1 Xí na̱ma̱ñuꞌ na̱tha̱n mbaꞌa inii ajngúún xa̱bo̱ numbaa o ajngúún ánje̱l mbo̱ꞌ, jamí tsíyoꞌ ja̱ñu̱ú xa̱bo̱, ma̱nindxu̱ꞌ xómá ajwa̱nꞌ rí naꞌne wee jayu o xómá ajwa̱nꞌ jndi rí nawán ído̱ nudi̱í xa̱bo̱ mbo̱ꞌ. 2 Xí na̱ma̱ñuꞌ na̱gúwíjnga̱a ajngóo Ana̱ꞌlóꞌ, xí na̱ne̱-núwíin mbá xúgíí awan drígo̱o̱ Ana̱ꞌlóꞌ rí i̱ndo̱ó máꞌ ikhaa̱ ni̱gi̱da̱ꞌ idxu̱u̱ nákhí wajyúú, jamí na̱ma̱ñuꞌ mbá xúgíí rí ríga̱ ná tsu̱du̱u̱ numbaa, xúꞌkhue̱n máꞌ xí phú wéje̱ a̱kui̱nꞌ ná inuu Ana̱ꞌlóꞌ rí asndo ma̱goo ma̱ne̱-maꞌba̱a̱n mbá júba̱, jamí tsíyoꞌ ja̱ñu̱ú xa̱bo̱, nda̱a̱ nitháan numuꞌ xúꞌkhue̱n rá. 3 Maske máꞌ ma̱xnu̱ú mbá xúgíí rí gúꞌdo̱ꞌ tsí ngíníi, o ma̱xna̱xí-mina̱ꞌ rí mi̱khúún mbo̱ꞌ, jamí tsíyoꞌ ja̱ñu̱ú xa̱bo̱, nda̱a̱ nitháan rí gíꞌdoo numuꞌ xúꞌkhue̱n rá.

4 Tsí nandoo jaꞌñúú xa̱bo̱ phú mba̱a̱ a̱kuii̱n, jamí phú májáan a̱kuii̱n. Tsí nandoo jaꞌñúú xa̱bo̱, tsíxígu̱u̱ꞌ, tsíꞌne-tsiꞌyée̱ ni máꞌ tsíkúxe̱-mine̱e̱ꞌ. 5 Tsí nandoo jaꞌñúú xa̱bo̱, tsíꞌnii̱ nimbá rí nda̱a̱ gamakuu, tsíndxaꞌwá-mine̱e̱ꞌ i̱ndo̱ó máꞌ ga̱jma̱á numuu̱ ikhaa̱, tsíjiꞌnáa̱, tsíka̱ jayóo̱ sia̱nꞌ. 6 Tsídxu a̱kuii̱n eꞌne rí ra̱máján, rí nadxu a̱kuii̱n eꞌne rí gakon. 7 Tsí nandoo jaꞌñúú xa̱bo̱, mbá xúgíí naꞌne mba̱a̱ a̱kuii̱n jaꞌyoo̱, mbá xúgíí nanimbo̱o̱ꞌ, mbá xúgíí na̱gi̱ꞌthu̱u̱n, mbá xúgíí na̱ꞌngo̱o̱ a̱kuii̱n.

8 Jámuu ndaꞌyóo rí ma̱xtáa̱ tsí nandoo jaꞌñúú xa̱bo̱. Xómáꞌ tsí nu̱rawíjnga̱a ajngóo Ana̱ꞌlóꞌ náxáꞌyóo rí ma̱ju̱wée̱ꞌ, jamí náxájúwa̱ꞌ tsí nuthan ajngáa rí tsígu̱ma-nuwiin, xúꞌkhue̱n máꞌ ma̱mbáa mbá xúgíí rí na̱ma̱ñúú xa̱bo̱ ná tsu̱du̱u̱ numbaa. 9 Numuu rí xúge̱ꞌ na̱nguá káxe̱ e̱ꞌne̱-nuwiinlóꞌ jamí na̱nguá káxe̱ nu̱rawíjnga̱alóꞌ ajngóo Ana̱ꞌlóꞌ. 10 Ído̱ ága̱nú rí jañii, a̱ꞌkhue̱n ma̱mbáa rí na̱nguá káxe̱. 11 Ikhúúnꞌ, nákhí ninindxu̱ꞌ ada̱, ni̱tha̱n xómá naꞌthán ada̱, ni̱ndxa̱ꞌwa̱-mína̱ꞌ xómá nandxaꞌwá-mina̱ꞌ ada̱, xúꞌkhue̱n máꞌ ni̱froꞌo̱ꞌ xómá nafroꞌo̱o̱ ada̱. Jamí ído̱ ninindxu̱ꞌ xa̱bo̱ nikhi̱i̱ rá, ni̱ni̱ꞌñúu-ra̱ne̱ rí naꞌne ada̱. 12 Rí xúge̱ꞌ mbá ngidi jayu iꞌyááꞌlóꞌ, xómá tsí nayaxu̱u̱ inuu ná iyaniwan rí miꞌsmba jaꞌnii. Jamí ído̱ ága̱nú rí jañii, a̱ꞌkhue̱n rí ma̱ma̱ꞌthoo inalóꞌ jamí mbu̱ꞌyáá májánlóꞌ. Rí xúge̱ꞌ na̱nguá káxe̱ e̱ne̱-núwíinlo̱ꞌ, jamí ído̱ gága̱nú mbiꞌi rúꞌkhue̱n, a̱ꞌkhue̱n rí mba̱yo̱o̱ asndo xómá jaꞌnii naꞌne-nuwúún Ana̱ꞌlóꞌ.

13 Rí xúge̱ꞌ ríga̱ jámuu atsú ríge̱ꞌ: rí ma̱we̱je̱ a̱kia̱nꞌlóꞌ ná inuu Ana̱ꞌlóꞌ, rí ga̱jma̱á mbá jañii a̱kia̱nꞌlóꞌ mu̱waꞌthi̱ínlóꞌ ná inuu Ana̱ꞌlóꞌ jamí rí ma̱galóꞌ juꞌñúú xa̱bo̱. Xómáꞌ rí phú i̱tha̱án gíꞌdoo numuu ñajuun rí ma̱galóꞌ juꞌñúú xa̱bo̱.