1 Ikhaa jngó, a̱ngui̱nꞌ tsí jaꞌwuun, tsáanꞌ nindxaꞌwálaꞌ Ana̱ꞌlóꞌ rí ma̱nindxa̱ꞌlaꞌ xa̱bo̱ xuajñuu̱, gu̱ya̱á májánlaꞌ tsáa phú ñajuun Jesús. Ikhaa̱ ñajuu̱n tsí waxúngua̱a̱ꞌ jamí ikhaa̱ ñajuu̱n tsí jayá idxu̱ún dxakuun ga̱jma̱á numuu mbá xúgíí rí nanimba̱ꞌlóꞌ juꞌyáá Ana̱ꞌlóꞌ. 2 Ikhaa̱ neꞌne-mbánuu̱ rí ni̱ge̱ꞌe̱ inuu̱ rí ma̱ꞌnii̱ neꞌne Ana̱ꞌlóꞌ, xómá neꞌne-mbánuu Moisés mangaa ná majñu̱ú mbá xúgíin xa̱bo̱ guꞌwóo Ana̱ꞌlóꞌ. 3 I̱ndo̱ó máꞌ numuu rí i̱tha̱án gíꞌdoo numuu Jesús xó rí Moisés, xómá rí i̱tha̱án gíꞌdoo numuu xa̱bo̱ tsí naꞌne guꞌwá inuu guꞌwá rí niꞌnii̱. 4 Numuu rí xtáa mbáa tsí neꞌne-ku̱maa mbámbá guꞌwá, xómáꞌ tsí neꞌne-ku̱maa mbá xúgíí rí ríga̱ ñajuun Ana̱ꞌlóꞌ. 5 Gakon máꞌ rí Moisés ninindxu̱u̱ yumbáá tsí jmbii ná majñu̱ú mbá xúgíin xa̱bo̱ guꞌwóo Ana̱ꞌlóꞌ. Ikhaa̱ niꞌthúu̱n xa̱bo̱ rí wéje̱ rí maꞌthán Ana̱ꞌlóꞌ nda̱wa̱á. 6 Xómáꞌ Krísto̱ rá, Ada̱ guꞌwá tsí jmbii ná guꞌwóo máꞌ Ana̱ꞌlóꞌ ñajuu̱n. Jamí ikháánꞌlóꞌ ñajwanlóꞌ mbá guꞌwíin xa̱bo̱ ná guꞌwá rúꞌkhue̱n, i̱ndo̱ó máꞌ numuu rí ndaꞌyóo rí ma̱we̱je̱ gúkúu a̱kia̱nꞌlóꞌ jamí ma̱xáti̱ya̱ꞌlóꞌ ga̱jma̱á numuu rí mbá jañii a̱kia̱nꞌlóꞌ guáꞌthi̱ínlóꞌ.

7 Ikhaa jngó, naꞌthán Xu̱u̱ꞌ Ana̱ꞌlóꞌ:

«Xí nu̱dxawíínlaꞌ a̱ꞌwóo Ana̱ꞌlóꞌ xúge̱ꞌ,

8 mu̱xúne̱ gúkú a̱kia̱nꞌlaꞌ,

xómá nene̱ tsí nijñaguun,

nákhí mbiꞌi rí ni̱jmaa̱ Ana̱ꞌlóꞌ ná mbaa niníí.

9 Ikhín ni̱jmúú táta̱-xi̱ꞌñálaꞌ wajyúú, nini̱i̱ rí mbuyáa̱ xí mba̱a̱ a̱kui̱nꞌ,

maske máꞌ ndiyáa̱ a̱jma̱ skíñú (40) tsigu rí phú wáá ne̱ne̱lo̱ꞌ ná inúu̱.

10 Ikhaa numuu rúꞌkhue̱n nijiꞌnúú ja̱ñu̱ú mbá xúgíin xa̱bo̱ tsúꞌkhue̱n,

jamí ni̱tha̱nlo̱ꞌ: "Mbá xúgíí mbiꞌi nikhuáa máꞌ jamba̱a̱ ngrigúu̱n,

jamí tsíñúu̱ gúdxawíi̱n rí na̱thúu̱n".

11 Ikhaa jngó, nákhí rí najiꞌnúú ni̱xu̱ꞌdá-mina̱ꞌ ríge̱ꞌ:

"Ni miꞌtsú ma̱xátu̱ꞌúu̱n rí mbuyaa̱ xúu̱nꞌ ga̱jma̱á nindxu̱ꞌ"».*

12 A̱ngui̱nꞌ, a̱gu̱ya̱álaꞌ xí ndawa̱a̱ nimbáa tsí xkawi̱i̱ꞌ a̱kui̱in jamí tsínimbo̱o̱ꞌ ná majña̱ꞌlaꞌ rí ma̱ꞌne-tsíngua̱ꞌ-mina̱ꞌ ná inuu Ana̱ꞌlóꞌ tsí xtáa jámuu. 13 I̱tha̱án máján rí gu̱tha̱n-máꞌán-mijnálaꞌ tsitsíí, awúun rí xóó ríga̱ mbiꞌi «xúge̱ꞌ», kajngó nimbáa ma̱xáꞌne gúkú a̱kui̱in ga̱jma̱á numuu rí ni̱gu̱ma-nduwaa eꞌne aꞌkhán. 14 Numuu rí ikháánꞌlóꞌ nanindxa̱ꞌlóꞌ xa̱bi̱i Krísto̱, i̱ndo̱ó máꞌ numuu rí ndaꞌyóo rí ma̱wajún-gúkuálóꞌ ná tsu̱du̱u̱ rí ninimba̱ꞌlóꞌ asndo nákhí ginii. 15 Ikhaa numuu rúꞌkhue̱n naꞌthán ajngáa rawuun Ana̱ꞌlóꞌ:

«Xí nu̱dxawíínlaꞌ a̱ꞌwóo Ana̱ꞌlóꞌ xúge̱ꞌ,

mu̱xúne̱ gúkú a̱kia̱nꞌlaꞌ,

xómá nene̱ tsí nijñaguun».*

16 Tsíin ñajúún tsí ni̱dxawíín ajngóo Ana̱ꞌlóꞌ jamí nijñaguun róꞌ. Á ra̱ꞌkhá mbá xúgíin tsí nigájna̱á ná numbaa Ejípto̱ gajmíí Moisés rá. 17 Jamí tsíin ñajúún tsí nijiꞌnáa Ana̱ꞌlóꞌ jaꞌñúú a̱jma̱ skíñú (40) tsigu róꞌ. Á ra̱ꞌkhíin tsí nene̱ aꞌkhán jamí nijáñúú ná mbaa niníí rá. 18 Jamí tsíin ñajúún tsí nixuda-mina̱ꞌ Ana̱ꞌlóꞌ ga̱jma̱á nindxu̱ún rí ma̱xátu̱ꞌu̱ún mbuya̱a xu̱únꞌ ga̱jma̱á nindxu̱u̱ rá. Ikhiin máꞌ tsí túne̱-mbáníí rí niꞌthúu̱n. 19 Jamí nduꞌyáálóꞌ rí ra̱khóo gátu̱ꞌúu̱n mbuyaa̱ xúu̱nꞌ ga̱jma̱á numuu rí tánimbúu̱nꞌ juyáa̱ ajngóo Ana̱ꞌlóꞌ rí ni̱dxawíi̱n.