 21 Mafiñerabá houn; añahein hóugiñe bián-wein hawügüriñanigu aramudagu habá ǘmada agurabahei lun háfaruni hilagubei. Fiñuhaña lau íñaraguni ligibugiñe Bungiu luagu méiginbaña lan, matun darí háfaruni Pábulu; guentó aranseñu haña, hagurabarügüñein bóunabagüle.

22 Ábati lóunahani gumadan irahü ligía águyu, ariñageina ligía lun lun mariñagun lan ni ka un luagu abahüdagua laali lan katei le lun.

23 Aba lagúarun gumadan houn bián hádangiñe hábutigu súdara, aba lariñagun houn lun haranserun bián-san súdara lun houdin Sesaréa eibu, úara hama ǘrüwa-wein-diisi ha hawagutiña gabayu, hama bián-san ha táutiña eféin, lun houdin ladaünrün nefu guñoun. 24 Aransegüdáti giñe gabayu lun lawarirun Pábulu, ru ligía dimurei lun hachülüragüdüni Pábulu lumoun gumadimati Félisi lau magadiñein. 25 Óunahati aban gárada hama, lariñahare tidan gárada tuguya:

26 «Lúmagiñetu Külaudiu Lisíasi lun gumadimati Félisi le wéirigubei, mábuiga niña bun. 27 Anihán wügüri le, le nóunahabei bun, daü hamaali yebe huríu ani háfaraali yebe hilagubei; dan le nasubudirúnbalin luagu Rómana lan, aba nidin hau nisudaranigu, aba nesefuruni. 28 Keiti nabusenrun nasubudiruni ka lan lidurunbei houn, aba nanügüni hagibugiñoun lúrudugu huríu íñutimatiña. 29 Lidurun houn luáguti burí katei le luáguti halurudun; úati irichaü lun lafarún hilagubei, ni íbini lun ladaürǘn. 30 Kei lachülürün labun naganbun luagu haransehaña lan huríu lun háfaruni hilagubei, ligía lébubei nóunahani bun furese. Ariñagaadina giñe houn ha íchugubaña lidurun lun buma lan haranserei le hánibei luma».

31 Ábati hanügüni súdara Pábulu kei lariñawagúniwa houn, áriebu, chülǘ Antipatürisi. 32 Larugan, ligía hagiribudun súdara ha éibubaña; súdaraguti ha hawagubaña gabayu, aba hasigiruni haweiyasun lau Pábulu. 33 Dan le hachülürünbei Sesaréa, aba hederegerunu gárada lun gumadimati, derege haméi giñe Pábulu. 34 Aba laliihanu gumadimati gárada, ábati lálügüdahan halíana lan Pábulu; danti le lasubudirunbalin luagu Silisiana lan, 35 aba lariñagun lun:

—Naganbubadibu danme le hayabin ha íchugubaña bidurun.

Ábati líchugun dimurei lun lichugúniwa Pábulu tidoun palasiu to meha lábunaguboun Erodesi, hau óunigirutiña.