1 Timóteo 2

Xáne gíꞌmaa mi̱ꞌthán-jáñíí Ana̱ꞌlóꞌ

1 Rí phú ginii na̱tha̱nꞌlaꞌ ñajuun rí mu̱tha̱n-jáñíílaꞌ Ana̱ꞌlóꞌ numúú mbá xúgíin xa̱bo̱. Gu̱nda̱ꞌa̱laꞌ, gu̱tha̱n-kháanlaꞌ jamí gu̱rígu̱ulaꞌ gamaku ná inuu Ana̱ꞌlóꞌ ga̱jma̱á numúu̱. 2 Gu̱nda̱ꞌa̱laꞌ ga̱jma̱á numúú thúngaa xúꞌkhue̱n máꞌ ga̱jma̱á numúú mbá xúgíin xa̱bo̱ ñajun, kajngó ma̱juwalóꞌ tsímáá jamí nda̱a̱ gajmá inalóꞌ gáꞌne, awúun rí juwalóꞌ nu̱ꞌne̱ jámba̱ rí nandoo Ana̱ꞌlóꞌ jamí nambáxa̱ꞌlóꞌ ga̱jma̱á gamaku. 3 Rúꞌkhue̱n rí máján jamí rí na̱ni̱gu̱u̱ꞌ Ana̱ꞌlóꞌ eꞌne, tsí naꞌne-jríñáaꞌlóꞌ. 4 Ikhaa̱ nandoo̱ rí mbá xúgíin xa̱bo̱ ma̱jáwíin jamí rí mune̱-nuwii̱n mújúu̱n rí gakon. 5 Numuu rí mbáwíi tsí ñajuun Ana̱ꞌlóꞌ xtáa, xúꞌkhue̱n máꞌ xtáa mbáwíi tsí naꞌne rí tsímáá gámbáxi̱in xa̱bo̱ ga̱jma̱á nindxu̱u̱ Ana̱ꞌlóꞌ. Ikhaa tsúꞌkhue̱n ñajuun Jesukrísto̱, tsí ninindxu̱u̱ xa̱bo̱ numbaa. 6 Ikhaa̱ nixnáxe̱-mine̱e̱ꞌ rí ma̱ja̱ñúu̱ rí ma̱ꞌne-jáwíi̱n mbá xúgíin xa̱bo̱, numuu rí niꞌnii̱ rúꞌkhue̱n nákhí ni̱ga̱nú mbiꞌi rí niꞌgí Ana̱ꞌlóꞌ. 7 Ikhaa numuu rúꞌkhue̱n nixúngu̱únꞌ Ana̱ꞌlóꞌ rí ma̱tha̱n-ráꞌa ajngóo̱. (Ndaꞌyoo Krísto̱ rí*2.7 Ríga̱ mbá tikhu i̱yi̱i̱ꞌ griégo̱ rí wayuu ná na̱nguá i̱ꞌkha̱ ajngáa ríge̱ꞌ: «Ndaꞌyoo Krísto̱ rí». gakon i̱tha̱nlo̱ꞌ, jamí tsíne̱-ndúwalo̱ꞌ). Xúꞌkhue̱n máꞌ niꞌgiúún Ana̱ꞌlóꞌ rí ma̱sngúún xa̱bo̱ tsí ra̱ꞌkháa judío̱ ñájúún xáne ma̱nimbúu̱n juyáa̱ Ana̱ꞌlóꞌ jamí ma̱sngúu̱n rí gakon.

8 Nandoꞌ rí xa̱bekha muthán-jáñíí Ana̱ꞌlóꞌ, mbá xúgíí máꞌ ná júwe̱e̱ꞌ. Gu̱xu̱xíi̱ ñawúu̱n ná inuu Ana̱ꞌlóꞌ ga̱jma̱á a̱kuíi̱n rí jaꞌwu, xúꞌkhue̱n máꞌ ma̱xájiꞌníi̱ juñúu̱ xa̱bo̱ ni máꞌ mu̱xúni̱i̱ ajngáa gajmíi̱.

9 Xúꞌkhue̱n máꞌ go̱ꞌo̱ gune̱-karatha-mijnée̱ ga̱jma̱á rí gamakuu̱n, gajúwúu̱n xtíin rí narugoo mbá jayu xuñúu̱ jamí mbayíí máꞌ numuu. Mu̱xúne̱-karatháa̱ guéño tsu̱u̱n idxúu̱n, xúꞌkhue̱n máꞌ ma̱xájmúu̱ xábí ajwa̱nꞌ mo̱jmo̱ꞌ, ni itsí kuitsúun rí mbiꞌyuu pérla̱, ni máꞌ ma̱xájúwúu̱n xtíin rí numuu mi̱ndaꞌkho. 10 I̱wa̱á máján rí gune̱-tsiꞌyá-mijnée̱ ga̱jma̱á majñu̱u̱ rí máján nuni̱i̱, xómá ga̱náꞌyoo rí mune̱ go̱ꞌo̱ tsí nuthan rí nune̱ rí nandoo Ana̱ꞌlóꞌ.

11 Ga̱ꞌne-wíyuu rawúún go̱ꞌo̱ ído̱ rí nune̱-gajma̱a̱ jamí gune̱-mbáníi̱ mbá xúgíí rí nithúu̱n. 12 Numuu rí tsíxnu̱u̱ a̱ꞌgo̱ rí maꞌsngúún xa̱bekha, ni máꞌ rí maꞌthán-ñájúu̱n. Rí gíꞌmaa ma̱ꞌne a̱ꞌgo̱ ñajuun rí ma̱xtáa̱ wíyuu̱. 13 Numuu rí Ana̱ꞌlóꞌ ginii Adán neꞌne-ku̱maa̱, jamí nda̱wa̱á neꞌne-ku̱maa̱ Éba̱. 14 Mbáá máꞌ rí ra̱ꞌkhá Adán ñajuun tsí ni̱gu̱ma-nduwaa, rí a̱ꞌgo̱ ni̱gu̱ma-nduwaa. Jamí ído̱ wámba̱ ni̱gu̱ma-nduwaa̱, a̱ꞌkhue̱n nixuda-mine̱e̱ꞌ aꞌkhán. 15 I̱ndo̱ó má numuu rí ma̱jáwíin go̱ꞌo̱ ído̱ rí ma̱gu̱mii i̱jíi̱n, xí wéje̱ a̱kuíi̱n ná inuu Ana̱ꞌlóꞌ, xí nandúu̱n juñúu̱ xa̱bo̱, jamí jaꞌwu júwe̱e̱ꞌ ná inuu Ana̱ꞌlóꞌ ga̱jma̱á gamaku.