1 Masulubete ŋa ngwali, bakuutu ba bangaanga ba Nzambi, na mikukunyungu, na milongisi mi Mikele, na pfuundu banzonzi yi Bayudaayo yoosi, basiidi pfuundu. Bo baatumisi uhada Yisu, baabehi nde na baayehuli nde huli Pilaato. 2 Pilaato afuuli Yisu: «Be we ni pfumu Bayudaayo?» Yisu afutili: «We miileele lo.» 3 Bakuutu ba bangaanga ba Nzambi baakesi nde mu matooni ma malahi. 4 Pilaato abwefuula nde: «We a hafutili isiha ve? We bibaayaka mu uyuha matooni moosi ma bali mu ukese we!» 5 Ka Yisu a haabwefutala mvutu tso mosi ve. Ni mu buuna, Pilaato haakimuhi.

6 Mu pasi mukungi a Paake, Pilaato akanyahula ikondaayi imosi, hi koonge yaakavondo. 7 Kaahu, bahala limosi nga nduhi Barabasi, aba hutso a kondaayi, itwadi na banga mikungu ba baadubi muutu mu mudiingu a tudu. 8 Koonge a baatu yaakumisi huli Pilaato, na yaavondi ti nde avaanga dyambu mu bo, we bu hu bibaayaka ipfu hya nde. 9 Pilaato afutili bo: «Benu litoondi ti me nyahula benu pfumu Bayudaayo?» 10 Mu tooni ati, nde aba ayaaba ti, bakuutu ba bangaanga ba Nzambi mu nyengi baayehuli nde Yisu. 11 Ka bakuutu ba bangaanga ba Nzambi baatuumbisi koonge a baatu, mana Pilaato anyahula bo mu mawasa Barabasi. 12 Pilaato abwefuula bo: «Ka tso me nyahuli benu Barabasi, hima benu litoondi ti me tsa mu wu benu lili mu uteele pfumu Bayudaayo?» 13 Bo baafutili nde mu ubaafulaha: «Komene nde!» 14 Pilaato afuuli bo: «Ki dyambu lilibi nde haavaanga?» Na bo baabwesinzafulaha mu mifudi: «Komene nde!» 15 Pilaato atoondi umweese koonge a baatu kinya, na nde anyahuli bo Barabasi. Titswene, nde atumisi ti bafwinza Yisu bikooti, na ayehuli nde mana bakomene nde ŋa muti✝.

16 Masadaadu maabiti Yisu hu nzo mutumi, na bo baateeli koonge masadaadu yoosi. 17 Bo baalwatisi nde libita bibaayaka libeenge, na ŋa mutswe a nde, baasuusili mutata wu baavaangi mu ibata hi matsyende. 18 Titswene, bo baabaandihi ubila nde na ubaaleele: «Bwehe pfumu Bayudaayo!» 19 Bo baakatete nde litsootso mu mutswe, baakatuula nde maate na baakatsokomo ŋa busu bwa nde mu ukongemene nde. 20 Ŋa baamani usinzakwede nde, bo baamaasi nde libita bibaayaka libeenge na baabwelwatisa nde bikutu bya nde.

