Gênesis 26

I’saq’iy Avimelek

1 İbrıhımne gahılyna mısvalla xhineena, ölkee sa mebnab mısvalla vuxhana. I’saq' Gerar eyhene şahareeqa, Filiştinbışde paççahne, Avimelekne, k’anyaqa ayk’an. 2 Rəbb mang’us gyagu, eyhen:

– Misirqa ımayk’an. Zı vak’le uvhiyne cigee axve. 3 İne ölkee menne cigayna xhinne axve. Zı vaka ixhes, vas xayir-düə hevles. Yiğne dekkıs İbrıhımıs k’ın g’aysır ha’asva uvhiyn karbı ha’asınbı: in gırgın cigabı vasiy vake g’abıynbışis heles. 4 Vake g’abıynbı xəədın xənebımee geeb qaa’as, in gırgın cigabı yiğne nasıles heles. Ç’iyene aq’valyne gırgıne milletbışe vake g’abıynbışileğana xayir-düə alyapt’as. 5 İbrıhımee Yizde cuvabıl k’ırı alixhxhı, Zı uvhiynçika gyu’ur-oza qıxha, Yizde əmrbışil, g’aydabışil, q’aanunbışil k’ırı alixhxhı. Mançil-alla Zı in cigabı vas hele.

6 I’saq’ır Gerar axva. 7 Mane ölkayne insanaaşe I’saq’ıke cune xhunaşşeyne hək’ee qiyghınmee, mang’vee «İna yizda yiçu vornava» uvhu. Rivq’a geer micagrava, I’saq' «Mana yizda xhunaşşeva» eyhes qərq’ı’nna. Mang’vee culed-alqa eyhen: «Deşxheene, Rivq’al-alla ine ölkayne insanaaşe zı gik’asda».

8 I’saq' maa’ar geer axva. Yiğbışde sa yiğıl Filiştinbışda paççah Avimelek g’ulele horzulymee, I’saq' cune xhunaşşeyka huvaga g’ece. 9 Avimelekee I’saq' qort’ul, eyhen:

– Mana yiğna xhunaşşevur. Nya’a ğu məng’ı’ne hək’ee «İna yizda yiçuva» uvhu?

I’saq’ee mang’uk’le qiyghanan:

– Məng’ı’l-alla zı g’ek’ava qərq’ı’n.

10 Avimelekee eyhen:

– İn ğu şak hı’iyn hucoona? Yişde insanaaşina sa yiğne xhunaşşeyka g’alixhasse axu. Məxüb ğu şi bınaheeqa aa’asse avxu.

11 Qiyğa Avimelekee milletılqa g’ayxha’a:

– İne insanıkiy mang’une xhunaşşeyk qet’una gidek’u g’alerçes deş.

I’saq' Avimelekıka yuşanexhe

12 I’saq’ee mane cigabışee toxum qeehe, mane sen şagav vəş yəqqees ezuynçile geed eyxhe. Məxüb Rəbbee mang’us xayir-düə hoole. 13 Mang’uke geed karnana insan eyxhe. Yiğ-yiğıle mang’un kar geed qexhe ıxha. 14 Mang’uqa geed çavra-vəq’ə, həmbalar vobva Filiştinbışde ulen man alyaat’a deş. 15 Dekkıne İbrıhımne gahıl mang’une həmbalaaşe alitk’uriyn gırgın kahrızbı Filiştinbışe nyaq’vuka gyatsts’a’anbı.

16 Avimelekee I’saq’ık’le eyhen:

– Şasse hoora, ğu şale nimeexheyir gucnana ıxha.

17 I’saq' mançe ayk’anna. Mana Gerarne q’adaalilqa qarı, maayir axvana. 18 I’saq’ee dekkıne İbrıhımne gahıl xhinesva alitk’uriyn kahrızbı meed iliyk’varanbı. Man kahrızbı Filiştinbışe nyaq’vuka gyatsts’ı’ı ıxha. Mang’vee dekkee gixhxhiyn dobı meed mane kahrızbışilqa giyxhenbı.

