1 Coríntios 10

Xkri̱doo rí nigíꞌníí xa̱bo̱ Israél

1 A̱ngui̱nꞌ, nandoꞌ rí ma̱rmáꞌáan a̱kia̱nꞌlaꞌ rí mbá xúgíin táta̱-xi̱ꞌñáxo̱ꞌ wajyúú ningrigúu̱n ná agoo xka̱mixoo du̱u̱n, jamí mbá xúgíi̱n ninújngúu̱n ná awúun iya a̱pha̱. 2 Mbá xúgíi̱n waxúꞌdu-maꞌíi̱n ná awúun du̱u̱n jamí ná awúun iya a̱pha̱ kajngó magóo̱ tsu̱du̱u̱ Moisés. 3 Mbá xúgíi̱n niꞌphi̱i̱ mbóó ikhaa máꞌ ganitsu rí nixnúu̱ Ana̱ꞌlóꞌ, 4 jamí mbá xúgíi̱n niꞌwa̱a̱n mbóó ikhaa máꞌ iya rí nixnúu̱ Ana̱ꞌlóꞌ. Numuu rí niꞌwa̱a̱n iyoo pátsí rí na̱ꞌkha̱ ga̱jma̱á nindxúu̱n, jamí pátsí rúꞌkhue̱n ñajuun Krísto̱. 5 I̱ndo̱ó máꞌ numuu rí phú mbaꞌii̱n ikhii̱n táni̱gu̱u̱ꞌ Ana̱ꞌlóꞌ nini̱i̱, ikhaa jngó nijáñúu̱ jamí ninguanúu̱ xuñúu̱ ná mbaa niníí.

6 Mbá xúgíí rúꞌkhue̱n niríga̱ kajngó ma̱ꞌne mbá xkri̱da mbu̱ꞌyáálóꞌ, kajngó ma̱xáni̱gua̱ꞌlóꞌ mu̱ꞌne̱lóꞌ rí ra̱máján, xómá rí ni̱ni̱gúu̱n muni̱i̱ ne̱ ikhii̱n. 7 Ni máꞌ ma̱xánindxa̱ꞌlóꞌ xa̱bo̱ tsí nune̱-mbi̱in tsí ra̱ꞌkháa Ana̱ꞌlóꞌ ñajúún, xómá nini̱i̱ mbá tikhuu̱n. Numuu rí xáꞌnii ka̱ma naꞌthán ná i̱yi̱i̱ꞌ ajngóo Ana̱ꞌlóꞌ: «Nitrigi̱in xa̱bo̱ mu̱peꞌtso jamí nijngii̱n, wámba̱ rúꞌkhue̱n nini̱i̱ rí nandoo xuñúu̱».*10.7 Ajngáa ríge̱ꞌ na̱ꞌkha̱ ná I̱yu̱u̱ꞌ xó nigájna̱á xa̱bo̱ 32.6. 8 Ni máꞌ mu̱xúꞌbálóꞌ gajmiálóꞌ xa̱bo̱ tsí túꞌyáalóꞌ, xómá nini̱i̱ mbá tikhuu̱n. Ikhaa jngó, mbóó mbiꞌi nijáñúú mbá skíñú i̱tsu̱ míl (23 000) xa̱bo̱. 9 Ni máꞌ mu̱xúꞌjmaalóꞌ Táta̱ kajngó mbu̱ꞌyáálóꞌ xí mba̱a̱ a̱kuii̱n, xómá nene̱ mbá tikhuun tsí ikhii̱n, ikhaa jngó wanitsúu̱n nene̱ a̱bo̱ꞌ jamí nijáñúu̱. 10 Ni máꞌ mu̱xúꞌne̱-gajmálóꞌ, xómá nini̱i̱ mbá tikhuu̱n, ikhaa jngó nijáñúu̱ neꞌne ánje̱l tsí na̱gu̱díin xa̱bo̱.

11 Mbá xúgíí ríge̱ꞌ nigíꞌníí táta̱-xi̱ꞌñáxo̱ꞌ wajyúú kajngó ma̱ꞌne xkri̱da mbu̱ꞌyáálóꞌ, jamí waꞌtháán ne̱ ná i̱yi̱i̱ꞌ ajngóo Ana̱ꞌlóꞌ kajngó maxpríguálóꞌ ne̱, tsáanꞌ juwalóꞌ ná awúun mbiꞌi rí inu ma̱mbá numbaa. 12 Ikhaa jngó, tsí na̱ju̱mu̱u̱ rí wéje̱-gúkúu, ga̱ꞌyoo̱ lá ra̱ꞌkhá ma̱xpátri̱ga̱a̱ mbayíí. 13 Tsirájá rí na̱ꞌkha̱ inalaꞌ, ikhaa máꞌ rúꞌkhue̱n na̱ꞌkha̱ inúú mbá xúgíin xa̱bo̱ numbaa. Xómáꞌ Ana̱ꞌlóꞌ phú jmbii, ikhaa jngó ma̱xániñuu̱ rí ma̱gu̱ma-rájáanꞌlaꞌ i̱tha̱án gakhe̱ xó rí ma̱ꞌnga̱ꞌlaꞌ ma̱wajún-ꞌthi̱ín. A̱ꞌkhue̱n gakon, ído̱ rí ma̱ꞌkha̱ tsirájá inalaꞌ, marmáꞌthoo̱ mbá xkrugua ná ma̱ga̱jnálaꞌ kajngó ma̱ꞌnga̱ꞌlaꞌ ma̱wajún-ꞌthi̱ín ne̱.

