1 Humbisa a mwa bilumbu, Yisu abwefutaha hu musyenge a Kapernahumi. Buuna, baatu baayuhi ti nde aka hu nzo. 2 Baatu ba balahi baayatsonzomo huuna, natee bu mambuha maasiidi tsatu, tso ŋa busu bu munywa a nzo. Na Yisu akalongese bo mambu ma Nzambi. 3 Baatu baayidi huli Yisu, baabehili nde ikata imosi, hi baatu bana baaba baatsyete. 4 Ka mu tooni a koonge a baatu, bo a baatwali uyamweese Yisu ikata mo ve. Ni mu buuna, bo baavaati na ikata hu yulu a mwanzi, na baatubi vulu mu mwanzi mu masungimini ma Yisu haba. Mu vulu mo liina, bo baakulimisi ikata mu ipoyi hi hyo hyaba hyalambama. 5 Bu Yisu haamoni imiinu hya bo, nde aleeli huli ikata: «Mwana a me, masumu ma we bamiinyahula.» 6 Ŋaana hwaba hwatsahala milongisi mi mikele mi myakaleelesene hutso mitima: 7 «Mu hima Muutu mo wunuwu huutwala uleele buuna? Nde miituha Nzambi. Na li na matwala ma unyahula masumu? Ndulu ni Nzambi siha✝!» 8 Masulubete, Yisu mu livupu, abaanguli matsimi ma mitima mya bo na aleeli bo: «Mu hima lili mu utsima buuna mutso mitima mya benu? 9 Hima hyafulala uleenge mu uleele huli ikata: "Masumu ma we bamiinyahula"? Buuve mu uleele: "Teleme, tsyete ipoyi hya we na takula"? 10 Eye, ka me tondi ti benu liyaaba ti Mwana a Muutu li na matwala ma unyahula masumu ŋa toto.» Buuna, Yisu aleeli huli ikata: 11 «Me miindeele we, teleme, tsyete ipoyi hya we na yene hu nzo a we!» 12 Masulubete, muutu wu aba ikata atelimi, atsyeti ipoyi hya nde na apali ŋa miisu ma baatu boosi. Boosi baakimuhi na baakayusa Nzambi na ubaaleele: «Buuna, bisu kini a laamoni la pila yiniiyi ve!»

13 Ŋa mbisa a maana, Yisu abwefutaha ŋa muvanga a dyanga la hu itaanzi hya Ngalili. Koonge a baatu yoosi, yaakaya huli nde, na nde akalongese bo. 14 Bu Yisu haakavyoho, nde amoni Levi, mwana a Alafe, wu abeedi atsahala mu nzo isalu yi bakaambi ba limandu. Yisu aleeli nde: «Duukala me✝!» Levi atelimi na aduukili nde. 15 Bu Yisu haaba hatsahala ŋa metse mu udya mu nzo a Levi✝, bakaambi ba limandu ba balahi na baatu ba baasumaha, baakadya itwadi na nde na bayihi ba nde. Mu tooni ati, baatu ba balahi, baakaduukala nde. 16 Milongisi mi mikele mi myaba mu kabu li Bafarisi, myamoni ti Yisu li mu udya na bakaambi ba limandu na ba baasumaha. Buuna, myo myaleeli huli bayihi ba nde: «Mu hima nde ali mu udya na bakaambi ba limandu na ba baasumaha✝?» 17 Bu Yisu haayuhi ma bo baaleeli, nde akaali: «Babeedu ni basahi ba ngaanga, a batsiitsa ve. Me a hanzandanda ba bali tsiitsa ve, ka me anzandanda ba bali basumihi✝.»

18 Ilumbu imosi, bayihi ba Yowani na Bafarisi baakadya ikaandi. Baatu baayafuula Yisu: «Bayihi ba Yowani na bayihi ba Bafarisi bali mu udya ikaandi; ka mu hima bayihi ba we baaveledya ikaandi?» 19 Yisu afutili bo: «Benu litsimi ti byenyi bi mukungi makweele, utwala udya ikaandi bu mukweeli akini ŋa hati la bo? Bu mukweeli akini ŋa hati la bo, bo utwala udya ikaandi ve. 20 Ka mu bilumbu bi byuya, buumaasa bo mukweeli. Buuna, ilumbu mo hiina, bo buudya ikaandi.

21 A hu li na muutu wu ubaalondo ikutu hi ikulu mu ireende hya tsanda hi inyatihi ve. Kini, ireende hi inyatihi hyubwekasula tsanda yikulu. Buuna, vulu luubwefulala bunene. 22 Ni bumosi kaka, muutu utwala usyeholo malamu ma tsohele mutso mirumbu mi mikulu ve, kini malamu ma tsohele muubula mirumbu. Buuna, na malamu, na mirumbu, byosi byunyambahana. Ka baafwana usyeholo malamu ma tsohele mutso mirumbu mi minyatihi!»

23 Mu ilumbu hya saba, bu Yisu haakataangila tsyehe masangu*, bayihi ba nde mu nzila a nzila, baabaandihi ukoolo mivoovo mi masaangu✝. 24 Buuna, Bafarisi baaleeli huli Yisu: «Mono, mu hima bayihi ba we bali mu uvanga mi baaliha usa mu ilumbu hya saba✝?» 25 Yisu afutili bo: «Benu kini a laataangi ma Davidi haavaangi ilumbu imosi, ŋa bo baaba baamiikeehele ve? Mu tooni ati, nde mwakulu na bambaahi ba nde, baaba na nzala. 26 Nde akoti mu nzo a Nzambi, mu taangu yi Abyatariya haaba mukuutu bangaanga ba Nzambi. Nde adiidi mapa ma baayeholo huli Nzambi, ma pasi muutu a hali na muswa mu udya mo ve, ka ndulu bangaanga ba Nzambi✝. Na Davidi aviidi mo kaka huli bambaahi ba nde.» 27 Na Yisu abweleele bo: «Baavaangi saba mu tooni a baatu, ka a baatu baavaangi mu tooni a saba ve. 28 Ni mu buuna, Mwana a muutu ali napa Pfumu a saba.»