1 Ɛhe si ne, né Yudafoɛ ne di b’afahyɛ, na Yesu hɔle Yerusalem. 2 Ne ɛkwaa* bie la Yerusalem Mmoan Anoa nanwo bɔ Hebri nu ne bɛfrɛ ye Betsada;* né ole varanda nnu wɔ ye nwo. 3 Na né mmenia pee bɔ bɛnde apɔ, bɛ nye asi, babubu, na bɛ bue awu lela berɛ. 4 * — 5 Né biaa bie bɔ wafokyɛ afoɛ 38 wɔ berɛ. 6 Yesu nwuni kyɛ sɔ biaa ne la berɛ, na ne ɔse kyɛ wafokyɛ wahyɛ. Yeti obisale ye kyɛ: "Ɛpena kyɛ wɔ nwo tɔ wɔ?" 7 Biaa bɔ ɔnde apɔ ne hane kyɛ: "Me wura, nnne ebiala bɔ nzue ne ponda a, ɔkɔfa me kɔto nu ɔ; na sɛ mekwaatɔ nu a, né ebie ali me nyunu moa waatɔ nu." 8 Yesu ha hyirele ye kyɛ: "Dwɔso, fa wɔ bɛen ne, na nate." 9 Na ɛberɛ ala biaa ne nwo tɔle ye, ɔfale ye bɛen, na ɔhyɛle yebo natele. Né sɔ kyẽa ne te Homeda.

10 Yeti, Yudafoɛ nemɔ ha hyirele biaa bɔ basa ye anwonyerɛ ne kyɛ: "Ɛnɛ te Homeda, na mmeraa mma ate kyɛ ɛsoa wɔ bɛen." 11 Na biaa ne ha hyirele bɛ kyɛ: "Sona bɔ ɔsale me anwonyerɛ ne, ye ala yeɛ ɔha hyirele me kyɛ, ‘Fa wɔ bɛen na nate’ ne. " 12 Bɛbisale ye kyɛ: "Nwa yeɛ ɔha hyirele wɔ kyɛ, ‘Fa wɔ bɛen ne, na nate’ ne?" 13 Né biaa ne nze sona-horɛ, ofikyɛ ne Yesu afra mmenia bɔ bɛwɔ berɛ nanu. 14 Ɛhene si ne, Yesu nwuni ye wɔ asɔre awuro berɛ, na ɔha hyirele ye kyɛ: "Nea, wɔ nwo atɔ wɔ. Nnɛyɛ bɔne kõ, na bɔ ɔtra ɛhe ando wɔ." 15 Biaa ne fili berɛ ne, ɔɔbɔle Yudafoɛ nemɔ amaneɛ kyɛ, Yesu yeɛ ɔsale ye anwonyerɛ ne. 16 Ɛhe ati, Yudafoɛ nemɔ tuli bɛ nye siele Yesu so, ofikyɛ né ɔyɛ sɔ nningyein hemɔ Homeda. 17 Nakoso Yesu ha hyirele bɛ kyɛ: "Me Baba ayɛ adwuma tonn waadwu ɛnɛ, na me koso, ngɔhɔ so ngɔyɛ adwuma." 18 Ɛhe ati yeɛ né Yudafoɛ nemɔ nye aboro, bɔ ne bɛpena atee bɔ bɛkɔfa so bɛkɔhu ye ne, ofikyɛ nná Homeda ne ngome yeɛ obuli so ɔ, mmom ne ɔfrɛ Nyameɛ kyɛ ye Baba, na ɔyɛ ye nwo kyɛ ɔne Nyameɛ te pɛ.

19 Na Yesu koso ha hyirele bɛ kyɛ: "Nahorɛ paa bɔ meka mekyire ɛmɔ yeɛ ole kyɛ, Baa ne bɔbɔ ngora mva ye tumi nnyɛ hwee, sana bɔ okonwu kyɛ Baba ne yɛ ne. Ofikyɛ bɔ Baba ne kɔyɛ ne, ɛhene ala yeɛ Baa ne koso yɛ ɔ. 20 Na Baba ne kuro Baa ne dwirɛ, na nikye biala bɔ ɔyɛ ne, okyire ye, na okohyire ye nningyein bɔ ɔte mbiri tra ɛhemɔ maa ɔkɔyɛ ɛmɔ nwanwa. 21 Na kyɛbɔ Baba ne tingye awufo, ná ɔmaa benya ngoa ne, sɔ ala yeɛ Sona Awa ne kora ma bɔ okuro biala nya ngoa ɔ. 22 Na Baba ne nngɔbu ebiala atɛn, mmom wafa atemmuo namukoraati wawura Baa ne sa, 23 kyɛbɔ ɔkɔyɛ a, ebiala koli Baa ne ni, kyɛbɔ bɛdi Baba ne ni ne. Ebiala bɔ onni Baa ne ni ne, onni Baba bɔ ɔsomane ye ne koso nni. 24 Nahorɛ paa bɔ meka mekyire ɛmɔ yeɛ ole kyɛ, ebiala bɔ okotie me dwirɛ, na okole bɔ ɔsomane me ne koli ne, ole daa ngoa, na bɛngɔbu ye atɛn, mmom wafi ewue nu wahɔ ngoa nu.

