1 Mbandihili a Musamu wu Mubwe wa Yisu Kristo, Mwana a Nzambi. 2 We bu baasonehe mu muhanda wu mumbihuli Esaya:

«Mono, me miitsindaha iluumbi hya me hu busu bwa we,

mu uvangimasa nzila a we✝.

3 Ni ndaha a nde wuuna wu li mu uta ibila mu kumu a nzala:

"Vangimasaani nzila a Pfumu,

suungahaani misoho mya nde✝!"»

4 Yowani Mutondihi apali mu kumu a nzala. Nde akata ibila: «Sobwaani mbiili, yakaani tondihili mana Nzambi anyahula masumu ma benu✝.» 5 Bisu tsi a Yuda yoosi na baatu boosi ba musyenge a Yeruselemi, baakayene huli nde. Bo baakasiinga masumu ma bo ŋa kuungi la baatu. Na Yowani akatondehe bo, mu nzali a Yolodani✝. 6 Yowani aba alwata ikutu hi baatuunga mu myoso mya buuru nga irunga. Na mu luungu la nde, aba ahada mudi wu mukobo ibulu. Nde akabaadya makooko na maadi ma nyuhi a tsyehe✝. 7 Nde akayabisa bunuubu: «Huuba na muutu wu uya hu mbisa a me, wu afulala me matwala. Me a handi wu akuha mu ubaandama na unyangula mikudu mi bikoodi bya nde ve✝. 8 Me, me miitondehe benu mu mamba, ka nde, nde sa atondehe benu mu Livupu la Ngidi.»

9 Mu taangu mo yiina, Yisu amati hu musyenge a Nazareti mu itaanzi hya Ngalili, na Yowani atondihi nde mu nzali a Yolodani. 10 Bu Yisu haapali mu nzali, masulubete, nde amoni mayulu maadibumi. Na Livupu laakulimini ŋa yulu a nde we libembe✝. 11 Ndaha mosi yaayuhini hu mayulu: «We ni Mwana a me wu litondo. Mu we me ndi mu umono kinya a me yoosi✝.»

12 Masulubete, Livupu la Nzambi laabiti Yisu hu kumu a nzala✝. 13 Huuna, nde avyosi maku mana ma bilumbu, na Saatana alobisi nde. Bibulu bya bwadi byaba itwadi na Yisu, na bapofi baakakumbasa nde.

14 Humbisa a hu baakotisi Yowani mu kondaayi, Yisu ayeni hu Ngalili. Nde akayabisa Musamu wu Mubwe wa Nzambi✝, 15 na nde akaleele: «Tangu yimiito, na Ipfumu hya Nzambi hyaka bebele. Sobwaani mbiili a benu, na saani imiinu mu Musamu wu Mubwe✝.»

16 Bu Yisu hakataangila muvanga a dyanga li musyenge a Ngalili, nde amoni Simoni na Andele mwana a ngu a Simoni. Bo baakabwaha malihi ma bo mu dyanga, mu tooni ati, bo aba balobi. 17 Buuna, Yisu aleeli bo: «Duukalaani me, me ukitusa benu balobi ba baatu.» 18 Masulubete, bo baatiimbi malihi ma bo, na baaduukili Yisu✝. 19 Bu Yisu haasusihi mwana a lala, nde amoni Yaki, mwana a Zebedayi na Yowani, mwana a ngu a nde. Bo baabeedi kaka mu bootehe, mu ubaaloondo malihi ma bo✝. 20 Masulubete, Yisu ateeli bo. Bo baasiisi taata a bo Zebedayi na basalili ba nde mutso a bootehe, na bo baaduukili Yisu.

21 Yisu na bayihi ba nde baayeni hu musyenge a Kapernahumi. Masulubete, mu ilumbu hya saba, bo baakoti mu nzo lisambulu yi Bayudaayo na Yisu abaandihi ulongese.

