1 Nniema mɔ, ɛmɔnze kyɛ ebie te ase a, yeɛ mmeraa kyekye ye hɔ? (Ofikyɛ me dwudwo mekyire bɛ bɔ bɛse mmeraa ne.) 2 Ebie yeɛ ole kyɛ, brasua bɔ wagya ne, mmeraa akyekye ye abata ohu nwo, mmerɛ bɔ brienzua ne te ase ne. Nakoso sɛ ohu ne wu a, walɛ ye nwo wafi mmeraa bɔ ne wakyekye ye nanwo. 3 Yeti mmerɛ bɔ ohu te ase ne, sɛ ɔkɔ brienzua foforɛ nwo a, wasɛkye agyaa. Nakoso sɛ ohu wu a, mmeraa ne ngyekye ye kõ, yeti sɛ ogya biaa foforɛ a, ɔsɛkyelle agyaa.

4 Aliemaa mɔ, sɔ ala yeɛ ɔte wɔ ɛmɔ afa nu ɔ. Ɛmɔnate Kristo nipadua naso awu bama mmeraa ne, kyɛbɔ ɔkɔyɛ a, ɛmɔ kɔyɛ sona foforɛ deɛ; ɛmɔ kɔyɛ bɔ bɛtingyele ye bɛfili ewue nu, kyɛbɔ ɔkɔyɛ a ɛmɔ kosu mmaa bɛkɔma Nyameɛ ne deɛ. 5 Ofikyɛ mmerɛ bɔ yɛte ase wɔ anwoɔnaen nu ne, bɔne akɔnnɔ bɔ mmeraa ne kanyane ye ne, ɔyɛle adwuma wɔ y’akwaa nu, na osuli mmaa bɔ ɔkɔ ewue nu. 6 Nakoso kesaalae de, balɛ́ yɛ bafi mmeraa nabo, ofikyɛ yawu yama bɔ ne wakyekye yɛ ne, kyɛbɔ ɔkɔyɛ a yɛkɔfa honhom naso yɛkɔyɛ ngoaa wɔ atee foforɛ so, ná ɔtte atee daa bɔ né bahworɔ ne.

7 Ye de, nzu yeɛ yɛpena yɛkyire ɔ? Yɛnwa mmeraa ne te bɔne anaa? Daabi! Nakoso sɛ nná mmeraa ne ahɔ a, ahaa menze bɔne. Ofikyɛ sɛ mmeraa ne anga kyɛ, "Nnɛmaa wɔ nye boro wɔ mmango nikye" a, ahaa menze anyeborolɛ. 8 Nakoso sɔ mmeraa nati, bɔne nyane ye nwo atee fale anyeborolɛ wurale me nu, ofikyɛ sɛ mmeraa nne berɛ a, bɔne awu. 9 Bɔ ɔte yeɛ ole kyɛ, mmerɛ bɔ ne mmeraa nne berɛ ne, ndenane ase. Nakoso mmeraa ne wale ne, bɔne sa mane ye nwo so maa nwuli. 10 Yeti mma nwuni kyɛ, mmeraa bɔ ahaa odikyɛ ɔfa ngoa ba ne, ewue mmom yeɛ ɔfa wale ɔ. 11 Ofikyɛ mmeraa nati, bɔne nyane ye nwo atee laka-lakale me, na ohuni me. 12 Yeti mmeraa ne te krongron, na ahyɛdeɛ ne koso te krongron, ɔtengyɛ, na ɔte pa.

13 Ye de, nikye pa bie yeɛ ɔmaa nwuli anaa? Daabi oo! Bɔne mmom yeɛ ɔmaa nwuli ɔ, kyɛbɔ ɔkɔyɛ a bekonwu ye kyɛ, bɔne yeɛ ɔnate nikye pa bie so wafa ewue wawa me so ɔ, na wamaa bɔne afa ahyɛdeɛ naso ala ye nwo ali kyɛ ɔttemaye koraa. 14 Yɛse kyɛ mmeraa ne te honhom nu nikye, na me de, nde anwoɔnaen bɔ batɔne me kyɛ akoaa bama bɔne. 15 Na bɔ meyɛ ne po, mende yebo; ofikyɛ bɔ mepena kyɛ meyɛ ne, nná ɛhene yeɛ meyɛ ɔ, bɔ menguro ne mmom yeɛ meyɛ ɔ. 16 Ɔnate kyɛ bɔ menguro yeɛ meyɛ nati, medɛ́ meto nu kyɛ mmeraa ne te pa. 17 Yeti nná me bɔbɔ deinn yeɛ meyɛ sɔ nningyein ne, mmom bɔne bɔ ɔte me nu ne, yeɛ ɔyɛ sɔ ne. 18 Ofikyɛ mese ye paa kyɛ, me nu, kyire kyɛ me nipadua nu ne de, nikye pa biala nne berɛ bɔ ɔte nu ɔ; ofikyɛ mepena kyɛ meyɛ nikye pa, nakoso mengora ye yɛ. 19 Pa bɔ mekuro ne, menyɛ, bɔne bɔ menguro ne mmom yeɛ meyɛ ɔ. 20 Yeti sɛ bɔ menguro yeɛ meyɛ a, ye de nná me yeɛ meyɛ ɔ, bɔne bɔ ɔte me nu ne mmom yeɛ ɔyɛ ɔ.

21 Yeti, mmeraa he yeɛ manwu ye wɔ me nwo ɔ, yeɛ ole kyɛ: Mmerɛ biala bɔ mepena kyɛ meyɛ pa ne, né bɔne aye yeti. 22 Me nu paa de, me nye gye Nyameɛ mmeraa nwo, 23 nakoso menwu mmeraa foforɛ wɔ me nu, bɔ ɔkõ tia mmeraa bɔ ɔwɔ m’adwene nu ne, na ɔfa me yɛ akoaa ma bɔne mmeraa bɔ ɔte me nu ne. 24 Me dwirɛ yɛ anwunvo paa! Nwa yeɛ okole me kofi nipadua bɔ ɔkɔ ewue nu he anu ɔ? 25 Asennaa fa y’Awurade Yesu Kristo so ha Nyameɛ! Afei, mafa m’adwene mayɛ akoaa mama Nyameɛ mmeraa, nakoso mafa me nwonaen mayɛ akoaa mama bɔne mmeraa.