1 Afei, honhom ne fale Yesu hɔle ɛserɛ so maa Abɔnzam sɔle ye neane. 2 Ɔyɛle akɔngyere ngyẽa 40, eyia ne kɔngɔen ne, né ɛhɔen ku ye. 3 Ná bɔ ɔsɔ mmenia nea ne wale ye berɛ, yeɛ ɔha hyirele ye kyɛ: "Sɛ wɔ yeɛ ɛle Nyameɛ awa ne a, dwudwo kyire nyɔboɛ hemɔ ma bɛkakyi paanoo." 4 Yeɛ Yesu ha hyirele ye kyɛ: "Bahworɔ kyɛ:

‘Nná paanoo ngome yeɛ ɔkɔmaa sona konya ngoa ɔ,

mmom edwirɛ biala bɔ ofi Awurade noa nu kɔwa ne.’ "

5 Afei Abɔnzam fale ye hɔle kuro krongron nanu, na ɔfale ye gyinane nekaa bɔ ɔwale paa wɔ asɔre awuro berɛ. 6 Yeɛ ɔha hyirele ye kyɛ, "Sɛ wɔ yeɛ ɛle Nyameɛ awa ne a, gyi wɔ nwo to aseɛ nwo dɔ. Ofikyɛ bahworɔ kyɛ:

‘Wɔ ti, ɔkɔhyɛ ye abɔfo,

maa bɛkɔsoa wɔ bɛ sa so,

kyɛbɔ ɔkɔyɛ a,

wɔ gya ngɔpoli nyɔboɛ ɔ.’"

7 Yesu ha hyirele ye kyɛ, "Bahworɔ kyɛ: ‘Nnɛsɔ Awurade, wɔ Nyameɛ nea.’" 8 Afei, Abɔnzam fale ye hɔle bokaa tendee bie so, na ɔfale ahennie bɔ ɔwɔ wiase, ne enu anuonyam mukoraati hyirele ye. 9 Yeɛ ɔha hyirele ye kyɛ, "Sɛ ɛbɔ wɔ nu ase komapɛ sõ me a, ngɔfa ɛhe amukoraati ngɔma wɔ."

10 Na Yesu ha hyirele ye kyɛ: "Fi me so, Satan! Ofikyɛ bahworɔ kyɛ:

‘Awurade wɔ Nyameɛ ngome yeɛ odikyɛ ɛkoto ye ɔ,

na ye ngome yeɛ odikyɛ ɛsõ ye ɔ.’"

11 Afei Abɔnzam yakyile ye berɛ hɔle, na abɔfo wale bɛɛsone ye.

12 Yesu tele kyɛ bahye Yohane bato prizin ne, ɔhɔle Galilea. 13 Ofili Nazerɛt ne, ɔɔtenane Kapernaum, sɔ kuro ne la ɛpo noa wɔ Sebulun ne Naftali mandanu berɛ, 14 kyɛbɔ ɔkɔyɛ a, edwirɛ bɔ diifoɛ Isaiah hane ne kɔwa nu ɔ, ɔhane kyɛ:

15 "O Sebulun aseɛ

ne Naftali aseɛ,

aseɛ bɔ ɔwɔ ɛpo atee naso wɔ Yordan si dɔ ne,

maen-maen né Galilea ne.

16 Mmenia bɔ bɛte awosii nu ne,

banwu kanea kandinga bie;

na bɛ bɔ bɛte nekaa bɔ ewue wawoɛ la ne,

kanea atɔ bɛ so."

17 Ofi sɔ mmerɛ ne, Yesu hyɛle ye asɛnka adwuma nabo, na ɔhane kyɛ, "Ɛmɔsakra ɛmɔ adwene, ofikyɛ anwuro Ahennie ne apingye."

18 Yesu nate Galilea ɛpo ne noa ne, onwuni mmenia nyɔ bie, né bɛte aliemaa, Simon bɔ bɛfrɛ ye Petro ne, ɔne oliema Andrea kyɛ bɛgua nɛt wɔ ɛpo nanu, ofikyɛ né bɛkye egyein. 19 Yesu ha hyirele bɛ kyɛ, "Ɛmɔbra beeli me si, na ngɔmaa ɛmɔ kɔhye mmenia." 20 Na ɛberɛ nala, bɛyakyile bɛ nɛt ne berɛ bɛlili ye si. 21 Na ofili berɛ ne, osa nwuni aliemaa nyɔ bie, Sebedeo awa Yakobo, ne oliema Yohane. Né bɛne bɛ baba Sebedeo te ɛlɛen nu, na ne bɛpomba bɛ nɛt. Yesu frɛle bɛ, 22 na ɛbrɛ ala bɛyakyile bɛ baba ne ɛleɛn ne berɛ bɛɛlili ye si.

23 Afei, Yesu hyinini Galilea mukoraati yɛle ngyerɛkyerɛ wɔ sua bɔ beyia nu nemɔ nu hane Ahennie nanwo nzɛmba ne, na ɔsale bɛ bɔ bɛnde apɔ ne bɛ bɔ bayɛ mmerɛ namukoraati anwonyerɛ. 24 Na ye nwo dwirɛ trɛ hɔle Siria mukoraati, na bɛfale bɛ bɔ bɛnde apɔ, bɛ bɔ ɔhaw ahoroɛ teetee bɛ, bɛ bɔ sunzummɔne wɔ bɛ so, bɛ bɔ bɛpɛ, ɔne bɛ bɔ babubu mukoraati bɛbrɛle ye, na ɔsale b’anwonyerɛ. 25 Ɛhe ati, mmeni pee fili Galilea, Dekapoli, Yerusalem, Yudea, ne Yordan si dɔ lili ye si.