Bo baabiti nde hu mbadi mu uyakomene nde. 21 Muutu mumosi wu akamata hu matsyehe nga nduhi Simoni musi Kilene, taata a Alezande na wa Rufusi, avyohili ŋaana. Masadaadu maakwiihi nde kuruwa a Yisu mu ubita. 22 Bo baabiti Yisu hu mbuha mosi yi bubaateele Ngolongota, mbindulili ni ti: «Mbuha yi Ibanga.» 23 Bo baakiiva nde malamu ma baapfuuta na myre*, ka Yisu abisi unywa. 24 Titswene, bo baakomini nde ŋa kuruwa na baakabisini bikutu bya nde bi baatiidi ngodo, mu uyaaba kabu la pasi muutu. 25 Aba aka ngunga yi ipfwa ya ŋa ngwali, ŋa bo baakomini nde ŋa kuruwa. 26 Mabaasonihi mu umweese tooni yi ubelese nde aba ni maniima: «Pfumu Bayudaayo.» 27 Baakomini Yisu na biibi byole, mumosi ŋa mbahala a nde, mukima ŋa kaasu. 28 [Buuna ni bu hwavangimi, Mabasonehe ma Ngidi: «Baasuusi nde mu litaangu bibaayaka badubi.»] 29 Bapyohi nzila baakatuha nde na baakanyingasa mitswe mya bo, na ubaaleele: «E! We wu bibaayaka mu utsala nzo a Nzambi na utuunga yo mu bilumbu bitatu, 30 yoboho we mwakulu, sutaha ŋa kuruwa!» 31 Ni bumosi kaka, bakuutu ba bangaanga ba Nzambi na milongisi mi Mikele baakakwede Yisu na baakaleelesene: «Nde afuuhasa bakima, ka nde utwala ufuuhasa nde mwakulu ve! 32 Nyaha Kristo, pfumu Isereli, asutaha taangu yiniiyi ŋa kuruwa! Tso bisu limoni nde mu usutaha, buuna bisu luusa imiinu mu nde.» Ba baakomini itwadi na Yisu, baakatuha kaka nde.

33 Mu ngunga ya mwangulu, piipidi yabwiidi mu toto yoosi natee mu ngunga yi matatu ya hu mbisa a mwangulu. 34 Na mu ngunga yi matatu ya hu mbisa a mwangulu, Yisu afulihi mu ndaha yi mifudi: «Eloyi, Eloyi, lema sabakatani?» Mbindulili ni ti: «Nzambi a me, Nzambi a me, tooni ma we miisiisa me siha*?» 35 Mwana a baatu bakima ba baabeedi ŋaana, baayuhi nde na baakaleele: «Yuhaani, nde aka mu uteele Eliya!» 36 Mumosi mu bo ayabwadiha ikamuni imosi mu vinye a nganyi*, na akatisi hyo mu litsootso, titswene nde aviidi Yisu mu unywa na aleeli: «Keelaani, limonwaani tso Eliya uyaasutasa nde ŋa kuruwa!» 37 Ka Yisu afulihi mu ndaha yi mifudi, na nde amani muvumu.

38 Nguumbu yi yaaba mu nzo a Nzambi✝ yaakasuhi mu bibadi byole, umata hu yulu natee hu tsina. 39 Mukuutu a kama bibaayaka masadaadu wu aba mu masungimini ma Yisu, amono buni Yisu haamani muvumu, aleeli: «Bahala mo liniili mbuli beedi Mwana a Nzambi!» 40 Hwaba na mwa bakaasu ba baakatala hu lala. Ŋa hati la bo, Mariya musi Magadala, Mariya ngu a Yaki wu ikenyi na wa Yose, na Salome. 41 Bo baakaduukala Yisu na baakakumbasa nde ŋa nde haaba hu Ngalili. Bakaasu bakima kaka ba balahi baaba ŋaana, ba baakakumasa na Yisu hu Yeruselemi.

42 Tsitsaha aba yaamiito, ka bu hyaaba ilumbu hya pangimini, teehele ilumbu hya Saba, 43 Yosefi, musi Arimate, inama hi likiinzu hya pfuundu yinene, wu akakeele nziili Ipfumu hya Nzambi nde kaka, ayidi. Nde ayeni na ibahala mu uyavondo nyutu a Yisu huli Pilaato. 44 Pilaato akimuhi mu uyuha ti Yisu aba amiikwa. Nde ateeli mukuutu a kama bibaayaka masadaadu, na afuuli nde tso Yisu aba amiidiinga na ukwa. 45 Bu mukuutu a kama bibaayaka masadaadu haabehili nde tsaangu, Pilaato asiingisi Yosefi mu uvolo nyutu a Yisu. 46 Yosefi asuumbi lileeso la lino, asutisi nyutu a Yisu ŋa kuruwa, apoti yo mu lileeso, na ayasuusa yo hutso a ngila yibaavaha hutso a manya. Titswene, nde atsindihili manya bibaayaka linene mu udibuha ikotili hya ngila. 47 Mariya musi Magadala na Mariya ngu a Yose, baakatsikaha mbuha yi baasuusi Yisu.