1 I’sa lotk’eeqa gyu’ur, golyune şene aq’valyne Cune şahareeqa qarayle. 2 Mang’usqa paralic ı’xı’na tyuleena sa insan ıkkekka. I’sayk’le manbışin inyam g’acumee, paralic ı’xı’yng’uk’le eyhen:

– Dix, qı’məyq’ən, yiğne bınahbışike ılyheepç’iynbı.

3 Manke maa’ane sabara Q’aanunne mə’əllimaaşe*9:3 Q’aanunun mə’əllimar: manbışik’le Allahee Mısayleğana g’axuvuna Q’aanun (Tavrat) yugba vaats’a vuxha. coled-alqa uvhiyn:

– Mang’vee kufurud ha’a!

4 Manbışde fıkıreençe ı’lğəən g’acu I’see eyhen:

– Nya’a vuşde yik’eençe pisın karbı ı’lğəə? 5 İnçin neniy eyhes vaxxariyda: «Yiğne bınahbışike ılyheepç’iynbıvane», deşxhee, «Oza qıxha iykrevane»? 6 Şok’le inıd ats’axhxhe, ç’iyeyne aq’val İnsanne Dixısse*9:6 İnsanna Dix: I’see geedne yəqqee Cuk’le İnsanna Dixva uvhu. Məxür Daniyal peyğambaree qalesde Paççah Masihık’le eyhe. Mana Paççah gırgıne milletbışda xərna ixhes. bınahbışile ılyheç’es əxəna.

Qiyğa Mana paralic ı’xı’yng’uk’le eyhen:

– Oza qıxhe, g’alirxhuyn karıd alyaat’u yiğne xaaqa hoora.

7 Manar oza qıxha cune xaaqa ayk’an. 8 Milletık’le man g’acu qətq’ı’n, insanaaşis məxbına guc hoolena Allah axtı qa’a.

9 I’sa mançe ı’lğəəmee, nalok’bı sa’ane cigee gyu’urna Matta donana sa insan g’acu, mang’uk’le eyhen:

– Zaqar qihna qora.

Manar suğotsu I’sayqar qihna qarayle. 10 I’sa sufranılqa qarımee, nalok’bı sa’anbıyiy *9:10 nalok’bı sa’anbı: Mane gahıl nalok’bı sa’anbı şavuscab vukkiykananbı deşdiy. İzrail mane gahıl Rooma imperiyeyn uvhiynçikaniy gyuv’ur oza qooxhena. Man nalok’bı sa’anbı cühüt’yar vuxheeyib, manbışe nalok’bı Rooma imperiyeysniy sa’anbı. Mançil-allab nalok’bı sa’anbışqa duşmanaaşiqa xhinneniy ilyaaka.bınahnanbı abı, Mang’ukayiy Mang’une telebabışika sacigee kar otxhan ıxha. 11 Fariseyaaşik’le*9:11 Fariseyar: Manbı I’sayne gahılin dindarar vuxha. Fariseyar din k’orada hidya’anbışiqa ooğançe avqa ilyaaka vuxha. man g’acumee, Mang’une telebabışik’le eyhen:

– Nya’a vuşde Mə’əllimee nalok’bı sa’anbışikayiy bınahnanbışika sacigee kar oyxhan?

12 I’sayk’le man g’ayxhı eyhen:

– Vuk’dyak’aranbışisqa deş, vuk’aranbışisqa doxtur ıkkiykanna. 13 Şu ts’eppa hudoora havak’ne «Zas q’urban deş, rəhı’m vukkan»*9:13 İnəxüd Hoşea peyğambarne kitabee otk’un (6:6). eyhene cuvabına mə’na vaats’a vuxhe. Zı qopkuynbı deş, bınahnanbı qoot’alas arı.

14 Mane gahıl Yəhyeyn telebabı I’saysqa abı, qiyghanan:

– Nya’a şiyiy fariseyaaşe geed sivar aqqaqqa, Yiğne telebabışe ıqdyaqqa?

15 I’see manbışik’le eyhen:

– Tsuma k’anenang’a, davatbışeeqa abıyne mihmanaaşe nya’a aq’vabı qa’as eyxheyee? Tsuma manbışisse alyart’asın yiğbı qadımee, manke manbışed sivar aqqasınbı. 16 Neng’veecab yisseyne tanalinçilqa ts’enne parçeykena yamax üvxiyxə deş. Ts’ebna parçe yisseynçik avqas deş, curuvxhesda, q’əç’ür sık’ılbab xəp quvxhes. 17 Ts’edın çaxırıd yisseyne tuluğbışeeqa k’ya’an deşxhe. Deşxheene, tuluğbı qodu, çaxırıd ehekkasın, tuluğbışikınıd ixhesın. Ts’edın çaxır, ts’enne tuluğbışeeqaxhe k’ya’an. Məxüd he’eene tuluğbıd, çaxırıd axvasın.

