1 Odwu fili bokaa naso ne, mmeni pee lili ye si. 2 Ná kwataniɛ bie wale ye berɛ, yeɛ obuli ndwerɛ ha hyirele ye kyɛ: "Awurade, ɛkuro a, ɛkɔhora kɔmaa me nwo kɔtɔ me."* 3 Na ɔtengyɛle ye sa sɔle ye nu hane kyɛ: "Mekuro! Wɔ nwo tɔ wɔ."* Na ɛberɛ ala, ye kwata ne hɔle. 4 Yeɛ Yesu ha hyirele ye kyɛ: "Nea ná anga angyire ebiala, mmom kɔ, na kɔfa wɔ nwo kyire sɔfo nemɔ, na fa akyɛdeɛ bɔ Mose hyɛle ne ma bɛ, na ɔyɛ adanzeɛ ma bɛ."

5 Owurale Kapernaum ne, sogyaniɛ panyi bie wale ye berɛ, na ɔsrɛle ye kyɛ: 6 "Me wura, m’akoaa abubu la awuro, na onwu amaneɛ paa." 7 Yeɛ ɔha hyirele ye kyɛ, "Medwu dɔ a, ngɔsa ye anwonyerɛ." 8 Sogyaniɛ panyi ne ha hyirele ye kyɛ: "Me wura, memvata kyɛ ɛba m’awuro, wɔ de ka edwirɛ bie, na m’akoaa ne nwo kɔtɔ ye. 9 Ofikyɛ nwura mmeraa bo, na nne sogyafoɛ bɔ bɛwura me bo. Meka mekyire ebie kyɛ, ‘Kɔ’ a, né wahɔ, na meka mekyire sona foforɛ koso kyɛ, ‘Bra!’ na wawa, na m’akoaa koso, meka mekyire ye kyɛ, ‘Yɛ ɛhe,’ ne wayɛ." 10 Yesu tele ɛhe ne, ɔyɛle ye nwanwa, na ɔha hyirele bɛ bɔ bɛli ye si ne kyɛ: "Nahorɛ bɔ meka mekyire ɛmɔ yeɛ ole kyɛ, nnwuni ebiala bɔ ole gyidie piri sɔa wɔ Israel. 11 Na meka mekyire ɛmɔ, mmeni pee kofi eyia afiteleɛ, ne eyia atɔleɛ kɔwa, na bɛne Abraham, Isaac, ne Yakob kɔtena tɛbulu nwo kodidi wɔ anwuro Ahennie nanu; 12 nakoso Ahennie ne mmaa ne de, bɛkogyi bɛ bɛkogua awosii nu wɔ aluo. Ɛberɛ yeɛ bɛkosu, na bɛ anwose bɛ gye." 13 Yeɛ Yesu ha hyirele sogyaniɛ panyi ne kyɛ: "Kɔ. Na kyɛbɔ ahyire kyɛ ɛle gyidie ne, ɔyɛ berɛ ma wɔ." Na sɔ mmerɛ nala, ye akoaa ne nwo tɔle ye.

14 Afei Yesu hɔle Petro awuro, odwuli berɛ ne, onwuni kyɛ ye sia brasua la berɛ bɔ fiiva* ahye ye. 15 Yeti, ɔsɔle ye sa nu, na fiiva ne hɔle. Yeɛ maame ne dwɔsole, na ɔhyɛle yebo kyɛ ɔsõ ye. 16 Sɔ nnɔsoa ne, bɛfale mmeni pee bɔ sunzummɔne wɔ bɛ so bɛwale Yesu berɛ. Ɔfale ye noa nu dwirɛ tuli sunzummɔne nemɔ, na ɔsale bɛ bɔ bɛnde apɔ né anwonyerɛ. 17 Ɛhe maa edwirɛ bɔ diifoɛ Isaiah hane ne wale nu kyɛ:

"Ye yeɛ ɔfale yɛ ahotutuo,

na ɔsoale yɛ anwonyerɛ ɔ."

18 Yesu nwuni kyɛ mmenia pee apɛ ye nwo ayia ne, ɔha hyirele asuafoɛ ne kyɛ bɛhɔ nzue ne si dɔ. 19 Na atwerɛfoɛ nanu kõ wale berɛ, yeɛ ɔha hyirele ye kyɛ: "Kyerɛkyerɛniɛ, nekaa biala bɔ ɛkɔhɔ ne, mene wɔ kɔhɔ." 20 Yesu koso ha hyirele ye kyɛ: "Kangane mɔ le bɔen, na ewienu nnomaa le buye, nakoso sona Awa ne de, olle nekaa bɔ ɔfa ye ti po to ɔ." 21 Ná asuafoɛ nanu kõ ha hyirele ye kyɛ: "Awurade, ma nni moa ngɔnzie me baba kora." 22 Nakoso Yesu ha hyirele ye kyɛ: "Di me si, na awufo sie b’awufo."

23 Yesu tenane ɛleɛn nanu ne, ye asuafoɛ nemɔ lili ye si. 24 Afei, mvrama kandinga bie tuli wɔ ɛpo naso, na né asorɔkye ne pena kata ɛlɛen naso; nakoso Yesu de, né wala. 25 Yeti bɛtingyele ye, na bɛha behyirele ye kyɛ: "Awurade, dɛ́ yɛ, na yawu yayie." 26 Nakoso, ɔha hyirele bɛ kyɛ: "Ɛmɔ bɔ ɛmɔ gyidie te kaa, nzuati yeɛ ɛmɔ amaa esuronyi aha ɛmɔ ne?" Na ɔdwɔso teɛteane nzue ne mvrama ne, na bɛyɛle konn. 27 Yeti ɔyɛle mmrienzua ne nwanwa maa bɛhane kyɛ: "Sona beni ɛhe, bɔ mvrama ne ɛpo po tie ye ne?"

28 Odwuli nzue ne si dɔ, Gadarafoɛ aseɛ naso ne, mmrienzua nyɔ bie bɔ sunzummɔne wɔ bɛ so fili asieleɛ naso yiale ye. Né bɛ nye so yɛ hye paa, yeti né ebiala nne berɛ bɔ ɔkora fa sɔ atee naso ɔ. 29 Na bɛteɛteane nu kyɛ: "Nyameɛ Awa, nzu yeɛ ɔwɔ yɛne wɔ afia ɔ? Awa ɛwa kyɛ ɛbaaha yɛ kora ne mmerɛ ne aso?" 30 Né mbrako pee mbaen bie wɔ dede bɛdidi. 31 Yeti sunzummɔne nemɔ srɛle Yesu kyɛ: "Sɛ etu yɛ a, maa yɛɛwura sɔ mbrako nemɔ nu." 32 Na ɔha hyirele bɛ kyɛ, "Ɛmɔhɔ!" Yeti bɛfili bɛ nu bɛɛwurale mbrako nemɔ nu. Na mbrako namukoraati tuli mirika fili bokaa naso beeguale ɛpo nanu, na bɛwuli wɔ nzue nanu. 33 Yeti bɛ bɔ ne bɛnea mbrako ne nwatili, na bɛhɔle kuro nanu bɛɛhane bɔ wasi namukoraati, bɛhane mmrienzua bɔ otuli sunzummɔne ne fili bɛ nu ne koso nwo dwirɛ. 34 Na kuro nanufoɛ mukoraati wale kyɛ bɛ baapena Yesu. Bɛnwuni ye ne, bɛsrɛle ye kyɛ ofi bɛ mandanu berɛ hɔ.