Ester 2

ಎಸ್ತೇರ್ ರಾಣಿ ಹುಯಿತೆ

1 ಆ ಹುಯಿನ್ ಥೋಡ ದನ್ನ ಬಾದ್ಮ ರಾಜ಼ ಇರಾದೊ ತೋಡಿನ್, ಇನೆ ವಷ್ಟಿರಾಣಿನಾಬಿ ಇನೆ ಕರೀತೆ ಢಂಗ್‌ನಾಬಿ ಅಜು಼ ಇನಿ ಬಾರೇಮ ಕರ‍್ಯೋತೆ ತೀರ್ಪ್‌ನಾಬಿ ಯಾದ್‌ಕರಿಲಿದೊ. 2 ತದೆ ಇನಿ ಚಾ಼ಕ್ರಿ ಕರುಕರ್ತುಥೂತೆ ರಾಜ಼ನಿ ಪರಿವಾರ್‌ವಾಳು ಇನ ಬೋಲ್ಯುಕಿ, "ರಾಜ಼ನಖ್ಹಾಜೆ ಶನ್‌ಗಾರ್‌ನಿ ಛೋ಼ಕ್ರಿಯೇ ಢೂಂಡಾನ ಹುಕುಮ್ ಹೋಣು. 3 ಅನಾಖ್ಹಾಜೆ ರಾಜ಼ ಇನ ಮುಲಕ್ನು ಖ್ಹಾರೂಸ್ ರಾಜಧಾನಿನಾಬಿ ಅದಿಕಾರಿಯೇವ್‌ನ ಮೋಕ್‌ಲ್‌ನು; ಇವ್ಣೆ ಶನ್‌ಗಾರ್‌ನಿ ಖ್ಹಾರೀಸ್‌ ಕವಾರಿ ಛೋ಼ಕ್ರಿಯೇವ್‌ನ ಶೂಷನ್ ಖ್ಹಯೇರ್‌ನ ಬುಲೈಲಾಯಿನ್ ಮಹೇಲ್‌ನೊ ಅದಿಕಾರಿಯೇನಾಬಿ ರಾಜ಼ನಿ ಆಸ್ಥಾನ್ನೊಹಿಜ಼್‌ಡೊ ಹುಯಿರೋತೆ ಹೇಗೈನ ಕಬ್‌ಜಾ಼ಮ ದೇವ್ಣು. ಯೊ ಇವ್ಣುನ ಶನ್‌ಗಾರ್‌ ಭಡ್ವಾನು ಲೋಥಾನ ತೇಲ್ನ ದ್ಯಾವಾದೆ. 4 ರಾಜ಼ ಖೆವಿ ಛೋ಼ಕ್ರಿನ ಪಸಂದ್‌ಕರಸ್‌ಕಿ; ವಷ್ಟಿರಾಣಿನ ಬದಲ್ ಯೊ ಛೋ಼ಕ್ರಿ ರಾಣಿಹುವಾದೆ". ಕರಿ ಬೋಲ್ಯು. ರಾಜ಼ ಇವ್ಣಿ ಖ್ಹೂಜ಼್‌ನ ಮಾನಿನ್ ಇಮ್ಮಸ್‌ಕರ‍್ಯೊ. 5 ಶೂಷನ್ ಖ್ಹಯೇರ್‌ಮ ಮೊರ್ದೆಕೈಕರಿ ಯೆಹೂದ್ಯವಾಳೊ ಏಕ್‌ಜ಼ಣೊ ಜಿವ್ಣುಕರುಕರ್ತೊಥೊ. ಆ ಬೆನ್ಯಾಮೀನ್‌ ಖೂಮ್‌ವಾಳೊ ಕೀಷನೊ ಪಡ್‌ಪೋತಿಬಿ, ಶಿಮ್ಗಿನೊ ನಾತ್ಯೋಬಿ ಯಾಯೀರನೊ ಛಿಯ್ಯೊಬಿ ಹುಯಿರೋಥೊ. 6 ಬಾಬಿಲೋನಿಯನೊ ರಾಜ಼ಹುಯಿರೋತೆ ನೆಬೂಕದ್ನೆಚ್ಚರ್‌ಥಿ ಯೆಹೂದ ರಾಜ಼ಹುಯಿರೋತೆ ಯೆಹೋಯಾಕೀನನಿ ಜೋ಼ಡ್ಮ ಜೇಲ್‌ಮ ಕೋಂಡಾಯಹುಯಾಮ ಯೆರೂಸಲೇಮ್‌ಥು ಥೂತೆ ಇವ್ಣಾಮ ಮೋರ್ದಕೈಬಿ ಥೊ. 7 ಅನೆ ಇನ ನ್ಹಾನಕಾಕನಿ ಛೋ಼ರಿ ಎಸ್ತೇರ್, ಕತೊ; ಆಯಾಬಾ ಮರ‍್ಯಾತಪ್‌ಥ ಅನಾದ್ರಿಹುಯಿರೀತೆ ಅನ ಶೊಂತ್‌ ಛೋ಼ರಿನಿತರ ಯೊ ಪಾಳುಕರ್ತೊಥೊ. ಇಬ್ರಿಯಮ ಹದೆಸ್ಸಾ ಕರಿ ಇನು ನಾಮ್‌; ಆ ಹೈರೀತೆ ರೂಪ್‌ವಾಳಿಬಿ, ಜ಼ವಾನೀಬಿ , ಘಣಿ ಶನ್‌ಗಾರ್‌ನಿಬಿ ಥಿ. 