1 Afei krataa bɔ ɛmɔ hworɔ bɛbrɛle me ne, ɛhe yeɛ meka mefa ye nwo ɔ: Ɔte pa kyɛ ahaa brienzua ngɔfa ye nwo ngɔha brasua. 2 Nakoso, adwaman bɔ wabuso nati, odikyɛ brienzua biala nya ɔye deɛ, na brasua biala koso nya ohu deɛ. 3 Odikyɛ brienzua yɛ bɔ ɔfata ma ɔye, na brasua ne koso yɛ sɔ ala ma ohu. 4 Brasua de, olle ye bɔbɔ ye nipadua so tumi, mmom ohu. Sɔ ala yeɛ brienzua koso lle ye nipadua so tumi, na mmom ɔye. 5 Nnɛmaa ɛmɔ nu biala ka kyɛ ɔne ye mmango ngɔla, sana ɛmɔ munyɔ ne de to nu kyɛ, ɔkwaadwu mmerɛ bie de, ɛmɔngɔla, ná wamaa ɛmɔ anya mmerɛ babɔ mbaeɛ; na ye si ne, ɛmɔ asa bayia nu bieku. Ná wanyɛ kyɛ, ɛmɔ nwo so bɔ ɛmɔ anhyɛ nati, Abɔnzam sɔ ɛmɔ nea. 6 Ɛhe de, ɔtte mmeraa yeɛ mehyɛ mema ɛmɔ ɔ, mmom ɛmɔkuro a, ɛmɔ kɔhora bɛkɔyɛ sɔ. 7 Ɔhale me ngome a, ahaa sona biala te kyɛ me. Nakoso ebiala le akyɛdeɛ bɔ Nyameɛ afa ama ye ɔ, ebie deɛ te sɔa, yeɛ ebie koso deɛ te sɔa.

8 Afei asigyafoɛ ne akunafoɛ de, meka mekyire bɛ kyɛ, ɔte pa kyɛ ahaa bɛkɔtena berɛ kyɛbɔ nde ye. 9 Nakoso sɛ bɛngɔhora bɛngɔhyɛ bɛ nwo so a, ye de bɛgya. Ofikyɛ ɔte pa kyɛ bɛkogya tra kyɛ bɛkɔtena berɛ maa akɔnnɔ kɔhyɛ bɛ so ɔ.

10 Bɛ bɔ bagya ne de, mema bɛ ahyɛdeɛ, nakoso nná me yeɛ mefa mema bɛ ɔ, mmom Awurade. Yeɛ ole kyɛ, nnɛmaa brasua ne ohu tete nu. 11 Na sɛ ɔne ye tete nu po a, nnɛmaa ogya sona foforɛ. Sɛ ɔpena kyɛ ogya a, ɔne ohu ne ha bɔnu bieku. Na brienzua koso, nnɛmaa oyira ɔye.

12 Na bɛ bɔ baha ne de, ɛhe yeɛ meka mekyire ɛmɔ ɔ. Ɛhe de, offi Awurade berɛ. Yeɛ ole kyɛ, sɛ aliemaa bie gya braa bɔ ɔtte gyidiniɛ, na brasua ne de to nu kyɛ ɔne ye kɔtena a, nnɛmaa oyira ye. 13 Na sɛ brasua bie koso gya biaa bɔ ɔtte gyidiniɛ, na sɛ brienzua ne de to nu kyɛ ɔne ye kɔtena a, nnɛmaa oyira ye. 14 Ofikyɛ brienzua bɔ ɔtte gyidiniɛ ne, ɔye ti, ye nwo ate; na brasua bɔ ɔtte gyidiniɛ ne koso, ohu ti, ye nwo ate. Wanyɛ sɔ a, ɛmɔ mmaa nemɔ nwo ngɔte, nakoso kesaalae de, bɛ nwo ate. 15 Nakoso, sɛ bɔ ɔtte gyidiniɛ ne pena kyɛ oyira a, ma ɔhɔ. Ɔba sɔ a, mmeraa biala ngyekye brienzua anaa brasua bɔ ɔte gyidiniɛ ne. Asomdwie nu yeɛ Nyameɛ frɛlɛ ɛmɔ ɔ. 16 Brasua, ɛkɔyɛ sɛɛ na anwu kyɛ, wɔ yeɛ ekole ɛhu ngoa ɔ? Na brienzua koso, ɛkɔyɛ sɛɛ na anwu kyɛ wɔ yeɛ ekole ɛye ngoa ɔ?

17 Ye mukoraati si ne, bɔ Awurade afa ama ebiala ne, sɔ ala yeɛ ebiala bɔ ye bra ɔ, kyɛbɔ Nyameɛ frɛle ye ne. Akwankyerɛ he ala yeɛ mva mmane asafo bɔ waha nemɔ ɔ. 18 Mmerɛ bɔ bɛfrɛle ebie ne, né wapɛ ye toa hɔ? Nnɛmaa ɔha ye nwo kɔsesa ye. Na bɛfrɛle ebie ne, né ɔpɛlle ye toa koso a, nnɛmaa ɔkɔpɛ. 19 Ofikyɛ sɛ apɛ wɔ toa oo, sɛ ɛpɛlle oo, ɛhene nwo nhia, mmom bɔ ohia yeɛ ole kyɛ ekoli Nyameɛ mmeraa so. 20 Tebea bɔ ne ebiala wɔ nu, mmerɛ bɔ bɛfrɛle ye ne, ɛhene yeɛ ɔhɔ so tena nu ɔ. 21 Aso bɛfrɛle wɔ ne, né ɛte akoaa? Nnɛmaa ɔha wɔ, nakoso sɛ ɛkɔhora kole wɔ nwo a, fa ye nwo atee ne yɛ sɔ. 22 Na ebiala bɔ ne ɔte akoaa mmerɛ bɔ Awurade frɛle ye ne, Awurade alɛ́ ye afi ngoasom nu. Sɔ ala yeɛ bɔ né ɔtte akoaa ne koso, waayɛ Kristo akoaa. 23 Bɛtɔle ɛmɔ nyɔboɛ serɛ, yeti nnɛmaa ɛmɔyɛ ngoaa bɛma mmenia. 24 Aliemaa mɔ, tebea bɔ ne ebie wɔ nu mmerɛ bɔ Nyameɛ frɛle ye ne, ma ɔhɔ so tena sɔ tebea nanu.