Mu̱xúꞌne̱-mbi̱inlóꞌ tsí ra̱ꞌkháa Ana̱ꞌlóꞌ ñajúún

14 Ikhaa jngó, a̱ngui̱nꞌ, tsáanꞌ phú nandoꞌ ja̱ya̱ꞌlaꞌ, mu̱xúne̱-mbi̱inlaꞌ tsí ra̱ꞌkháa Ana̱ꞌlóꞌ ñajúún. 15 Xúꞌkhue̱n i̱tha̱nꞌlaꞌ numuu rí xa̱bo̱ tsí nafruꞌu̱ún ñajwanlaꞌ. Gu̱ra̱jwa̱ꞌlaꞌ máꞌ ikháanꞌlaꞌ rí na̱tha̱nꞌlaꞌ. 16 Ído̱ nawanlóꞌ iyoo rgúxi̱ jamí nu̱rígu̱ulóꞌ gamaku inuu Ana̱ꞌlóꞌ, mbá xúgiáanꞌlóꞌ mbéꞌtháán nduꞌya-makuíílóꞌ iꞌdiuu Krísto̱. Xúꞌkhue̱n máꞌ ído̱ nu̱xpíꞌtháalóꞌ guma, mbá xúgiáanꞌlóꞌ mbéꞌtháán nduꞌya-makuíílóꞌ xuyuu Krísto̱. 17 Mbóó máꞌ guma rí napholóꞌ mbá xúgiáanꞌlóꞌ, ikhaa jngó mbáwíi máꞌ xa̱bo̱ ñajwanlóꞌ mbá xúgiáanꞌlóꞌ, maske máꞌ phú mbaꞌáanꞌlóꞌ.

18 Gu̱ya̱xi̱ílaꞌ xómá ene̱ xa̱bo̱ Israél: tsí naꞌpho̱ xuwi tsi̱gi̱jña̱ꞌ, jambáxúu̱n naꞌphi̱i̱ xuwi tsi̱gi̱jña̱ꞌ rí nakha-ráma. 19 Dí lá iyoꞌ gátha̱nꞌlaꞌ ga̱jma̱á numuu xkri̱da ríge̱ꞌ rá. Tsítha̱n rí gíꞌdoo numúú tsí ra̱ꞌkháa Ana̱ꞌlóꞌ ñajúún, ni máꞌ rí gíꞌdoo numuu xuwi rí kixnáxe̱ ná inúu̱. 20 Na̱tha̱nꞌlaꞌ rí ído̱ nu̱xna̱xí tsi̱gi̱jña̱ꞌ xa̱bo̱ tsí ra̱ꞌkháa judío̱ ñajúún, ná inúú gíñá ꞌguéen nu̱xna̱xíi̱ ne̱, ra̱ꞌkhá ná inuu Ana̱ꞌlóꞌ. Ikhaa jngó, tsíyoꞌ rí mu̱peꞌtsolaꞌ gajmiálaꞌ gíñá ꞌguéen mangáanꞌlaꞌ. 21 Ma̱xáxóo mu̱wanlaꞌ iya ga̱jma̱á numuu Táta̱, jamí mu̱wanlaꞌ iya ga̱jma̱á numúú gíñá ꞌguéen mangaa. Xúꞌkhue̱n máꞌ ma̱xáxóo rí ma̱trigáanꞌlaꞌ mu̱peꞌtsolaꞌ gajmiálaꞌ Táta̱, jamí ma̱trigáanꞌlaꞌ mu̱peꞌtsolaꞌ gajmiálaꞌ gíñá ꞌguéen mangiin. 22 Á nandalóꞌ rí ma̱jiꞌnáa Táta̱ dxe̱ꞌ. Á i̱wa̱á mba̱a̱ ski̱ya̱ꞌlóꞌ ikháánꞌlóꞌ xó rí ikhaa̱ dxe̱ꞌ.