8 ರಾಜ಼ನಿ ಖ್ಹೂಜ಼್‌ನಿ ಪರಕ್ಮ ಇನಿ ಹುಕುಮ್ ಖ್ಹಾರೀಸ್‌ ಬಾಜೂ಼ಮ ಫೈಲಾಯು. ಕೈಏಕ್‌ಜ಼ಣಿ ಛೋ಼ಕ್ರಿಯೇನ ಶೂಷನ್ ಖ್ಹಯೇರ್‌ನ ಬುಲೈಲಾಯಿನ್‌ ಆಸ್ಥಾನ್ನ ದೇಖಿಲ್ಯವಾಳೊ ಹೇಗೈನ ದೇಕ್‌ಬಾಲ್‌ಮ ದೆವಾಯು. ಅಥ್ರಾನವಾಳಿಯೇಮ ಎಸ್ತೇರ್‌ಬಿ ಏಕ್‌ಜ಼ಣಿ. 9 ಎಸ್ತೇರ್‌ ಹೇಗೈನ ಪಸಂದ್‌ಹೋತಾನ ಮೊರ್ದೆಕೈ ಹೈರೀತೆನ ಹೋಣುತೆ ಶನ್‌ಗಾರ್‌ಭಡಾವಾನು ತೇಲ್‌ಖ್ಹಾರೂಬಿ ಅಜು಼ ಅಛ್ಛು಼ ಖಾಣೂಬಿ ದೀನ್, ಇನಾಬಿ ಇನಿ ಮದತ್‌ ಕರಾನಖ್ಹಾಜೆ ಚೂ಼ಣ್ಯುತೆ ಖ್ಹಾತ್‌ಜ಼ಣಿ ಸೇವಕಿಯೆವ್ನಬಿ ಮಹೇಲ್‌ನು ಖ್ಹಾರೇಥಿ ಅಛ್ಛಿಝ಼ಗೋಮ ರಾಖ್ಯೊ. 10 ಎಸ್ತೇರ್‌ನೆ ಇನ ಶೊಂತ್ ಅದ್ಮೇವ್ನ ಖೆವ ದೇಖ್ಹ್‌ನಿ ಅಜು಼ ಖಾನ್‌ಖೋಜ಼್‌ನಿ ಬಾರೇಮ ಕಿನಾಬಿ ಬೋಲಿರಾಖಿಥಿಕೊಯ್ನಿ. ಬೋಲ್ನುನಾಕರೀಬಿ ಮೊರ್ದೆಕೈನೆ ಇನ ಖ್ಹಮ್‌ಜಾ಼ಡಿರಾಖ್ಯೋಥೊ. 11 ಎಸ್ತೇರ್ ಅಛ್ಛೊ ಛಾಕಿಶೂ ಕರೀಬಿ ಅಜು಼ ಯೊ ಅಗಾಡಿ ಶಾತ್‌ಕರ‍್ನು ಕರೀಬಿ ಪುಛಾವಾನಖ್ಹಾಜೆ ಹರೇಕ್‌ರೋಜ಼್‌ ಮಹೇಲ್‌ನ ಖ್ಹಾಮ್ಣೆ ಮೊರ್ದೆಕೈ ಆತೊಜ಼ಾತೊರ‍್ಹೇತೋಥೊ. 12 ಛೋ಼ಕ್ರಿಯೇನ ಶನ್‌ಗಾರ್‌ಹುವಾನ ಲೋಥಾನು ಹಗಾಮ್‌ ಪೂರಹುವಾನಖ್ಹಾಜೆ ಮಹಿಕಾವನುತೇಲ್ ಲಗಾಡಾಮ ಛೋ಼ ಮಹಿನ ಹೋತುಥು, ಘಣುಗೋರುಕರಾನು ವಾನುತೈಲ ಲಗಾಡಾಮ ಛೋ಼ ಮಹಿನ, ಅಮ್ ಏಕ್‌ ವರಖ್ಹ್‌ ನಿಕ್ಳಿಗಯೊ. ಆ ಹುವಾದೀನ್‌ ಪದತ್ತಿನಿ ಪರಕ್ಮ ಶನ್‌ಗಾರ್‌ಕರಿಲಿದಿಹುಯಿ ಹರೇಕ್ ಛೋ಼ಕ್ರಿಬಿ ರಾಜ಼ ಅಹಷ್ವೇರೋಷಕನ ಜಾವ್ಣುಥು. 13 ಅಮ್ಮಸ್‌ ಏಕ್‌ಜ಼ಣಿ ರಾಜ಼ಾಕನ ಜಾ಼ವಾನಿವಖ್ಹ್‌ತೆ ಇನಿ ಜೋ಼ಡ್ಮ ಲೀನ್‌ಜಾ಼ವಾನ ಪಸಂದ್‌ಕರಾಸ್ತೆ ತಮಾಮಸ್‌ ಯೊ ಛೋ಼ಕ್ರಿನ ದೆವಾವ್ತುಥು. 