25 Na mmabunu de, Awurade mmane me ahyɛdeɛ biala kyɛ mva mma bɛ, mmom mekyire m’adwene kyɛ ebie bɔ Awurade anwu ye anwunvo kyɛ ɔyɛ ebie bɔ odi nahorɛ. 26 Sɛ menea ɔhaw bɔ yɛwɔ nu kesaalae ne a, menwu ye kyɛ ahaa ɔte pa kyɛ sona biala kɔtena berɛ kyɛbɔ ɔte nala. 27 Agya braa hɔ? Nnɛyɛ w’adwene kyɛ eyira ye. Na sɛ eggya bie koso a, nnɛpena bie. 28 Nakoso sɛ agya braa po a, ɛyɛlle bɔne. Sɛ ababunu gya a, ɔyɛlle bɔne biala. Nakoso bɛ bɔ bagya ne, bɛ nwo kɔhyere bɛ wɔ anwoɔnaen nu. Me de, mepena kyɛ ɛmɔ nwo tɔ ɛmɔ.

29 Aliemaa mɔ, bɔ mekyire yeɛ ole kyɛ, mmerɛ bɔ waha ne te kaa. Yeti ofi ɛnɛ bɔ ɔkɔ ne, bɛ bɔ bagya braa ne, bɛyɛ kyɛ bɛ bɔ bɛgyalle ne, 30 bɛ bɔ bɛsu ne, bɛyɛ kyɛ bɛ bɔ bɛnzu ne, bɛ bɔ bɛ nye agye ne, bɛyɛ kyɛ bɛ bɔ bɛ wora abɔ ne, na odikyɛ bɛ bɔ bɛtɔ ne yɛ bɛ nwo kyɛ bɛ bɔ bɛlle bie ne, 31 ná bɛ bɔ bɛfa ewiase ne bɛdi dwumaa ne koso, nnɛmaa bɛmaa wiase ne di bɛ ti, ofikyɛ kyɛbɔ wiase ne te, ɔsesa. 32 Menguro kyɛ adwene-dwene biala hyɛ ɛmɔ so. Brienzua bɔ ogyalle ne de, ɔda dwene Awurade nningyein nwo, kyɛbɔ ɔkɔsɔ Awurade nye ɔ. 33 Nakoso brienzua bɔ wagya ne de, wiase nningyein yeɛ ɔdwene ye nwo ɔ, kyɛbɔ ɔkɔsɔ ɔye nye ɔ. 34 Yeti yenu nu ahyɛ. Sɔ ala yeɛ brasua bɔ ogyalle ne, ɔne ababunu koso dwene Awurade nningyein nwo, kyɛbɔ ɔkɔyɛ a ɔkɔyɛ krongron wɔ ye nipadua ne ye honhom nu ɔ. Nakoso brasua bɔ wagya ne de, nningyein bɔ ɔwɔ wiase ne yeɛ ɔdwene ye nwo ɔ, kyɛbɔ ɔkɔsɔ ohu nye ɔ. 35 Ɛmɔ ngɔsoɛ ti yeɛ meka ɛhe ɔ, na ɔtte kyɛ mehyɛ ɛmɔ, kyɛbɔ ɔkɔyɛ a, ɛmɔ kɔyɛ bɔ ɔte pa, na ɛmɔ ayere ɛmɔ nwo basõ Awurade bɔ hwee ngɔha ɛmɔ ɔ.

36 Nakoso sɛ ebie nwu ye nwo kyɛ agyaa bɔ ogyalle nati, ɔyɛ basabasa, na sɛ sɔ sona ne tte akwalaa a, ye de bɔ odikyɛ ɔyɛ ɛhe: Ma ɔyɛ bɔ okuro ɔ, ɔtte bɔne, ma ogya. 37 Nakoso sɛ ebie si ye adwene pi, bɔ nikye fee nhyɛ ye, na mmom, ɔkora hyɛ ye nwo so, na wasi gyinayɛ wɔ y’ahone nu kyɛ ɔngogya a, wayɛ nikye. 38 Bɔ wagya ne koso ayɛ nikye, nakoso bɔ ogyalle ne ayɛ nikye atra bɔ wagya ne.

39 Sɛ brasua ahu te ase a, mmeraa akyekye ye abata ohu nanwo. Nakoso sɛ ohu ne wu a, ye de ɔne ye atete nu, ɔkɔhora kogya ebiala bɔ okuro ɔ, nakoso ogya wɔ Awurade nu ngome. 40 Nakoso me de menwu ye kyɛ, sɛ ɔtena berɛ sɔ ala a, ye nye kɔgye paa. Medɛ́ medi kyɛ me koso, Nyameɛ honhom wɔ me so.