Ester 7

1 ರಾಜ಼ ಹಾಮಾನನಿ ಜೋ಼ಡ್ಮ ಎಸ್ತೇರ್‌ನ ಘರೆ ಮಿಝ಼್‌ವಾನ್ನಖ್ಹಾಜೆ ಗಯೊ. 2 ಯೊ ಬೇನ ದನ್‌ಬಿ ದ್ರಾಕ್ಷಿನೊ ರಖ್ಹ್‌ನ ಪಿಯಾನಿವಖ್ಹ್‌ತೆ ರಾಜ಼ನೆ ಎಸ್ತೇರ್‌ನ, "ಎಸ್ತೇರ್ ರಾಣಿ, ತಾರಿ ಆಖ್ಹ್ ಶಾತ್ ಬೋಲ್; ಮೇ ಇನ ಚ಼ಲೈದೆವುಸ್‌. ತೂ ಮಾರಿ ಆಧ ರಾಜ್ಯನ ಬೋಲಿತೋಬಿ ಮೇ ತುನ ದೆವುಸ್‌" ಕರಿ ಬೊಲ್ಯೊ. 3 ತದೆ ಎಸ್ತೇರ್‌ ರಾಣಿನೆ, "ರಾಜ಼ ಮಾರಪರ್ ಗೋರ್‌ಕರೀನ್ ಒಹೊ ಕರಿ ಬೋಲಾವಾಳೊ ಉಶೇತೊ ಮಾರಿ ಬಿಂತಿನಾಬಿ, ಪ್ರಾರ್ಥನೆನಾಬಿ, ಖ್ಹಮ್‌ಜಿನ್ ಮಾರ ಜಾನ್ನಬಿ ಅಜು಼ ಮಾರ ಅದ್ಮೆವ್‌ನಾಬಿ ಬಚಾ಼ಡ್‌ನು. 4 ಅದ್ಮಿಖ್ಹಾರು ಹಮುನ ಕತ್ರಿ ಮಾರಿನಾಖಿನ್, ಹಮುನ ಖತಮ್ ಕರಿನಾಖನಿಘೋಣಿ ಹಮೆ ವೇಚೈ಼ಗಯ. ಖಲಿ ವೇಚೈ಼ಗಯ ಹೋತ್ತೊ ಆ ಖರಾಬ್ ಹಾಲತ್‌ನಿ ಬಾರೇಮ ರಾಜ಼ನ ತಕ್‌ಲಿಬ್ ದ್ಯಾವಾನು ಬರೋಬರ್‌ಕೊಯ್ನಿಕರಿ ಖ್ಹೊಪೊರ‍್ಹಿಗೈಹೋತ್." ಕರಿ ಬೋಲಿ. 5 ತದೆ ರಾಜ಼ನೆ ಎಸ್ತೇರ್‌ ರಾಣಿನ, "ಅಥ್ರಾನು ಕಾಮ್ ಕರಾನ ಕಳ್ ಚ಼ಲಾಯೋತೆ ಕೋಣ್? ಯೊ ಕಿಜ಼್ಜ ಛಾ಼?" ಕರಿ ಪುಛಾ಼ಯೊ. 6 ತದೆ ಇನೆ, "ಹಮಾರೊ ದುಶ್ಮನ್‌ಬಿ ವಹೇರ‍್ಯೊ ಬಿಜು಼ಕೋಣ್‌ಬಿ ಕಾಹೆ; ಹಂದೇಕ್ ಆ ಹಾಮಾನಾಸ್ ಯೊ ದುಷ್ಟ" ಕರಿ ಬೋಲಿ. ಅನ ಖ್ಹಮಜ಼್‌ತಾನಸ್ ಹಾಮಾನನೆ ರಾಜ಼ ಅಜು಼ ರಾಣಿನ ಖ್ಹಾಮ್ಣೆ ಡರ್‌ಥಿ ಕಾಪಲಗ್ಯೊ. 