14 ಯೊ ಹಿಜ್ಜಾ಼ ಖ್ಹಾಂಜೆಗೈಹುಯಿ ಇನವ್ಹಾಣೆ ರಾಜ಼ನಿ ರಖೇಲ್‌ಬಾವ್ಣೆನ ದೇಕ್‌ಬಾಲ್‌ ಕರಾವಳೊ ಶವಷ್ಗಜಕರಿ ರಾಜ಼ನಿಆಸ್ಥಾನ್ನೊ ಅದಿಕಾರಿ ದೇಕ್‌ಬಾಲ್‌ಮಥೂತೆ ಬೇನು ಮಹೇಲ್‌ಮ ಆವ್ಣುಥು. ರಾಜ಼ ಇನ ಪಸಂದ್‌ಕರೀನ್ ನಾಮ್‌ಬೋಲಿನ್ ಪುಕಾರಲಗೂಬಿ ಏಕ್‌ಜ಼ಣೀಬಿ ರಾಜ಼ಕನ ಪಾಛಿ ಜಾ಼ವಖ್ಹರ್ಕು ಕೋಥೂನಿ. 15 ರಾಜ಼ಕನ ಜಾ಼ವಾನಖ್ಹಾಜೆ ಮೊರ್ದೆಕೈನಿ ಪಾಳಿಹುಯಿ ಛೋ಼ರಿಬಿ, ಇನೊ ನ್ಹಾನೊಕಾಕ ಅಬೀಹೈಲನಿ ಛೋ಼ರಿ ಎಸ್ತೇರ್‌ ಜಾ಼ವಾನಿ ವಖ್ಹತ್ ಆವಾದಿನ್, ಮಹೇಲ್‌ನೊ ದೇಕ್‌ಬಾಲ್‌ಕರವಾಳೊ ಹೇಗೈಕರಿ ರಾಜ಼ನ ಆಸ್ಥಾನ್ನೊ ಅದಿಕಾರಿ ನೇಮಕ್‌ಕರ‍್ಯೊತೆಸ್ ಪಣ್ಕಿ ಇನೆ ಬಿಜು಼ ಖೆವೂಬಿ ಬೋಲಿಕೊಯ್ನಿ. ದೇಖಾವಾಳು ಖ್ಹಾರೂಬಿ ಇನ ಪಸಂದ್‌ಕರ್ತುಥು. 16 ರಾಜ಼ ಅಹಷ್ವೇರೋಷನೆ ಇನು ರಾಜ಼್‌ಭಾರ್‌ಚ಼ಲಾಯೋತೆ ಖ್ಹಾತ್‌ನೊ ವರಖ್ಹ್ ದಖ್ಹ್‌ನೊಮಹಿನೊ ಹುಯಿರೋತೆ ಪುಷ್ಯ ಮಹಿನಾಮ ಎಸ್ತೇರ್‌ನ ರಾಜ಼ಕನ ಬುಲೈಲೀನ್‌ಗಯು. 17 ರಾಜ಼ ಖ್ಹಾರೀಸ್‌ ತಯೇಡಾಥೀಬಿ ಎಸ್ತೇರ್‌ನ ಪಸಂದ್‌ಕರ‍್ಯೊ. ಖ್ಹಾರೀಸ್‍ ಛೋ಼ಕ್ರಿಯೆಮ ಯೊ ರಾಜ಼ನಿ ದಯನಾಬಿ, ಪ್ಯಾರ್‌ನಾಬಿ ಜೀತಿಲಿದಿತೆ ಇನಾಖ್ಹಾಜೆ ರಾಜ಼ನೆ ಇನ ಮುಡ್‌ಕ್ಯಾಪರ್ ರಾಜ಼ನಿ ಕಿರೀಟ್‌ಘಾಲೀನ್‌ ವಷ್ಟಿರಾಣಿನ ಬದಲ್ ಇನ ರಾಣಿಕರಿಲಿದೊ. 18 ಇನ ಖ್ಹಾರಸ್‌ ಪರಿವಾರ್‌ವಾಳನಾಬಿ , ಅದಿಕಾರಿಯೇನಾಬಿ ಎಸ್ತೇರ್‌ನಿ ಮರ‍್ಯಾದಿನಖ್ಹಾಜೆ ಎಕ್ ಮೋಟಿ ಮಿಝ಼್‌ವಾನ್ ತಯ್ಯಾರ್‌ಬಣಾಯೊ. ಇನು ಖ್ಹಾರೀಸ್‍ ಇಟಾರಮ್ನಿ, ಖ್ಹಾರ್‌ಕೋಟ್‌ಮ ಕೋಂಡೈಪಡ್ಯುಥೂತೆ ಇವ್ಣುನ ಛುಟ್‌ಕಾರ್‌ದೀನ್, ರಾಜ಼ನಿ ಮರ‍್ಯಾದಿನ ಬರೋಬರ್ ಛು಼ಟಾದಿಲ್‌ಥಿ ಅದ್ಮೇವ್‌ನ ದಾನ್ ಧರಮ್ ಕರ‍್ಯೊ.