19 I’saq’ne həmbalaaşe q’adaalil ciga alitk’ur, maa’ad xhyan ı’lqəən ciga iveeke. 20 Gerarne çobanaaşe «Xhyan yişin vodva» uvhu, I’saq’ne çobanaaşika xıliynbı ha’a giviyğal. Maa’ad xıliynbı ıxhava, I’saq’ee mane kahrızın do Eseq (xıliynbı) giyxhe. 21 I’saq’ne həmbalaaşe sa mebna kahrız ilyviyk’ar. Mançil-allad meed xıliynbı ha’a. I’saq’ee mane kahrızın doyud Sitna (duşmaniyvalla) giyxhe. 22 I’saq' mançe ark’ın, sa mebna kahrız ilyviyk’ar. Mançil-allamee xıliynbı ha’a deş. Məxüd ıxha, I’saq’ee mançin do Rexovot (ağlaxıyvalla) gixhxhı, eyhen: «Həşde Rəbbee şas ağlaxıyvalla huvu, şi ine cigee geeb qeepxhes».

23 I’saq' mançe Beer-Şeveeqa ayk’an. 24 Mane xəmde Rəbb mang’us gyagu, eyhen:

– Zı yiğne dekkee, İbrıhımee, ı’bəədat hı’ına Allah vorna. Qı’məyq’ən, Zı vaka vorna. Yizde nukarne İbrıhımnemee, Zı vas xayir-düə hevles, vake g’abıynbıb geeb qaa’as.

25 I’saq’ee maa’ad q’urbanbı allya’an ciga ali’ı, Rəbbis ı’bəədat ha’a. Mang’vee maa’ab cusda çadır giviyxə. I’saq’ne həmbalaaşe meeb maa’ab kahrız ilyviyk’ar.

26 Mane gahıl Avimelek cune mısləhətçiyka, Axuzatıka, g’oşunne xərıng’uka, Pikoluka, sacigee Gerareençe I’saq' eyxhene cigabışeeqa arayle. 27 I’saq’ee manbışik’le eyhen:

– Nişisne şu zasqa abı? Şos zı g’ımece qıxha, şu zı g’e’eşşunaniy.

28 Manbışe eyhen:

– Şak’le g’acuyn, Rəbb hək’erar vakavur. Həşde şas ıkkanan ğunad şinad k’ınybı g’aysaras. Qora, vaka cuvab g’ats’ak’vanas. 29 Şi vak syudyoot’u, vaka yugbacab vuxha, yugrar yəqqı’l arçun xhinne, ğunad şak pisın ha’as deş. Ğu həşde Rəbbee xayir-düə huvuna insan vor.

30 I’saq’ee manbışis sufra qa’a, manbışed yugda otxhun-ulyoğan. 31 Manbı miç’eeb çakba oza qeepxha, sana-sang’us k’ın g’iysar. I’saq’ee manbı sağba-salamatba yəqqı’l haa’anbı.

32 Mane yiğıl I’saq’ın həmbalar abı, alipk’ırne kahrızne hək’ee «Xhyan qığeç’uynva» eyhe. 33 I’saq’ee mane kahrızın do Şeva (k’ın) giyxhe. Mançil-allad mane şaharın do g’iyniyne yiğılqamee*26:33 g’iyniyne yiğılqamee: in kitab otk’uning’vee kitab ok’anassencad gahbı eyhe ıxha. Beer-Şeva (k’ınena kahrız) vod.

Esavın xhunaşşer

34 Esavıqa yoq’ts’al (40) sennang’a, mang’vee Beerna yiş Yehuditiy, Elonna yiş Basmat cus haa’a. Manbışda q’öyursana Q’etbışinbı vuxha. 35 Man zəiyfabı I’saq’neyiy Rivq’ayne vuk’lene ık’arılqa siviyk’al.