1 Mwijuba lya tatu, kale kwa tendala umukiti go maseswa mu munzi gwa Kana, mu cilalanda ca Galileya. Nyina gwa Jesu ko kali, 2 Jesu ne bazigigwa bakwe nabo naba kugigwa ku mukiti. 3 Mi waine aa sejila mani, Nyina gwa Jesu kale ga mulugwila buti, "Iwaine jilamani."

4 Jesu kale ge mwitaba buti, "Maa, tobotele uku ni lugwila byo kutenda? Inako jangu jisini kusika."

5 Nyina kale alugwila abaika buti, "Mutende ibi saka ami gambaguze byonse."

6 Ko kakuli tuzunga to mabwe totosanwe ne kakole katu ningikitweo, utu kaba shambilanga Amajuda mwi nako jo mikiti kuja ko cizo cabo utu katusika akulema kutenda amakumi gobile kampa gotatwe. 7 Jesu kale alugwila abaika buti, "Musintile amenzi mutuzunga tubumbe." Mane tu sintauke, 8 Jesu kale aba lugwila buti, "Cwale muteke mu menzi gago mumu twalile uju ajendesa umukiti." Kale ba mutwalila gago menzi. 9 Mujendesi go mukiti aa shutula amenzi aga naga zoka waine. Taa kazekelele jejo iwaine uku kajizwa kono, abaika aba naba kateka menzi kabezi, mi umujendisi kale akugila umusesi kumbali 10 nokutyo, "Umuntu gense gasa tagilanga iwaine indotu tansila, mi abantu aa sebala dakwi lwini, ko kuwegwa iwaine imangoju, kono igwe ula biki indotu kusika jejino inako!"

11 Byebi ne bisupo bye tanzi naga tenda Jesu mu munzi gwa Kana mwa Galileya, ka byebyo naga bikululwa mu bunene bwakwe, mi abazigigwa bakwe naba muzumina.

12 Byebyo aa sebila mani, Jesu kale aja kwa Kapenaumi ne nyina, noba kwakwe, no bazigigwa bakwe, koko kale bakekalako bulyo amajuba amace.

13 Umukiti go majuda gwe Mpaseka seka gu kokelele afuwi, mi Jesu kale aja kwa Jelusalema. 14 Momo mwilapa lyo Tempele Jesu kale akagwana abantu ba gulisa in’ombe, ingu no tukwilimba, mi bamwinya nabe kele bucinca amashelen’i amatafule gabo. 15 Jesu kale aosha iciwepu amukumba go n’ombe, mi kale abatanda bonse mwi lapa lyo Tempele, ne ngu, in’ombe jabo bobo. Kame kale amwaga mwaga ama shelen’i aga kabakwesi kucinca, no kugwisa amatafule gabo. 16 Mi kale alugwila aba kaba gulisa utu nkwilimba buti, mutu zwisemo tonse, muleke ukuzola injugo ja Tata icibaka co magulikizo. 17 Abazigigwa bakwe kale ba gaja ubu kun’olelwe, "Nyambe, icisemo cangu ku njugo jako, casa jakila mu cizuba cangu sinagwe mulilo."

18 Ama juda kale babuza buti, "Ni cisupo ja buti iji soko utende, iji saka jitu bonise buti uli kwesi inguzu jo kutenda zezo zokukala bobo."

19 Jesu kale abataba buti, "Mu jakulule Itempele jeji, Ime kuti nani jijake mu majuba go tatwe bulyo."

20 Amajuda kale bamubuza buti, "Itempele jeji naja tuindila imyaka jo makumi gone natosanwe nakakole (46) muku jaka, kono igwe buti utyo kuti, no jijake muma juba go tatwe."

21 Kono Itempele ka sukulula Jesu kaguli umubili gwakwe. 22 Jesu aa sala buki ku bafwu, abazigigwa bakwe kale bagaja ibi naga gamba, mi kale bazumina in’olo, no majwi sali kugamba Jesu.

23 Jesu aa kakele mwa Jelusalema mwinako jo mukiti gwe Mpaseka, ubungi bo bantu kale babona ibisupo katenda mi kale bazumina mwizina lyakwe. 24 Kono Jesu ta a kaba sepite, ukuti kabezi bonse. 25 Mi taa kashaka ubumpaki bungi bo muntu, ukuti kezi ici kacili mu mojo go muntu gense.