Gu̱ꞌne̱-mba̱a̱lóꞌ Ana̱ꞌlóꞌ ga̱jma̱á majñu̱u̱ mbá xúgíí rí nu̱ꞌne̱lóꞌ

23 Mbá tikhuun tsí ikháanꞌlaꞌ nuthan: «Mbá xúgíí rí nandoꞌ, ma̱goo ma̱ne̱lo̱ꞌ», i̱ndo̱ó máꞌ numuu rí ra̱ꞌkhá mbá xúgíí nafriya̱ꞌ. «Mbá xúgíí rí nandoꞌ, ma̱goo ma̱ne̱lo̱ꞌ», i̱ndo̱ó máꞌ numuu rí ra̱ꞌkhá mbá xúgíí nambáyálóꞌ. 24 Nimbáa ma̱xáꞌne i̱ndo̱ó máꞌ rí ma̱xtáa mújúun ikhaa, rí gandxaꞌwá-mine̱e̱ꞌ ga̱jma̱á numúú i̱ꞌwíin mangaa.

25 Apholaꞌ mbá xúgíí inii xuwi rí nitangu̱jo̱o̱ ná xuáá, jamí mu̱xúra̱xe̱laꞌ nimbá, ra̱ꞌkhá mu̱ndxa̱ꞌwa̱-mijnálaꞌ rí ra̱máján e̱ne̱laꞌ rí napholaꞌ ne̱. 26 Numuu rí «drígo̱o̱ Táta̱ ñajuun mbá xúgíí ju̱ba̱ꞌ jamí mbá xúgíí rí ríga̱ ná inuu ne̱».

27 Xí mbáa xa̱bo̱ tsí tsíꞌne-nuwiin Ana̱ꞌlóꞌ nandxaꞌwálaꞌ mu̱peꞌtsolaꞌ, jamí ikháanꞌlaꞌ nandalaꞌ gúꞌgualaꞌ, apholaꞌ mbá xúgíí rí nastrámee̱ inalaꞌ, ni mu̱xúra̱xe̱-mijnálaꞌ xí ma̱goo o ma̱xáxóo mu̱pholaꞌ ne̱. 28 I̱ndo̱ó máꞌ xí mbáa gáꞌthánlaꞌ: «Xuwi ríge̱ꞌ waxnáxe̱ inúú tsí ra̱ꞌkháa Ana̱ꞌlóꞌ ñajúún», ma̱xúpholaꞌ ne̱ xúꞌkhue̱n rá. Ga̱jma̱á numuu tsí niꞌthánlaꞌ ríge̱ꞌ, jamí rí ma̱xáꞌne a̱jma̱ a̱kui̱in tsúꞌkhue̱n, ma̱xúpholaꞌ ne̱. 29 Tsítha̱nlo̱ꞌ rí ikháanꞌlaꞌ ma̱xáꞌne a̱jma̱ a̱kia̱nꞌlaꞌ, rí i̱mba̱a̱ꞌ ma̱xáꞌne a̱jma̱ a̱kui̱in.

Ra̱máján ma̱ne̱lo̱ꞌ mbá rí nandoo máꞌ ma̱ne̱ xí ra̱máján iꞌyoo i̱mba̱a̱ꞌ rí ma̱ne̱ rúꞌkhue̱n. 30 Xí gakon rí ikhúúnꞌ na̱rígu̱u gamaku inuu Ana̱ꞌlóꞌ ga̱jma̱á numuu rí nakholo̱ꞌ, nda̱a̱ numuu rí i̱mba̱a̱ꞌ maꞌthán rí ra̱máján e̱ne̱lo̱ꞌ ga̱jma̱á numuu rí nakholo̱ꞌ.

31 Ikhaa jngó, xí napeꞌtsolaꞌ, o xí nawanlaꞌ iya, o asndo náá máꞌ rí e̱ne̱laꞌ mbo̱ꞌ, gu̱ne̱laꞌ rí ma̱gu̱ma-mba̱a̱ Ana̱ꞌlóꞌ ga̱jma̱á numuu mbá xúgíí rí nu̱ne̱laꞌ. 32 Mu̱xúne̱laꞌ rí ma̱ꞌne a̱jma̱ a̱kui̱in nimbáa xa̱bo̱, ni máꞌ xa̱bo̱ judío̱, ni máꞌ xa̱bo̱ tsí ra̱ꞌkháa judío̱ ñajúún, ni máꞌ tsí nanimbu̱únꞌ juyáá Ana̱ꞌlóꞌ. 33 Gu̱ne̱laꞌ xómá e̱ne̱ ikhúúnꞌ, na̱ne̱ rí ma̱ni̱gu̱únꞌ mbá xúgíin xa̱bo̱ juyeꞌ. Tsíꞌyálo̱ꞌ i̱ndo̱ó máꞌ rí ndaꞌyóꞌ ikhúúnꞌ, rí nda̱ꞌyá rí mambáñúú tsí i̱ꞌwíin mangiin, kajngó ma̱jáwíi̱n.