1 Ikhúúnꞌ nda̱yo̱o̱ mújúnꞌ rí nda̱a̱ máꞌ numuu rí ma̱tha̱n rí máján ga̱jma̱á numuꞌ máꞌ ikhúúnꞌ. I̱ndo̱ó máꞌ numuu rí ndaꞌyóo rí ma̱tha̱nꞌlaꞌ ga̱jma̱á numuu rí ndi̱yo̱o̱ jamí nisngájmiꞌ Táta̱. 2 Na̱ne̱-núwíin mbáa xa̱bo̱ tsí na̱ka̱ tsu̱du̱u̱ Krísto̱, tsí nákhí timbá gu̱wa̱ꞌ i̱kho̱ (14) tsigu eꞌne mbá nacha̱ ni̱ka̱ jiꞌyáa̱ asndo ná riatsú awúun mikhuíí. I̱ndo̱ó máꞌ numuu rí tsíyo̱o̱ xí ni̱ka̱ jiꞌyáa̱ ga̱jma̱á máꞌ xuyuu̱ o i̱ndo̱ó máꞌ xu̱u̱ꞌ mbo̱ꞌ, i̱ndo̱ó máꞌ Ana̱ꞌlóꞌ ndaꞌyoo. 3 Gakon, i̱ndo̱ó máꞌ Ana̱ꞌlóꞌ ndaꞌyoo xí ni̱ka̱ jiꞌyáa̱ ga̱jma̱á xuyuu̱ o i̱ndo̱ó máꞌ ga̱jma̱á xu̱u̱ꞌ mbo̱ꞌ. I̱ndo̱ó máꞌ numuu rí nda̱yo̱o̱ 4 rí mbá nacha̱ ni̱ka̱ jiꞌyáa̱ ná mikhu mitsaan jamí ikhín nidxawuu̱n rí tsíyoo mi̱ꞌthán ga̱jma̱á ajngáa, rí tsíjanáá maꞌthán asndo nimbáa xa̱bo̱ numbaa. 5 Ma̱goo ma̱ku̱xí-mina̱ꞌ ikhúúnꞌ ga̱jma̱á numuu xa̱bo̱ tsúꞌkhue̱n, xí numuu rí nandoꞌ, i̱ndo̱ó máꞌ numuu rí ma̱xáne̱. Xómáꞌ ikhúúnꞌ ma̱ku̱xí-mina̱ꞌ i̱ndo̱ó máꞌ ga̱jma̱á numuu rí wabúúnꞌ. 6 Xí nandoꞌ rí ma̱ku̱xí-mina̱ꞌ ga̱jma̱á numuu rúꞌkhue̱n, ma̱goo ma̱ne̱lo̱ꞌ, ra̱ꞌkhá máꞌ najmiyuꞌ, numuu rí gakon máꞌ rí na̱tha̱nlo̱ꞌ. I̱ndo̱ó máꞌ numuu rí ma̱xáku̱xí-mina̱ꞌ, kajngó nimbáa ma̱xáju̱mu̱u̱ rí i̱tha̱án máꞌ na̱ma̱ñuꞌ ikhúúnꞌ xó rí ndaꞌyoo̱ na̱ne̱ o xó rí nadxawuu̱n na̱tha̱n mbo̱ꞌ.

7 Ikhaa máꞌ numuu rúꞌkhue̱n, rí ma̱xáku̱xí-mina̱ꞌ guéño ga̱jma̱á numuu rí phú wáá rí wasngájmuꞌlo̱ꞌ, ni̱ꞌkha̱ mbá gajmá inuꞌ rí asndo xómá tsuwan jaꞌnii bráꞌa ná xuyuꞌ. Gajmá rúꞌkhue̱n ni̱ꞌkha̱ neꞌne Satanás, kajngó ma̱ꞌnii̱ rí ma̱mínu̱u̱ꞌ, jamí ma̱xánújngo-rámuu guéño rí ma̱ku̱xí-mina̱ꞌlo̱ꞌ. 8 Atsú nothon ni̱tha̱n-jáñuu Táta̱ rí marígúu̱ gajmá rúꞌkhue̱n ná xuyuꞌ. 9 Xómáꞌ Ana̱ꞌlóꞌ niꞌthínꞌ: «Mbájndi máꞌ rí na̱ne̱-tsakun-rámááꞌ, numuu ído̱ rí ikháánꞌ wabáánꞌ, i̱tha̱án máꞌ nakujma ski̱yu̱ꞌ ikhúúnꞌ». Ikhaa jngó, nadxu a̱kui̱nꞌ na̱tha̱n rí wabúúnꞌ, kajngó ma̱kujma ski̱yu̱u̱ꞌ Krísto̱ ga̱jma̱á nindxu̱ꞌ ikhúúnꞌ. 10 Ikhaa numuu rúꞌkhue̱n nadxu a̱kui̱nꞌ rí wabúúnꞌ, rí nuthan-xkawi̱ꞌ xa̱bo̱, rí xtáá ná awúun tsingíná, rí tsíñúú xa̱bo̱ gúyeꞌ, jamí rí na̱mínu̱u̱ꞌ ga̱jma̱á numuu Krísto̱. Numuu ído̱ nda̱yo̱o̱ rí wabúúnꞌ, a̱ꞌkhue̱n rí phú gúꞌdo̱ꞌ tsiakhe̱.

