1 Bafarisi na mwa milongisi mi Mikele ba baamati hu Yeruselemi, baakuukimi ŋa pedu a Yisu. 2 Bo baamoni mwa bayihi ba nde bakima mu udya na myoho mi myasumaha, mbindulili ni ti mi baaveleswaha, we bu hu bibaayaka bukulu. 3 Ni mu buuna, Bafarisi we Bayudaayo boosi a bubaadya hwavele umaswaha makaka na bungeele ve, bu bo baakangama mu bukulu bu bakaaha ba bo. 4 Na ŋa bo bubaamata hu saandu, bo ubaadya ndulu ŋa bamiimana upuupala maamba mu utsyemese nyutu a bo. Bo bubaakiinza kaka matsalili makima ma malahi ma bukulu, we uswaha hu mambuungu, na mihudu, na masanga ma baayuha mu bitali.

5 Bafarisi na milongisi mi Mikele baafuuli Yisu: «Mu hima bayihi ba we baaveleduukala bukulu bu bakaaha, na ubaadya na myoho mi myasumaha?» 6 Yisu akaali bo: «Benu ba nga muwala lili! Esaya aba na mbiinga ŋa nde habihuli bubwe mu tooni a benu, Mabasonehe:

"Baatu mo baniiba bubaayuusa me mu bibodu,

ka mitima mya bo myasinzatahuha na me✝.

7 Mu pu baatu mo baniiba bali mu ukuunda me,

ndongisili yi bo bali mu ulongese

yili ndulu matumili ma baatu✝."

8 Benu lili mu utiimba matumili ma Nzambi, buleeli Yisu, mu uduukala bukulu bu imuutu.»

9 Yisu akabweleele bo: «Benu lili ba baavangama bubwe mu unyasula matumili ma Nzambi, mana livatahana mu bukulu bwa benu mwakulu! 10 Mu tooni ati Moose aleeli: "Kiinza taata a we na ngu a we", na: "Woosi wu usinga taata a nde buuve ngu a nde, sa baduba nde✝." 11 Ka benu lili mu uleele huli muutu: "We na muswa wu uleele huli taata a we buuve huli ngu a we ti: Kabu la bya me bi me akiipa we mu ukumbasa we ni korobani", mbindulili ni ti "bungodu bu baaswehele Nzambi". 12 Na benu lili mu uva muswa huli muutu mo wuuna, mu ubwevelevangila taata a nde buuve ngu a nde isiha tso imosi! 13 Buuna, benu libaafwinzala mambu ma Nzambi mu usalila bukulu bwa benu. Na benu lili mu uvaanga bisiha bi bilahi bya pila yiina.»

14 Yisu abweteele koonge a baatu na aleeli bo: «Yuhaani me, benu boosi na tsikahaani bubwe: 15 A hu bibaayaka na isiha tso imosi hi hili hu mbadi hi hibaakoto mu nyutu a muutu hi hyutwala usumana nde ve. Ka hi hili mu upala mu muutu, hiina ni hi hili mu usumana nde.» 16 [Tso muutu bibaayaka na matswi mu uyuha, nyaha nde ayuha*.]

17 Bu Yisu haakoti mu nzo, lala na koonge, bayihi ba nde baafuuli nde mu tooni a kuma mo yiina. 18 Nde aleeli bo: «Benu kaka kaahu buyedi ve? Benu a lili mu utsikaha ve? Isiha tso imosi hya hu mbadi utwala usumana muutu ve, tso hyo hikoti mu nde. 19 Buuna, bisiha mo biina a bili mu ukoto hutso mutima a nde ve, ka hutso a moonyi a nde, mana hu mbisa byo bipala mu uyene hu mwaasa.» Mu maambu mo maana, Yisu akaleele ti byudya byosi bi byatsyeme bili✝. 20 Nde abweleele: «Ni hi hili mu upala mu muutu hili mu usumana nde. 21 Mu tooni ati, ni hu hati, hutso mutima a muutu hubaapala matsimi ma mabi, mo mu baabita nde hu bulaala, hu yiba, hu uduba, 22 hu mayamba, hu ngaabi, hu bukanyi, hu mapfuta, hu buyahudi, hu linyungi, hu bituhi, hu nyeme, hu pelili a nzuhili. 23 Bisiha mo biniibi byosi bibibi, bili mu upala hu hati na bibaasumana muutu.»

24 Yisu amati ŋaana na ayeni hu itaanzi hya Tiilo. Nde akoti mu nzo mosi na a haatoondi ti muutu tso mumosi ayaaba ve, ka nde a haatwali uswemene ve. 25 Mukaasu mumosi wu mwana wa nuumba haaba na livupu lilibi, ayuhi tsaangu a Yisu na mu mawasa, ayabwa ŋa miilu mya nde. 26 Mukaasu mo wuuna aba mungeleke, musi Fenisiya ya hu Siriya. Nde avondi huli Yisu mu ubinga tengo bibaayaka laaba mu mwana a nde. 27 Ka Yisu aleeli nde: «Nyaha baana bamaaywata, mu tooni ati, a hu bibaayaka bubwe mu uvolo lipa la baana na ubuma lo huli baana ba bamvwa ve». 28 Mukaasu afutili nde: «Pfumu, baana ba bamvwa kaka hu tsina a metse, bubaadya bipepesi bi baana bubaabwisa.» 29 Buuna Yisu aleeli nde: «Mu tooni a dyambu bibaayaka we miileele liniili, yene: tengo limiipala mu mwana a we wu mukaasu.» 30 Bu mukaasu haafutihi hu nzo a nde, nde abiisi mwana a nde alaambama ŋa yulu a taangi: tengo laaba laamiipala mu nde.

31 Yisu abwemata itaanzi hya Tiilo, na ayafutaha mu nzila a Sidoni hu tsyelo a dyanga la Ngalili. Nde asabuhi itaanzi hya Dekapoli hyoosi.

32 Bamiibehele Yisu ikwa-matswi hi hili na muvinyu mu utoyo, na bamiiyayaana nde mu usuusala hyo hoho✝. 33 Yisu abiti hyo ŋa muvaanga, lala na koonge, akotisi muutu mo wuuna mileembo mutso matswi, na abeembi limi mu maate ma nde mwakulu Yisu. 34 Titswene, nde asiimbuli miisu hu yulu, asuusi ivuumi na aleeli huli muutu mo: «Efata*!» Mbindulili ni ti: «Dibuma!» 35 Masulubete, matswi ma nde maadibumi, limi la nde laanyanguhi na nde akayambila we bu hwafwana. 36 Yisu asinzikebese baatu mu uveleyabisa lo huli pasi muutu. Ka bu nde haakafulala ukebese bo, bo baakasinzafulala utsala musamu. 37 Baatu baaba mu kimuhili yi yaafulala na baakaleele: «Moosi ma nde ali mu uvaanga, mu mbuli mali ma mabwe! Nde bibaayaka mu uyuhasa bikwa-matswi napa utoyese biduka!»