ರಾಜ಼ನ ಬಚಾ಼ಡ್ಯೋತೆ ಮೊರ್ದೆಕೈ

19 ಬೇನಿ ಬಾರ್ ಛೋ಼ಕ್ರಿಯೇನ ಎಕ್ಟುಕರಾವನಿ ವಖ್ಹ್‌ತೆ ಮೊರ್ದೆಕೈ ಮಹೇಲ್‌ನು ದರ‍್ವಾಜ಼ಕನ ಬೇಠೋಥೊ. 20 ಎಸ್ತೇರ್‌ತೊ ಮೊರ್ದೆಕೈಕನ ಪಳೂಕರ್ತಿಥೀತೆ ದನುಮ ಕಿಮ್ಕಿ ಇಮ್ಮಸ್ ತದೇಬಿ ಇನಿ ಹುಕುಮ್‌ಪರ್‌ ಚಾ಼ಲಾವಾಳಿಹುಯಿರೀನ್ ಮೇ ಅಥ್ರಾನಿ ಖೂಮ್‌ವಾಳಿ, ಅಥ್ರಾನಿ ಶೊಂತ್ ಜ಼ಗ್‌ಜಾ಼ತ್‌ವಾಳಿಕರಿ ಕಿನಾಬಿ ವತಾಳಿಲಿದಿಕೊಯ್ನಿ. 21 ಯೊ ದನುಮ ಮೊರ್ದೆಕೈ, ರಾಜ಼ನ ಮಹೇಲ್‌ನ ದರ್ವಾಜ಼ನ ಕಾವಲ್ ಕರಾವಾಳಥಾತೆ ಬಿಗೆತಾನ್‌ ಅಜು಼ ತೆರೆಷ್‌ಕರಿ ಬೇಜ಼ಣ ರಾಜನಆಸ್ಥಾನ್ನ ಅದಿಕಾರಿ ಇರಾದೇಥಿ ರಾಜ಼ನ ಮಾರಿನಾಕ್ಣುಕರಿ ಮಶ್ಲತ್‌ ಕರಿರಾಖ್ಯಥ. 22 ಆವಾತೆ ಮೊರ್ದೆಕೈನ ಮಾಲುಮ್‌ಪಡಾಮ ಇನೆ ಎಸ್ತೇರ್‌ರಾಣಿನ ಖ್ಹಮ್‌ಜಾ಼ಡ್ಯೊ. ರಾಣಿನೆ ಮೊರ್ದೆಕೈನು ನಾಮ್‌ ರಾಜ಼ನ ಬೋಲಿನ್‌, ಯೊ ವಾತೆ ಖ್ಹಮ್‌ಜಾ಼ಡಿ. 23 ಆ ವಾತೆನಿ ಬಾರೇಮ ವಾತ್‌ಚೀತ್‌ ಹುವಾಮ ಯೊ ಖ್ಹಾಚೀಸ್ ಕರಿ ಮಾಲುಮ್‌ಪಡ್ಯು, ಯೊ ಬೇಜ಼ಣನಾಬಿ ಫಾಶಿದೆವಾಯು. ಆ ವಾತೆ ರಾಜ಼ನು ದನ್‌ಪರ್‌ರೋಜ಼್‌ನು ಲಿಖಾಪಟ್‌ನ ದಪ್ತರ್‌ಮ ಲೀಖೈಮ್ಹೇಲಾಯು.