11 Xómá eꞌne mbáa xa̱bo̱ tsí najmiyuu e̱ne̱ rí na̱ku̱xí-mina̱ꞌ ná inalaꞌ, xómáꞌ ikhúúnꞌ na̱ne̱ rúꞌkhue̱n numuu rí ikháanꞌlaꞌ ni̱tsu̱dúúnlaꞌ. Ikháanꞌlaꞌ jaꞌyoo mu̱tha̱nlaꞌ rí máján ga̱jma̱á numuꞌ. Maske máꞌ gakon rí nda̱a̱ rí ñajunꞌ, ra̱ꞌkhá máꞌ rúꞌkhue̱n iꞌthán rí i̱tha̱án gíꞌdoo numúu̱ ikhii̱n xó rí ikhúúnꞌ, «tsí waxúngui̱inꞌ mbo̱ na̱ma̱ñúú mi̱ndaꞌkho» kuaꞌdiinlaꞌ a̱ꞌkhue̱n. 12 Nákhí nixtáá ga̱jma̱á nindxa̱ꞌlaꞌ ni̱snga̱jmálaꞌ rí ikhúúnꞌ ñajunꞌ mbáa tsí waxúngua̱a̱ꞌ neꞌne Jesukrísto̱. Ni̱snga̱jmálaꞌ rúꞌkhue̱n ga̱jma̱á majñu̱u̱ rí phú mba̱a̱ a̱kui̱nꞌ ne̱ne̱ ná inalaꞌ, xúꞌkhue̱n máꞌ ga̱jma̱á majñu̱u̱ rí phú wáá rí ne̱ne̱ jamí rí phú nimakúún xa̱bo̱ eꞌne. 13 Gakon máꞌ rí táne̱ ga̱jma̱á nindxa̱ꞌlaꞌ ikháanꞌlaꞌ xómá rí ne̱ne̱ ga̱jma̱á nindxu̱ún i̱ꞌwíin kuthuun tsí nanimbu̱únꞌ juyáá Jesús: táne̱-gajmálaꞌ rí mu̱xnu̱ꞌlaꞌ rí ndaꞌyóꞌ. Gu̱ne̱ mba̱a̱ a̱kia̱nꞌlaꞌ ju̱yo̱ꞌ xí ne̱ne̱-ñawánlaꞌ ga̱jma̱á numuu rúꞌkhue̱n.

14 Rí xúge̱ꞌ rá, xtáá máꞌ na̱ma̱ñuꞌ rí ma̱ꞌgá gáya̱ꞌlaꞌ rí riatsú nothon, jamí ma̱xáne̱-gajmálaꞌ máꞌ rí mu̱xnu̱ꞌlaꞌ rí ndaꞌyóꞌ. Numuu ra̱ꞌkhá rí guáꞌdáálaꞌ i̱ꞌyálo̱ꞌ, rí jmína̱áꞌ máꞌ ikháanꞌlaꞌ naxná-gamiéjunꞌ e̱ne̱laꞌ. Mbáá máꞌ rí ra̱ꞌkhá tsí ñajúún e̱je̱n jaꞌñúu̱ mu̱gímbíi̱ rí ndaꞌñúú anúu̱, rí anúu̱ jaꞌñúú mu̱gímbú rí ndaꞌñúu̱ ikhii̱n. 15 Xómáꞌ ikhúúnꞌ phú nadxu a̱kui̱nꞌ rí ma̱jmuꞌ rí gúꞌdo̱ꞌ, xúꞌkhue̱n máꞌ rí ma̱ne̱-gámba̱-mina̱ꞌ ga̱jma̱á numalaꞌ numuu rí nandoꞌ ja̱ya̱ꞌlaꞌ, maske* máꞌ ído̱ rí i̱tha̱án nandoꞌ ja̱ya̱ꞌlaꞌ, ikháanꞌlaꞌ mbá lájwíin nandalaꞌ ju̱yo̱ꞌ. 16 Ikháanꞌlaꞌ ndu̱ya̱á májánlaꞌ rí táne̱-gajmálaꞌ rí mu̱xnu̱ꞌlaꞌ rí ndaꞌyóꞌ. Maske máꞌ xkuaꞌnii, mbá tikhuun tsí ikháanꞌlaꞌ nuthan rí phú wiphiúún rí ma̱gúwíi mbúkha̱ꞌlaꞌ ga̱jma̱á majñu̱u̱ mi̱nduwa. 