25 "Nahorɛ paa bɔ meka mekyire ɛmɔ yeɛ ole kyɛ, mmerɛ bie ba, na wadwu, bɔ awufo kɔte Nyameɛ Awa ne konvi, na bɛ bɔ bayɛ asoɛ batie ne konya ngoa. 26 Ná kyɛbɔ Baba ne le ngoa wɔ ye bɔbɔ ye nu ne, sɔ ala yeɛ wamaa Baa ne koso anya ngoa wɔ ye bɔbɔ ye nu ɔ. 27 Na wama ye tumi kyɛ obu atɛn, ofikyɛ ye yeɛ ɔte Sona Awa ne. 28 Nnɛmɔ maa ɛhe yɛ ɛmɔ nwanwa, ofikyɛ mmerɛ ne ba, ná sɔ mmerɛ ne, bɛ bɔ bɛwɔ ngaeɛ kumaa* nu namukoraati kɔte ye konvi, 29 ná bafite. Na bɛkotingye bɛ bɔ bɛyɛle pa ne bɛkɔhɔ ngoa nu, ná batingye bɛ bɔ bɛyɛle bɔ ɔttemaye ne bahɔ atemmuo nu.

30 "Me de, mengora memva me tumi menyɛ hwee. Bɔ mete ne yeɛ mebu ye nwo atɛn ɔ, na m’atemmuo ne tengyɛ, ofikyɛ nná bɔ mekuro yeɛ meyɛ ɔ, mmom meyɛ bɔ ɔsomane me ne apɛdeɛ. 31 Sɛ me ngome medi me nwo adanzeɛ a, m’adanzeɛ ne tte nahorɛ. 32 Ebie wɔ berɛ bɔ ye koso odi me nwo adanzeɛ ɔ, na mese kyɛ adanzeɛ bɔ odi fa me nwo ne te nahorɛ. 33 Ɛmɔ somane mmenia maa bɛhɔle Yohane berɛ, na olili nahorɛ nanwo adanzeɛ. 34 Ɔwɔ nu, menne adanzeɛ bɔ ofi sona berɛ mendonu, nakoso meka ɛhemɔ, ná wamaa ɛmɔ anya ngoa. 35 Né sɔ biaa ne te kanea bɔ ɔsɔ, ná ɔta, na ɛmɔ de, mmerɛ kaa bie yeɛ né ɛmɔpena kyɛ ɛmɔgye ɛmɔ nye wɔ ye kanea nanu ɔ. 36 Na me de, m’adanzeɛ ne tra Yohane deɛ ne; ofikyɛ nyumaa bɔ Baba ne afa ama me kyɛ nyɛ ne, sɔ nyumaa bɔ meyɛ ne di me nwo adanzeɛ kyɛ Baba ne yeɛ wasoma me ɔ. 37 Na Baba bɔ ɔsomane me ne bɔbɔ di me nwo adanzeɛ. Ɛmɔ telle ye konvi lle, na kyɛbɔ ɔte ne koso, ɛmɔ nnwuni ye, 38 na ye dwirɛ ne nne ɛmɔ nu, ofikyɛ bɔ ɔsomane me ne, ɛmɔnne ye benni. 39 Ɛmɔneɛnea tworɔnzɛm nanu, ofikyɛ ɛmɔse kyɛ ɛhene yeɛ ɔkɔmaa ɛmɔ konya daa ngoa ɔ; na ɛhemɔ yeɛ odi me nwo adanzeɛ ɔ. 40 Nakoso, ɛmɔ mbena kyɛ ɛmɔ ba me berɛ, ná wamaa ɛmɔ anya ngoa. 41 Membena anuonyam mennvi sona berɛ, 42 ofikyɛ mese ye paa kyɛ, Nyameɛ nwo dɔ nne ɛmɔ nu. 43 Me Baba dumaa nu yeɛ mmale ɔ, nakoso ɛmɔ anne me. Sɛ ebie ba ye bɔbɔ ye dumaa nu a, ye de, ɛmɔkole ye. 44 Ɔkɔyɛ sɛɛ ne ɛmɔ alɛ́ bali, mmerɛ bɔ ɛmɔpena anuonyam bɛfi ɛmɔ nwo berɛ, ná ɛmɔnne anuonyam bɔ ofi Nyameɛ komapɛ ne berɛ ne? 45 Nnɛmɔ nya adwene kyɛ, me yeɛ ngɔbɔ ɛmɔ sommoɛ wɔ me Baba nyunu ɔ; sona-horɛ yeɛ ɔbɔ ɛmɔ sommoɛ ɔ, yeɛ ole Mose bɔ ɛmɔ afa ɛmɔ nye bato ye so ne. 46 Sɛ ɛmɔlɛle Mose bɛlili a, ahaa ɛmɔkole me bɛkoli, ofikyɛ ɔhworɔle me nwo dwirɛ. 47 Na sɛ ɛmɔnne bɔ ɔhworɔle ne benni a, ɔkɔyɛ sɛɛ ne ɛmɔ alɛ́ bɔ meka ne bali?"