1 Titswene, Yisu abwefutaha mu nzo lisambulu yi Bayudaayo. Muuna mwaba na muutu nga kaka li laararama. 2 Bafarisi baakakete Yisu, mu umono tso nde ubeeloso muutu mu ilumbu hya saba, mana bo bayakese nde. 3 Na Yisu aleeli huli muutu nga kaka li laararama: «Teleme! Na yaanga ŋa butima.» 4 Titswene, nde afuuli huli baatu: «Hima baava muswa mu uvaanga mu ilumbu hya saba? Uvaanga libwe, vo uvaanga libi? Ufuuhasa idiingu hya muutu, vo uduba nde?» Ka bo boosi baasiidi swii. 5 Buuna, Yisu atali bo na ifwefwe. Ka nde aluuli kaka mu lingebe mu tooni bunono bu mitima mya bo. Nde aleeli huli muutu mo wuuna: «Laba kaka la we.» Nde alabi kaka la nde na lo laabeeluhi. 6 Bafarisi baapali mu nzo lisambulu yi Bayudaayo na baapfuutini mawasa-mawasa na baatu ba kabu la Eloode, mu pfuundu yi usaha buni bo buuduba Yisu.

7 Yisu ayeni na bayihi ba nde hu muvaanga a dyanga la Ngalili. Koonge a baatu yinene yaaduukili nde: Baatu mo baana baamati hu Ngalili na hu Yude, 8 hu Yeruselemi, hu Idumiya*, hu toto yi yili hu simu lina la Yolodani bebele na Tiilo, na Sidoni. Baatu mo baana baayidi mu koonge huli Yisu mu tooni ati, bo baayuhi tsangu a mambu ma nde haakavaanga. 9 Buuna, Yisu aleeli huli bayihi ba nde mu uvangimasa nde hyabu mana koonge a yivinyala nde. 10 Mu tooni ati, bu nde haakabeeloso baatu ba balahi, babeedu boosi baakabingalala ubeembe nde. 11 Ŋa mavupu ma mabi maakamono Yisu, mo maakabwa ŋa busu bwa nde na maakafulaha: «We, we ni Mwana a Nzambi!» 12 Ka Yisu akasinzakebese bo mu mifudi mu uveleleele ti nde Mwana a Nzambi.

13 Ŋa mbisa a maana, Yisu akumisi hu yulu isyelo, nde ateeli ba nde hatondi, na bo baayidi huli nde. 14 Nde abyalisi kuumi na boole, ba nde haluhi biluumbi. Nde asooli bo, mu uba itwadi na nde na mu utsindaha bo bayayabisa Musamu wu Mubwe. 15 Yisu aviidi bo kaka matwala ma ubinga matengo. 16 Manduhi ma kuumi na biluumbi byole bi Yisu hasooli ni maniima: Simoni wu Yisu haviidi kuumbu Peetelo✝, 17 Yaki, mwana a Zebedayi na Yowani mwana a ngu a nde, ba nde haviidi kuumbu Bwanengesi, mbindulili ni ti «mwana a nzyedi✝.» 18 Andele, Filipo, Batolomayi, Mataayi, Tomasi, Yaki mwana a Alafe, Tadayi, Simoni Muzeloti*, 19 na Yuda nga kuumbu Isikaryoti, wu ayehuli Yisu.

20 Titswene, Yisu afutihi hu nzo, na koonge a baatu yabweyakuukama. Nde na bayihi ba nde, a baabwetwala tso ubwedya ve. 21 Bu ikuta hya Yisu hyayuhi buuna, hyo hyayeni hu uyavolo nde. Mu tooni ati, bo baakaleele ti: «Nde liniili ka ladi!» 22 Milongisi mi Mikele mi myamati hu Yeruselemi myakaleele: «Belesebuli✝ li mu nde! Ni mu matwala ma pfumu matengo nde ali mu ubinga matengo!» 23 Buuna, Yisu ateeli bo, na ayambili na bo mu makuma: «Buni Saatana huutwala ubinga Saatana? 24 Tso ipfumu hya tsi hikabuhi na tso baatu ba ipfumu mo hiina bali mu ulwana bomo na bomo, ipfumu mo hiina sa hitsaamuha. 25 Na tso baatu ba nzo mosi bali mu ukaakana bomo na bomo, nzo mo yiina utwala ukwilala ve. 26 Ni mu buuna, tso Saatana li mu ulwanisa nde mwakulu, na tso nde li wu akabuha, nde utwala ukwilala ve. Yiina ni tsukusu a nde.»

27 «Muutu tso mumosi utwala ukoto mu nzo a nga pinyu na utaana bya nde ve, hwavele umaahada nde mikudu. Ka tso nde teehili uhada muutu nga pinyu mikudu, buuna nde utwala utaana bya mu nzo a nde byosi✝. 28 Mu mbuli me ndi mu undeele benu, Nzambi unyahula masumu ma baatu boosi, naapa bituhi bi bali mu utuha nde, tso byafulala bulahi. 29 Ka pasi nde wu utuha Livupu la Ngidi, a huuyaka nyahulili lisumu mo liina ve: Nde li mu ubita tooni a lo mu bilima na bilima.»

30 Yisu ali mu uleele buuna, mu tooni a bu bo baaleeli ti: «Nde na livupu lilibi!»

31 Ngu na baana ba ngu a Yisu baayidi. Bu baaba baateleme ŋa mbadi, baatsindihi muutu mu uyateele Yisu. 32 Koonge a baatu yi yaaba yadiinga Yisu maatsahala, yaaleeli nde: «Mono, ngu a we na baana ba ngu a we hu mbadi bali, bo bali mu usaha we.» 33 Yisu akaali: «Ngu a me ni na? Na baana ba ngu a me ni ba na?» 34 Titswene bu nde hatali baatu ba baaba baadiinga nde maatsahala, nde aleeli: «Monwaani ngu a me, na baana ba ngu a me! 35 Mu tooni ati, woosi wu li mu ukuhasa litondo la Nzambi, wuuna ni mwana a ngu a me, wuuna ni kedi a me, na wuuna ni ngu a me.»