22 Baatu ba baakayuha nde, baasinzikimuha mu ndongisili a nde. Mu tooni ati, nde akalongese na matwala. Ndongisili a nde yaaba yaasobohono na yi milongisi mi Mikele✝. 23 Kaahu masulubete, mutso a nzo lisambulu yi Bayudaayo, hwaba na muutu mumosi wu livupu lilibi laakakwamisa. Nde akafulaha✝: 24 «Yisu musi Nazareti, lo lima na bisu? We yidi mu ubungasana bisu? Me nzaabi na we li: we li wa Ngidi, wu Nzambi amiitsindaha!» 25 Yisu afwengili livupu lilibi bunuubu: «Ba swii, na pala mu muutu mo wunuwu!» 26 Livupu lilibi laapali mu muutu, laapfwikisi nde mu mifudi na lo laafulihi mubabu wu munene. 27 Baatu boosi baakimuhi; na baakafuulasana ŋa hati la bo: «Liniili kaka ki dyambu? Yiniiyi ndongisili yi nyatihi, mu ulongese na matwala! Muutu mo wunuwu li mu utuma napa mavupu ma mabi, na mo kaka mali mu usiingala nde!» 28 Masulubete, lidumu la nde laatsamuhi pasi tsyelo mu itaanzi hya Ngalili hyoosi.

29 Bo bapala mu nzo lisambulu yi Bayudaayo, masulubete Yisu ayeni hu nzo a Simoni na Andele, itwadi na Yaki na Yowani✝. 30 Buko bwa Simoni bu mukaasu aba abwamina ŋa taangi, bu haaba na baahu. Na masulubete, baatoosili musamu bubeedu huli Yisu. 31 Yisu asusihi huli mubeedu, akaangi nde mu kaka, na atelimisi nde. Baahu laapali mu nde, na buko bwa Simoni akabili bo byudya✝.

32 Bu tsitsaha yaatoodi, hu nyangu hadyami, baatu baabehili Yisu babeedu boosi, na baatu ba matengo maakakwamisa✝. 33 Baatu boosi ba musyenge, baayakuukama ŋa busu bu munywa a nzo. 34 Nde abeelusi babeedu ba balahi, ba mabeedu ma pila mu pila maakakwamisa. Na nde abingi kaka matengo ma malahi. Yisu a hakava matengo muswa wu uyambila ve, mu tooni ati, mo maaba maayaaba na nde ali.

35 Ilumbu hi hyaduukili, tsuumba a ngwali, Yisu asuuhi na apali mu nzo mu uyene nde siha hu kumu a nzala, na huuna, nde akoti mu lisambulu✝. 36 Simoni na bambaahi ba baaba na nde, baayeni hu uyasaha Yisu. 37 Bu baasooli nde, bo baaleeli nde: «Baatu boosi bali mu usaha we.» 38 Nde afutili bo: «Tswendaani tsyelo kima, mu mala ma ibiingi mo hinihi. Mana huuna kaka, me nzabisa Musamu wu Mubwe. Mu tooni ati, ni mu nde me anziila✝.» 39 Na nde ataangili itaanzi hya Ngalili hyoosi, mu ubaalongese mutso manzo ma lisambulu ma Bayudaayo na ubaabinga matengo.

40 Muutu mumosi nga bwatsi miiya huli Yisu, atsokomo, nde ayayiini Yisu: «Tso we tondi, we utwala utsyemese me!» 41 Bu hakwili nde lingebe, Yisu alabi hoho, abembi nde na aleeli: «Me tondi buuna, ba wu atsyeme!» 42 Masulubete, bwatsi bwamati mu nde na nde atsyemi. 43 Yisu aduti nde matswi, abingi nde mu mawasa, 44 na aleeli nde: «Kele, a hayabisa lo huli pasi muutu. Ka yene we mwakulu yamonehele huli ngaanga a Nzambi, na yava nde bungodu bu Moose hatuma mu tsyemili a we, mana bwo buba imbangi huli bo, ti we miibeeloho✝.» 45 Ka muutu mo wuuna ayene, abaandihi uyaleele ma malahi na utsala musamu pasi mbuha huli baatu boosi. Ni mu buuna, Yisu hakabwevelekoto mu pasi musyenge ŋa miisu ma baatu. Nde aba ubaatsahala aka mu matsomo ma misyenge, mu hwavele a baatu. Ka baatu baakamata bibiingi byosi, baakaya huli nde.