18 I’sa yuşan ha’amee, Mang’usqa sinagogna*9:18 sinagoga: Cühüt’yaaşe ı’bəədat ha’an ciga. xərna qarayle. Mana I’says k’yorzul eyhen:

– Yizda yiş həşde xhinne qiyk’u, Ğu həşde arı məng’ı’lqa xıl gixhxheene, mana eexvasda.

19 I’sa suğotsu, telebabışika sacigee mang’uqar qihna ayk’an.

20 Mane gahıl yits’ıq’vəlle (12) senna eb k’əən ık’arnana sa zəiyfa, I’saysqa yı’q’əle qiyxha Mang’une tanalinçine baağık seet’a. 21 Məng’ee celed-alqa eyheva: «Mang’une tanalinçikcar seet’unaxhiy, yug qeexheyiy».

22 I’sa sak’ımee mana g’aycu eyhen:

– Yiş, qimeeq’ən, yiğne inyamın ğu yug qey’ı.

Zəiyfa hamankecar yug qeexhena. 23 I’sa sinagogne xərıng’une xaaqa arımee, maadın alikkı-gikkiyiy ak’ına mə’niy dyutyak’ee hook’anbı g’avcu, 24 eyhen:

– G’eepç’e ögile, içiy qiyk’u-karey’ı deşur, mana g’alirxhu vor.

Manbışe I’sayne cuvabıs əqənabı ha’a. 25 Cəmə’ət g’aqa qığavhu, I’sa aqa ikkeç’u, içiyne xıleke aqqımee içiy sığeets’ana. 26 Mana xabar, mane cigabışde gırgıne surabışilqa hiviyxharna.

27 I’sa mançe qığeç’umee, Mang’uqab qihna q’öyre bı’rq’ı’na «Davudna Dix*9:27 Davudna Dix: Masih Davudaanbışda ixhes, məxüd peyğambaraaşe oyk’an ıxha. Mançil-allad Mang’uk’le Davudna Dixva eyhe ıxha., şalqa rəhı’m hee’eva!» ts’ir haa’a qöö vuxha. 28 Mana xaaqa ikkeç’umee, bı’rq’ı’nbı Mang’usqa qavayle. I’see manbışik’le eyhen:

– Zasse man ha’as əxəva şu inyam ha’anne?

Bı’rq’ı’nbışe Mang’uk’le eyhen:

– Ho’o, yişda Xərna!

29 I’sa manbışde uleppışik qet’u eyhen:

– Vuşde inyamıs sik’ı helen.

30 Manbışin uleppı mankecad qeedaxhenbı. I’see manbışik’le «Nyaggah şavuk’lecad immeyheva» eyhe. 31 Manbışemee mana xabar, mançe qığeepç’ı mane cıgayne gırgıne surabışilqa hivxhar haa’ana.

32 Manbı mançe qı’ğəəne gahıl, I’saysqa cinaaşe aqqına, yuşan ha’as dəxəna insan arayle. 33 I’see cin qığavhumee, mana insan yuşan ha’a giyğal. Cəmə’ət mane işile mattıxha eyhen:

– İzrailil inəxdun kar mısacad ıxhayn deşdiy!

34 Fariseyaaşemee eyhe ıxha:

– Mang’vee cinar, cinaaşine xərıng’une kumagıka qığa’a.

35 I’sa gırgıne xivaaşeeyiy şaharbışee alycaxva maane sinagogbışee xət qa’a ıxha. Mang’vee Xəybışeene Paççahiyvalina Yugna Xabar yuşan haa’a, gırgıne ık’arbışikeb yug qaa’a vuxha. 36 Cuqa qihna qöön cəmə’ət g’acu, I’sayna manbışilqa rəhı’m qavayle: manbı çoban dena axuyn vəq’əbı xhinne obzur-opt’ul, hucoome ha’asınbı avxu vuxha. 37 Mang’vee Cune telebabışik’le eyhen:

– Şagav geedıd, işçermee k’ılyba. 38 Mançil-allab şagavne İyesilqa miz k’ee’e, Cun şagav sa’asın işçer g’axuvlecenva.