ROMANFOƐ 13

1 Ɛmɔma sona biala brɛ ye nwo ase wura atumvoɛ bɔ bɛwɔ berɛ nabo, ofikyɛ tumi biala nne berɛ, sana bɔ ofi Nyameɛ berɛ ne. Na atumvoɛ bɔ bɛwɔ berɛ ne, Nyameɛ yeɛ wama bɛ atee kyɛ bɛli tumi ɔ. 2 Yeti, ebiala bɔ ɔkɔdwɔso kotia atumvoɛ bɔ bɛwɔ berɛ ne, né odwɔso tia Nyameɛ nhyehyɛɛ, na bɛ bɔ bɛyɛ sɔ ne, bɛkɔfa atemmuo bɛkɔwa bɛ nwo so. 3 Sɛ ebie yɛ nikye pa a onzuro bɛ bɔ bɛdi tumi ne, bɔ ɔyɛ bɔne ne mmom yeɛ ɔsuro bɛ ɔ. Ɛnkuro kyɛ esuro atumvoɛ nemɔ anaa? Ye de yɛ nikye pa, na bɛkɔ kamvo wɔ. 4 Ofikyɛ bɛte Nyameɛ asomvoɛ, na wɔ pa nu ti yeɛ bɛwɔ berɛ ɔ. Nakoso sɛ ɛyɛ bɔne de a, suro, ofikyɛ ottira dadeɛ ne mbaen. Ɔte Nyameɛ somvoɛ bɔ ɔtwe bɛ bɔ bɛyɛ bɔne ne so. 5 Ɛhe ati yeɛ odikyɛ ebu atumvoɛ nemɔ ne, nná asotwe bɔ ɛkɔkwati ne ngome ti ɔ, mmom w’ahonim*13:5 Anaa "Tiboa." koso ti. 6 Ɛhene koso ati yeɛ odikyɛ etua toɔ ne, ofikyɛ atumvoɛ nemɔ te Nyameɛ asomvoɛ bɔ bɛsõ maen ne, na bɛyɛ b’adwuma daa. 7 Ɛmɔtua ebiala deɛ bɛma ye: bɔ odɛ́ toɔ ne, ɛmɔtua toɔ bɛma ye, bɔ odɛ́ alambo ne, ɛmɔfa alambo bɛma ye; bɔ odikyɛ ɛmɔsuro ye ne, ɛmɔfa esuronyi bɔ ɔte sɔ bɛma ye; na bɔ ɔfata nidie ne, ɛmɔfa nidie bɛma ye.