17 Á ne̱ne̱-ndúwáanꞌlaꞌ ga̱jma̱á majñu̱ú mbá tikhuun xa̱bo̱ tsí ni̱xu̱ꞌmíi rí magóó gúyalaꞌ dxe̱ꞌ. 18 Ikhúúnꞌ ni̱tha̱n-jáñuu Títo̱ rí ma̱ꞌga gáꞌyalaꞌ, jamí ni̱xu̱ꞌmáa i̱mba̱a̱ꞌ dxájwalóꞌ ma̱ꞌga ga̱jma̱á nindxu̱u̱. Á neꞌne-nduwáanꞌlaꞌ Títo̱ dxe̱ꞌ. Á ra̱ꞌkhá mbóó máꞌ a̱kia̱nꞌxo̱ꞌ ju̱ya̱ꞌlaꞌ jamí mbóó máꞌ xó e̱ne̱xo̱ꞌ ga̱jma̱á nindxa̱ꞌlaꞌ dxe̱ꞌ.

19 A̱ngui̱nꞌ, tsáanꞌ phú nandoꞌ ja̱ya̱ꞌlaꞌ, á xóó na̱ju̱ma̱ꞌlaꞌ ikháanꞌlaꞌ rí ikháanꞌxo̱ꞌ nu̱tha̱n-mbáá numaxo̱ꞌ ná inalaꞌ dxe̱ꞌ. I̱ndo̱ó máꞌ numuu rí ra̱ꞌkhá xkuaꞌnii jaꞌnii. A̱ꞌkhue̱n gakon, Ana̱ꞌlóꞌ ndaꞌyoo rí nu̱tha̱nxo̱ꞌ ríge̱ꞌ ga̱jma̱á numuu Krísto̱. Mbá xúgíí ríge̱ꞌ nu̱tha̱nxo̱ꞌ kajngó ma̱ꞌkhiáanꞌlaꞌ ná inuu Ana̱ꞌlóꞌ. 20 I̱ndo̱ó máꞌ numuu rí namíñuꞌ rí ma̱xáxkamáaꞌlaꞌ xómá rí naꞌne a̱kui̱nꞌ ído̱ rí ma̱ꞌgá gáya̱ꞌlaꞌ, ni máꞌ ikháanꞌlaꞌ mu̱xúxkamúúlaꞌ xómá rí naꞌne a̱kia̱nꞌlaꞌ. Namíñuꞌ rí ma̱xkamáaꞌlaꞌ na̱tsa̱ña̱ꞌlaꞌ, naxígua̱ꞌlaꞌ, najiꞌnáaꞌlaꞌ ju̱ya̱-mijnálaꞌ, nu̱xpíꞌthá-mijnálaꞌ, nu̱ne̱-xuxtaalaꞌ, nu̱tha̱n numa-mijnálaꞌ, nu̱ku̱xí-mijnálaꞌ jamí nu̱xkaxi̱ilaꞌ xkujndu ná xuajen a̱ꞌkhue̱n. 21 Xúꞌkhue̱n máꞌ mangaa namíñuꞌ rí ído̱ ma̱ꞌgá gáya̱ꞌlaꞌ mbu̱júꞌ, Ana̱ꞌlóꞌ ma̱ꞌne rí ma̱ga̱jnúu gamakuꞌ ga̱jma̱á numalaꞌ, jamí rí ma̱mbi̱ya̱ꞌ ga̱jma̱á numúú mbaꞌiin tsí ikháanꞌlaꞌ, tsí wajyúú máꞌ ene̱ aꞌkhán, jamí na̱nguá i̱ni̱ꞌñáa̱ rí nune̱-maꞌchú-mijnée̱, rí nubúu̱n gajmíi̱ xa̱bo̱ tsí túya̱a̱, jamí na̱nguá máꞌ i̱ni̱ꞌñáa̱ rí phú mate̱ꞌ nuni̱i̱.