7 ಚ಼ಂಢಾಳ್‌ಥಿ ರಾಜ಼ನೆ ದ್ರಾಕ್ಷಿನೊ ರಖ್ಹ್‌ಪಿಯಾನು ಮ್ಹೇಲಿನ್ ಉಠಿ ಮಹೇಲ್‌ನ ಬಗೀಚಾ಼ಮ ಗಯೊ. ರಾಜಾ಼ಥಿ ಇನ ನಿಶತ್‌ ತಯಾರ್ ಹುಯಿಗಿಕರಿ ಮಾಲುಮ್‌ ಪಡಿನ್, ಹಾಮಾನನೆ ಎಸ್ತೇರ್ ರಾಣಿನ ಖ್ಹಾಮ್ಣೆ ಗಿಂಗೈನ್ ಜಾನ್ನಿ ಭೀಕ್ ಮಾಂಗ್ಯೊ. 8 ರಾಜ಼ ಮಹೇಲ್‌ನು ಬಗೀಚ಼ಮಾಥೊ ಯೊ ದ್ರಾಕ್ಷಿನೊರಖ್ಹ್‌ ಪೀತೊಥೊತೆ ಕೋಣಾಮ ಆಯೋತೆ ತದೆ, ಎಸ್ತೇರ್ ಟೇಕೊದೀನ್ ಬೇಠಿಥೀತೆ ಅರಾಮ್‌ನಿ ಖುಡ್‌ಶಿಭಣಿ ಹಾಮಾನ ಝು಼ಕಿರ‍್ಹಯೋತೆ ದೇಖಿನ್, "ಆ ಶಾತ್‌? ಹೈರೋತೆ ಮಾರಖ್ಹಾಮ್ಣೇಸ್ ಮಾರಿ ಮಹೇಲ್‌ಮಾಸ್ ರಾಣಿಪರ್ ಬಲಾತ್ಕಾರ್ ಕರ್ನುಕರಿ ಛಾ಼ಕಿಶೂ?" ಕರಿಬೋಲ್ಯೊ. ರಾಜ಼ನ ಮ್ಹೋಡಾಮಾಥು ಆ ವಾತ್ ನಿಕಳ್‌ತಾಸ್ ಆಳ್‌ ಖ್ಹಾರು ಹಾಮಾನನ ಮ್ಹೋಡಾಪರ್ ಲುಂಗ್ಡು ಢಾಪಿನ್‌ ಖೇಚಿ ಲೀನ್‌ಗಯು. 9 ಆ ನಾಹುಯಿನ್, ರಾಜ಼ನು ಚಾ಼ಕ್ರಿ ಕರ್ತುಥೂತೆ ಅದಿಕಾರಿಮಥೊ ಏಕ್‌ಜ಼ಣೊ ಹರ್ಬೋನನೆ, "ಹಂದೇಕ್, ರಾಜ಼ನೊ ಜಾನ್‌ ಬಚಾ಼ಡಾನಿ ವಾತ್ ಬೋಲ್ಯೋತೆ ಮೊರ್ದೆಕೈನ ಮರ್‌ನಾಖಾನಖ್ಹಾಜೆ ಹಾಮಾನನೆ ತಯಾರ್‌ಕರ‍್ಯೋತೆ ಅಢೈವೀಖ್ಹ್ ಹಾತ್ ಊಚು಼ರ‍್ಹವಾನು ಗಳ್‌ಫಾಶಿನು ಖಂಬಾನ ತಯಾರ್‌ ಕರಿರಾಖ್ಯೋಸ್‌" ಕರಿ ಬೊಲ್ಯೊ. ಇನಾಖ್ಹಾಜೆ ರಾಜ಼ನೆ, "ಇಮ್ ಉಶೇತೊ ಹಾಮಾನನ ಇನಾಪರಸ್‌ ಠಂಗಾವೊ." ಕರಿ ಹುಕುಮ್ ಕರ‍್ಯೊ. 10 ಮೊರ್ದೆಕೈನಖ್ಹಾಜೆ ತಯಾರ್ ಬಣಾಯುಹುಯು ಯೋಸ್‌ ಗಳ್‌ಫಾಶಿನ ಖಂಬಾಪರ್ ಹಾಮಾನನ ಠಂಗಾಯು. ಅಮ್ ಕರೀನ್‌ ರಾಜ಼ನಿ ಚ಼ಂಢಾಳ್ ಠಂಡೊಹುಯು.